Toꞌ₂ jág₁ a₂tsá₃ jme₃gan₃ dsa₂ diú₄ lag₄
10
Tsá₃ ꞌnio₃ jniá₂ juaꞌ₅₄ a₂tsá₃ ŋiꞌ₅₄ ꞌniaꞌ₂ rɨnꞌ₅₄ jniog₄, a₂jme₁tionꞌ₅₄ dsa₂ canꞌ₅₄ quián₂ jniaꞌ₅₄ ma₂lɨ́gꞌ₂ néꞌ₃ jnei₅, jaun₂ guë́₄ ca₂ŋɨ́i₃ ca₂le₃jɨ́in₃ Jmɨ₁ŋíꞌ₄ Guéin₂.
2 Ca₂tónꞌ₂ dsa₂ co₂lë₅ ca₂le₃jɨ́in₃ quiainꞌ₅₄ Moisés jë₄ jnei₅ quianꞌ₅₄ jë₄ jmɨ₁ŋíꞌ₄ në́₃.
3 Le₂jaun₂ bá₄ ján₃, ca₂guë́ꞌ₃ co₂dsia₅ ca₂le₃jɨ́in₃ má₃ a₂gu₂dsí₂;
4 ca₂ꞌɨnꞌ₃ jmɨg₂ a₂gu₂dsí₂ ján₃. Ia₁ ca₂ꞌɨnꞌ₃ jmɨg₂ a₂ca₂ꞌia₂ dsoꞌ₂ nɨ₁ꞌlau₂ a₂gu₂dsí₂ jaun₂ a₂ca₂jme₃quiongꞌ₅₄ ca₂le₃jë́₃ jmɨg₄ tioinꞌ₅₄ juɨ₅. Nɨ₁ꞌlau₂ jaun₂ në́₃, Cristo bá₄ ꞌéi₂.
5 La₁ia₁, meiꞌ₂ tsá₃ le₃jɨ́n₃ dsa₂ ꞌéi₂ në́₃, tsá₃ ca₂jmo₃ a₂ꞌŋio₂ dsɨ́₅ Diú₄. Jaun₂ ne₄ ꞌuɨg₅₄ jaun₂, qui₂i₃gaꞌ₅₄ nɨ₁ŋɨ₁₂ ꞌuë₃ quein₂ co₂ꞌŋiog₅ jaun₂.
6 Ca₂le₃jë́₃ a₂në₅ ca₂lë₃ ia₁jaun₂ lë́₅ caun₂ jág₁ a₂jángꞌ₅ léi₄ quián₂ jniog₄ jmɨg₄ në₃, ia₁jaun₂ tsá₃ jmó₁ jniog₄ ꞌɨ́n₅ dsɨ₅ ja₁con₂ a₂ꞌlɨgꞌ₅₄, juɨ₁liaꞌ₂ ca₂jmo₃ dsa₂ ꞌéi₂ ꞌɨ́n₅ dsɨ́₅.
7 Jaun₂ juɨ́g₂ jniá₂ ꞌniaꞌ₂, tsá₃ jme₁ganꞌ₃ ꞌniaꞌ₂ diú₄ lag₄, juɨ₁liaꞌ₂ ca₂jmo₃ i₂lɨn₅₄ dsa₂ ꞌéi₂; juɨ₁liaꞌ₂ juáꞌ₂ ne₄ Si₂: “Ca₂tiánꞌ₂ dsa₂ ca₂guë́ꞌ₃ qui₂ca₂ꞌɨnꞌ₃ në́₃, jaun₂ guë́₄ qui₂ca₂nau₂, ca₂co₃.”a
8 Tsá₃ ca₂tág₂ jniog₄ ꞌnióg₁ dso₄ juaꞌ₅₄ nióꞌ₄ jniog₄ jág₁ quianꞌ₅₄ juɨ₁ꞌein₂ guë́₃, juɨ₁liaꞌ₂ ca₂jmo₃ i₂lɨn₅₄ dsa₂ ꞌéi₂. Ne₄ ꞌuɨg₅₄ jaun₂, quianꞌ₅₄ co₂jmɨg₄ ca₂dsan₃ conꞌ₂ guióg₂-ꞌnɨ₅ mei₅ dsa₂ ꞌéi₂.
9 On₃ guëꞌ₂ ca₂tág₂ jniog₄ a₂quiong₅₄ táu₂ Te₁guiꞌ₅₄ juɨ₁liaꞌ₂ ca₂jmo₃ i₂lɨn₅₄ dsa₂ ꞌéi₂, jaun₂ qui₂ca₂dsain₃, qui₂ca₂cagꞌ₂ dsɨ₂mɨꞌ₂.
10 On₃ guëꞌ₂ chi₁ꞌɨ́nꞌ₄ ꞌniaꞌ₂ uɨg₅ Diú₄, juɨ₁liaꞌ₂ ca₂jmo₃ i₂lɨn₅₄ dsa₂ ꞌéi₂, jaun₂ ca₂chen₃ Diú₄ ángel i₂quian₅ ꞌmú₃, ca₂jme₃dsiain₂₃ dsa₂ ꞌéi₂.
11 Le₂në₅ bá₄ ca₂i₃ŋɨ́₂ dsa₂ ꞌéi₂, ia₁jaun₂ jiógꞌ₂ ꞌí₁ lë́₅ léi₄; ca₂i₃toꞌ₅₄ ne₄ Si₂ co₂ꞌnióꞌ₄ caun₂ jág₁ a₂i₂ꞌag₅₄ të₃jŋiá₅, ia₁jaun₂ dsiogꞌ₂ dsɨ₅ jniog₄ jmɨg₄ në₃, ia₁ ma₂ja₂quián₃ bá₄ le₃ꞌŋia₅ jmɨg₄ a₂le₂ti₃ a₂lë́₅ dsɨ́₅ Diú₄ jmo₃ ja₁con₂ jniog₄.
12 Le₂në₅ bá₄, chi₂juaꞌ₂ ꞌein₂ lɨ́n₂ chéinꞌ₅ tiá₂ a₂ꞌéin₂, juɨ₁jmo₁₂ ꞌí₁ ia₁jaun₂ tsá₃ tiáinꞌ₃.
13 Tsá₃ ꞌe₂ táu₂ ma₂i₂ŋɨ́ꞌ₂ ꞌniaꞌ₂, jŋiaꞌ₅₄ liaꞌ₂ a₂qui₂dsɨ₂ŋɨ́₂ dsa₂ mɨ₂güɨ́g₃. La₁ i₂rë₂tiꞌ₅₄ bá₄ Diú₄, tsá₃ cuë₃ jmɨg₄ juaꞌ₅₄ ŋɨ́₄ a₂qui₂dsɨ₁juɨn₅₄ ꞌa₂ conꞌ₂ jŋiaꞌ₅₄ tiangꞌ₃. Të₂le₃ ꞌŋiog₅ bá₄ Diú₄ jmo₃ caun₂ juɨ₅ ꞌa₂ liaꞌ₂ lé₂ jmóꞌ₂ a₂tiangꞌ₃, juɨ₁ꞌe₂ guë́₃ caun₂ táu₂ já₅.
14 Jaun₂ juɨ́g₂ jniá₂ ꞌniaꞌ₂ rɨnꞌ₅₄ jniog₄, quiá₂ ꞌniaꞌ₂ cau₅ ja₁jme₂juɨnꞌ₂ dsa₂ diú₄ lag₄.
15 Juɨ́g₂ jniá₂ ꞌniaꞌ₂ dsa₂ i₂ŋɨ́ꞌ₂ dsɨ́₅: quion₂ deꞌ₂ ꞌniaꞌ₂ caun₂ ꞌí₁ a₂juáꞌ₅.
16 Juɨ₁liaꞌ₂ jme₁quianꞌ₅₄ jniog₄ rɨnꞌ₅₄, ꞌneꞌ₂ jniog₄ a₂ꞌa₄ copa jŋió₅, cuë₂ ti₁ꞌmagꞌ₄ Diú₄: ¿on₁juaꞌ₅₄ a₂queinꞌ₄ jniog₄ jmɨ₄ Cristo? Le₂jaun₂ bá₄ ján₃ juɨ₁liaꞌ₂ jme₁quianꞌ₅₄ jniog₄ rɨnꞌ₅₄ jmo₂ dsióg₁ i₁ŋíꞌ₄: ¿on₁juaꞌ₅₄ a₂queinꞌ₄ jniog₄ nɨ₁ŋɨ₁ Cristo?
17 Juɨ₁liaꞌ₂ caun₂ bá₄ i₁ŋíꞌ₄ lë́₅, ján₃ bá₄ le₂jaun₂ jniog₄ në́₃, o₁jŋiaꞌ₅₄ la₂ juag₅ jniog₄ lë́₂, la₁ caun₂ bá₄ nɨ₁ŋɨ́₅ lág₅ jniog₄, ia₁ caun₂ i₁ŋíꞌ₄ bá₄ que₂ jniog₄.
18 Quion₂ deꞌ₂ ꞌniaꞌ₂ ꞌí₁ ꞌa₂ liaꞌ₂ lë́₅ juɨg₂ Israel: ¿Tsa₁ lɨ́nꞌ₂ ꞌniaꞌ₂, jŋiaꞌ₅₄ dsa₂ i₂guë́ꞌ₅ má₃ ŋɨ₄ jáꞌ₂ a₂qui₂rë₂jenꞌ₅₄ ne₄chei₂, le₂jaun₂ bá₄ queinꞌ₅₄ guioin₅₄ ne₄chei₂ jaun₂?
19 Tsá₃ juɨ́g₂ jniá₂ ꞌniaꞌ₂ juaꞌ₅₄ a₂cha₂ bí₂ ꞌio₅ diú₄ lag₄, on₃ guëꞌ₂ le₂jaun₂ ŋɨ́₅ a₂te₁ꞌi₁ ne₅₄.
20 Të₂le₃ juáꞌ₅ jniá₂, jme₁jénꞌ₅ dsa₂ ꞌe₂ qui₂jénꞌ₅ ne₄ ꞌéi₂, qui₂jénꞌ₅ dsa₂ a₂jaun₂ ne₄ je₂naꞌ₅₄, on₃juaꞌ₅₄ rëꞌ₂ ne₄ Diú₄ të₃dsónꞌ₂. Jaun₂ tsá₃ ꞌnio₃ jniá₂ juaꞌ₅₄ quenꞌ₅₄ ꞌniaꞌ₂ quianꞌ₅₄ je₂naꞌ₅₄.
21 Tsá₃ lé₂ ꞌagꞌ₅₄ ꞌniaꞌ₂ copa quióꞌ₅ Te₁guiꞌ₅₄, chi₂juaꞌ₂ ján₃ guëꞌ₂ ꞌagꞌ₅₄ táng₃ copa quióꞌ₅ je₂naꞌ₅₄. On₃ guëꞌ₂ lé₂ quenꞌ₅₄ ꞌniaꞌ₂ ne₄ mesa quióꞌ₅ Te₁guiꞌ₅₄, chi₂juaꞌ₂ ján₃ guëꞌ₂ quenꞌ₅₄ táng₃ ꞌniaꞌ₂ ne₄ mesa quióꞌ₅ je₂naꞌ₅₄.
22 ¿ꞌE₂ lé₂ në́₃? ¿O₃ bá₄ lé₂ le₃jmó₁ jniog₄ ia₁jaun₂ le₃dsíꞌ₅ Te₁guiꞌ₅₄ o₄quián₂ jniog₄? ¿O₃ bá₄ ꞌuauꞌ₂ guë́₄ jniog₄ liaꞌ₂ conꞌ₂ guë́₄ ꞌéi₂?
ꞌA₂ conꞌ₂ jŋiaꞌ₅₄ cuë₂₃ jmɨg₄ ia₁ a₂lág₅ jniog₄ dsa₂ quián₅ Cristo
23 Dsónꞌ₂ bá₄ dsau₅: “ꞌI₄ bá₄ ꞌéiꞌ₃ le₃jmo₃ dsa₂ ꞌe₂ ꞌnio₃ jmo₃”, la₁ tsá₃ juaꞌ₅₄ ca₂le₃jë́₃ a₂jaun₂ jme₂ꞌo₅₄; dsau₅ bá₄: “ꞌI₄ ꞌéiꞌ₃ le₃jmo₃ dsa₂ ca₂le₃jë́₃ ꞌe₂ ꞌnio₃ jmo₃”, la₁ia₁ tsá₃ juaꞌ₅₄ ca₂le₃jë́₃ a₂jaun₂ jmo₃ a₂dsɨ₃cón₃ dsa₂ të₂le₃ quióꞌ₅ jme₂dsí₂.
24 ꞌNióꞌ₅ bá₄ ꞌnoꞌ₂ dsa₂ juɨ₅ jmo₃ a₂dse₃ le₃ja₁con₂ rɨinꞌ₅₄, on₃juaꞌ₅₄ rëꞌ₂ jmáꞌ₃ liaꞌ₂ a₂dse₃ ja₁coin₂ ꞌŋiog₅.
25 Quéꞌ₂ bá₄ ꞌniaꞌ₂ liaꞌ₂ ꞌei₅ ne₄ a₂dsɨ₂ꞌnag₂ ꞌmaꞌ₅₄, lë₃ juaꞌ₅₄ tsá₃ ꞌe₂ cáunꞌ₂ ꞌniaꞌ₂ ꞌí₁ o₄quióꞌ₄ a₂qui₂dsɨ₂jŋi₅ ꞌauꞌ₂ ꞌniaꞌ₂.
26 Ia₁: “Guaꞌ₅₄ ꞌuë₃, quianꞌ₅₄ guë́₄ ca₂le₃jë́₃ ꞌe₂ niog₅ cha₂ ja₁jaun₂, a₂quióꞌ₅ Te₁guiꞌ₅₄ jë₂ bá₄ jaun₂.”b
27 Në₁juaꞌ₂ ꞌein₂ dsa₂ i₂tsá₃ ꞌén₂ ca₂të₃ ꞌniaꞌ₂ a₂o₁quéꞌ₂ ja₁quióꞌ₄, në₁juaꞌ₂ ꞌniogꞌ₂ ꞌniaꞌ₂ o₁nógꞌ₅, jaun₂ quéꞌ₂ bá₄ ꞌniaꞌ₂ ca₂le₃jë́₃ ꞌe₂ niog₅ dsia₃ dsa₂ neꞌ₅₄, lë₃ juaꞌ₅₄ tsá₃ cáunꞌ₂ ꞌí₁ o₄quióꞌ₄ a₂qui₂dsɨ₂jŋi₅ ꞌauꞌ₂ ꞌniaꞌ₂.
28 La₁ në₁juaꞌ₂ chan₂ guëꞌ₂ ꞌein₂ juáꞌ₂: “Má₃ a₂quë́ꞌ₂ ꞌniaꞌ₂ në₅ a₂ma₂jáuꞌ₅ jme₁rë₂jenꞌ₅₄ ne₄ diú₄ lag₄ bá₄ në₅”, co₂dsia₅ tsá₃ ma₃quë́ꞌ₂ ꞌniaꞌ₂, o₄quióꞌ₄ i₂juáꞌ₂ le₂në₅, ján₃ bá₄ o₄quióꞌ₄ a₂qui₂dsɨ₂jŋi₅ dsɨ́₅ në́₃.c
29 A₂qui₂dsɨ₂jŋi₅ dsɨ́₅ dsa₂ ꞌéi₂ bá₄ guëꞌ₂, on₃juaꞌ₅₄ rëꞌ₂ ꞌniaꞌ₂.
La₁ chan₂ guëꞌ₂ i₂le₃juáꞌ₂ táng₃: “¿ꞌE₂ ꞌuɨg₅₄ qui₂con₂ dsa₂ ꞌí₁ të₂le₃ juɨ₅ a₂tsá₃ jnág₅ quió₃, o₄quióꞌ₄ ꞌa₂ liaꞌ₂ niog₅ ŋɨ́ꞌ₂ dsɨ́₅ i₂siánꞌ₂?”
30 Chi₂juaꞌ₂ cuë́₅ jniá₂ ti₁ꞌmagꞌ₄ o₄quióꞌ₄ caun₂ má₃ a₂quenꞌ₅₄ jniá₂ jë₄ guë́ꞌ₅ dsa₂, ¿ꞌe₂ ꞌuɨg₅₄ chi₂ꞌag₅ dsa₂ o₄quióꞌ₄ a₂guëꞌ₂ jaun₂, chi₂juaꞌ₂ cuë́₅ ti₁ꞌmagꞌ₄ në́₃?
31 Jaun₂ lë₃, chi₂juaꞌ₂ quë́ꞌ₂, ꞌagꞌ₂, ján₃ guëꞌ₂ le₂jaun₂ chi₂juaꞌ₂ ꞌe₂ guë́₄ niog₅ jmoꞌ₂ ꞌniaꞌ₂, jmo₄ bá₄ a₂jaun₂, la₁ juaꞌ₅₄ le₃juɨnꞌ₂ bá₄ Diú₄ le₃jë́₃ a₂jaun₂.
32 La₁ tsá₃ cuë₂ ꞌniaꞌ₂ jmɨg₄ juaꞌ₅₄ ja₁lé₂ tsɨ₃sénꞌ₂ dsa₂ judíos*, on₃ guëꞌ₂ dsa₂ griegos, on₃ guëꞌ₂ dsa₂ i₂tén₅ le₃quióꞌ₅ guáꞌ₅ quián₅ Diú₄ në́₃.
33 Jniá₂ ꞌŋió₃ në́₃ quɨ́nꞌ₅ bí₂ jmo₂₃ a₂të₅ dsɨ́₅ ca₂le₃jɨ́n₃, tsá₃ jmo₅ jniá₂ dsɨ₃ a₂ꞌnáuꞌ₅ jniá₂ a₂dse₃ le₃ja₁cong₂ ꞌŋió₃. Jmo₅ bá₄ jniá₂ a₂dse₃ le₃ja₁con₂ i₂siánꞌ₂, ia₁jaun₂ lióin₂.