Juɨ₁liaꞌ₂ ŋɨ₄ jáꞌ₂ a₂qui₂rë₂jenꞌ₅₄ ne₄ diú₄ lag₄
8
La₂ juáꞌ₄ táng₃ juɨ₁liaꞌ₂ cuente quióꞌ₅ ŋɨ₄ jáꞌ₂ a₂qui₂jénꞌ₅ dsa₂ ne₄ diú₄ lag₄. Dsónꞌ₂ bá₄ jaun₂ cha₂ a₂ne₄ jniog₄, ca₂le₃jág₃. Juɨ₁liaꞌ₂ a₂ŋi₅ dsa₂ në́₃, a₂jaun₂ bá₄ jmo₅ a₂róin₂; la₁ juɨ₁liaꞌ₂ a₂ꞌnio₃ dsa₂ rɨinꞌ₅₄, a₂jaun₂ bá₄ jmo₅ a₂dsɨ₂cóin₃.
2 Chi₂juaꞌ₂ chan₂ i₂juáꞌ₂ ma₂tɨin₂, tsá₃ bá₄ guë́₄ ꞌe₂ ma₂tɨin₂ liaꞌ₂ conꞌ₂ dsi₂ten₅₄ le₃tɨin₂.
3 Chi₂juaꞌ₂ ꞌein₂ të₃dsónꞌ₂ ꞌnioi₃ Diú₄, i₂cuɨn₅ bá₄ Diú₄ dsa₂ le₂ꞌéi₂.
4 Jaun₂ në́₃, jág₁ juɨ₁liaꞌ₂ a₂quɨgꞌ₂ dsa₂ ŋɨ́₅ a₂ma₂të₁no₁ në₂jénꞌ₃ dsa₂ ne₄ diú₄ lag₄: ne₄ bá₄ jniog₄ jaun₂, ꞌi₁caun₂ tsá₃ ꞌe₂ quen₅ juɨ₁liaꞌ₂ diú₄ lag₄ ne₄ guaꞌ₅₄ ꞌuë₃ la₂, ia₁ jŋiaꞌ₅₄ liaꞌ₂ jan₂ bá₄ Diú₄ chan₂.
5 Juɨ₁ꞌa₂ guë́₃ la₂ chan₂ i₂të́ꞌ₂ dsa₂ diú₄ gueiꞌ₅₄ i₂juɨ́g₃ quianꞌ₅₄ ne₄ guaꞌ₅₄ ꞌuë₃, (ia₁ të₃dsónꞌ₂ lë́₅ le₂jaun₂ në́₃, a₂niog₅ chan₂ juɨn₅ “diú₄”, ján₃ guëꞌ₂ le₂jaun₂ juɨn₅ i₂gon₂ ján₃),
6 la₁ të₂le₃ quián₂ jniog₄ në́₃, jŋiaꞌ₅₄ liaꞌ₂ jan₂ bá₄ Diú₄ chan₂, i₂lɨ́n₅ Jmei₂ jniog₄, i₂ca₂jmo₃ ca₂le₃jë́₃ ꞌe₂ niog₅ cha₂. Le₂jaun₂ guëꞌ₂ jniog₄ në́₃ chong₂ o₄quióꞌ₄ ꞌéi₂. Jŋiaꞌ₅₄ liaꞌ₂ jan₂ tan₅₄ bá₄ i₂gon₂, i₂lɨ́n₅ Jesucristo. Të₂le₃ ne₄ o₄quióꞌ₄ ꞌéi₂ bá₄ ca₂lë₃ ca₂le₃jë́₃ a₂cha₂, ca₂të₂ jniog₄ guio₅₄ në́₃, chong₂ të₂le₃ quianꞌ₅₄ ꞌéi₂.
7 La₁ tsá₃ ca₂le₃jɨ́n₃ ŋi₅ a₂në₅. I₂chan₂ bá₄ guë́₄ i₂qui₂ma₂tɨn₂ dsɨ́₅ jme₂gain₃ diú₄ lag₄, jmo₂₃ bá₄ guë́₄ dsɨ́₅ juɨ₁liaꞌ₂ jme₁quɨgꞌ₂ ŋɨ́₅ a₂ma₂jáuꞌ₅ ne₄ diú₄ lag₄, ꞌuɨg₅₄ ia₁ a₂ꞌuan₅₄ jme₂dsí₂ quióꞌ₅, tsá₃ caun₂ a₂qui₂dsɨ₂jein₃ dsɨ́₅, ma₂ca₂rë₃ꞌiog₅ bá₄ jme₂dsí₂ quióꞌ₅.
8 Dsónꞌ₂ bá₄, on₃juaꞌ₅₄ o₄quióꞌ₄ má₃ náu₂ jniog₄ rë₂ ne₄ Diú₄. Ia₁ on₃juaꞌ₅₄ a₂náu₂ rë₂ guë́₄ ne₄ ꞌéi₂, në₁juaꞌ₂ ca₂que₅₄, on₃ guëꞌ₂ juaꞌ₅₄ a₂tsá₃ rë₂ tióg₂ në₁juaꞌ₂ tsá₃ ca₂que₅₄ guëꞌ₂ táng₃.
9 La₁ia₁ jag₄ deꞌ₂ ꞌniaꞌ₂, ia₁ conꞌ₂ tsá₃ ŋó₅ në₁qui₂ca₂sénꞌ₂ juɨ₁liaꞌ₂ i₂ꞌuan₅₄, ꞌuɨg₅₄ ia₁ a₂rë₂na₄ juɨ₅ quiánꞌ₂ ꞌniaꞌ₂ a₂lé₂ le₃quioꞌ₅₄.
10 Chi₂juaꞌ₂ ŋiꞌ₅₄ ꞌne₂ rë₂ ꞌa₂ liaꞌ₂ dsi₂ten₅₄ jmóꞌ₂, në₁juaꞌ₂ ca₂jág₂ jan₂ rɨnꞌ₅₄ i₂ꞌuan₅₄, i₂tsá₃ lɨn₄ rë₂ ŋɨ́ꞌ₂ dsɨ́₅, a₂ŋéiꞌ₂ quë́ꞌ₂ ja₁tión₂ diú₄ lag₄, ¿ꞌe₂ bá₄ lé₂ në₁juaꞌ₂ ca₂tiá₂ dsɨ́₅ ꞌéi₂ guë́ꞌ₃ a₂ma₂rë₂jenꞌ₅₄ ne₄ diú₄ lag₄?
11 O₄quióꞌ₄ a₂ŋiꞌ₅₄ ꞌne₂ jaun₂, dsɨ₃ꞌén₂ rɨ́ngꞌ₂ i₂ꞌuan₅₄ guë́₄ në́₃. Ca₂jon₃ Cristo o₄quióꞌ₄ ꞌéi₂ bá₄ ján₃.
12 Ia₁ në₁juaꞌ₂ jmoꞌ₂ ꞌniaꞌ₂ a₂tsá₃ caun₂ a₂qui₂dsɨ₂jein₃ dsɨ́₅ rɨ́ngꞌ₂ i₂ꞌuan₅₄, ꞌnauꞌ₂ ꞌniaꞌ₂ dso₄ të₂le₃ ne₄ Cristo.
13 Jaun₂ lë₃, chi₂juaꞌ₂ léi₄ ꞌŋió₃ bá₄ jniá₂ jmo₂₃ a₂tanꞌ₂ dso₄ rɨ́ngꞌ₃ o₄quióꞌ₄ ꞌe₂ a₂guëꞌ₂, ja₂lɨn₃ guë́₄ dse₃ o₁lɨ́gꞌ₂ jmɨg₄ tsá₃ ma₃quɨgꞌ₅₄ ŋɨ́₅, ia₁jaun₂ tsá₃ ma₃tiáinꞌ₃ dso₄.