6 Ca₂le₃jë₃ a₂juáꞌ₅ jniá₂ në₅ cuë́₅ jniá₂ ꞌniaꞌ₂ jmɨg₄, on₃juaꞌ₅₄ rëꞌ₂ a₂tonꞌ₂ jniá₂ ꞌniaꞌ₂ caun₂ ꞌéiꞌ₃.

7 Conꞌ₂ juáꞌ₅ jniá₂ ꞌŋió₃, ꞌnio₃ jniá₂ juaꞌ₅₄ ca₂le₃jɨ́n₃ bá₄ dsa₂ ŋeꞌ₂ lɨ́n₅ liaꞌ₂ lɨ́ng₅ ꞌŋió₃; la₁ conꞌ₂ në₅ tɨn₂ Diú₄ jma₃quén₅ ma₂cuë́ꞌ₃ dsa₂ ꞌa₂ liaꞌ₂ niog₅ lɨ́n₅ dsa₂ le₂jain₂ le₂jain₂.

8 Juɨ₁liaꞌ₂ dsa₂ i₂tsá₃ gu₂ le₁jenꞌ₂, juɨ₁liaꞌ₂ dsa₂ mɨ́₂ i₂ma₂ꞌnɨ́₂ në́₃, juáꞌ₅ jniá₂ ꞌe₂ guë́₄ dse₃ juaꞌ₅₄ co₂ŋeiꞌ₅₄ bá₄ tsá₃ ma₃jéinꞌ₂ gu₂, tiainꞌ₃ juɨ₁liaꞌ₂ chan₂ jniá₂ tsá₃ ꞌein₂ gua₅₄ quiangꞌ₅₄.

9 La₁ia₁ në₁juaꞌ₂ tsá₃ quɨꞌ₅₄ jmɨg₄ jmo₃ tióꞌ₃ dsɨ́₅ në́₃, juɨ₁jeinꞌ₅₄ gu₂, ia₁ ja₂lɨn₃ guë́₄ dse₃ bá₄ jéinꞌ₂ co₂ŋeiꞌ₅₄ gu₂, liaꞌ₂ conꞌ₂ guë́₄ a₂ŋɨ́₄ dsɨ́inꞌ₂ ꞌŋiog₅.

10 La₁ juáꞌ₅ jniá₂ juɨ́g₂ ca₂le₃jɨ́n₃ juɨ₁liaꞌ₂ i₂ma₂tiánꞌ₅ le₁jenꞌ₂ gu₂, tsá₃ ma₃o₁tein₅₄ rɨinꞌ₅₄ le₂jain₂ le₂jain₂. ꞌÉiꞌ₃ në₅ on₃juaꞌ₅₄ ꞌéiꞌ₃ quió₃ jniá₂ ꞌŋió₃; ꞌéiꞌ₃ quióꞌ₅ Te₁guiꞌ₅₄ ꞌŋiog₅ bá₄ në₅.

11 La₁ në₁juaꞌ₂ chan₂ jan₂ dsa₂ mɨ́₂ ca₂téin₂ dsɨ₂i₂gu₂, juɨ₁gua₂ bá₄ tei₄ ꞌŋiog₅; o₃ juɨ₁ꞌei₅₄ bá₄ táng₃ caun₂ jág₁ quianꞌ₅₄ dsɨ₂i₂gu₂ ꞌe₂. Le₂në₅ bá₄ juɨ₁liaꞌ₂ dsa₂ ŋeꞌ₂ táng₃, tsá₃ ꞌnióꞌ₅ téin₂ dsa₂ mɨ́₂ quiáin₅.

12 Juɨ́g₂ jniá₂ juɨ₁liaꞌ₂ i₂siánꞌ₂, (jág₁ quió₃ ꞌŋió₃, on₃juaꞌ₅₄ ꞌéiꞌ₃ quióꞌ₅ Te₁guiꞌ₅₄): Chi₂juaꞌ₂ tsá₃ ꞌén₂ dsa₂ mɨ́₂ quián₅ juɨ₁liaꞌ₂ jan₂ dsa₂ ꞌén₂ rɨnꞌ₅₄ jniog₄, la₁ në₁juaꞌ₂ ꞌŋio₂ bá₄ dsɨ́₅ dsa₂ mɨ́₂ ꞌéi₂ guá₅ quiongꞌ₅₄, tsá₃ ꞌnióꞌ₅ téi₂ rɨnꞌ₅₄ jniog₄ ꞌéi₂.

13 O₃ chi₂juaꞌ₂ dsa₂ ŋeꞌ₂ i₂tsá₃ ꞌén₂ lɨ́n₅ dsɨ₂i₂gu₂ jan₂ dsa₂ mɨ́₂ i₂ꞌén₂, la₁ në₁juaꞌ₂ ꞌŋio₂ bá₄ dsɨ́₅ guá₅ quiainꞌ₅₄ dsa₂ mɨ́₂ ꞌéi₂, ján₃ bá₄ tsá₃ ca₂tɨ́n₂ dsa₂ mɨ́₂ téi₂ ján₃.

14 Ia₁ juɨ₁liaꞌ₂ dsɨ₂i₂gu₂ i₂tsá₃ ꞌén₂ në́₃, ma₂jmo₅ bá₄ Diú₄ a₂lë́₅ ꞌí₁ të₂le₃ quianꞌ₅₄ dsa₂ mɨ́₂; dsa₂ mɨ́₂ i₂tsá₃ ꞌén₂ në́₃, lë́₅ bá₄ ꞌí₁ quián₅ Diú₄ të₂le₃ quianꞌ₅₄ dsa₂ ŋeꞌ₂ i₂ꞌén₂ rɨnꞌ₅₄ jniog₄. Juaꞌ₅₄ meiꞌ₂ tsá₃ le₂jaun₂, ꞌuɨ́n₂ chiꞌ₂-guein₂ quiánꞌ₂ ꞌniaꞌ₂ tsá₃ le₁jɨ́in₃. La₁ia₁, liaꞌ₂ conꞌ₂ tí₅ jág₁, ma₂jŋió₅ bá₄ ꞌéi₂.

15 La₁ juɨ₁liaꞌ₂ dsa₂ ŋeꞌ₂ o₃ dsa₂ mɨ́₂ i₂tsá₃ ꞌén₂ në́₃, chi₂juaꞌ₂ tion₅₄ ꞌnio₃ téin₂ rɨinꞌ₅₄, juɨ₁tein₅₄ rɨinꞌ₅₄. Tsá₃ lë́₅ juaꞌ₅₄ rë₂jnág₅ juɨ₅ quióꞌ₅ dsa₂ i₂ꞌén₂ rɨnꞌ₅₄ chi₂juaꞌ₂ le₂jaun₂.^a Ia₁ ma₂të₃ Diú₄ jniog₄ a₂le₃chong₂ le₁ꞌág₄ tei₄ dsɨ₅.

16 Ia₁, ¿ꞌa₂ liaꞌ₂ ŋiꞌ₅₄ ꞌne₂ dsa₂ mɨ́₂, juaꞌ₅₄ lé₂ longꞌ₅₄ dsɨ₂i₂gogꞌ₂? Le₂jaun₂ guëꞌ₂ ꞌne₂ dsa₂ ŋeꞌ₂, ¿ꞌa₂ bá₄ liaꞌ₂ ŋiꞌ₅₄ juaꞌ₅₄ lé₂ longꞌ₅₄ dsa₂ mɨ́₂ quiángꞌ₂?

17 Jŋiaꞌ₅₄ liaꞌ₂ juɨ₁i₂nio₄ dsa₂ le₂jain₂ le₂jain₂ juɨ₁liaꞌ₂ niog₅ lë́₅ juɨ₅ ma₂cheiꞌ₃ Te₁guiꞌ₅₄, liaꞌ₂ conꞌ₂ lë́₅ ma₂të₅ Diú₄. ꞌÉiꞌ₃ në₅ cuë́₅ jniá₂ ca₂le₃jɨ́n₃ guáꞌ₅.

18 Chi₂juaꞌ₂ i₂lɨn₅₄ ma₂le₁uɨng₁ lo₄* liaꞌ₂ conꞌ₂ jme₁ca₂rë₃ꞌéin₂ ca₂të₃ Te₁guiꞌ₅₄, tsá₃ juɨ₁jme₂tsɨ́in₃ léi₄ jaun₂. O₃ chi₂juaꞌ₂ ꞌein₂ ca₂rë₃ꞌén₂ le₃quióꞌ₅ Te₁guiꞌ₅₄ të₃ tsá₃ rë₂uɨng₄ quióꞌ₅, tsá₃ juɨ₁guein₁₂ uɨ́ng₃ quióꞌ₅.

19 Ia₁ tsá₃ ꞌe₂ dsen₅₄ ta₁ juaꞌ₅₄ rë₂uɨng₄ o₃ tsá₃ rë₂uɨng₄ quióꞌ₅ dsa₂ te₁i₂nioi₅₄. A₂jme₃ti₃ ꞌéiꞌ₃ quióꞌ₅ Diú₄ bá₄ dsa₂ dsen₅₄ ta₁.

20 Le₂jan₂ le₂jan₂ bá₄ dsa₂ ca₂tɨ́in₂ le₃chain₂ liaꞌ₂ conꞌ₂ lɨ́in₅ ꞌŋiog₅ liaꞌ₂ conꞌ₂ jme₁ca₂të₃ Te₁guiꞌ₅₄.

21 Chi₂juaꞌ₂ jme₁lɨ́ngꞌ₄ dsa₂ i₂jme₂ti₃ a₂tsá₃ ꞌliangꞌ₅₄, liaꞌ₂ conꞌ₂ jme₁ca₂të₃ Te₁guiꞌ₅₄, tsá₃ jmo₂ ꞌɨ₅ ꞌauꞌ₂ a₂jaun₂; la₁ chi₂juaꞌ₂ ca₂cuɨn₃ jmɨg₄ a₂tsá₃ ma₃léngꞌ₂ dsa₂ i₂jme₂ti₃ ta₁, ja₂lɨn₃ guë́₄ dse₃ quioꞌ₅₄ juɨ₅ jaun₂.

22 Juɨ₁liaꞌ₂ dsa₂ i₂jme₁lɨ́n₄ i₂jme₂ti₅ ta₁ ne₄ dsa₂ liaꞌ₂ conꞌ₂ jme₁ca₂të₃ Te₁guiꞌ₅₄, la₁ rë₂në́₃ në́₃ ma₂lɨ́in₅ dsa₂ i₂jme₂ti₃ le₃ja₁con₂ Te₁guiꞌ₅₄. Ján₃ bá₄ guëꞌ₂ le₂jaun₂ juɨ₁liaꞌ₂ dsa₂ i₂tsá₃ ꞌein₂ ne₄ jme₁jme₂ti₃ liaꞌ₂ conꞌ₂ jme₁ca₂të₃ Te₁guiꞌ₅₄ la₁ rë₂në́₃ guëꞌ₂ në́₃, ma₂lɨ́in₅ dsa₂ i₂jme₂ti₃ ta₁ ne₄ Cristo.

23 I₂ca₂quɨ́n₁ ꞌmuꞌ₅₄ lɨn₃ bá₄ ꞌniaꞌ₂ ca₂láu₂ Cristo. Jaun₂ tsá₃ ma₃cuɨ́n₅ ꞌniaꞌ₂ jmɨg₄ juaꞌ₅₄ a₂jme₁tiꞌ₄ guë́₄ ne₄ dsa₂ mɨ₂güɨ́g₃.

24 Le₂në₅ bá₄ jaun₂, ꞌniaꞌ₂ rɨnꞌ₅₄ jniog₄, juɨ₁tiónꞌ₂ bá₄ ꞌniaꞌ₂ liaꞌ₂ jme₁lɨ́ngꞌ₄ liaꞌ₂ conꞌ₂ jme₁ca₂të₃ Diú₄ ꞌniaꞌ₂.

25 Në₃ në́₃, juɨ₁liaꞌ₂ dsa₂ mɨ₄ i₂tsá₃ dsa₂ ŋeꞌ₂ ma₂jiog₅, tsá₃ ꞌe₂ ꞌéiꞌ₃ ma₂ŋɨ₂ jniá₂ ja₁con₂ Te₁guiꞌ₅₄. La₂ cuë₅₄ jniá₂ jág₁ liaꞌ₂ conꞌ₂ ŋɨ́ꞌ₂ dsɨ₃, co₂ꞌnióꞌ₄ jan₂ i₂tí₅ jág₁ quióꞌ₅ ia₁ a₂ŋéi₂ dsɨ́₅ Te₁guiꞌ₅₄.

26 Jaun₂ lɨ́ng₂, ja₂lɨn₃ guë́₄ dse₃ juaꞌ₅₄ co₂ŋeiꞌ₅₄ guë́₄ juɨ₁chanꞌ₂ bá₄ ꞌniaꞌ₂ ꞌa₂ liaꞌ₂ lë́₅ changꞌ₂, ꞌuɨg₅₄ ia₁ ꞌŋio₅ lɨn₃ cha₂ o₂meꞌ₅₄ dsɨ₅ jmɨg₄ rë₂në́₃.

27 Chi₂juaꞌ₂ ma₂jenꞌ₂ gogꞌ₂, tsá₃ jmóꞌ₂ ꞌauꞌ₂ juaꞌ₅₄ téngꞌ₄ rɨ́ngꞌ₂. Chi₂juaꞌ₂ tsá₃ ma₂jenꞌ₂ guëꞌ₂ gogꞌ₂, tsá₃ lë₁ꞌnágꞌ₂ dsa₂ mɨ́₂ i₂neꞌ₅₄ quiangꞌ₅₄.

28 La₁ në₁juaꞌ₂ ca₂jenꞌ₂ guëꞌ₂ gogꞌ₂, on₃juaꞌ₅₄ ꞌe₂ dso₄ jaun₂. Le₂jaun₂ bá₄ ján₃ juɨ₁liaꞌ₂ dsa₂ mɨ₄, chi₂juaꞌ₂ ca₂jéinꞌ₂ gu₂, on₃juaꞌ₅₄ ꞌe₂ dso₄ jaun₂ ján₃. La₁ jŋiaꞌ₅₄ liaꞌ₂ a₂jaun₂ bá₄ juáꞌ₅ jniá₂, le₃chain₂ quian₅ o₂meꞌ₅₄ dsɨ₅ mɨ₂güɨ́g₃ la₂. A₂jaun₂ tsá₃ jme₁ꞌnio₃ jniá₂ dsɨ₂ŋɨ́ꞌ₂ ꞌniaꞌ₂.

29 A₂la₂ bá₄ ꞌnio₃ jniá₂ juáꞌ₄, rɨnꞌ₅₄ jniog₄. Tsá₃ ma₃uë́₂ le₃ꞌag₄ a₂dsióg₄ Jmɨg₄ quióꞌ₅ Te₁guiꞌ₅₄. ꞌUɨg₅₄ jaun₂, juɨ́g₂ jniá₂ ꞌniaꞌ₂: në₃ të₂le₃ ne₄ juɨ₅, ca₂le₃jɨ́n₃ i₂ma₂tiánꞌ₅ quianꞌ₅₄ dsa₂ mɨ́₂, juɨ₁le₂chain₂ në₂jag₄ bá₄ a₂tsá₃ dsa₂ mɨ́₂ quiáin₅ chan₂.

30 Juɨ₁liaꞌ₂ dsa₂ i₂chan₂ qui₂le₁quɨꞌ₂ dsɨ́₅, juɨ₁jmo₁₂ bá₄ dsɨ́₅ në₂jag₄ bá₄ a₂tsá₃ ꞌe₂ o₂i₁ dsɨ₅ chain₂. Le₂jaun₂ guëꞌ₂ juɨ₁liaꞌ₂ dsa₂ i₂jmo₅ ꞌioꞌ₂, ca₂tɨ́in₂ bá₄ jmo₃ në₂jag₄ bá₄ a₂tsá₃ dse₃ chain₂. Le₂jaun₂ guëꞌ₂ ján₃ juɨ₁liaꞌ₂ dsa₂ i₂qui₂lá₅ ꞌe₂ lá₅, juɨ₁jmo₁₂ bá₄ dsɨ́₅ në₂jag₄ bá₄ on₃juaꞌ₅₄ a₂quióꞌ₅ ꞌe₂ ma₂lá₃.

31 Le₂jaun₂ guëꞌ₂ juɨ₁liaꞌ₂ dsa₂ i₂jmóꞌ₂ ta₁ a₂cha₂ mɨ₂güɨ́g₃ la₂, juɨ₁jmo₁₂ bá₄ dsɨ́₅ në₂jag₄ bá₄ a₂tsá₃ chi₂quiain₂₃ jmɨg₄ a₂jaun₂. Ia₁ ma₂ja₂quián₃ dsɨ₃ŋɨ́₂ bá₄ liaꞌ₂ lë́₅ mɨ₂güɨ́g₃ la₂.

32 Jaun₂ ꞌnio₃ jniá₂ tsá₃ tónꞌ₂ ꞌniaꞌ₂ qui₂le₁quianꞌ₄ ꞌniaꞌ₂ o₂i₁ dsɨ₅. Ia₁ juɨ₁liaꞌ₂ jan₂ dsa₂ ŋeꞌ₂ i₂conꞌ₂ ꞌŋioꞌ₂ i₂tsá₃ dsa₂ mɨ́₂ quianꞌ₅₄, ꞌɨ₅ dsɨ́₅ të₂le₃ quióꞌ₅ Te₁guiꞌ₅₄, tonꞌ₂ jmo₂₃ bá₄ a₂ꞌŋio₂ dsɨ́₅ ꞌéi₂.

33 Ia₁ juɨ₁liaꞌ₂ dsa₂ i₂jenꞌ₂ gu₂ në́₃, ꞌŋio₅ lɨn₃ guë́₄ dsan₂ dsɨ́₅ juɨ₁liaꞌ₂ ꞌe₂ a₂niog₅ cha₂ mɨ₂güɨ́g₃, ꞌa₂ liaꞌ₂ jmo₃ a₂ꞌŋio₂ dsɨ́₅ ꞌio₅₄ quiáin₅.

34 Jma₃quén₅ bá₄ dsɨ₂jiog₅ dsɨ́₅. Juɨ₁liaꞌ₂ jan₂ ꞌio₅₄ i₂tsá₃ gu₂ ma₂rë₂jenꞌ₂, o₃ jan₂ dsa₂ mɨ₄ ꞌe₂, ꞌŋio₅ guë́₄ dsan₂ dsɨ́₅ të₂le₃ o₄quióꞌ₄ Te₁guiꞌ₅₄, a₂ꞌnio₃ léin₂ ꞌí₁ le₃ja₁con₂ Diú₄, liaꞌ₂ le₃quióꞌ₅ nɨ₁ŋɨ₁₂, liaꞌ₂ le₃quióꞌ₅ jme₂dsí₂ në́₃. La₁ juɨ₁liaꞌ₂ dsa₂ mɨ́₂ i₂ma₂chan₂ dsɨ₂i₂gu₂ guëꞌ₂ në́₃, ꞌŋio₅ lɨn₃ guë́₄ dsan₂ dsɨ́₅ juɨ₁liaꞌ₂ ꞌe₂ niog₅ cha₂ mɨ₂güɨ́g₃, ꞌa₂ liaꞌ₂ jmo₃ a₂ꞌŋio₂ dsɨ́₅ dsa₂ ŋeꞌ₂ quiáin₅.

35 A₂dse₃ quiánꞌ₂ bá₄ ꞌniaꞌ₂ juáꞌ₅ jniá₂ le₂në₅, on₃juaꞌ₅₄ rëꞌ₂ a₂jnɨ₄ jniá₂ quiánꞌ₂ ꞌniaꞌ₂, të₂le₃ ia₁jaun₂ le₃chanꞌ₂ ꞌniaꞌ₂ liaꞌ₂ conꞌ₂ dsi₂ten₅₄, ia₁jaun₂ lé₂ jangꞌ₅₄ ꞌniaꞌ₂ ꞌauꞌ₂ ne₄ Te₁guiꞌ₅₄ të₃ tsá₃ jnág₅ cha₂.

36 La₁ chi₂juaꞌ₂ ꞌein₂ chan₂ jan₂ dsa₂ mɨ₄ i₂jme₁ma₂lɨꞌ₅₄ jág₁ a₂jéinꞌ₂ gu₂ quiainꞌ₅₄, tonꞌ₂ ma₂ca₂ŋɨ́₂ jmɨg₄ i₁jéinꞌ₂ gu₂, chi₂juaꞌ₂ lɨ́in₂ a₂tsá₃ jmo₂₃ liaꞌ₂ dsi₂ten₅₄ ja₁con₂ ꞌéi₂, chi₂juaꞌ₂ le₂jaun₂ dsi₂ten₅₄ lé₂ a₂jéinꞌ₂ gu₂, juɨ₁jmo₁₂ bá₄ ꞌa₂ liaꞌ₂ ꞌŋio₂ dsɨ́₅; lé₂ bá₄ qui₂jéinꞌ₂ gu₂, ia₁ on₃juaꞌ₅₄ ꞌe₂ dso₄ jaun₂.

37 La₁ juɨ₁liaꞌ₂ dsa₂ i₂ma₂ꞌei₅ caun₂ dsɨ́₅, on₃juaꞌ₅₄ a₂ꞌnióꞌ₅ ꞌein₂ qui₂chi₂quióng₂ jmɨg₄, të₂le₃ quɨꞌ₅₄ jmɨg₄ jmo₃ ꞌí₁ ꞌŋiog₅, a₂dse₃ bá₄ jaun₂.

38 Jaun₂ le₂në₅ bá₄, juɨ₁liaꞌ₂ dsa₂ i₂jénꞌ₂ gu₂, a₂dse₃ bá₄ jmo₂₃; la₁ia₁ juɨ₁liaꞌ₂ i₂tsá₃ jénꞌ₂ gu₂ ja₂lɨn₃ guë́₄ dse₃ jmo₂₃.^b

39 ꞌI₄ ꞌéiꞌ₃ jiog₃ dsa₂ mɨ́₂ jŋiai₃ dsɨ₂i₂gu₂ ꞌa₂ conꞌ₂ jŋiaꞌ₅₄ jmɨg₄ chan₂ ꞌéi₂. Në₁ca₂jon₃ dsɨ₂i₂gu₂ guëꞌ₂ në́₃, jaun₂ guë́₄ le₃jɨin₅₄ guá₃ táng₃ jéinꞌ₂ gu₂ chi₂juaꞌ₂ ꞌein₂ quiainꞌ₅₄ ꞌnio₃, la₁ lë₃ juaꞌ₅₄ lɨ́n₅ dsa₂ ꞌén₂ ꞌéi₂.

40 La₁ ja₂lɨn₃ guë́₄ dse₃ le₃chain₂ juaꞌ₅₄ co₂ŋeiꞌ₅₄ tsá₃ ma₃gu₂ jéinꞌ₂ táng₃. Le₂në₅ conꞌ₂ lɨ́n₂ jniá₂ bá₄. Qui₂dsɨ₂jiog₅ dsɨ₃ conꞌ₂ lë́₅ jiog₅ Jme₂dsí₂ quián₅ Diú₄ bá₄, lɨ́n₂ jniá₂.