2
Jaun₂ ma₂ca₂dsia₃ jniá₂ dsɨ₃ a₂tsá₃ ma₃i₁jɨng₁₂ táng₃ ꞌniaꞌ₂ të₃ ꞌliaꞌ₂ dsɨ₃.
2 Ia₁ në₁juaꞌ₂ i₁jmo₃ ꞌliaꞌ₂ ꞌauꞌ₂ ꞌniaꞌ₂ bá₄ jniá₂, ¿ꞌein₂ bá₄ i₂jmo₃ jéin₄ jniá₂ ꞌioꞌ₂? Jŋiaꞌ₅₄ liaꞌ₂ ꞌniaꞌ₂ bá₄ i₂ma₂në₂jmo₃ jniá₂ ꞌliaꞌ₂ ꞌauꞌ₂.
3 Jaun₂ lë₃, ca₂jmo₃ si₂ ca₂juáꞌ₃, ia₁ tsá₃ ꞌnio₃ jmóꞌ₂ ꞌniaꞌ₂ ꞌliaꞌ₂ dsɨ₃ jë₁ma₂dsióg₃, ia₁ ꞌniaꞌ₂ dsónꞌ₂ bá₄ ca₂tɨ́ngꞌ₂ jmóꞌ₂ a₂jéin₄ ꞌioꞌ₂ jë₁ma₂dsióg₃. Ia₁ caun₂ bá₄ ꞌei₅ dsɨ₃ ja₁conꞌ₂ ꞌniaꞌ₂ a₂dsióg₄ ꞌei₅ dse₃ dsɨ₃, le₂jaun₂ a₂ꞌei₅ rë₂ ꞌauꞌ₂ ꞌniaꞌ₂ ján₃.
4 Ia₁ a₂jme₁quian₄ o₂i₁ dsɨ₅, të₃ ca₂tánꞌ₂ dsɨ₃, jme₁ca₂jmo₃ jniá₂ si₂ jaun₂, ca₂le₃jë́₃ jme₁ꞌo₅ jniá₂. La₁ on₃juaꞌ₅₄ jaun₂ ca₂juáꞌ₃ ia₁jaun₂ tiáꞌ₃ ꞌliaꞌ₂ ꞌauꞌ₂ ꞌniaꞌ₂ ján₃; të₂le₃ ia₁jaun₂ le₃ŋiꞌ₅₄ ꞌniaꞌ₂ ꞌa₂ liaꞌ₂ lë́₅ dsɨ₃ a₂ꞌnióg₃ ꞌniaꞌ₂ ꞌŋio₅ lɨn₃.
Ca₂ꞌén₂ dsáu₁ jan₂ dsa₂ i₂ca₂ꞌnáu₂ dso₄
5 Në₁juaꞌ₂ chan₂ i₂ma₂jmo₃ a₂cha₂ o₂i₁ dsɨ₅, on₃juaꞌ₅₄ jmáꞌ₃ ja₁con₂ jniá₂ ma₂jmo₃ quian₅₄ o₂i₁ dsɨ₅; le₂jiog₅ ja₁conꞌ₂ ꞌniaꞌ₂ bá₄ ca₂jmo₃ ca₂la₂ a₂ma₂ca₂quianꞌ₂ ꞌniaꞌ₂ o₂i₁ dsɨ₅ ca₂le₃jɨ́ngꞌ₃. A₂juáꞌ₅ jniá₂ “a₂ca₂jmo₃ ca₂la₂,” ia₁jaun₂ tsá₃ lɨn₄ uɨg₅ tɨnꞌ₅₄ ꞌniaꞌ₂ jág₁ në₅.
6 Co₂ꞌnióꞌ₄ uɨg₅ a₂ca₂cuëꞌ₅₄ ꞌniaꞌ₂ dsa₂ ꞌéi₂ jë₄ le₁ŋɨꞌ₂ ꞌniaꞌ₂ ca₂le₃jɨ́ngꞌ₃, tióꞌ₅ bá₄ co₂në₅.
7 Ca₂tɨ́nꞌ₂ bá₄ ꞌniaꞌ₂ në́₃ jmóꞌ₂ ꞌua₁ ꞌauꞌ₂ ꞌéngꞌ₄ dsáu₁, jmóꞌ₂ táng₃ ꞌniaꞌ₂ liánꞌ₂ dsɨ́₅, ia₁ conꞌ₂ tsá₃ ŋó₅ në₁juaꞌ₂ ca₂tánꞌ₂ co₂ŋeiꞌ₅₄ dsɨ́₅.
8 Jaun₂ chi₂lenꞌ₄ jniá₂ ꞌniaꞌ₂ a₂jme₁jniagꞌ₂ táng₃, a₂dsónꞌ₂ ꞌnióiꞌ₃ ꞌniaꞌ₂.
9 ꞌUɨg₅₄ jaun₂ bá₄ ma₂juáꞌ₃ bá₄ jniá₂ le₂jŋiá₅ quianꞌ₅₄ si₂ a₂ma₂tsɨ́ng₂ neꞌ₅₄ ꞌniaꞌ₂, a₂jŋiaꞌ₅₄ conꞌ₂ ca₂cáun₃ ꞌí₁ bá₄ quiánꞌ₂ ꞌniaꞌ₂ o₁ne₄ në₁juaꞌ₂ jmóꞌ₂ dsónꞌ₂ ꞌniaꞌ₂ conꞌ₂ lë́₅ ca₂le₃jë́₃ jág₁ a₂juáꞌ₅ jniá₂.
10 Jaun₂ në́₃, juɨ₁ꞌe₂ guë́₃ ꞌa₂ liaꞌ₂ lë́₅ dsáu₁ rɨ́nꞌ₂ ꞌniaꞌ₂ a₂ꞌéngꞌ₄, ján₃ bá₄ le₂jaun₂ le₃jmo₅₄ jniá₂ dsɨ₃, ꞌén₄ bá₄ jniá₂ dsáu₁ dsa₂ ꞌéi₂. Ia₁ juɨ₁liaꞌ₂ dso₄ a₂ma₂ꞌén₃ jniá₂, chi₂juaꞌ₂ ꞌe₂ caun₂ dso₄ ma₂ꞌéng₃, o₄quiánꞌ₂ ꞌniaꞌ₂ bá₄ ma₂jmo₃, të₃ne₄ Cristo.
11 Jmo₅ jniá₂ le₂në₅ ia₁jaun₂ tsá₃ jo₃ i₂së₃dsen₃, ia₁ a₂ne₄ rë₂ bá₄ jniog₄ ꞌa₂ liaꞌ₂ lë́₅ mai₅₄ ꞌio₅ ꞌéi₂.
Tsá₃ rë₂ jme₁ꞌei₅ dsɨ́₅ Pa₄ juɨg₂ Troas
12 Jaun₂ jme₁ca₂dsióg₃ jniá₂ juɨg₂ Troas a₂ꞌë́₄ jág₁ dse₃ quióꞌ₅ Cristo, ꞌŋio₅ bá₄ jme₁rë₂na₄ juɨ₅ a₂jme₁jmo₅₄ ta₁ quióꞌ₅ Te₁guiꞌ₅₄ ja₁jaun₂.
13 La₁ tsá₃ tei₄ jme₁ꞌei₅ dsɨ₃, ia₁ tsá₃ ca₂dsángꞌ₂ Tito rɨnꞌ₅₄ jniog₄. Ca₂ꞌágꞌ₃ bá₄ jniá₂ jág₁ rɨnꞌ₅₄ jniog₄ ja₁jaun₂, jaun₂ guë́₄ guio₃ le₃ꞌuë₃ Macedonia la₂.
A₂léi₂ jniog₄ quianꞌ₅₄ Cristo
14 La₁ ti₁ꞌmagꞌ₄ Diú₄ ia₁ co₂tan₅₄ bá₄ jiog₂₃ juɨ₅ a₂léi₂ jniog₄ le₃quióꞌ₅ Cristo Jesús, ia₁ të₂le₃ quianꞌ₅₄ jniog₄ bá₄ jme₂jniai₂₃ jág₁ dse₃ la₂ quióꞌ₅, ia₁jaun₂ dsa₂ në́₃ le₃cuɨin₂₃ ꞌéi₂, co₂ꞌnióꞌ₄ a₂ja₂dsɨ́₂ ma₂juɨg₂ ca₂le₂con₂.
15 Ia₁ jniog₄ bá₄ lág₅ co₂ꞌnióꞌ₄ chen₂ a₂cau₂ ja₂dsɨ́₂ ma₂juɨg₂ ma₂ro₂ a₂jénꞌ₅ Cristo ne₄ Diú₄, a₂qui₂dsɨ₂ꞌag₅ jë₄ quióꞌ₅ dsa₂ i₂i₂nio₄ juɨ₅ a₂lióin₂, qui₂ja₂dsɨ́₂ ján₃ jë₄ quióꞌ₅ i₂dsɨ₂ꞌén₂ në́₃.
16 Të₂le₃ ja₁con₂ dsa₂ i₂dsɨ₂ꞌén₂ në́₃, chen₂ la₂ lë́₅ a₂ja₂dsɨ́₂ ꞌlɨgꞌ₅₄ a₂ma₂le₃dsiáin₃; la₁ të₂le₃ quióꞌ₅ dsa₂ i₂tɨ́nꞌ₄ guëꞌ₂ në́₃, lë́₅ caun₂ cosa a₂ja₂ ma₂juɨg₂ ma₂ro₂ a₂tɨ́nꞌ₂ jme₂dsí₂ quióꞌ₅. ¿ꞌEin₂ bá₄ ꞌéi₂ i₂quɨꞌ₅₄ jmɨg₄ quianꞌ₅₄ ta₁ në₅?
17 Jniaꞌ₅₄ bá₄ ꞌéi₂ i₂quɨꞌ₅₄ jmɨg₄, ia₁ tsá₃ ta₁ jaun₂ i₂nio₄ jniaꞌ₅₄ juaꞌ₅₄ a₂jmó₁ ꞌmaꞌ₅₄ jág₁ dse₃ quióꞌ₅ Diú₄ juɨ₁liaꞌ₂ jmo₅ i₂lɨn₅₄. Të₂le₃ jág₅ bá₄ Diú₄, chei₂ jniaꞌ₅₄ dsa₂ liaꞌ₂ tí₅ jág₁, lág₅ jniaꞌ₅₄ dsa₂ quián₅ Diú₄ i₂juáꞌ₂ o₄quióꞌ₄ Cristo.