Mɨꞌ₅₄ a₂cha₂ jɨn₄ dsa₂ ꞌén₂ ꞌnɨi₂₃ rɨinꞌ₅₄ ne₄ dsɨ₂tan₅₄ i₂tsá₃ ꞌén₂
6
Juɨ₁liaꞌ₂ jme₁chan₂ ꞌein₂ ꞌniaꞌ₂ ꞌnio₃ dsia₃ dso₄ ꞌnɨ₃ rɨnꞌ₅₄, ¿ꞌa₂ bá₄ liaꞌ₂ tiá₂ ꞌauꞌ₂ o₁dsiaꞌ₄ dso₄ ne₄ juɨ₁liaꞌ₂ dsa₂ i₂tsá₃ Diú₄ cuɨn₅, ꞌnióꞌ₄ a₂jme₁juɨgꞌ₅₄ ꞌniaꞌ₂ dsa₂ quián₅ Diú₄?
2 ¿Tsa₁ ŋiꞌ₅₄ ꞌniaꞌ₂ juaꞌ₂ dsa₂ juɨg₂ quián₅ Diú₄ bá₄ guëꞌ₂ i₂con₂ ꞌí₁ quióꞌ₅ dsa₂ mɨ₂güɨ́g₃? Chi₂juaꞌ₂ ꞌniaꞌ₂ i₂cáunꞌ₂ ꞌí₁ quióꞌ₅ dsa₂ mɨ₂güɨ́g₃ në́₃, ¿ꞌen₁ jmáꞌ₃ guëꞌ₂ tsá₃ ꞌein₂ i₂tɨn₂ chan₂ i₂lé₂ jme₃rë́₃ juɨ₁liaꞌ₂ mɨꞌ₅₄ meꞌ₂?
3 ¿Tsa₁ ŋiꞌ₅₄ ꞌniaꞌ₂ juaꞌ₂ le₂jiog₅ ángeles bá₄ quiong₅₄ jniog₄ ꞌí₁ quióꞌ₅? ¡ꞌË₂ guë́₄ bá₄ jaun₂ ca₂tág₂ jniog₄ jme₁rë₂ ꞌe₂ caun₂ o₂meꞌ₅₄ dsɨ₅ rë₂cha₂ ne₄ guaꞌ₅₄ ꞌuë₃ la₂!
4 Chi₂juaꞌ₂ ꞌe₂ caun₂ mɨꞌ₅₄ cha₂ quiánꞌ₂ ꞌniaꞌ₂, rɨnꞌ₅₄ jniog₄, ¿ꞌe₂ lë₃ o₂nóꞌ₅ ꞌniaꞌ₂ o₂dsiaꞌ₅₄ dso₄ ne₄ dsa₂ i₂tsá₃ ꞌe₂ quen₅ le₃quióꞌ₅ guáꞌ₅?
5 Juáꞌ₅ jniá₂ le₂në₅ ia₁jaun₂ le₃guenꞌ₅₄ ꞌniaꞌ₂ ca₂la₂. ¿O₃ bá₄ ꞌi₁jan₂ jmáꞌ₃ tsá₃ ꞌein₂ chan₂ jɨnꞌ₄ ꞌniaꞌ₂ i₂quɨꞌ₅₄ jmɨg₄ jme₃rë́₃ mɨꞌ₅₄ a₂niog₅ jɨn₄ rɨnꞌ₅₄?
6 ¿Rë₂ guë́₄ dsióg₅, lɨ́nꞌ₂ ꞌniaꞌ₂, juɨ₁liaꞌ₂ jan₂ rɨnꞌ₅₄ jniog₄ dsɨ₂dsiá₃ dso₄ ne₄ dsa₂ i₂tsá₃ ꞌén₂?
7 Chi₂juaꞌ₂ ma₂tionꞌ₅₄ ꞌniaꞌ₂ mɨꞌ₅₄ jɨnꞌ₄ ꞌniaꞌ₂, co₂dsia₅ ma₂tánꞌ₂ bá₄ ꞌniaꞌ₂ jág₁ chi₂juaꞌ₂ le₂jaun₂. ¿Tsa₁ dse₃ guë́₄ jmo₃ dsa₂ co₂ŋeiꞌ₅₄ tióꞌ₃ dsɨ́₅ a₂caun₂ lë₁dsɨ₂ŋɨ́i₂ jmógꞌ₂ rɨinꞌ₅₄? ¿Tsa₁ dse₃ guë́₄ guén₄ jniog₄ juɨ₁ꞌang₁₂ ꞌe₂ ꞌang₃ quián₂?
8 La₁ ꞌniaꞌ₂ në́₃, jmagꞌ₅₄ dsa₂, ꞌangꞌ₂ quióꞌ₅ dsa₂; ca₂të₂ ja₁con₂ rɨ́nꞌ₂ ꞌniaꞌ₂ guiongꞌ₅₄ jmoꞌ₂ le₂në₅.
9 ¿O₃ bá₄ tsá₃ ŋiꞌ₅₄ ꞌniaꞌ₂, tsá₃ ja₁gon₂ Diú₄ ca₂tɨ́n₂ dsa₂ i₂tsá₃ cuɨn₅ Diú₄? Tsá₃ cuɨ́n₅ ꞌniaꞌ₂ jmɨg₄ juaꞌ₅₄ a₂le₃gangꞌ₂, ia₁ juɨ₁liaꞌ₂ dsa₂ i₂i₂nio₄ nióꞌ₅ jág₁ quianꞌ₅₄ dsa₂ i₂tsá₃ lë́₅ dsɨ₂i₂gu₂, juɨ₁liaꞌ₂ dsa₂ i₂qui₂jme₂juɨnꞌ₂ diú₄ lag₄, juɨ₁liaꞌ₂ dsa₂ ŋeꞌ₂ i₂dsɨ₂jŋia₅ dsɨ́₅ liaꞌ₂ dsɨ₂jŋia₅ dsɨ₅ ꞌio₅₄,a juɨ₁liaꞌ₂ dsa₂ ŋeꞌ₂ i₂nióꞌ₅ jág₁ quianꞌ₅₄ dsa₂ ŋeꞌ₂ rɨinꞌ₅₄,
10 juɨ₁liaꞌ₂ dsa₂ ꞌang₂, dsa₂ i₂ꞌuaꞌ₂ dsɨ́₅, dsa₂ i₂i₂nio₄ ꞌen₅, dsa₂ i₂i₂nio₄ qui₂dsia₂₃ jág₁ të₂jág₁, dsa₂ i₂lɨ́ꞌ₂ cu₄ të₂le₃ quianꞌ₅₄ a₂ꞌŋioi₅₄ jme₂gain₂₃ rɨinꞌ₅₄: dsa₂ le₂ꞌéi₂ në́₃, tsá₃ ca₂tɨ́in₂ ja₁gon₂ Diú₄.
11 Le₂në₅ bá₄ jme₁chanꞌ₂ i₂lɨn₅₄ ꞌniaꞌ₂ le₂jŋiá₅. La₁ ꞌŋiog₅ bá₄ Diú₄ ma₂qui₂ca₂rɨ́nꞌ₃ jme₂dsí₂ quiánꞌ₂ ꞌniaꞌ₂, ma₂lë́₅ ꞌí₁ quiáin₅, ca₂guei₃ Diú₄ ꞌniaꞌ₂ në₂jag₄ bá₄ a₂tsá₃ ꞌe₂ dso₄ rɨnꞌ₂ ꞌniaꞌ₂, të₂le₃ quianꞌ₅₄ Te₁guiꞌ₅₄ Jesús, quianꞌ₅₄ guëꞌ₂ Jme₂dsí₂ quián₅ Diú₄ quián₂.
A₂ꞌnióꞌ₅ jmo₃ dsa₂ ꞌí₁ nɨ₁ŋɨ₁₂
12 Chan₂ dsa₂ i₂juáꞌ₂: “ꞌI₄ bá₄ ꞌéiꞌ₃ le₃jmo₃ dsa₂ ꞌe₂ ꞌnio₃ jmo₃.” Dsónꞌ₂ bá₄ dsau₅, la₁ tsá₃ juaꞌ₅₄ ca₂le₃jë́₃ jaun₂ jme₂ꞌo₅₄. Dsau₅ bá₄ “ꞌI₄ ꞌéiꞌ₃ le₃jmo₅₄ jniá₂ ca₂le₃jë́₃ ꞌe₂ ꞌnio₃ jmo₅₄”, la₁ia₁ tsá₃ cuɨ́n₄ jniá₂ jmɨg₄ juaꞌ₅₄ co₂dsia₅ jɨnꞌ₄ jniá₂ co₂ŋeiꞌ₅₄ ne₄ ꞌi₁caun₂.
13 Dsau₅ bá₄ juɨ₁liaꞌ₂ juáꞌ₂ dsa₂: “Lë́₅ má₃ o₄quióꞌ₄ rë₂túꞌ₅ dsa₂; rë₂túꞌ₅ guëꞌ₂ dsa₂ lë́₅ o₄quióꞌ₄ má₃.” La₁ já₅ jmɨg₄ a₂ꞌén₂ Diú₄ ta₁tɨn₃. La₁ tsá₃ ta₁ jaun₂ quíꞌ₅ nɨ₁ŋɨ₁₂ juaꞌ₅₄ a₂ꞌno₃ dsa₂ dso₄ quianꞌ₅₄ i₂siánꞌ₂. Ta₁ a₂quíꞌ₅ nɨ₁ŋɨ₁₂, a₂jme₃ti₃ ta₁ ne₄ Te₁guiꞌ₅₄ bá₄ jaun₂; jaun₂ Te₁guiꞌ₅₄ në́₃ i₂cuë₅ bí₂ quióꞌ₅ nɨ₁ŋɨ₁₂.
14 Ia₁ juɨ₁liaꞌ₂ ca₂jme₃jenꞌ₅₄ Diú₄ Te₁guiꞌ₅₄ quianꞌ₅₄ juɨ₅bí₂ quióꞌ₅, le₂jaun₂ bá₄ jmo₃ a₂jeinꞌ₅₄ guëꞌ₂ jniog₄ ján₃.
15 ¿Tsa₁ ŋiꞌ₅₄ ꞌniaꞌ₂ jaun₂ a₂tén₅ të₂le₃ quióꞌ₅ Cristo bá₄ nɨ₁ŋɨꞌ₁ ꞌniaꞌ₂? ¿On₃ bá₄ lé₂ le₃tion₄ jniog₄ juɨ₁liaꞌ₂ a₂tén₅ nɨ₁ŋɨ₁ Cristo le₃ja₁con₂ juɨ₁liaꞌ₂ jan₂ ꞌio₅₄ i₂ꞌnag₅ quióꞌ₅? ¡Tsá₃ juɨ₁le₅₄ bá₄ le₂jaun₂!
16 ¿Tsa₁ ŋiꞌ₅₄ ꞌniaꞌ₂, juɨ₁liaꞌ₂ jan₂ dsa₂ ŋeꞌ₂ i₂nióꞌ₅ jág₁ quianꞌ₅₄ jan₂ ꞌio₅₄ i₂ꞌnag₅ quióꞌ₅, co₂ꞌnióꞌ₄ caun₂ nɨ₁ŋɨ́₅ bá₄ lë́₅ jë₁le₃oin₃ le₂jaun₂? Ia₁ ne₄ Si₂ juáꞌ₂: “Co₂ꞌnióꞌ₄ caun₂ nɨ₁ŋɨ́₅ lé₂ le₃oin₃ le₂jaun₂.”b
17 La₁ juɨ₁liaꞌ₂ jan₂ dsa₂ i₂rë₂quianꞌ₅₄ Te₁guiꞌ₅₄, co₂ꞌnióꞌ₄ jan₂ jme₂dsí₂ bá₄ lé₂ quiainꞌ₅₄.
18 Cuɨng₄ ꞌniaꞌ₂ ja₁con₂ a₂ꞌlɨgꞌ₅₄ juɨ₁liaꞌ₂ a₂qui₂ꞌno₅ dsa₂ dso₄ quianꞌ₅₄ i₂siánꞌ₂. Juɨ₁ꞌe₂ guë́₃ dso₄ siáꞌ₂ a₂ꞌno₅ dsa₂, ꞌno₂₃ le₃coꞌ₅₄ nɨ₁ŋɨ₁₂ bá₄. La₁ juɨ₁liaꞌ₂ dsa₂ i₂nióꞌ₅ jág₁ quianꞌ₅₄ i₂tsá₃ lɨ́n₅ dsɨ₂i₂gu₂, ꞌno₂₃ dso₄ ja₁con₂ nɨ₁ŋɨ₁ ꞌŋiog₅ bá₄.
19 ¿Tsa₁ ŋiꞌ₅₄ ꞌniaꞌ₂ a₂lë́₅ nɨ₁ŋɨꞌ₁ ꞌniaꞌ₂ caun₂ guáꞌ₅ ja₁ꞌen₅₄ Jme₂dsí₂ Jŋió₅ i₂ma₂cuɨn₃ Diú₄? Jaun₂ tsá₃ lë́₅ juaꞌ₅₄ a₂ténꞌ₅ guionꞌ₅₄ ꞌniaꞌ₂;
20 ia₁ i₂ma₂ca₂lán₂ ꞌmuꞌ₅₄ lɨn₃ Diú₄ ꞌniaꞌ₂. Jaun₂ bá₄ lë₃ ca₂tɨ́nꞌ₂ ꞌniaꞌ₂ jme₁ganꞌ₃ Diú₄ të₂le₃ quianꞌ₅₄ nɨ₁ŋɨꞌ₁ ꞌniaꞌ₂.