Jág₁ quióꞌ₅ Cristo, a₂ca₂ŋó₃ ne₄ cróg₄
2
Rɨnꞌ₅₄ jniog₄, liaꞌ₂ conꞌ₂ ŋeg₅₄ ja₁conꞌ₂ ꞌniaꞌ₂, i₁chei₁₂ ꞌniaꞌ₂ jág₁ tí₅ la₂ quióꞌ₅ Diú₄, tsá₃ jaun₂ ca₂jmo₃ juaꞌ₅₄ ca₂juɨ́g₂ ꞌniaꞌ₂ jág₁ caꞌ₅₄ juɨ₁liaꞌ₂ jmo₅ dsa₂ i₂ŋɨ́₄ tɨn₂.
2 Liaꞌ₂ conꞌ₂ jme₁ꞌeng₅₄ quiangꞌ₅₄ ꞌniaꞌ₂, tsá₃ ꞌe₂ jág₁ siáꞌ₂ jme₁ꞌnio₃ le₃guion₅₄, jŋiaꞌ₅₄ liaꞌ₂ ca₂ne₅₄ jág₁ quióꞌ₅ Cristo bá₄, i₂të₁ton₅₄ cróg₄.
3 Ca₂dsióg₃ jniá₂ ja₁conꞌ₂ ꞌniaꞌ₂ a₂lɨ́ng₅ jan₂ dsa₂ ꞌuan₅₄, góꞌ₅, jleng₂₃ ꞌŋio₅ lɨn₃.
4 Liaꞌ₂ jme₁ca₂jme₁tɨng₂₃ ꞌniaꞌ₂ jág₁ dse₃, tsá₃ ca₂jmo₃ jág₁ juɨ₁liaꞌ₂ jmo₅ dsa₂ i₂tɨn₂; jmáꞌ₃ liaꞌ₂ quianꞌ₅₄ jág₁ a₂jme₂jnia₅ juɨ₅bí₂ quióꞌ₅ Jme₂dsí₂ Jŋió₅ bá₄ ca₂ꞌë́₂ jniá₂ jág₁,
5 ia₁jaun₂ të₂le₃ quianꞌ₅₄ juɨ₅bí₂ quióꞌ₅ Diú₄ bá₄ lë́₅ a₂ꞌénꞌ₂ ꞌniaꞌ₂, on₃juaꞌ₅₄ liaꞌ₂ conꞌ₂ lë́₅ tɨn₂ dsa₂ mɨ₂güɨ́g₃.
Jme₂jnia₅ Diú₄ ja₁con₂ dsa₂ mɨ₂güɨ́g₃ të₂le₃ quianꞌ₅₄ Jme₂dsí₂ quiáin₅
6 La₁ia₁ dsia₂ bá₄ jniaꞌ₅₄ jág₁ caꞌ₅₄ a₂tag₂ a₂ne₄ jɨn₄ rɨnꞌ₅₄ i₂ma₂ron₂, la₁ on₃juaꞌ₅₄ jág₁ caꞌ₅₄ a₂cha₂ mɨ₂güɨ́g₃ la₂, on₃ quëꞌ₂ jág₁ caꞌ₅₄ quióꞌ₅ dsa₂ i₂gon₂ mɨ₂güɨ́g₃ la₂, i₂qui₂dsɨ₃ŋɨ́₂.
7 Të₂le₃ jág₁ a₂jme₁rë₂ꞌma₄ quióꞌ₅ Diú₄ la₂ bá₄ ꞌë́₅ jniaꞌ₅₄, qui₂chei₂ jniaꞌ₅₄ dsa₂ ca₂le₃jë́₃ a₂niog₅ dsɨ́₅ Diú₄ jmo₃ a₂jláꞌ₁ o₄quián₂ jniog₄ néꞌ₃ guë́₄ a₂nio₃ mɨ₂güɨ́g₃.
8 Ca₂liaꞌ₂ ꞌi₁jan₂ dsa₂ canꞌ₅₄ i₂qui₂dsɨ₅ ꞌéiꞌ₃ mɨ₂güɨ́g₃ la₂ ma₂ca₂rë₃ŋɨ́iꞌ₂ jág₁ la₂; ia₁ juaꞌ₅₄ meiꞌ₂ guë́₃ ca₂rë₃ŋɨ́iꞌ₂, tsá₃ jme₁tioin₃ ne₄ cróg₄ Te₁guiꞌ₅₄ ꞌuanꞌ₂ quián₂.
9 La₁ia₁, juɨ₁liaꞌ₂ juáꞌ₂ ne₄ Si₂:
Tsá₃ ne₄ dsa₂ ma₂të́₂,
on₃ guëꞌ₂ ma₂nág₂,
on₃ guëꞌ₂ ma₂i₂jiog₅ dsɨ́₅ dsa₂
a₂ma₂jmo₃ Diú₄ co₂jŋia₅₄ quióꞌ₅ dsa₂ i₂ꞌnio₃.a
10 La₁ të₂le₃ quianꞌ₅₄ Jme₂dsí₂ quiáin₅, Diú₄ bá₄ ma₂ca₂jme₃jnia₅ a₂jaun₂ ja₁con₂ jniog₄. Ia₁ Jme₂dsí₂ ꞌéi₂ bá₄ téi₂ si₂ jág₁ juëꞌ₂ a₂niog₅ cha₂ quióꞌ₅ Diú₄ ꞌŋiog₅.
11 Të₂le₃ jɨn₄ dsa₂ mɨ₂güɨ́g₃ guioin₅₄ guëꞌ₂ në́₃, ¿ꞌein₂ bá₄ quɨꞌ₅₄ jmɨg₄ le₃ŋi₅ ꞌe₂ dsɨ₂jiog₅ dsɨ́₅ rɨinꞌ₅₄, jŋiaꞌ₅₄ liaꞌ₂ jme₂dsí₂ quióꞌ₅ ꞌŋiog₅ bá₄ dsa₂ a₂ꞌi₄ të₂dsɨ́₅ ŋi₅? Le₂jaun₂ bá₄ lë́₅ le₃quióꞌ₅ Diú₄. ꞌI₁jan₂ tsá₃ ꞌein₂ ma₂ca₂rë₃ŋi₅ ꞌa₂ liaꞌ₂ dsɨ₂jiog₅ dsɨ́₅ Diú₄; jŋiaꞌ₅₄ liaꞌ₂ ꞌŋiog₅ bá₄ Jme₂dsí₂ ŋi₅.
12 Tsá₃ jme₂dsí₂ quián₅ mɨ₂güɨ́g₃ la₂ ma₂guén₄ jniog₄; Jme₂dsí₂ a₂já₅ ja₁con₂ Diú₄ bá₄ i₂ma₂ca₂guén₄ jniog₄, ia₁jaun₂ le₃ŋɨ́ꞌ₂ dsɨ₅ jniog₄ ca₂le₃jë́₃ ꞌe₂ a₂ma₂cuë₃ Diú₄ jniog₄ ia₁ a₂ꞌua₁ dsɨ́₅.
13 Jniog₄ në́₃, le₂në₅ lë́₅ ca₂le₃jë́₃ jág₁ a₂dsia₂ jniog₄ conꞌ₂ lë́₅ ma₂ca₂jme₃tag₅ Jme₂dsí₂ quián₅ Diú₄, on₃juaꞌ₅₄ conꞌ₂ lë́₅ jág₁ a₂ŋɨ́ꞌ₂ dsɨ́₅ dsa₂ mɨ₂güɨ́g₃. Le₂në₅ bá₄ jme₂jniá₁ jniaꞌ₅₄ jág₁ a₂gu₂dsí₂ qui₂chei₂ jniaꞌ₅₄ dsa₂ i₂gu₂dsí₂.b
14 Juɨ₁liaꞌ₂ dsa₂ i₂tsá₃ lɨ́n₅ i₂gu₂dsí₂ në́₃, tsá₃ guein₂₃ jág₁ quióꞌ₅ Jme₂dsí₂, ia₁ lë́₅ jág₁ co₄ bá₄ la₂ le₃quióꞌ₅ ꞌéi₂. Tsá₃ lé₂ le₃ŋɨ́iꞌ₂, ia₁ ca₂le₃jë́₃ a₂në₅ qui₃jiógꞌ₂ ꞌí₁ të₂le₃ quianꞌ₅₄ Jme₂dsí₂ bá₄.
15 La₁ dsa₂ i₂gu₂dsí₂ në́₃, qui₂con₂ ꞌí₁ le₃jë́₃, la₁ia₁ ꞌi₁jan₂ tsá₃ lé₂ le₃con₂ ꞌí₁ ja₁coin₂.
16 Ia₁:
¿ꞌEin₂ bá₄ ꞌéi₂ i₂ŋi₅
ꞌa₂ liaꞌ₂ dsɨ₂jiog₅ dsɨ́₅ Te₁guiꞌ₅₄,
juaꞌ₅₄ lé₂ le₃jme₃tɨin₂₃ ꞌéi₂?c
La₁ jniog₄ në́₃ dsɨ₂jiog₅ dsɨ₅ juɨ₁liaꞌ₂ dsɨ₂jiog₅ dsɨ́₅ Cristo.