Ta₁ a₂ca₂tɨ́n₂ dsa₂ i₂chen₄ quián₅ Cristo
4
Jaun₂ bá₄ në́₃, conꞌ₂ jŋiaꞌ₅₄ dsa₂ i₂jme₂ti₃ ta₁ ne₄ Cristo bá₄ ca₂tɨ́n₂ dsa₂ jág₂ jniaꞌ₅₄, a₂niog₅ ne₄ jniaꞌ₅₄ jág₁ a₂jme₁rë₂ꞌma₄ quióꞌ₅ Diú₄.
2 Conꞌ₂ siáꞌ₂ táng₃, chi₂juaꞌ₂ le₂në₅, jaun₂ bá₄ tion₅₄ ca₂tɨ́n₂ juɨ₁liaꞌ₂ dsa₂ i₂niog₅ gu₂ ta₁ le₂ꞌéi₂, jme₃ti₃ quianꞌ₅₄ ta₁ a₂ca₂ŋɨi₂.
3 Të₂le₃ quió₃ jniá₂ në́₃, tsá₃ a₂nag₅₄ jaun₂ në₁juaꞌ₂ ca₂quionꞌ₂ ꞌniaꞌ₂ ꞌí₁ le₃ja₁cong₂, o₃ në₁juaꞌ₂ ca₂cáun₃ ꞌí₁ dsɨ₂tan₅₄ dsa₂ mɨ₂güɨ́g₃ ꞌe₂. Ca₂liaꞌ₂ jŋiaꞌ₅₄ ꞌŋió₃, tsá₃ cáun₅ ꞌí₁ le₃ja₁cong₂ ꞌŋió₃.
4 ꞌI₁caun₂ tsá₃ ꞌe₂ dsɨ₂jŋi₅ dsɨ₃. La₁ on₃juaꞌ₅₄ le₂në₅ o₂ꞌag₅ jág₁ a₂tsá₃ ꞌe₂ rë₂cángꞌ₄. ꞌŊiog₅ bá₄ Te₁guiꞌ₅₄ i₂con₂ ꞌí₁ quió₃.
5 Jaun₂ tsá₃ lë₁cáun₂ deꞌ₂ ꞌniaꞌ₂ ꞌí₁ të₃jŋiá₅. Jë₁ma₂guánꞌ₅ Te₁guiꞌ₅₄, téi₂ si₂ ne₄ a₂rë₂ꞌma₄ a₂jmo₅-dsáu₅ dsa₂ jë₄ qui₁néꞌ₃; jme₃jniai₂₃ ca₂le₃jë́₃ a₂niog₅ qui₂dsɨ₂jŋia₅ dsɨ́₅ dsa₂. Jaun₂ guë́₄ gue₃ dsa₂ ꞌliainꞌ₅₄ a₂cuë₃ Diú₄ a₂ꞌŋio₂ dsɨ́₅ quióꞌ₅ le₂jain₂ le₂jain₂.
6 Rɨnꞌ₅₄ jniog₄, a₂dse₃ quiánꞌ₂ bá₄ ꞌniaꞌ₂ juáꞌ₅ jniá₂ ca₂le₃jë́₃ a₂në₅, a₂ꞌɨ́ng₅ Apolos quianꞌ₅₄ guëꞌ₂ ꞌŋió₃ jniá₂. Juáꞌ₅ le₂në₅ ia₁jaun₂ të₂le₃ quianꞌ₅₄ jág₁ jángꞌ₅ léi₄ në₅ quián₂ jniaꞌ₅₄, le₃tɨnꞌ₂ ꞌniaꞌ₂, a₂tsá₃ jmóꞌ₂ ꞌniaꞌ₂ ŋag₅₄ guë́₄ conꞌ₂ lë́₅ juáꞌ₂ ne₄ Si₂, conꞌ₂ tsá₃ ŋó₅ në₁juaꞌ₂ ca₂jmoꞌ₅₄ ꞌniaꞌ₂ rónꞌ₂ o₄quióꞌ₄ jan₂, a₂jɨnꞌ₅₄ ꞌniaꞌ₂ sion₅ i₂siánꞌ₂.
7 ¿ꞌEin₂ ꞌéi₂ ꞌag₅ ꞌne₂ a₂dsengꞌ₃ guë́₄ liaꞌ₂ conꞌ₂ guë́₄ rɨ́ngꞌ₂? ¿ꞌE₂ bá₄ bí₂ ꞌauꞌ₂ juaꞌ₅₄ tsá₃ ma₂cuë₃ Diú₄ në́₃? ¿ꞌE₂ guëꞌ₂ lë₃ dsiaꞌ₂ jág₁ táꞌ₅ në₂jag₄ bá₄ a₂ca₂jnagꞌ₂ ꞌŋiagꞌ₂ a₂cha₂ quiángꞌ₂ jmoꞌ₂?
8 Jmoꞌ₂ ꞌniaꞌ₂ ꞌauꞌ₂ ꞌŋio₅ lɨn₃ dse₃ ma₂changꞌ₂; ma₂cha₂ quiánꞌ₂ ꞌniaꞌ₂ ca₂le₃jë́₃. Ma₂jmoꞌ₂ ꞌniaꞌ₂ ꞌauꞌ₂ ma₂tiángꞌ₅ canꞌ₅₄ bá₄ ꞌniaꞌ₂, tsá₃ ma₃quiongꞌ₅₄ jniaꞌ₅₄. ¡Juaꞌ₅₄ meiꞌ₂ guë́₃ dsónꞌ₂ dsɨ₂jóꞌ₃ ma₂gonꞌ₂ ꞌniaꞌ₂! Jaun₂ bá₄ jme₁lé₂ gon₂ jniaꞌ₅₄ co₂lë₅ quianꞌ₅₄ ꞌniaꞌ₂ juaꞌ₅₄ meiꞌ₂ guë́₃ le₂jaun₂.
9 Ia₁ lɨ́n₂ jniá₂, liaꞌ₂ lë́₅ bá₄ të₂le₃ jë₁ca₂tóꞌ₂ bá₄ ma₂cheiꞌ₃ Diú₄ conꞌ₂ jniaꞌ₅₄ i₂lág₅ dsa₂ i₂chen₄ quiáin₅, a₂jág₂ dsa₂ liaꞌ₂ ja₁jɨ́n₂ dsa₂ i₂ma₂ꞌí₄ ꞌéiꞌ₃ dsián₃. Ma₂ja₂lén₂ dsa₂ jág₂ jniaꞌ₅₄ në₂jag₄ a₂lë₁ꞌioꞌ₂ të₅ dsɨ́₅ jág₃ ca₂lë₃jɨ́n₃ i₂chan₂, liaꞌ₂ dsa₂ mɨ₂güɨ́g₃ liaꞌ₂ ángeles në́₃.
10 Dsa₂ co₄ bá₄ ꞌag₅ dsa₂ jniaꞌ₅₄ o₄quióꞌ₄ Cristo; ꞌniaꞌ₂ guëꞌ₂ ma₂jmoꞌ₂ ꞌŋio₅ lɨn₃ ma₂ŋɨ́ꞌ₂ ꞌauꞌ₂ juɨ₁liaꞌ₂ të₂le₃ quióꞌ₅ Cristo. Ma₂jmoꞌ₂ ꞌniaꞌ₂ ꞌŋio₅ lɨn₃ tiá₂ ma₂tióngꞌ₂; jniaꞌ₅₄ guëꞌ₂ jagꞌ₅₄ táng₃ në₂jag₄ dsa₂ ꞌuan₅₄. Jme₂gan₃ dsa₂ ꞌniaꞌ₂; jniaꞌ₅₄ guëꞌ₂ në́₃ tsá₃ jei₅₄ dsa₂.
11 Ca₂liaꞌ₂ jŋió₂ jmɨg₄ në₃, ja₂náu₅ jniaꞌ₅₄ a₂ꞌong₄, qui₂rë₂quein₂ dsɨ₅, tsá₃ cha₂ a₂quiꞌ₅₄, tsá₃ dsi₂néi₂ cha₂ ꞌio₁ jniaꞌ₅₄. Dsa₂ guëꞌ₂, conꞌ₂ lë₁co₂jmógꞌ₂.
12 Ja₂náu₅ jniaꞌ₅₄ jmo₂ ta₁ quianꞌ₅₄ gu₂-tag₄ guio₅₄. Juɨ₁liaꞌ₂ jme₁të₂ꞌoꞌ₂ dsa₂, caun₂ jág₁ dse₃ bá₄ qui₁jeinꞌ₄ jniá₂ quióꞌ₅. Juɨ₁liaꞌ₂ jme₁co₂ꞌein₅ dsa₂, la₁ jmo₂ bá₄ jniaꞌ₅₄ tióꞌ₃ dsɨ₅.
13 Chan₂ guëꞌ₂ dsa₂ i₂dsia₅ ꞌag₅ ꞌlɨgꞌ₅₄, la₁ caun₂ jág₁ dse₃ bá₄ cuëꞌ₂ táng₃ jniaꞌ₅₄. Jág₂ dsa₂ në₂jag₄ ti₁ꞌŋeꞌ₅₄ a₂tsá₃ ta₁ tí₄, në₂jag₄ bá₄ jme₁qui₅ quióꞌ₅ dsa₂ mɨ₂güɨ́g₃ në́₃, ca₂liaꞌ₂ jŋió₂ jmɨg₄ në₃.
14 On₃juaꞌ₅₄ ia₁jaun₂ cánꞌ₁ ꞌniaꞌ₂ o₂guíꞌ₃ tóꞌ₅ jniá₂ jág₁ la₂ ne₄ si₂. A₂jaun₂ bá₄ jmo₂₃ jág₁ të₃jŋiá₅ ja₁congꞌ₂, në₂jag₄ bá₄ chiꞌ₂-guein₂ quiáng₃ i₂ꞌnióg₃ guë́₄ lɨn₃.
15 Ia₁ o₁jŋiaꞌ₅₄ guia₃ mei₅ të₅ ca₂rë₃chán₃ i₂jme₃tag₅ ꞌniaꞌ₂ le₃quióꞌ₅ Cristo, la₁ tsá₃ juɨn₅ ŋéiꞌ₅ ꞌniaꞌ₂ chan₂. Ia₁ le₃quióꞌ₅ Cristo Jesús, të₂le₃ quianꞌ₅₄ jág₁ dse₃ quióꞌ₅, ca₂lɨn₃ jniá₂ ŋéiꞌ₅ ꞌniaꞌ₂.
16 Jaun₂ lë₃, mɨ₅ jniá₂ ja₁conꞌ₂ ꞌniaꞌ₂, jaun₂ tónꞌ₂ ꞌniaꞌ₂ juɨ₅ i₁nioꞌ₄ ꞌniaꞌ₂ ja₁ma₂ŋɨ₃ jniá₂.
17 ꞌUɨg₅₄ jaun₂ bá₄ tsɨ́n₂ jniá₂ Timoteo, i₂jmo₅ jniá₂ dsɨ₃ co₂ꞌnióꞌ₄ guein₂ quiáng₃ i₂ꞌnióg₃ guë́₄ lɨn₃, i₂rë₂tiꞌ₅₄ le₃ja₁con₂ Te₁guiꞌ₅₄. ꞌÉi₂ bá₄ jmo₃ dsiogꞌ₂ ꞌauꞌ₂ ꞌniaꞌ₂ ꞌa₂ liaꞌ₂ lë́₅ chan₂ jniá₂ a₂ꞌéng₂ le₃quióꞌ₅ Cristo, liaꞌ₂ conꞌ₂ lë́₅ jme₂tɨ́ng₁ guáꞌ₅ ca₂le₂con₂ ja₁siáꞌ₂.
18 I₂lɨn₅₄ ꞌniaꞌ₂ ma₂i₂niogꞌ₅₄ jmoꞌ₂ ꞌniaꞌ₂ róngꞌ₂, a₂lɨ́nꞌ₂ ꞌniaꞌ₂ a₂tsá₃ ma₃dsióg₄ jniá₂ i₁jɨng₁₂ ꞌniaꞌ₂.
19 La₁ ŋiꞌ₅₄ ta₁ la₂ bá₄ ꞌnio₃ dsióg₄ i₁jág₃ në₁juaꞌ₂ ca₂cuë₃ Te₁guiꞌ₅₄ jmɨg₄. Jmɨg₄ jaun₂ le₃guion₅₄ jniá₂, on₃juaꞌ₅₄ jmáꞌ₃ jág₁ táꞌ₅ a₂dsia₅ dsa₂ jɨnꞌ₄ ꞌniaꞌ₂ tioinꞌ₅₄, le₃guion₅₄ jniá₂ ján₃ ꞌa₂ conꞌ₂ bí₂ ꞌio₂₃.
20 Ia₁ juɨ₁liaꞌ₂ ja₁gon₂ Diú₄, on₃juaꞌ₅₄ a₂jŋiaꞌ₅₄ dsɨ₂lé₂ jmáꞌ₃ jág₁; a₂quianꞌ₅₄ juɨ₅bí₂ bá₄ ján₃.
21 ¿ꞌE₂ ꞌniogꞌ₂ ꞌniaꞌ₂: a₂ꞌi₁ꞌë́₃ jniá₂ uɨg₅ jë₁ma₂dsióg₃, o₃ a₂dsióg₄ jniá₂ caun₂ dse₃ a₂ꞌnió₃ jniá₂ ꞌniaꞌ₂ a₂ꞌua₁ dsɨ₃ ꞌe₂?