Rɨnꞌ₅₄ jniog₄ i₂jmo₅ ta₁ jme₂ti₃ ne₄ Diú₄
3
Rɨnꞌ₅₄ jniog₄, tsá₃ ca₂lë₃ juaꞌ₅₄ juɨg₅₄ ꞌniaꞌ₂ juɨ₁liaꞌ₂ ꞌniaꞌ₂ dsa₂ i₂jiog₅ conꞌ₂ lë́₅ Jme₂dsí₂, të₂le₃ juɨ₁liaꞌ₂ ꞌniaꞌ₂ dsa₂ i₂jiog₅ conꞌ₂ lë́₅ nɨ₁ŋɨ₁ bá₄ ca₂juɨ́g₂ jniá₂ ꞌniaꞌ₂, në₂jag₄ bá₄ guein₂ le₃quióꞌ₅ Cristo.
2 Jmáꞌ₃ liaꞌ₂ jág₁ a₂tsá₃ juɨ́ꞌ₅ bá₄ ma₂ca₂jme₁tɨn₅ jniá₂ ꞌniaꞌ₂, në₂jag₄ bá₄ guein₂ bëꞌ₅₄ i₂ꞌɨ́nꞌ₂ dsiꞌ₅₄ i₂tsá₃ ma₂lé₂ guë́ꞌ₃ má₃ bén₂. Dsónꞌ₂ bá₄ jaun₂, tsá₃ ma₂lé₂ nágꞌ₁ ꞌniaꞌ₂ jág₁ bén₂.
3 Ia₁ liaꞌ₂ lɨ́n₅ dsa₂ i₂jiog₅ conꞌ₂ lë́₅ nɨ₁ŋɨ₁ bá₄ guë́₄ lɨ́nꞌ₅ ꞌniaꞌ₂. Ia₁ të₁liaꞌ₂ tionꞌ₅₄ ꞌniaꞌ₂ le₂jaun₂ a₂uɨg₅ ꞌauꞌ₂ ꞌniaꞌ₂, a₂qui₂tsɨ́nꞌ₂ ꞌniaꞌ₂ në́₃, ¿Tsa₁ i₂nioꞌ₅₄ ꞌniaꞌ₂ conꞌ₂ jiog₅ nɨ₁ŋɨꞌ₁? ¿Tsa₁ i₂nioꞌ₅₄ ꞌniaꞌ₂ juɨ₁liaꞌ₂ i₂nio₅ dsa₂ mɨ₂güɨ́g₃?
4 Ia₁ chi₂juaꞌ₂ chan₂ jan₂ i₂juáꞌ₂: “Dsa₂ quián₅ Pa₄ bá₄ jniá₂”; i₂lɨn₅₄ guëꞌ₂ dsia₅ táng₃, juáꞌ₂: “Jniá₂ guëꞌ₂ lɨ́ng₅ dsa₂ quián₅ Apolos”, ¿on₁juaꞌ₅₄ liaꞌ₂ lɨ́n₅ dsa₂ mɨ₂güɨ́g₃ bá₄ lɨ́nꞌ₅ ꞌniaꞌ₂?
5 Jaun₂ në́₃, ¿ꞌein₂ ꞌéi₂ Apolos? Le₂jaun₂ guëꞌ₂ ¿ꞌEin₂ ꞌéi₂ Pa₄? Jŋiaꞌ₅₄ liaꞌ₂ dsa₂ i₂jme₂ti₃ ta₁ ne₄ Diú₄ bá₄ lág₅ jniaꞌ₅₄ i₂i₂nio₄ jme₂tɨ́n₁ dsa₂ juɨ₁liaꞌ₂ ca₂lë₃ jme₁ca₂rë₃ꞌénꞌ₂ ꞌniaꞌ₂ të₂le₃ quióꞌ₅ Te₁guiꞌ₅₄. Le₂jau₂ le₂jau₂ jniaꞌ₅₄ ma₂ja₂náu₅ jmo₂ ta₁ conꞌ₂ lë́₅ ma₂cuë₃ Te₁guiꞌ₅₄.
6 Jŋiaꞌ₅₄ conꞌ₂ ca₂jan₃ jon₂ bá₄ jniá₂; Apolos guëꞌ₂ ca₂séi₂ jmɨg₂. La₁ia₁ ꞌŋiog₅ bá₄ Diú₄ ca₂jmo₃ ca₂i₃cón₃.
7 Jaun₂ në́₃, dsa₂ i₂jne₅, quianꞌ₅₄ guëꞌ₂ i₂séi₂ jmɨg₂, tsá₃ ꞌe₂ tɨn₂ ꞌéi₂; jŋiaꞌ₅₄ liaꞌ₂ ꞌŋiog₅ bá₄ Diú₄ jmo₂₃ a₂dsɨ₂cón₃.
8 Juɨ₁liaꞌ₂ dsa₂ i₂jne₅ quianꞌ₅₄ guëꞌ₂ dsa₂ i₂séi₂ jmɨg₂, co₂rë₂ bá₄ téin₅ ta₁. Jaun₂ le₂jaun₂ bá₄ gue₃ ꞌliainꞌ₅₄ le₂jain₂ le₂jain₂ liaꞌ₂ conꞌ₂ lë́₅ ta₁ quióꞌ₅.
9 Jme₁tí₁ jniaꞌ₅₄ ne₄ Diú₄ quianꞌ₅₄ rɨnꞌ₅₄ jmo₂ ta₁; ꞌniaꞌ₂ bá₄ lɨ́ngꞌ₅ co₂ꞌnióꞌ₄ ꞌuë₃ ja₁nau₂ ja₁lë́₂ ta₁. O₃ lé₂ le₃juaꞌ₅₄ ján₃, lɨ́nꞌ₅ ꞌniaꞌ₂ në₂jag₄ caun₂ ꞌné₅ a₂chíꞌ₅ quióꞌ₅ Diú₄.
10 ꞌUɨg₅₄ ia₁ a₂ꞌua₁ dsɨ́₅ Diú₄, ca₂cuë₃ ta₁ a₂tsɨꞌ₅₄ ꞌuɨg₅₄ ꞌiaꞌ₂, co₂ꞌnióꞌ₄ jan₂ të₅ꞌiaꞌ₂ bá₄ lɨ́ng₅. I₂siánꞌ₂ guëꞌ₂ táng₃ juɨ₂₃ ne₄ jaun₂. Le₂jan₂ le₂jan₂ i₂juɨ₅ në́₃, ca₂tɨ́in₂ con₂ ꞌí₁ rë₂ chi₂juaꞌ₂ rë₂ bá₄ juɨ₂₃ tioinꞌ₅₄.
11 Ia₁ ꞌi₁jan₂ tsá₃ ma₃ꞌein₂ lé₂ chiꞌ₃ ꞌuɨg₅₄ siáꞌ₂, jŋiaꞌ₅₄ liaꞌ₂ conꞌ₂ caun₂ a₂ma₂chíꞌ₅ bá₄; a₂jaun₂ lɨ́n₅ Cristo ꞌŋiog₅.
12 Në₃ në́₃, juɨ₁liaꞌ₂ ja₁juɨ₅ dsa₂ ne₄ ꞌuɨg₅₄ jaun₂ quianꞌ₅₄ cu₄nióg₄, cu₄tiog₂, quianꞌ₅₄ nɨ₁cang₁ tág₅ jláꞌ₁, o₃ juɨ₁liaꞌ₂ ja₁juɨ₅ ꞌe₂ dsa₂ quianꞌ₅₄ jau₅₄ ꞌma₂ o₃ quianꞌ₅₄ nɨ₁ŋei₂, nɨ₁ꞌma₂ ta₅ në́₃,
13 tion₅₄ bá₄ le₃jniá₂ ta₁ quióꞌ₅ le₂jan₂ le₂jan₂. Jmɨg₄ i₁jáun₃, si₂ bá₄ jme₃jnia₅ a₂jaun₂, jiógꞌ₂ ꞌí₁ në́₃ ꞌa₂ liaꞌ₂ lë́₅ ta₁ quióꞌ₅ le₂jan₂ le₂jan₂.
14 Chi₂juaꞌ₂ ca₂jiog₃ a₂ca₂chíꞌ₃ dsa₂ jaun₂, gue₃ bá₄ ꞌliainꞌ₅₄;
15 la₁ në₁juaꞌ₂ ca₂cáu₂ në́₃, dsɨ₃ꞌén₂ bá₄ quióꞌ₅. La₁ jŋiaꞌ₅₄ conꞌ₂ lióin₂ jmáꞌ₃ ꞌŋiog₅, në₂jag₄ bá₄ jan₂ dsa₂ i₂ja₂lag₃ ca₂lón₂ ne₄ si₂ bá₄ lé₂.
16 ¿Tsa₁ ŋiꞌ₅₄ ꞌniaꞌ₂, guionꞌ₅₄ bá₄ ꞌniaꞌ₂ lɨ́ngꞌ₅ guáꞌ₅ quióꞌ₅ Diú₄, tonꞌ₂ guá₅ Jme₂dsí₂ quián₅ Diú₄ të₂ꞌauꞌ₂ ꞌniaꞌ₂?
17 Në₁juaꞌ₂ ꞌein₂ ca₂ꞌén₂ guáꞌ₅ quióꞌ₅ Diú₄, Diú₄ në́₃ co₂dsia₅ ꞌéin₂ dsa₂ ꞌéi₂. Ia₁ i₂jŋió₅ bá₄ guáꞌ₅ quián₅ Diú₄, jaun₂ guionꞌ₅₄ bá₄ ꞌniaꞌ₂ lɨ́ngꞌ₅ guáꞌ₅.
18 ꞌI₁janꞌ₂ ꞌniaꞌ₂ tsá₃ ꞌein₂ juɨ₁le₂gan₂. Chi₂juaꞌ₂ chan₂ i₂lɨ́n₂ ꞌŋio₅ lɨn₃ ŋɨ́ꞌ₂ dsɨ́₅ liaꞌ₂ conꞌ₂ lë́₅ ŋɨ́ꞌ₂ dsɨ́₅ dsa₂ mɨ₂güɨ́g₃, juɨ₁jmo₁₂ co₂dsia₅ ne₂jag₄ bá₄ a₂tsá₃ ꞌe₂ ŋi₅, ia₁jaun₂ guë́₄ dsióg₄ léin₂ të₃dsónꞌ₂ dsa₂ i₂tɨn₂ i₂ŋi₅.
19 Ia₁ ca₂le₃jë́₃ a₂ŋɨ́₄ ꞌŋio₅ tɨn₂ dsa₂ mɨ₂güɨ́g₃, ca₂le₃jë́₃ a₂jaun₂ tsá₃ ꞌe₂ quen₅ le₃ne₄ Diú₄. Ia₁ ne₄ Si₂ juáꞌ₂: “Diú₄ join₂₃ dsa₂ jë₄ mai₅₄ quióꞌ₅ guioin₅₄.”a
20 Juáꞌ₂ ne₄ Si₂ ján₃: “I₂ŋi₅ bá₄ Te₁guiꞌ₅₄ ꞌa₂ liaꞌ₂ qui₂dsɨ₂jiog₅ dsɨ́₅ dsa₂ i₂tɨn₂, a₂tsá₃ ꞌe₂ ta₁ tí₄.”b
21 Jaun₂ lë₃, ꞌi₁jan₂ tsá₃ juɨ₁dsia₁₂ jág₁ táꞌ₅ le₃quióꞌ₅ dsa₂ mɨ₂güɨ́g₃. Ia₁ a₂ca₂tɨ́nꞌ₂ ꞌniaꞌ₂ bá₄ ca₂le₃jë́₃ a₂cha₂.
22 Pa₄, Apolos, Pe₄,c mɨ₂güɨ́g₃ a₂chong₂ jniog₄, ꞌmú₃, jmɨg₄ rë₂në́₃, juɨ₁la₂ jmɨg₄ ꞌióg₃ në́₃: ca₂le₃jë́₃ bá₄ në₅ lë́₅ quiánꞌ₂ ꞌniaꞌ₂.
23 Le₂jaun₂ guëꞌ₂ ján₃, i₂quián₅ Cristo bá₄ ꞌniaꞌ₂; Cristo guëꞌ₂ lɨ́n₅ i₂quián₅ Diú₄.