4
ꞌUɨg₅₄ jaun₂, o₁lɨ́gꞌ₂ jmɨg₄ tsá₃ tiánꞌ₃ dsɨ₅ jniaꞌ₅₄ dsa₂ i₂quian₅ jág₁ dse₃ quióꞌ₅ Diú₄, ia₁ ꞌŋiog₅ bá₄ Diú₄ ca₂dsia₃ ŋéi₂ dsɨ́₅ ca₂dsia₃ gu₂ jniaꞌ₅₄ ta₁ la₂.
2 Ma₂ca₂tí₄ jniaꞌ₅₄ ca₂le₃jë́₃ a₂ꞌlɨgꞌ₅₄ o₂guíꞌ₃ a₂jmo₅-dsáu₅ dsa₂ jë₄ rë₂ꞌma₄; tsá₃ a₂në₅ i₂nio₄ jniaꞌ₅₄ quianꞌ₅₄ mai₅₄ a₂qui₂jme₂gán₂ jniaꞌ₅₄ dsa₂. On₃ guëꞌ₂ juaꞌ₅₄ jmo₂ jniaꞌ₅₄ caun₂-tɨn₃ jág₁ juaꞌ₅₄ a₂co₂güɨnꞌ₄ jniaꞌ₅₄ jág₁ dse₃ quióꞌ₅ Diú₄. Jág₁ tí₅ dsónꞌ₂ rë₂jiá₃ jág₁ bá₄ jme₂tɨ́n₁ jniaꞌ₅₄ dsa₂, ne₄ Diú₄, ia₁jaun₂ le₃líꞌ₄ të₂dsɨ́₅ dsa₂ a₂dsau₅ bá₄ jág₁ a₂i₂quian₄ jniaꞌ₅₄.
3 Në₁juaꞌ₂ rë₂jlë₅ jág₁ dse₃ a₂i₂quian₄ jniaꞌ₅₄, rë₂jlë₅ ja₁con₂ dsa₂ i₂dsɨ₃ꞌén₂ jme₂dsí₂ quióꞌ₅ bá₄.
4 Ia₁ dsa₂ i₂le₂ꞌéi₂ i₂tsá₃ ꞌén₂, co₂ꞌnióꞌ₄ a₂rë₂jlɨn₅ dsɨ́₅, në₂jag₄ bá₄ a₂tein₅₄, a₂jmo₅ diú₄ quián₅ dsa₂ mɨ₂güɨ́g₃ la₂, ia₁jaun₂ tsá₃ tág₃ si₂ a₂le₃ŋɨ́ꞌ₂ dsɨ́₅ ꞌa₂ liaꞌ₂ jláꞌ₁ jág₁ dse₃ quióꞌ₅ Cristo i₂jlánꞌ₁ liaꞌ₂ lɨ́n₅ Diú₄ ꞌŋiog₅.
5 Ia₁ on₃juaꞌ₅₄ guio₅₄ jniaꞌ₅₄ ꞌɨ́n₅ jë₁ma₂të́₂ rë₁ꞌë́₄ jág₁ dse₃; Cristo Jesús bá₄ ꞌɨ́n₅ jniaꞌ₅₄ a₂lɨ́in₅ Te₁guiꞌ₅₄, a₂lág₅ jniaꞌ₅₄ dsa₂ i₂jme₂ti₃ ta₁ neꞌ₅₄ ꞌniaꞌ₂ ján₃ o₄quióꞌ₄ Jesús.
6 Ia₁ ꞌŋiog₅ bá₄ Diú₄ ca₂juáꞌ₂ jme₁ca₂jmo₃ mɨ₂güɨ́g₃: “Juɨ₁jnia₄ tág₅ jë₄ qui₁néꞌ₃”.a Jaun₂ i₂ꞌéi₂ bá₄ ma₂jmo₃ në́₃ a₂tágꞌ₄ si₂ të₂dsɨ₅ jniaꞌ₅₄ ia₁jaun₂ jág₃ i₂siánꞌ₂ si₂ jaun₂, ia₁jaun₂ le₃ŋi₅ dsa₂ ꞌa₂ liaꞌ₂ jlánꞌ₁ Diú₄ të₂le₃ ne₄ Jesucristo.
ꞌA₂ liaꞌ₂ ꞌnióꞌ₅ le₃chan₂ dsa₂ ia₁ a₂ꞌéin₂
7 Ca₂le₃jë́₃ a₂jláꞌ₁ a₂quen₅ ꞌŋio₅ lɨn₃ në₅ në́₃, a₂quian₄ jniaꞌ₅₄ a₂lág₅ liaꞌ₂ lë́₅ ca₂mɨ́g₂ nɨ₁tɨꞌ₂ tsá₃ quen₅, jë₁rë₂ꞌma₄ cosa a₂quen₅ ꞌŋio₅, ia₁jaun₂ le₃jniá₂ a₂já₅ ja₁con₂ Diú₄ bá₄ juɨ₅bí₂ juëꞌ₂ lɨn₃ në₅, on₃juaꞌ₅₄ a₂ꞌniogꞌ₂ jniaꞌ₅₄ dsɨ₅ guio₅₄.
8 Le₂në₅ në́₃, juɨ₁ꞌa₂ guë́₃ la₂ të₁ja₂lé₂ o₂meꞌ₅₄ dsɨ₅ jë₁chong₂ jniaꞌ₅₄, la₁ tsá₃ lë́₅ juaꞌ₅₄ a₂tsá₃ dsian₅. Juɨ₁ꞌe₂ guë́₃ já₅ caun₂ juɨ₅bí₂ a₂ꞌɨ₅ dsɨ₅ jniaꞌ₅₄ chong₂, la₁ tsá₃ juaꞌ₅₄ a₂ŋɨ́₄ quian₄ jniaꞌ₅₄ o₂i₁ dsɨ₅.
9 Juɨ₁ꞌe₂ guë́₃ qui₂co₂ꞌein₅ dsa₂, la₁ tsá₃ guio₅₄ jniaꞌ₅₄ tióng₂. Juɨ₁ꞌe₂ guë́₃ ca₂guiogꞌ₃ dsa₂ ꞌuë₃, la₁ tsá₃ ca₂dsau₃ guë́₄ jniaꞌ₅₄.
10 Të₁i₂nio₄ jniaꞌ₅₄ le₁quian₁ i₁gúꞌ₃ ꞌmú₃ quióꞌ₅ Jesús juɨ₅ nɨ₁ŋɨ₁ jniaꞌ₅₄, ia₁jaun₂ le₃jniá₂ juɨ₅ nɨ₁ŋɨ₁ jniaꞌ₅₄ ján₃ a₂chan₂ Jesús.
11 Ia₁ të₁liaꞌ₂ chong₂ jniaꞌ₅₄ la₂, le₂o₃ jmɨg₄ bá₄ goꞌ₂ a₂jme₃dsiog₅ dsa₂ o₄quióꞌ₄ Jesús, tonꞌ₂ ia₁jaun₂ le₃jniá₂ juɨ₅ nɨ₁ŋɨ₁ jniaꞌ₅₄ a₂siáꞌ₃ la₂, a₂chan₂ bá₄ Jesús.
12 Jaun₂ në́₃, ꞌuɨg₅₄ ia₁ a₂tioꞌ₅₄ jniaꞌ₅₄ juɨ₅ ꞌmú₃, ꞌniaꞌ₂ në́₃ tiongꞌ₅₄ juɨ₅ a₂le₃chan₂ jme₂dsí₂ quiángꞌ₂.
13 Le₂la₂ juáꞌ₂ ne₄ Si₂: “Ca₂rë₃ꞌéng₂, jaun₂ bá₄ lë₃ ca₂juáꞌ₃.”b Le₂në₅ bá₄ jniaꞌ₅₄ ján₃, ia₁ a₂ꞌi₄ jme₂dsí₂ i₂cuë₅ bí₂ a₂ꞌéin₂, jaun₂ bá₄ lë₃ ꞌéin₂ jniaꞌ₅₄, jaun₂ bá₄ lë₃ juaꞌ₂ jniaꞌ₅₄ ján₃.
14 Ia₁ ma₂ne₄ bá₄ jniaꞌ₅₄, Diú₄ i₂ca₂jme₃jenꞌ₅₄ Te₁guiꞌ₅₄ Jesús a₂jme₁rë₂join₅₄, le₂jaun₂ bá₄ jme₃jeinꞌ₅₄ jniaꞌ₅₄ ján₃, juɨ₁liaꞌ₂ ca₂jme₃jeinꞌ₅₄ ꞌéi₂, të₂ co₂dsia₅ quianꞌ₅₄ ꞌniaꞌ₂ ja₁coin₂.
15 A₂dse₃ o₄quiánꞌ₂ ꞌniaꞌ₂ bá₄ ca₂le₃jë́₃ a₂ma₂ca₂lë₃ në₅, ia₁ në₁juaꞌ₂ le₂jaun₂ juɨn₅ guë́₄ dsa₂ i₂tɨn₅ a₂ꞌua₁ dsɨ́₅ Diú₄, le₂jaun₂ bá₄ ján₃ juɨn₅ guë́₄ dsa₂ lé₂ i₂cuë₃ ti₁ꞌmagꞌ₄ qui₂le₃juɨnꞌ₂ Diú₄.
16 Jaun₂, o₁lɨ́gꞌ₂ jmɨg₄ tsá₃ qui₂ꞌuán₂ dsɨ₅ jniaꞌ₅₄. Tsá₃ a₂léiꞌ₂ jaun₂ caun₂ ma₂ne₁ca₂dsa₃ bí₂ nɨ₁ŋɨ₁ jniaꞌ₅₄. La₁ jme₂dsí₂ quián₂ në́₃ caun₂ rë₂ꞌmagꞌ₄ bá₄ liaꞌ₂ caun₂ jmɨg₄.c
17 Ia₁ jmɨ₁uɨg₅ a₂ca₂juɨg₄ a₂dsɨ₂ŋág₂ jniaꞌ₅₄ rë₂në́₃, a₂ŋiꞌ₅₄ ta₁ dsɨ₃ŋɨ́₂, jmo₃ a₂të₃dsɨ₅₄ a₂léi₂ ŋag₅₄ guë́₄ jniaꞌ₅₄ ja₁jláꞌ₁ guë́₄ ꞌŋio₅ lɨn₃ a₂jiog₅ co₂tan₅₄.
18 Ia₁ tsá₃ juaꞌ₅₄ tionꞌ₂ jniaꞌ₅₄ juɨ₅ caun₂ cosa a₂jniá₂; a₂jaun₂ bá₄ tionꞌ₂ jniaꞌ₅₄ juɨ₅ juɨ₁liaꞌ₂ a₂tsá₃ jniá₂. Ia₁ ca₂le₃jë́₃ a₂jniá₂, tsá₃ uë́₂ jiog₅. A₂dsau₅ bá₄ a₂tsá₃ jniá₂, a₂jaun₂ bá₄ a₂jiog₅ co₂tan₅₄.