3 Juɨ₁jme₁juɨnꞌ₂ jniog₄ Diú₄ Jmei₂ Jesucristo Te₁guiꞌ₅₄ quián₂, ia₁ ꞌéi₂ bá₄ i₂lɨ́n₅ Tia₅₄ quián₂ i₂ŋɨ́₄ ŋéi₂ dsɨ́₅ jniog₄; i₂ꞌéi₂ bá₄ Diú₄ i₂jmo₅ liánꞌ₂ dsɨ₅ jniog₄ chong₂.

4 ꞌÉi₂ bá₄ i₂jmo₅ liánꞌ₂ ja₁con₂ jniog₄ jë₄ ca₂le₃jë́₃ ꞌe₂ o₂i₁ dsɨ₅ cha₂, le₂jaun₂ guëꞌ₂ jniog₄ táng₃ lé₂ le₃jmó₁ liánꞌ₂ dsɨ́₅ juɨ₁liaꞌ₂ i₂chan₂ o₂i₁ dsɨ₅ ŋág₅ uɨg₅. Lé₂ le₃cuë₅₄ jniog₄ liánꞌ₂ dsɨ́₅ juɨ₁liaꞌ₂ jmo₅ Diú₄ ja₁con₂ jniog₄ guio₅₄.

5 Ia₁ le₂në₅ juɨ₁liaꞌ₂ ŋag₄ jniog₄ jmɨ₁uɨg₅ juëꞌ₂ lɨn₃ a₂ca₂can₃ Cristo, ján₃ bá₄ le₂në₅ táng₃ të₂le₃ quianꞌ₅₄ Jesucristo guéi₁ jniog₄ liánꞌ₂ a₂le₃chong₂ dse₃.

6 Jaun₂ në́₃, chi₂juaꞌ₂ ŋag₄ jniaꞌ₅₄ uɨg₅ chong₂, le₂në₅ le₃cha₂ liánꞌ₂ ja₁conꞌ₂ ꞌniaꞌ₂ jaun₂ liónꞌ₂ ꞌniaꞌ₂ në́₃; o₃ chi₂juaꞌ₂ guei₂ jniaꞌ₅₄ liánꞌ₂ ꞌe₂, ján₃ bá₄ le₃cha₂ liánꞌ₂ ja₁conꞌ₂ ꞌniaꞌ₂, jaun₂ lé₂ le₃jmóꞌ₂ tióꞌ₃ ꞌauꞌ₂ ꞌe₂ uɨg₅ cha₂, juɨ₁liaꞌ₂ jmo₂ jniaꞌ₅₄.

7 Caun₂ bá₄ le₁ꞌág₄ dsɨ₅ jniaꞌ₅₄ le₃ja₁conꞌ₂ ꞌniaꞌ₂ a₂jmóꞌ₂ tióꞌ₃ ꞌauꞌ₂ a₂liónꞌ₂ ꞌniaꞌ₂ në́₃. Ia₁ ne₄ bá₄ jniog₄, në₁juaꞌ₂ quenꞌ₅₄ ꞌniaꞌ₂ ŋagꞌ₅₄ uɨg₅ a₂ŋag₄ jniaꞌ₅₄, ján₃ bá₄ le₂në₅ guéiꞌ₁ ꞌniaꞌ₂ liánꞌ₂ a₂guéi₁ jniaꞌ₅₄ a₂cuë₃ Diú₄.

8 Chei₂ jniaꞌ₅₄ ꞌniaꞌ₂ le₂në₅, rɨnꞌ₅₄ jniog₄, ia₁ a₂ꞌniog₂ jniaꞌ₅₄ a₂le₃ŋiꞌ₅₄ ꞌniaꞌ₂ ꞌa₂ liaꞌ₂ lë́₅ o₂meꞌ₅₄ dsɨ₅ a₂ca₂quián₁ jniaꞌ₅₄ le₂tan₅₄ juɨg₂ tioꞌ₅₄ ꞌuë₃ Asia. ꞌŊio₅ lɨn₃ bá₄ uɨg₅ ca₂ŋag₄ jniaꞌ₅₄; ꞌŋio₅ lɨn₃ guei₂ ta₁ a₂tióng₂ jniaꞌ₅₄, ca₂liaꞌ₂ jŋiaꞌ₅₄ meiꞌ₂ tsá₃ ca₂ꞌuáu₂ co₂ŋeiꞌ₅₄ a₂tsá₃ ma₃jme₁tián₂.

9 Conꞌ₂ siáꞌ₂ lág₂ jniaꞌ₅₄ a₂tsá₃ ma₃jmɨg₄ cha₂ quián₂ jniaꞌ₅₄, në₂jag₄ bá₄ a₂ma₂ꞌi₄ ꞌéiꞌ₃ dsióg₃. La₁ tsá₃ a₂nag₅₄, ia₁ ca₂le₃jë́₃ a₂i₃ŋág₂ jniaꞌ₅₄ jaun₂ ca₂jmo₃ ta₁ a₂ca₂jme₁tɨn₅ jniaꞌ₅₄ a₂ꞌéin₂ le₃quióꞌ₅ Diú₄, on₃juaꞌ₅₄ le₂quián₂ jniaꞌ₅₄ guio₅₄. Ia₁ i₂ꞌéi₂ bá₄ lɨ́n₅ i₂jme₂jenꞌ₅₄ ꞌlag₄.

10 Ia₁ ma₂lió₂ bá₄ Diú₄ ne₄ ꞌmú₃ gau₂ jaun₂, tonꞌ₂ caun₂ lió₂ bá₄ juɨ₁liaꞌ₂ jmɨg₄ në₃. Jaun₂ le₃ja₁con₂ ꞌéi₂ bá₄ ma₂ꞌéi₁ jniaꞌ₅₄ caun₂ dsɨ₅ a₂lió₂ ne₄ juɨ₅

11 chi₂juaꞌ₂ jme₁ꞌoꞌ₁ ꞌniaꞌ₂ chi₂lengꞌ₅₄ Diú₄ o₄quián₂ jniaꞌ₅₄. Chi₂juaꞌ₂ juɨn₅ dsa₂ i₂mɨ₅ ne₄ Diú₄ o₄quián₂ jniaꞌ₅₄, ján₃ bá₄ juɨn₅ dsa₂ i₂cuë́ꞌ₃ ti₁ꞌmagꞌ₄ Diú₄ ne₄ ca₂le₃jë́₃ a₂dse₃ a₂jme₃ꞌo₅₄.^b

12 Cha₂ caun₂ cosa ja₂ të₅ dsɨ₅ jniaꞌ₅₄ tonꞌ₂ guio₅₄ jniaꞌ₅₄ quiong₂ ꞌí₁ të₂dsɨ₅, lei₅₄ jniaꞌ₅₄ a₂lé₂ le₃jangꞌ₅₄ jág₁ dsau₅ a₂chong₂ jmo₂ a₂dse₃ a₂tí₅ ne₄ guaꞌ₅₄ ꞌuë₃ la₂, juɨ₁liaꞌ₂ jme₂ti₃ Diú₄, la₁ ꞌŋio₅ lɨn₃ guë́₄ le₃ja₂conꞌ₂ ꞌniaꞌ₂. Ia₁ a₂ꞌua₁ dsɨ́₅ bá₄ Diú₄, ma₂ca₂jme₃ꞌo₅₄ a₂chong₂ jniaꞌ₅₄ le₂në₅; on₃juaꞌ₅₄ ia₁ a₂tag₂ jniaꞌ₅₄ guio₅₄.

13 Ca₂le₃jë́₃ a₂juaꞌ₂ jniaꞌ₅₄ a₂tioꞌ₅₄ ne₄ si₂ carta quián₂, tsá₃ ꞌe₂ a₂siáꞌ₂ juaꞌ₂ jniaꞌ₅₄ juaꞌ₅₄ a₂tsá₃ tɨnꞌ₂ ꞌniaꞌ₂ ꞌɨ́ꞌ₄, o₃ a₂tsá₃ ŋɨ́ꞌ₂ ꞌniaꞌ₂.

14 Jaun₂ ꞌɨ́n₂ dsɨ₅ jniaꞌ₅₄, juɨ₁liaꞌ₂ ma₂ca₂rë₃ŋɨ́gꞌ₂ ꞌniaꞌ₂ quián₂ jniaꞌ₅₄ ja₁lɨn₅₄, ján₃ bá₄ le₂në₅ le₃ŋɨ́ꞌ₂ ꞌniaꞌ₂ liaꞌ₂ rë₂ꞌŋia₅, ia₁jaun₂ lé₂ le₃dsiáꞌ₁ ꞌniaꞌ₂ jág₁ táꞌ₅ o₄quián₂ jniaꞌ₅₄, tonꞌ₂ lé₂ le₃dsiá₁ jniaꞌ₅₄ jág₁ táꞌ₅ o₄quiánꞌ₂ ꞌniaꞌ₂ ján₃, jë₁ma₂ca₂të́₂ jmɨg₄ quióꞌ₅ Jesús Te₁guiꞌ₅₄ quián₂.

15 ꞌUɨg₅₄ ia₁ caun₂ bá₄ ꞌei₅ dsɨ₃ ca₂le₃jë́₃ a₂në₅, jaun₂ jme₁lɨ́ng₂ nei₅₄ i₁jɨng₁₂ deꞌ₂ jŋiá₅ ꞌniaꞌ₂ a₂i₁jmo₃ liánꞌ₂ ꞌauꞌ₂ ꞌniaꞌ₂ ꞌŋio₅ lɨn₃, ia₁ dsióg₄ i₁jɨng₁₂ ꞌniaꞌ₂ ta₁tɨn₃ ráun₂.

16 Jme₁dsɨ₂jiog₅ dsɨ₃ jme₁i₁ŋɨg₁₂ ja₁tionꞌ₅₄ ꞌniaꞌ₂ liaꞌ₂ ma₂ꞌeng₅₄ juɨ₅ guio₃ juɨ₅ Macedonia; jë₁ma₂të́₂ rë₁négꞌ₄ táng₃, jaun₂ i₁jɨng₁₂ táng₃ ꞌniaꞌ₂. Ia₁ lɨ́ng₂, ꞌniaꞌ₂ bá₄ jme₁ꞌoꞌ₁ a₂lé₂ dsióg₄ jniá₂ të₂ Judea.

17 ¿O₃ bá₄ lɨ́nꞌ₂ ꞌniaꞌ₂ a₂ꞌei₅ caun₂-tɨn₃ dsɨ₃ a₂juáꞌ₅ le₂në₅? ¿O₃ bá₄ lɨ́nꞌ₂ ꞌniaꞌ₂ a₂lë́₅ jág₁ quió₃ liaꞌ₂ lë́₅ jág₁ quióꞌ₅ dsa₂ i₂tsá₃ ꞌén₂ i₂lë₁qui₂co₅ jág₁ quióꞌ₅, në₃ rëꞌ₂ juáꞌ₂ “ján₅,” në₃ guëꞌ₂ “jan₂ꞌón₄” táng₃?

18 Tí₅ bá₄ jág₁ quián₂ jniaꞌ₅₄, juɨ₁liaꞌ₂ tí₅ jág₁ quióꞌ₅ Diú₄; lɨ́gꞌ₂ jmɨg₄ juaꞌ₅₄ a₂lë₁cuë₂ jniaꞌ₅₄ jág₁ quián₂, juaꞌ₅₄ a₂juaꞌ₂ jniaꞌ₅₄ “ján₅,” conꞌ₂ siáꞌ₂ “jan₂ꞌón₄” táng₃.

19 Ia₁ Cristo Jesús i₂lɨ́n₅ Ja₁ŋiꞌ₅₄ Diú₄ i₂qui₂ꞌɨ́n₅ jniaꞌ₅₄ i₂nio₄, chei₂ ꞌniaꞌ₂ quianꞌ₅₄ Silvano,^c Timoteo në́₃, ꞌéi₂ në́₃ tsá₃ lɨ́gꞌ₂ jmɨg₄ juaꞌ₅₄ a₂lë₁qui₂ca₂co₃ jág₁ quióꞌ₅ juaꞌ₅₄ në₃ rëꞌ₂ juáꞌ₂ “ján₅,” në₃ cónꞌ₅ “jan₂ꞌón₄” táng₃. Të₂le₃ quianꞌ₅₄ Cristo, a₂dsau₅ dsónꞌ₂ bá₄ jág₁.

20 Ia₁ të₂le₃ quianꞌ₅₄ ꞌéi₂ bá₄ rë₂ti₃ ca₂le₃jë́₃ jág₁ a₂cuë₂₃ quióꞌ₅ Diú₄. Jaun₂ të₂le₃ quianꞌ₅₄ ꞌéi₂, juaꞌ₂ jniog₄ a₂méi₃*, ia₁ a₂dsau₅ dsónꞌ₂. Jaun₂ le₂në₅ lé₂ le₃jme₁juɨnꞌ₂ jniog₄ Diú₄.

21 Jaun₂ ꞌŋiog₅ bá₄ Diú₄ jmo₂₃ të₂le₃ ja₁con₂ jniaꞌ₅₄, quianꞌ₅₄ guëꞌ₂ le₃ja₁conꞌ₂ ꞌniaꞌ₂ në́₃, a₂tióng₂ jniog₄ tiá₂ le₃quióꞌ₅ Cristo. ꞌŊiog₅ bá₄ Diú₄ ma₂ca₂ꞌag₃ jniog₄ në́₃.

22 Ma₂ca₂jmógꞌ₂ jniog₄ léi₄ co₂ꞌnióꞌ₄ quianꞌ₅₄ sello quióꞌ₅, tonꞌ₂ ma₂cuɨin₃ Jme₂dsí₂ Jŋió₅ quiáin₅ të₂dsɨ₅ jniog₄, në₂jag₄ bá₄ cu₄ a₂ma₂ron₅ dsɨ₂jŋiá₄, a₂ma₂lág₅ jniog₄ léi₄ a₂dsi₁no₃ jniog₄ dsɨ₁guéi₁ a₂cuë₃.

23 Chi₂juaꞌ₂ tsá₃ ma₂ca₂lë₃ dsióg₄ juɨg₂ Corinto liaꞌ₂ conꞌ₂ lë́₅ ma₂i₃jiog₅ dsɨ₃, jág₅ bá₄ Diú₄ ia₁ tsá₃ ꞌnio₃ jniá₂ a₂cánꞌ₂ ꞌniaꞌ₂ o₂meꞌ₅₄ dsɨ₅ a₂tsá₃ ca₂dsióg₃; ia₁ në₁juaꞌ₂ tsá₃ le₂jaun₂, caun₂ bá₄ ꞌei₅ dsɨ₃ o₁jŋiaꞌ₅₄ ꞌmú₃ ca₂quɨ́n₂ quió₃.

24 On₃juaꞌ₅₄ a₂ꞌniog₂ jniaꞌ₅₄ a₂jme₁gon₂ ne₄ ꞌa₂ liaꞌ₂ ꞌénꞌ₂ ꞌniaꞌ₂, ia₁ ma₂tiónꞌ₂ bá₄ ꞌniaꞌ₂ tiá₂ a₂ꞌéngꞌ₂. Jŋiaꞌ₅₄ liaꞌ₂ ꞌniog₂ jniaꞌ₅₄ jmó₁ ta₁ co₂dsia₅ quianꞌ₅₄ ꞌniaꞌ₂ ia₁jaun₂ le₃cha₂ guë́₄ o₂ꞌŋió₃ dsɨ₅ ja₁conꞌ₂ ꞌniaꞌ₂, ia₁ o₄quióꞌ₄ a₂ꞌénꞌ₂ bá₄ ꞌniaꞌ₂, tiónꞌ₂ ꞌniaꞌ₂ tiá₂.