Diú₄ bá₄ con₂ ꞌí₁ co₂rë₂ ꞌa₂ liaꞌ₂ conꞌ₂ lë́₅ dsónꞌ₂
2
Jaun₂ në́₃, tsá₃ ꞌe₂ lé₂ le₃juaꞌ₅₄ ꞌne₂ juaꞌ₅₄ a₂tsá₃ ꞌe₂ dso₄ rɨngꞌ₂, ꞌne₂ guëꞌ₂ i₂con₂ ꞌí₁ ja₁con₂ i₂siánꞌ₂, tsá₃ a₂nag₅₄ juɨ₁ꞌein₂ guë́₃ lɨ́ngꞌ₅. Ia₁ në₁juaꞌ₂ cáunꞌ₂ ꞌí₁ ja₁con₂ rɨ́ngꞌ₂, jaun₂ co₂ꞌnióꞌ₄ ma₂qui₂dsɨ́ꞌ₁ ꞌéiꞌ₃ ja₁conꞌ₂ ꞌŋiagꞌ₂, tonꞌ₂ ján₃ bá₄ le₂jaun₂ jmoꞌ₂ ꞌne₂ ꞌŋiagꞌ₂ a₂cáunꞌ₂ ꞌí₁ jaun₂.
2 Ia₁ ne₄ bá₄ jniog₄ jaun₂, Diú₄ bá₄ i₂con₂ ꞌí₁ rë₂ ꞌa₂ liaꞌ₂ conꞌ₂ lë́₅ dsónꞌ₂, ja₁con₂ dsa₂ i₂jmo₅ le₂në₅.
3 Jaun₂ ꞌne₂ në́₃ i₂cáunꞌ₂ ꞌí₁ ja₁con₂ i₂siánꞌ₂ tonꞌ₂ a₂le₂jaun₂ bá₄ guëꞌ₂ jmoꞌ₂ ꞌŋiagꞌ₂, ¿ꞌe₂ lɨ́ngꞌ₂? ¿A₂lióngꞌ₂ jë₁ma₂të́₂ rë₁con₂ Diú₄ ꞌí₁ ja₁congꞌ₂?
4 ¿O₃ bá₄ tsá₃ dsáu₅ ꞌauꞌ₂ ia₁ a₂ŋɨ́₄ lë₃ dse₃ ꞌua₁ dsɨ́₅ Diú₄, a₂jmo₂₃ tióꞌ₃ dsɨ́₅, a₂jme₂juɨinꞌ₂ dsɨ́₅ në́₃? ¿Tsa₁ lenꞌ₅₄ ꞌne₂, ta₁ a₂quíꞌ₅ a₂dse₃ dsɨ́₅ Diú₄ a₂jaun₂ bá₄ jiog₂₃ a₂dsɨ₃quénꞌ₅ ꞌauꞌ₂?
5 La₁ ꞌŋio₅ ꞌuaꞌ₂ ꞌauꞌ₂ tsá₃ ꞌniogꞌ₂ jme₁tsɨ́ngꞌ₄ ꞌauꞌ₂; ꞌuɨg₅₄ jaun₂ në́₃ caun₂ jme₁juɨ́ꞌ₁ bá₄ a₂jme₂ꞌne₅₄ Diú₄ ne₄ quiángꞌ₂ ꞌŋiagꞌ₂ a₂tɨngꞌ₃ jmɨg₄ jaun₂ jë₁ma₂të́₂ rë₁jme₃jniai₂₃ a₂ꞌnei₂, jë₁qui₃dsɨ₂₃ ꞌéiꞌ₃ co₂rë₂.
6 Ia₁ jma₃quén₅ qui₃ bá₄ Diú₄ ꞌlianꞌ₅₄ le₂jan₂ le₂jan₂ ꞌa₂ liaꞌ₂ conꞌ₂ lë́₅ a₂ma₂ca₂jmo₃.a
7 Juɨ₁liaꞌ₂ dsa₂ i₂jmo₅ tióꞌ₃ dsɨ́₅ jmo₂₃ a₂dse₃, a₂qui₂ꞌnoꞌ₂ a₂co₂tág₅ co₂ꞌnéꞌ₅, tonꞌ₂ ꞌnoꞌ₂ juɨ₅ ꞌa₂ liaꞌ₂ jme₃guꞌ₅₄ Diú₄ quianꞌ₅₄ caun₂ a₂dse₃, tonꞌ₂ ꞌnoꞌ₂ juɨ₅ a₂tsá₃ dsiáin₃, ꞌéi₂ bá₄ cuë́ꞌ₃ Diú₄ a₂le₃chain₂ co₂tan₅₄.
8 La₁ quianꞌ₅₄ a₂ꞌnei₂ cuë́ꞌ₃ uɨg₅ ca₂le₃jɨ́n₃ i₂dsia₅ mɨꞌ₅₄, i₂tsá₃ ꞌnio₃ cán₂ caun₂ juɨ₅ a₂nag₃ gau₂ jág₁ tí₅, i₂jmáꞌ₃ juɨ₅ ꞌlɨgꞌ₅₄ bá₄ ꞌnio₃ cán₂.
9 Le₃cha₂ uɨg₅ o₂i₁ dsɨ₅ quióꞌ₅ ca₂le₃jɨ́n₃ i₂jmo₅ a₂ꞌlɨgꞌ₅₄, jë₁le₂ꞌuɨg₅₄ të₂le₃ quióꞌ₅ dsa₂ judíos*, ján₃ guëꞌ₂ le₂jaun₂ le₃ja₁con₂ dsɨ₂nau₂.
10 La₁ ja₁con₂ le₂jan₂ le₂jan₂ i₂jmo₅ a₂dse₃, cuë₃ Diú₄ a₂co₂tág₅ co₂ꞌnéꞌ₅, tonꞌ₂ cuë₃ caun₂ a₂dse₃, jmo₃ ꞌei₅ tei₄, jë₁le₂ꞌuɨg₅₄ quióꞌ₅ dsa₂ judíos, ján₃ guëꞌ₂ le₂jaun₂ le₃ja₁con₂ dsɨ₂nau₂.
11 Ia₁ tsá₃ jma₃quén₅ jɨ́n₂ Diú₄ dsa₂ liaꞌ₂ ca₂ton₂ ca₂ton₂;
12 ia₁ ca₂le₃jɨ́n₃ i₂ꞌno₅ dso₄ i₂tsá₃ ca₂tɨ́n₂ ꞌÉiꞌ₃ quióꞌ₅ Moisés, dsiáin₃ të₃ tsá₃ ꞌÉiꞌ₃ jaun₂ ca₂tɨ́in₂; la₁ ján₃ guëꞌ₂ le₂jaun₂ dsa₂ i₂ꞌno₅ dso₄ në₁juaꞌ₂ ron₅ bá₄ ꞌÉiꞌ₃ quióꞌ₅ Moisés në́₃, të₃dsɨ₅₄ bá₄ ꞌéiꞌ₃ quióꞌ₅, jiógꞌ₂ ꞌí₁ liaꞌ₂ conꞌ₂ lë́₅ ꞌÉiꞌ₃ jaun₂.
13 Ia₁ on₃juaꞌ₅₄ dsa₂ i₂nag₅ ꞌÉiꞌ₃ i₂jɨ́n₂ Diú₄ a₂lɨ́in₅ dsa₂ i₂jme₂ti₃; dsa₂ i₂jmo₅ liaꞌ₂ conꞌ₂ lë́₅ ꞌÉiꞌ₃ bá₄, i₂ꞌéi₂ bá₄ i₂jɨ́n₂ Diú₄ a₂lɨ́in₅ dsa₂ i₂jme₂ti₃.
14 Ia₁ juɨ₁liaꞌ₂ dsɨ₂nau₂ në́₃, i₂tsá₃ ꞌÉiꞌ₃ cha₂ ja₁coin₂, la₁ në₁juaꞌ₂ chain₂ juɨ₅ a₂jme₂ti₃ conꞌ₂ jaun₂ ma₂tɨn₂ dsɨ́₅, guion₅₄ bá₄ dsa₂ ꞌéi₂ ŋi₅ të₂dsɨ́₅ ꞌa₂ liaꞌ₂ lë́₅ ꞌÉiꞌ₃ quióꞌ₅ Diú₄, o₁jŋiaꞌ₅₄ tsá₃ a₂jaun₂ ron₅ quióꞌ₅.
15 Ia₁ cuë₂₃ léi₄ ꞌa₂ liaꞌ₂ lë́₅ chain₂, a₂rë₂ton₅ të₂dsɨ́₅ ta₁ a₂quíꞌ₅ ꞌÉiꞌ₃. Jaun₂ të₂dsɨ́₅ guioin₅₄ bá₄ jángꞌ₅ jág₁ dsau₅ o₄quióꞌ₄, jaun₂ tsá₃ quɨn₅ ꞌa₂ liaꞌ₂ dsɨ₂jiog₅ dsɨ́₅ guioin₅₄; a₂lɨn₅₄ jángꞌ₂, a₂lɨn₅₄ guëꞌ₂ të₂le₃ lió₂.
16 Le₂në₅ bá₄ lé₂ jë₁ma₂të́₂ jmɨg₄ jaun₂ a₂con₂ Diú₄ ꞌí₁ ca₂le₃jë́₃ a₂ꞌma₄ jlë₅ quióꞌ₅ ca₂le₃jɨ́n₃ dsa₂, të₂le₃ quianꞌ₅₄ Jesucristo, liaꞌ₂ conꞌ₂ lë́₅ jág₁ dse₃ a₂qui₂ꞌë́₅ jniá₂.
Dsa₂ judíos, quianꞌ₅₄ ꞌÉiꞌ₃ quióꞌ₅ Moisés
17 La₁ chi₂juaꞌ₂ lɨ́nꞌ₅ ꞌne₂ dsa₂ judío* jaun₂ dsiaꞌ₂ a₂chéngꞌ₅ tiá₂ quianꞌ₅₄ ꞌÉiꞌ₃ quióꞌ₅ Moisés, jaun₂ jmoꞌ₂ tángꞌ₅ ia₁ a₂cuɨngꞌ₂ Diú₄;
18 chi₂juaꞌ₂ ma₂ca₂jme₃tɨn₅ dsa₂ ꞌne₂ ꞌa₂ liaꞌ₂ lë́₅ ꞌÉiꞌ₃, jaun₂ ŋiꞌ₅₄ ꞌa₂ liaꞌ₂ ꞌnio₃ Diú₄, tonꞌ₂ tɨngꞌ₂ caunꞌ₅₄ ꞌí₁ ꞌa₂ liaꞌ₂ lë́₅ a₂dse₃;
19 jaun₂ chi₂juaꞌ₂ të₃dsónꞌ₂ lɨ́ngꞌ₂ a₂tɨngꞌ₂ jangꞌ₅₄ dsa₂ ten₄, chi₂juaꞌ₂ ŋiꞌ₅₄ ꞌa₂ liaꞌ₂ téiꞌ₄ si₂ ja₁con₂ dsa₂ i₂i₂nio₄ jë₄ qui₁néꞌ₃,
20 chi₂juaꞌ₂ ŋiꞌ₅₄ ꞌa₂ liaꞌ₂ jme₁rëꞌ₂ juɨ₅ a₂quian₅ dsa₂ co₄, chi₂juaꞌ₂ ŋiꞌ₅₄ ꞌa₂ liaꞌ₂ cuëꞌ₅₄ jág₁ i₂ꞌnióꞌ₄ i₂lɨ́n₅ chiꞌ₂, ia₁ a₂ron₅ ꞌÉiꞌ₃ ja₁congꞌ₂, a₂tén₅ ne₄ ꞌÉiꞌ₃ ꞌa₂ liaꞌ₂ ꞌnióꞌ₅ le₃ŋi₅ dsa₂, ꞌa₂ liaꞌ₂ lë́₅ jág₁ dsau₅;
21 ꞌne₂ guëꞌ₂ i₂jme₂tɨ́ngꞌ₂ i₂siánꞌ₂, ¿ꞌe₂ guëꞌ₂ ꞌuɨg₅₄ tsá₃ jme₂tɨ́ngꞌ₁ guëꞌ₂ ꞌŋiagꞌ₂? Chi₂juaꞌ₂ ꞌne₂ guëꞌ₂ ꞌë́ꞌ₅ jág₁ a₂tsá₃ ca₂tɨ́n₂ dsa₂ ꞌang₃, ¿tsa₁ ꞌangꞌ₂ ꞌŋiagꞌ₂?
22 Chi₂juaꞌ₂ ꞌne₂ juáꞌ₂ tsá₃ ca₂tɨ́n₂ dsa₂ nióꞌ₃ jág₁ quiainꞌ₅₄ i₂tsá₃ lë́₅ dsɨ₂i₂gu₂, ¿tsa₁ niógꞌ₅ guëꞌ₂ ꞌne₂ jág₁ jaun₂ ꞌŋiagꞌ₂? Chi₂juaꞌ₂ ꞌne₂ ꞌŋio₅ lɨn₃ ꞌŋiagꞌ₅₄ diú₄ lag₄, ¿tsa₁ ꞌangꞌ₂ ꞌne₂ a₂quen₅ a₂te₁ꞌi₁ dsi₂néi₂ ꞌné₅ quióꞌ₅?
23 ꞌNe₂ guëꞌ₂ i₂jmoꞌ₂ tángꞌ₅ ja₁con₂ ꞌÉiꞌ₃, ¿tsa₁ ꞌlɨgꞌ₅₄ tsɨ́ngꞌ₂ Diú₄ ia₁ tsá₃ jme₂tíꞌ₁ ꞌÉiꞌ₃ jaun₂?
24 Ia₁ juɨ₁liaꞌ₂ juáꞌ₂ ne₄ Si₂:
ꞌAg₅ dsɨ₂nau₂ ꞌɨin₂₃ ꞌlɨgꞌ₅₄ Diú₄
ꞌuɨg₅₄ quiánꞌ₂ ꞌniaꞌ₂.b
25 Dsónꞌ₂ bá₄ dsau₅ quen₅ a₂ti₃ dsa₂ lo₅₄* në₁juaꞌ₂ jme₂ti₃ ꞌÉiꞌ₃ quióꞌ₅ Moisés, la₁ në₁juaꞌ₂ tsá₃ jme₂ti₃ dsa₂ në́₃, tsá₃ ꞌe₂ ta₁ jmo₃, në₂jag₄ bá₄ a₂tsá₃ ꞌe₂ rë₂uɨng₄ bá₄ quióꞌ₅.
26 Juɨ₁liaꞌ₂ dsa₂ i₂tsá₃ ꞌe₂ ma₂rë₂uɨng₄ quióꞌ₅, la₁ në₁juaꞌ₂ jme₂ti₃ ꞌe₂ ta₁ quíꞌ₅ ꞌÉiꞌ₃, co₂jaun₂ bá₄ jɨ́n₂ Diú₄ dsa₂ ꞌéi₂ në₂jag₄ bá₄ i₂ma₂rë₂uɨng₄ quióꞌ₅ o₁jŋiaꞌ₅₄ tsá₃ ma₂rë₂uɨng₄.
27 Dsa₂ i₂tsá₃ ꞌe₂ rë₂uɨng₄ lo₄, la₁ në₁juaꞌ₂ jme₂ti₃ ꞌa₂ liaꞌ₂ juáꞌ₂ ꞌÉiꞌ₃, i₂ꞌéi₂ bá₄ chenꞌ₅ Diú₄ ne₄ juɨ₅ a₂con₂ ꞌí₁ ja₁conꞌ₂ ꞌne₂, ia₁ tsá₃ jme₂tíꞌ₁, juɨ₁ꞌe₂ guë́₃ ron₅ Si₂ tioꞌ₅₄ ꞌÉiꞌ₃ quiángꞌ₂, juɨ₁ꞌe₂ guë́₃ rë₂uɨng₄ quiángꞌ₂ në́₃.
28 Ia₁ juɨ₁liaꞌ₂ jan₂ dsa₂ i₂lɨ́n₅ judío dsónꞌ₂, on₃juaꞌ₅₄ rëꞌ₂ jŋiaꞌ₅₄ lɨ́n₅ dsa₂ léi₄ jmáꞌ₃ le₃coꞌ₅₄, on₃ guëꞌ₂ le₂jaun₂ juɨ₁liaꞌ₂ ta₁ dsónꞌ₂ a₂quíꞌ₅ a₂qui₂rë₂uɨng₄ lo₄ dsa₂, on₃juaꞌ₅₄ jŋiaꞌ₅₄ rë₂uɨng₄ lɨ́in₅ léi₄ jmáꞌ₃ le₃coꞌ₅₄ nɨ₁ŋɨ́₅.
29 Të₂le₃ a₂ca₂tɨ́n₂ bá₄ dsa₂ jmo₃, a₂lɨ́in₅ të₃dsónꞌ₂ dsa₂ judío, a₂lɨ́in₅ ca₂të₂ dsɨ́₅; ján₃ guëꞌ₂ le₂jaun₂ juɨ₁liaꞌ₂ a₂lɨ́n₅ dsa₂ léi₄ a₂rë₂uɨng₄ quióꞌ₅, a₂lë́₅ ca₂të₂ dsɨ́₅ bá₄ dsa₂; tonꞌ₂ a₂gu₂dsí₂ bá₄ a₂jaun₂, on₃juaꞌ₅₄ jmáꞌ₃ liaꞌ₂ conꞌ₂ le₁ton₅ ne₄ Si₂ ꞌÉiꞌ₃. Dsa₂ i₂lɨ́n₅ le₂në₅ chéinꞌ₅ rë₂ quianꞌ₅₄ Diú₄, on₃juaꞌ₅₄ rëꞌ₂ quiainꞌ₅₄ dsa₂ mɨ₂güɨ́g₃.