Jág₁ ꞌmɨ́₂ a₂lɨꞌ₅₄ quianꞌ₅₄ Diú₄
3
¿O₃ bá₄ lɨ́nꞌ₂ ꞌniaꞌ₂ a₂jŋiaꞌ₅₄ ꞌɨ́n₅ dse₃ guio₅₄ bá₄ jniaꞌ₅₄ jme₁juaꞌ₂ le₂në₅? ¿O₃ bá₄ ꞌniogꞌ₂ ꞌniaꞌ₂ a₂ꞌë́₄ si₂ a₂jángꞌ₅ jág₁ dsau₅ o₃ a₂mɨ́₁ ꞌe₂ jniaꞌ₅₄ neꞌ₅₄ ꞌniaꞌ₂ a₂cuë́ꞌ₁ caun₂ si₂ juɨ₁liaꞌ₂ jmo₅ dsa₂ i₂lɨn₅₄?
2 Jŋiaꞌ₅₄ liaꞌ₂ guionꞌ₅₄ bá₄ ꞌniaꞌ₂ ma₂cuëꞌ₂ jág₁ dsau₅ a₂ma₂léi₄ co₂ꞌnióꞌ₄ caun₂ si₂ të₂dsɨ₅ jniaꞌ₅₄ a₂lé₂ le₃con₂ dsa₂ siánꞌ₂ ꞌí₁ co₂ꞌnióꞌ₄ a₂lé₂ le₃ꞌɨ₃ dsa₂ në́₃.
3 Guionꞌ₅₄ bá₄ ꞌniaꞌ₂ lɨ́ngꞌ₅ co₂ꞌnióꞌ₄ caun₂ si₂ a₂ca₂jmo₃ Cristo ꞌŋiog₅, a₂ca₂dsia₃ gu₂ jniaꞌ₅₄. Caun₂ si₂, on₃juaꞌ₅₄ a₂léi₄ a₂qui₂rë₂tsáng₂ quianꞌ₅₄ jmɨ₁jné₂; lë́₅ léi₄ të₂le₃ quianꞌ₅₄ Jme₂dsí₂ quián₅ Diú₄ i₂chan₂ dsónꞌ₂. Lë́₅ caun₂ si₂ carta, on₃juaꞌ₅₄ a₂léi₄ rë₂ton₅ dsoꞌ₂ nɨ₁cang₁; lë́₅ léi₄ juɨ₅ të₂dsɨ́₅ dsa₂ mɨ₂güɨ́g₃ bá₄.
4 Caun₂ bá₄ le₁ꞌág₄ dsɨ₅ jniaꞌ₅₄ a₂ꞌéin₂ jniaꞌ₅₄ le₂në₅ le₃ja₁con₂ Diú₄ të₂le₃ quianꞌ₅₄ Cristo.
5 On₃juaꞌ₅₄ a₂tag₂ jniaꞌ₅₄ guio₅₄ a₂jmo₂ ꞌe₂ jmo₂. Ca₂le₃jë́₃ ꞌe₂ niog₅ jmo₂ jniaꞌ₅₄, Diú₄ bá₄ jmo₅ a₂quɨꞌ₅₄ jniaꞌ₅₄ jmɨg₄ quianꞌ₅₄ ta₁ në₅.
6 ꞌÉi₂ bá₄ ma₂jmo₃ a₂quɨꞌ₅₄ jniaꞌ₅₄ jmɨg₄ a₂i₂quian₄ jniaꞌ₅₄a jág₁ ꞌmɨ́₂ a₂ma₂lɨꞌ₅₄ quianꞌ₅₄ Diú₄: on₃juaꞌ₅₄ të₂le₃ quianꞌ₅₄ ꞌéiꞌ₃ a₂ton₅ ne₄ si₂; të₂le₃ quianꞌ₅₄ Jme₂dsí₂ quián₅ Diú₄ bá₄. Ta₁ a₂quíꞌ₅ ꞌéiꞌ₃ a₂rë₂ton₅ ne₄ si₂, a₂jiog₅ ne₄ ꞌmú₃ bá₄ jaun₂. La₁ Jme₂dsí₂ quián₅ Diú₄ guëꞌ₂ në́₃ toꞌ₂ jme₂dsí₂ a₂chan₂ dsa₂.
7 ꞌÉiꞌ₃ jaun₂ ca₂tióng₃ Diú₄ dsoꞌ₂ nɨ₁cang₁ jë₄ si₂ a₂tág₅ co₂ꞌnéꞌ₅. Tsá₃ ma₃ca₂tióꞌ₃ dsa₂ israelitas jág₃ uë́₂ ne₄ Moisés, ia₁ a₂ŋɨ́₄ lë₃ co₂tág₅ co₂ꞌnéꞌ₅ ca₂jnia₃, juɨ₁ꞌe₂ guë́₃ la₂ jë₁ca₂ag₂ si₂ jaun₂. La₁ chi₂juaꞌ₂ le₂në₅ ꞌŋio₅ jláꞌ₁ ca₂lë₃ jme₁ca₂lë₃ ꞌéiꞌ₃ a₂tsá₃ jme₁ꞌio₅ bí₂ juaꞌ₅₄ a₂tsá₃ dsián₂ dsa₂ jaun₂,
8 ¡ꞌë₂ guë́₄ dse₃ jláꞌ₁, jág₁ dse₃ a₂quian₅ Jme₂dsí₂ Jŋió₅ a₂jmo₅ a₂chan₂ táng₃ dsa₂!
9 Co₂ꞌnióꞌ₄ le₃juaꞌ₅₄, chi₂juaꞌ₂ lág₂ jniog₄ a₂ŋɨ́₄ lë₃ jláꞌ₁ ca₂lë₃ ꞌa₂ liaꞌ₂ ca₂cuë₃ Diú₄ ꞌÉiꞌ₃ të₂le₃ quianꞌ₅₄ Moisés, ꞌéiꞌ₃ a₂jme₁bógꞌ₂ dso₄ jaun₂, ¡ꞌë₂ guë́₄ jláꞌ₁ ta₁b quián₂ jniaꞌ₅₄ a₂i₁quian₄ jniaꞌ₅₄ jág₁ dse₃ a₂jme₂jnia₅ Diú₄ a₂tsá₃ ma₂dsáu₁ jniog₄ cha₂!
10 Ia₁ juɨ₁liaꞌ₂ ꞌéiꞌ₃ a₂jme₁jláꞌ₁ ma₂lɨ́gꞌ₂, tsá₃ ma₂ꞌe₂ quen₅ në₁ma₂ca₂quɨn₃ quianꞌ₅₄ jág₁ jláꞌ₁ guë́₄ a₂cha₂ rë₂në́₃.
11 Chi₂juaꞌ₂ lág₂ jniog₄ a₂ŋɨ́₄ lë₃ jme₁jláꞌ₁ ta₁b quióꞌ₅ a₂tsá₃ uë́₂ tióꞌ₅ jaun₂, ¡ꞌë₂ guë́₄ ꞌŋio₅ jláꞌ₁ ta₁b quióꞌ₅ jág₁ ꞌmɨ́₂ a₂tsá₃ ma₂dsɨ₃ŋɨ́₂ o₁lɨ́gꞌ₂!
12 ꞌUɨg₅₄ ia₁ caun₂ le₁ꞌág₄ dsɨ₅ jniaꞌ₅₄ le₂në₅, juaꞌ₂ jniaꞌ₅₄ co₂ŋeiꞌ₅₄ rë₂jiá₃ jág₁.
13 Tsá₃ jmo₂ jniaꞌ₅₄ juɨ₁liaꞌ₂ ca₂jmo₃ Moisés; ca₂jlë́₂ ꞌéi₂ ne₅₄ quianꞌ₅₄ ꞌmɨꞌ₂ ia₁jaun₂ tsá₃ jág₃ dsa₂ israelitas ꞌa₂ liaꞌ₂ éi₃ a₂co₂tág₅ jaun₂.
14 La₁ tsá₃ ca₂rë₃ŋɨ́ꞌ₂ dsɨ́₅ dsa₂ ꞌéi₂ në́₃, ia₁ cang₄ dsi₅₄. Ca₂liaꞌ₂ jŋió₄ jmɨg₄ në₃ ꞌɨ₅ dsa₂ Si₂ ꞌÉiꞌ₃ a₂ron₅ ma₂lɨ́gꞌ₂, liaꞌ₂ ma₂lɨ́n₅ jaun₂ bá₄ ꞌéi₂, co₂ꞌnióꞌ₄ rë₂jlë₅ ne₅₄, a₂tsá₃ ŋɨ́iꞌ₂. Ia₁ jmáꞌ₃ të₂le₃ quianꞌ₅₄ Cristo bá₄ lé₂ le₃jŋiaꞌ₃ a₂jlë₅ a₂ŋɨ́ꞌ₂ dsɨ́₅ dsa₂ jaun₂.
15 Ca₂liaꞌ₂ jŋió₄ jmɨg₄ në₃, jë₁ma₂tóinꞌ₂ ꞌɨ₂₃ si₂ quióꞌ₅ Moisés, jlɨn₅ ne₄ dsa₂, tsá₃ rë₂ŋɨ́iꞌ₂.
16 Ia₁ juɨ₁liaꞌ₂ jan₂ dsa₂ i₂jénꞌ₅ le₃quióꞌ₅ Te₁guiꞌ₅₄, jŋiaꞌ₅ a₂jmo₅ a₂jlɨn₅ ne₄ dsa₂ jaun₂.
17 Te₁guiꞌ₅₄ në́₃, ia₁ i₂lɨ́n₅ Jme₂dsí₂ bá₄ ꞌéi₂; ja₁ꞌen₅₄ Jme₂dsí₂ quián₅ Te₁guiꞌ₅₄, juɨ₁liaꞌ₂ të₂dsɨ́₅ dsa₂ i₂ꞌén₂, ja₁jaun₂ rë₂na₄ bá₄ juɨ₅.
18 Ia₁ ca₂le₃jág₃ jniog₄ tsá₃ ma₃le₁jlë₅ ne₄ jniog₄; lág₅ jniog₄ juɨ₁liaꞌ₂ lë́₅ nɨ₁ꞌɨ₂ a₂jniá₂ a₂co₂tág₅ co₂ꞌnéꞌ₅ a₂jlánꞌ₁ Te₁guiꞌ₅₄. Le₂në₅ bá₄ jniog₄ guio₅₄, caun₂ i₂ne₁ca₂lag₃ jniog₄ juɨ₁liaꞌ₂ lɨ́n₅ Cristo ꞌŋiog₅, ia₁ liaꞌ₂ caun₂ jmɨg₄ caun₂ jmɨg₄ bá₄ caun₂ i₂ne₁ca₂lag₃ jniog₄ jlánꞌ₁ juɨ₁liaꞌ₂ lɨ́n₅ ꞌéi₂. Ca₂le₃jë́₃ a₂në₅ jmo₅ Te₁guiꞌ₅₄, i₂lɨ́n₅ Jme₂dsí₂.