Juɨ₁liaꞌ₂ a₂ca₂tɨ́n₂ jan₂ dsa₂ i₂chen₄ quián₅ Jesús
9
Dsónꞌ₂ bá₄ rë₂na₄ juɨ₅ a₂ca₂tɨ́ng₂ ca₂le₃jë́₃ conꞌ₂ lë́₅ ca₂tɨ́ng₂ ia₁ lɨ́ng₅ dsa₂ i₂chen₄, ia₁ ma₂ca₂jɨng₅₄ bá₄ Jesús i₂lɨ́n₅ Te₁guiꞌ₅₄ quián₂. Guionꞌ₅₄ bá₄ ꞌniaꞌ₂ në́₃, lɨ́ngꞌ₅ co₂ꞌnióꞌ₄ ta₁ a₂rë₂jniá₂ quió₃, të₂le₃ quióꞌ₅ Te₁guiꞌ₅₄.
2 ꞌAn₁ chan₂ bá₄ i₂lɨn₅₄ jmo₅ dsɨ́₅ a₂tsá₃ lɨ́n₅ jniá₂ dsa₂ i₂chen₄ quián₅ Te₁guiꞌ₅₄. La₁ ꞌniaꞌ₂ në́₃, ca₂tɨ́nꞌ₂ bá₄ ꞌniaꞌ₂ jmóꞌ₂ ꞌauꞌ₂, le₂në₅ lɨ́ng₅, ia₁ ꞌniaꞌ₂ bá₄ lɨ́ngꞌ₅ i₂jángꞌ₅ léi₄ ta₁ quió₃, a₂të₃dsónꞌ₂ lɨ́ng₅ jan₂ dsa₂ i₂chen₄ quián₅ Te₁guiꞌ₅₄.
3 Juɨ₁liaꞌ₂ dsa₂ i₂con₂ ꞌí₁ ja₁con₂ jniá₂, le₂la₂ bá₄ lë́₅ jág₁ a₂jeinꞌ₅₄ jniá₂ quióꞌ₅:
4 ¿o₃ bá₄ tsá₃ ca₂tɨ́n₂ jniá₂ gue₅₄ ca₂le₃jë́₃ ꞌe₂ cuë₅ dsa₂ a₂guëꞌ₅₄, o₃ ꞌe₂ cuë₅ dsa₂ a₂guɨꞌ₅₄ ján₃?
5 ¿O₃ bá₄ tsá₃ ca₂tág₂ jniaꞌ₅₄ jŋiá₂ jan₂ dsa₂ mɨ́₂ i₂ꞌén₂ i₂jenꞌ₄ jniaꞌ₅₄ gu₂ quianꞌ₅₄, juɨ₁liaꞌ₂ jmo₅ dsa₂ i₂chen₄ siánꞌ₂ quianꞌ₅₄ guëꞌ₂ chiꞌ₂ rɨnꞌ₅₄ Te₁guiꞌ₅₄ ꞌŋiog₅, juɨ₁liaꞌ₂ chan₂ Pe₄a në́₃?
6 ¿O₃ bá₄ lɨ́nꞌ₂ ꞌniaꞌ₂, jŋiaꞌ₅₄ liaꞌ₂ jniá₂ quianꞌ₅₄ Bernabé ca₂tág₂ jmó₁ ta₁ a₂ꞌnióg₂ a₂dsɨ₃ŋág₂?
7 ¿ꞌEin₂ bá₄ ꞌlióg₂ jme₂ti₃ chi₂juaꞌ₂ ꞌŋiog₅ bá₄ quí₃ ꞌliainꞌ₅₄ a₂dsɨ₂ŋɨ́i₂? ¿I₂ꞌein₂ bá₄ ꞌéi₂ i₂chéinꞌ₅ nɨ₁uɨng₂ uvas juaꞌ₅₄ tsá₃ guë́ꞌ₃ guëꞌ₂ mɨ́g₂ jaun₂? O₃ juɨ₁liaꞌ₂ dsa₂ i₂jmo₅ ta₁ jme₂canꞌ₅₄ chein₄ lau₂, ¿Ján₃ guëꞌ₂ tsá₃ lé₂ le₃ꞌɨ́nꞌ₂ dsíꞌ₁ jáꞌ₂?
8 Tsá₃ o₁lenꞌ₂ ꞌniaꞌ₂ juaꞌ₅₄ jniá₂ a₂lë₁juáꞌ₅ conꞌ₂ lë́₂ dsɨ₃ ꞌŋió₃; ján₃ bá₄ le₂në₅ juáꞌ₂ ne₄ Si₂ ꞌÉiꞌ₃.
9 Ia₁ chi₁ton₅ ne₄ Si₂ ꞌÉiꞌ₃ quióꞌ₅ Moisés le₂la₂: “Tsá₃ tóꞌ₂ ꞌniaꞌ₂ ꞌnei₅₄ mɨ₂ꞌo₄ ca₁juɨ₅ i₂jmo₅ ta₁ i₂chén₂ mɨ́g₂ trigo.”b ¿A₂ꞌɨ₅ dsɨ́₅ Diú₄ ca₁juɨ₅ a₂juáꞌ₂ le₂jaun₂?
10 ¿O₃ a₂juáꞌ₂ o₄quián₂ jniog₄ bá₄? Dsónꞌ₂ bá₄ o₄quián₂ jniog₄ bá₄ ca₂i₃toꞌ₅₄ ꞌéiꞌ₃ në₅ ne₄ Si₂. Ia₁ le₂jaun₂ bá₄ lë́₅ juɨ₁liaꞌ₂ dsa₂ i₂quiaꞌ₂ ꞌuë₃ quianꞌ₅₄ guëꞌ₂ dsa₂ i₂cágꞌ₅ mɨ́g₂ trigo. Tsá₃ a₁jaun₂ juaꞌ₅₄ a₂lë₁jmo₅ dsa₂ ꞌéi₂ ta₁ a₂jmo₂₃, juaꞌ₅₄ tsá₃ ꞌɨ́n₂ dsɨ́₅ a₂ca₂tɨ́in₂ a₂cágꞌ₃ jaun₂.
11 Jaun₂ le₂në₅, chi₂juaꞌ₂ jaun₂ ma₂jŋí₁ jniaꞌ₅₄ jë₄ quiánꞌ₂ ꞌniaꞌ₂ caun₂ jon₂ a₂gu₂dsí₂, ¿a₁lɨn₃ ꞌŋio₅ lɨ́nꞌ₂ ꞌniaꞌ₂ juaꞌ₅₄ a₂cagꞌ₄ ca₂la₂ ja₁conꞌ₂ ꞌniaꞌ₂ juɨ₁liaꞌ₂ a₂dsɨ₃ŋág₂ jniaꞌ₅₄ të₁liaꞌ₂ chong₂?
12 Chi₂juaꞌ₂ ca₂tɨ́n₂ dsa₂ siánꞌ₂ a₂jme₁ꞌoinꞌ₄ ꞌniaꞌ₂, ꞌë₂ guë́₄ bá₄ ca₂tág₂ jniaꞌ₅₄.
La₁ tsá₃ ꞌe₂ ma₂ca₂chi₁quian₁ jniaꞌ₅₄ ꞌniaꞌ₂ jmɨg₄ juaꞌ₅₄ a₂mɨ₂ a₂ca₂tág₂ jniaꞌ₅₄ jaun₂. Ma₂jmó₁ bá₄ jniaꞌ₅₄ tióꞌ₃ dsɨ₅ ca₂le₃jë́₃ ia₁jaun₂ tsá₃ lë́₅ juaꞌ₅₄ cha₂ jnág₅ a₂qui₂dsɨ₃ꞌag₅ jág₁ dse₃ quióꞌ₅ Cristo.
13 ¿Tsa₁ ŋiꞌ₅₄ ꞌniaꞌ₂, juɨ₁liaꞌ₂ dsa₂ i₂niog₅ ne₄ a₂jŋió₅ dsi₂néi₂ guáꞌ₅, guë́ꞌ₅ juɨ₁liaꞌ₂ a₂cha₂ dsi₂néi₂ guáꞌ₅; juɨ₁liaꞌ₂ dsa₂ i₂tionꞌ₅₄ qui₂jme₂ti₃ ne₄chei₂ në́₃, ján₃ guëꞌ₂ queinꞌ₅₄ gue₂₃ a₂jénꞌ₅ ne₄chei₂?
14 Ján₃ bá₄ le₂jaun₂ ca₂jmo₃ Te₁guiꞌ₅₄ ꞌéiꞌ₃, juɨ₁liaꞌ₂ dsa₂ i₂i₂nio₄ qui₂ꞌë́₂ jág₁ dse₃, quianꞌ₅₄ ta₁ jaun₂ le₃chain₂.
15 La₁ jniá₂ në́₃, tsá₃ ꞌe₂ ma₂ca₂chi₁quian₁ jniá₂ jmɨg₄ ꞌniaꞌ₂ juaꞌ₅₄ a₂tion₅₄ lé₂ a₂ca₂tɨ́ng₂. On₃ guëꞌ₂ juaꞌ₅₄ jaun₂ jmo₅ jniá₂ si₂ la₂ neꞌ₅₄ ꞌniaꞌ₂ juaꞌ₅₄ a₂ꞌɨ́n₂ dsɨ₃ a₂jmóꞌ₂ le₂jaun₂ quianꞌ₅₄ jniá₂. ¡Të₂le₃ quió₃ jniá₂, ja₂lɨn₃ guë́₄ dse₃ juaꞌ₅₄ jóng₂, liaꞌ₂ conꞌ₂ guë́₄ në₁juaꞌ₂ ꞌein₂ jné₅ juɨ₅ a₂tsá₃ ma₃jme₁ti₁₂ guë́₄ ta₁ quió₃ a₂jmo₂₃ tángꞌ₅!
16 La₁ia₁, juɨ₁liaꞌ₂ jme₁ꞌë́₅ jniá₂ jág₁ dse₃, tsá₃ ca₂tɨ́n₂ jniá₂ dsia₅₄ jág₁ táꞌ₅, ia₁ tion₅₄ ꞌnióꞌ₅ ca₂tɨ́ng₂ bá₄ qui₂ꞌë́₄ dsa₂ jág₁ dse₃. ¡ꞌE₂ guë́₄ juɨ́g₂ jniá₂ në₁juaꞌ₂ tsá₃ ma₃ca₂ꞌë́₃ jniá₂ jág₁ dse₃!
17 Ia₁ në₁juaꞌ₂ ꞌë́₅ jniá₂ jág₁ dse₃ a₂ꞌŋio₂ dsɨ₃ ꞌŋió₃, gue₅₄ bá₄ ꞌliangꞌ₅₄. La₁ në₁juaꞌ₂ tsá₃ jmo₂₃ a₂ꞌŋio₂ dsɨ₃ ꞌŋió₃, a₂lë₁jme₂tí₁ bá₄ jniá₂ ta₁ a₂niog₅ gu₃ jmo₅₄.
18 ¿Na₅ bá₄ ꞌlianꞌ₅₄ jniá₂ jaun₂ në́₃? A₂jaun₂ bá₄ ꞌlianꞌ₅₄ jniá₂: a₂lé₂ qui₁ꞌë́₄ jniá₂ jág₁ dse₃ ja₁con₂ dsa₂, a₂tsá₃ ꞌliaꞌ₅₄ can₅₄, on₃juaꞌ₅₄ chi₁quiang₁₂ jmɨg₄ gue₅₄ a₂ca₂tɨ́ng₂.
19 O₁jŋiaꞌ₅₄ la₂ jɨn₅₄ jniá₂, on₃juaꞌ₅₄ chan₂ ꞌein₂ ne₄ jme₂tí₁, la₁ jmo₅₄ jniá₂ dsɨ₃ në₂jag₄ bá₄ i₂ma₂rë₂ꞌŋeꞌ₅₄ jniá₂ quián₅ ca₂le₃jɨ́n₃, ia₁jaun₂ lé₂ le₃léi₂ guë́₄ juɨn₅ dsa₂ të₂le₃ quióꞌ₅ Cristo.
20 Juɨ₁liaꞌ₂ jme₁ꞌeng₅₄ quiangꞌ₅₄ dsa₂ judíos*, jmo₂₃ dsɨ₃ në₂jag₄ bá₄ lɨ́ng₅ co₂ꞌnióꞌ₄ jan₂ dsa₂ judío, ia₁jaun₂ cuɨn₃ jmɨg₄ a₂jóin₄ jniá₂. Juɨ₁liaꞌ₂ ja₁con₂ dsa₂ i₂tionꞌ₅₄ ꞌÉiꞌ₃ quióꞌ₅ Moisés, jmo₅₄ jniá₂ dsɨ₃ në₂jag₄ bá₄ a₂ꞌeng₅₄ ꞌÉiꞌ₃, ia₁jaun₂ jón₄ jniá₂ juɨ₁liaꞌ₂ i₂tionꞌ₅₄ ꞌÉiꞌ₃, (o₁jŋiaꞌ₅₄ la₂ tsá₃ ꞌÉiꞌ₃ jaun₂ ꞌeng₅₄ të₃dsónꞌ₂).
21 Të₂le₃ quióꞌ₅ guëꞌ₂ juɨ₁liaꞌ₂ dsa₂ i₂tsá₃ tionꞌ₅₄ ꞌÉiꞌ₃ në́₃, ján₃ bá₄ co₂rɨng₂ quianꞌ₅₄ dsa₂ ꞌéi₂ jmo₂₃ dsɨ₃, ia₁jaun₂ jóng₄ juɨ₁liaꞌ₂ dsa₂ i₂tsá₃ tionꞌ₅₄ ꞌÉiꞌ₃, (o₁jŋiaꞌ₅₄ la₂ tsá₃ lon₄ jniá₂ ne₄ ꞌÉiꞌ₃ quióꞌ₅ Diú₄, a₂ꞌeng₅₄ bá₄ ꞌéiꞌ₃ quióꞌ₅ Cristo).
22 Juɨ₁liaꞌ₂ ja₁con₂ dsa₂ ꞌuan₅₄ i₂tsá₃ lɨn₄ ma₂ꞌén₂ rë₂, ján₃ bá₄ le₂jaun₂ jmo₂₃ dsɨ₃ lɨ́ng₅, ia₁jaun₂ jóng₄ juɨ₁liaꞌ₂ i₂ꞌuan₅₄. Ja₁con₂ ca₂le₃jɨ́n₃ dsa₂ ma₂jmo₃ jniá₂ dsɨ₃ a₂co₂rɨng₂ quianꞌ₅₄ ca₂lë₃jɨ́n₃, ia₁jaun₂ cuɨn₃ jmɨg₄ a₂lé₂ le₃lión₂ i₂lɨn₅₄.
23 Ca₂le₃jë́₃ a₂në₅ jmo₅ jniá₂ o₄quióꞌ₄ jág₁ dse₃, ia₁jaun₂ bá₄ quenꞌ₅₄ jniá₂ të₂le₃ quianꞌ₅₄ jág₁ dse₃.
24 ¿Tsa₁ ŋiꞌ₅₄ ꞌniaꞌ₂ juɨ₁liaꞌ₂ dsa₂ i₂i₂nio₄ co₂chiꞌ₅₄ jme₁co₂₃, ca₂le₃jɨ́n₃ bá₄ ꞌéi₂ i₂nioi₅₄, la₁ i₂jan₂ tan₅₄ juɨ₁liaꞌ₂ i₂lɨ́ꞌ₂ bá₄, gue₅ premio? Le₂jaun₂ bá₄ ꞌniaꞌ₂ ján₃, quenꞌ₂ bí₂ o₂nógꞌ₅ co₂chiꞌ₅₄ ia₁jaun₂ guéiꞌ₁ ꞌniaꞌ₂ premio.
25 Ca₂le₃jɨ́n₃ dsa₂ i₂jme₂tɨn₅ ia₁ cha₂ ja₁lë́₄ jág₁ a₂dsɨ₃cáu₂, jmo₂₃ ꞌí₁ ꞌŋiog₅, ia₁jaun₂ bá₄ líꞌ₂ caun₂ corona a₂jiog₅ co₂ꞌna₂. La₁ jniog₄ në́₃ quenꞌ₂ bí₂ léi₂ caun₂ corona a₂jiog₅ co₂tan₅₄ bá₄.
26 Jaun₂ le₂në₅, ꞌŋió₃ jniá₂ në́₃, on₃juaꞌ₅₄ a₂lë₁i₂ŋɨ₄ jniá₂ co₂chiꞌ₅₄; jaun₂ jme₁quɨ́nꞌ₂ jniá₂, on₃juaꞌ₅₄ a₂lë₁dsɨ₂dsí₂ jaꞌ₂.
27 Të₂le₃ jmaꞌ₄ cuë́₅ uɨg₅ ŋɨ₃ ꞌŋió₃, në₂jag₄ bá₄ a₂rë₂ꞌŋeꞌ₅₄, conꞌ₂ tsá₃ ŋó₅ në₁juaꞌ₂ të₁tsɨngꞌ₄ ꞌlɨgꞌ₅₄ ꞌŋió₃, liaꞌ₂ conꞌ₂ jme₁ca₂jme₁tɨng₅ i₂siánꞌ₂.