Jauꞌ₂ ꞌí₁ quióꞌ₅ jan₂ dsa₂ i₂ca₂ꞌnáu₂ dso₄
5
ꞌE₂ ca₂rë₃chá₃ jág₁, a₂chan₂ jan₂ jɨnꞌ₄ ꞌniaꞌ₂ ꞌno₂₃ dso₄, a₂jmo₂₃ a₂lë́₅ quiáin₅ bá₄ dsa₂ mɨ́₂ quián₅ jmei₂. Caun₂ dso₄ ca₂liaꞌ₂ jŋiaꞌ₅₄ dsa₂ i₂tsá₃ cuɨn₅ Diú₄ bá₄ guë́₄ tsá₃ jmo₂₃ le₂në₅.
2 ¡Jmoꞌ₂ guë́₄ ꞌniaꞌ₂ ꞌauꞌ₂ a₂tiongꞌ₅₄ dse₃ jmoꞌ₂ róngꞌ₂ tiongꞌ₅₄! ¡ꞌNióꞌ₄ jme₁tónꞌ₂ ꞌniaꞌ₂ quɨꞌ₁-ꞌáuꞌ₂ ꞌliaꞌ₂ ꞌauꞌ₂! Dsa₂ i₂ca₂ꞌnáu₂ dso₄ në₅ ca₂tɨ́in₂ o₃ꞌɨin₅ bá₄ jɨnꞌ₄ ꞌniaꞌ₂ në₅.
3 O₁jŋiaꞌ₅₄ tsá₃ quianꞌ₅₄ jniá₂ ꞌniaꞌ₂ dsi₁ne₁, la₁ ꞌeng₅₄ bá₄ ja₁në₅ quianꞌ₅₄ ꞌniaꞌ₂ të₂le₃ quianꞌ₅₄ jme₂dsí₂; ma₂cáun₃ jniá₂ ꞌí₁ ja₁con₂ dsa₂ i₂ca₂jmo₃ le₂në₅, në₂jag₄ bá₄ a₂chéngꞌ₅ ꞌŋió₃ të₃dsónꞌ₂.
4 Tiónꞌ₂ ꞌniaꞌ₂ longꞌ₂ o₄quióꞌ₄ Te₁guiꞌ₅₄ Jesús, a₂ꞌen₅₄ jniá₂ të₂le₃ quianꞌ₅₄ jme₂dsí₂ quió₃, quianꞌ₅₄ juɨ₅bí₂ quióꞌ₅ Te₁guiꞌ₅₄ Jesús,
5 a₂jɨnꞌ₅₄ ꞌniaꞌ₂ dsa₂ ꞌéi₂ o₄gú₃ Satanás, ia₁jaun₂ qui₂dsɨ₃ꞌén₂ nɨ₁ŋɨ₁₂, ia₁jaun₂ tɨ́nꞌ₂ jme₂dsí₂ quióꞌ₅ jmɨg₄ i₁jáun₃ quióꞌ₅ Te₁guiꞌ₅₄.
6 Tsá₃ dse₃ a₂dsiaꞌ₂ ꞌniaꞌ₂ jág₁ táꞌ₅. ¿Tsa₁ ŋiꞌ₅₄ ꞌniaꞌ₂, “Quianꞌ₅₄ ca₂juɨg₄ bá₄ levadura* guionꞌ₂ ta₁jë₂ ti₁can₁”?
7 Jŋiáꞌ₃ ꞌniaꞌ₂ levadura guiꞌ₅₄, ia₁jaun₂ lénꞌ₂ ꞌniaꞌ₂ co₂ꞌnióꞌ₄ ca₂mɨ́g₂ ti₁can₁ a₂tsá₃ levadura quianꞌ₅₄, juɨ₁liaꞌ₂ të₃dsónꞌ₂ lɨ́nꞌ₅ ꞌniaꞌ₂. Ia₁ ꞌŋiog₅ bá₄ Cristo ca₂join₃ ŋó₃ a₂rë₂jeinꞌ₅₄ ne₄ Diú₄ o₄quián₂ jniog₄; a₂lɨ́in₅ jáꞌ₂ chaꞌ₂ i₂ca₂jon₃ Jmɨg₄ Të₂ꞌɨn₅₄* quián₂.
8 Jaun₂ lë₃, jme₁go₃ jniog₄ Jmɨg₄ jaun₂, on₃juaꞌ₅₄ quianꞌ₅₄ levadura guiꞌ₅₄, on₃ guëꞌ₂ quianꞌ₅₄ a₂ꞌlɨgꞌ₅₄ qui₂dsɨ₂jŋia₅ dsɨ₅ jniog₄ ja₁con₂ rɨnꞌ₅₄, on₃ guëꞌ₂ jmó₁ uɨg₅ dsɨ₅ ja₁con₂ rɨnꞌ₅₄; të₂le₃ jme₁go₃ jniog₄ quianꞌ₅₄ jág₁ tí₅ dsɨ₂jóꞌ₃.
9 Ne₄ si₂ carta quió₃ a₂ca₂tsɨ́ng₂ neꞌ₅₄ ꞌniaꞌ₂ le₂jŋiá₅, ca₂juáꞌ₃ a₂tsá₃ jme₁quianꞌ₅₄ ꞌniaꞌ₂ dsa₂ i₂nióꞌ₅ jág₁ quianꞌ₅₄ dsa₂ i₂tsá₃ lë́₅ dsɨ₂i₂gu₂.
10 On₃juaꞌ₅₄ jaun₂ rëꞌ₂ juáꞌ₅ jniá₂ a₂qui₂dsɨ₃uɨ́nꞌ₃ ꞌniaꞌ₂ co₂dsia₅ co₂ŋeiꞌ₅₄ ja₁con₂ dsa₂ i₂ꞌno₅ dso₄, ja₁con₂ dsa₂ i₂ꞌuaꞌ₂ dsɨ́₅, dsa₂ i₂ꞌang₅, dsa₂ i₂qui₂jme₂juɨnꞌ₂ diú₄ lag₄ në́₃. Ia₁ co₂ŋeiꞌ₅₄ jme₁ꞌuɨ́nꞌ₃ ꞌniaꞌ₂ mɨ₂güɨ́g₃ la₂, juaꞌ₅₄ meiꞌ₂ guë́₃ le₂jaun₂.
11 A₂la₂ bá₄ juáꞌ₅, a₂tsá₃ dsi₂ten₅₄ jme₁jenꞌ₂ ꞌniaꞌ₂ ꞌŋio₅ lɨn₃ ꞌei₅ caun₂ jág₁ quianꞌ₅₄ jan₂ i₂jmo₅ a₂lɨ́in₅ jan₂ rɨnꞌ₅₄ jniog₄, chi₂juaꞌ₂ ján₃ guëꞌ₂ nióꞌ₅ jág₁ quianꞌ₅₄ i₂tsá₃ lë́₅ dsɨ₂i₂gu₂, chi₂juaꞌ₂ ꞌuaꞌ₂ dsɨ́₅, chi₂juaꞌ₂ jme₂juɨinꞌ₂ diú₄ lag₄, chi₂juaꞌ₂ qui₂juáꞌ₂ jág₁ uɨg₅, chi₂juaꞌ₂ qui₂i₂nioi₅₄ le₁ꞌein₅, chi₂juaꞌ₂ qui₂ꞌang₂₃ në́₃. On₃ guëꞌ₂ ca₂tɨ́nꞌ₂ ꞌniaꞌ₂ quëꞌ₅₄ quianꞌ₅₄ dsa₂ le₂ꞌéi₂.
12 Tsá₃ ca₂tɨ́n₂ jniá₂ cáun₄ ꞌí₁ ja₁con₂ dsa₂ i₂tsá₃ quiongꞌ₅₄ jniog₄. Diú₄ bá₄ i₂con₂ ꞌí₁ ja₁con₂ dsa₂ ꞌéi₂.
13 La₁ia₁ ꞌniaꞌ₂, ca₂tɨ́ngꞌ₂ caunꞌ₅₄ ꞌí₁ jmáꞌ₃ liaꞌ₂ dsa₂ i₂quiongꞌ₅₄ jniog₄. Jaun₂ në́₃: “Dsen₅₄ ꞌniaꞌ₂ cau₅ dsa₂ ꞌlɨnꞌ₅₄ i₂ꞌen₅₄ jɨnꞌ₄ ꞌniaꞌ₂.”a