Si₂ carta a₂ca₂jmo₃ San Pablo ne₄ dsa₂
GÁLATAS
Jmo₅ Pa₄ si₂ a₂chein₃ ne₄ Guáꞌ₅ i₂chan₂ ꞌuë₃ Galacia
1
Jniá₂ Pa₄, lɨ́ng₅ i₂chen₄* quián₅ Te₁guiꞌ₅₄ la₁ tsá₃ lɨ́ng₅ i₂ꞌɨ́n₁ quián₅ dsa₂ mɨ₂güɨ́g₃, on₃ guëꞌ₂ i₂chen₄ quián₅ dsa₂ mɨ₂güɨ́g₃ në́₃. Lɨ́ng₅ jan₂ i₂ꞌɨ́n₁ quián₅ Jesucristo, quianꞌ₅₄ Diú₄ Jmei₂ i₂ca₂jme₃jeinꞌ₅₄ ja₁jme₁rë₂ꞌlɨin₅₄.
2 Jniá₂, quianꞌ₅₄ ca₂le₃jɨ́n₃ rɨnꞌ₅₄ jniog₄ i₂quiangꞌ₅₄, jmo₂ jniaꞌ₅₄ si₂ carta la₂ a₂dsianꞌ₅₄ jniaꞌ₅₄ ja₁con₂ ca₂le₃jɨ́n₃ guáꞌ₅ i₂chan₂ ꞌuë₃ Galacia.
3 Juɨ₁jme₂guꞌ₅₄ bá₄ Diú₄ ꞌniaꞌ₂, juɨ₁jmo₅₄ bá₄ Diú₄ Jmei₂ quianꞌ₅₄ Te₁guiꞌ₅₄ Jesucristo në́₃, juɨ₁ꞌei₅ bá₄ tei₄ tionꞌ₅₄ ꞌniaꞌ₂.
4 Jesús ꞌéi₂ bá₄ ca₂gue₃ ꞌmú₃ ꞌuɨg₅₄ dsáu₁ jniog₄, a₂lió₂ jë₄ mɨ₂güɨ́g₃ ꞌlɨgꞌ₅₄ la₂, co₂jaun₂ ca₂rë₃ꞌŋió₃ dsɨ́₅ Diú₄ quián₂ i₂lɨ́n₅ jmei₂ jniog₄.
5 ¡ꞌÉi₂ bá₄ juɨ₁le₂juɨnꞌ₂ co₂tan₅₄! A₂méi₃.
Tsá₃ ma₃jág₁ siáꞌ₂ cha₂ juaꞌ₅₄ a₂lión₂ dsa₂
6 Dsɨ₂góꞌ₃ dsɨ₃ ia₁ ma₂ꞌniogꞌ₂ ꞌniaꞌ₂ téngꞌ₄ cónꞌ₂ Diú₄ i₂ca₂të₃ ꞌniaꞌ₂ të₂le₃ ia₁ a₂ꞌua₁ dsɨ́₅ Cristo. Ia₁ a₂ma₂nagꞌ₂ táng₃ ꞌniaꞌ₂ jág₁ siáꞌ₂.
7 On₃juaꞌ₅₄ a₂dsɨ₂jóꞌ₃ a₂cha₂ guë́₄ jág₁ dse₃ siáꞌ₂ a₂lió₂. La₁ia₁ juáꞌ₅ jniá₂, chan₂ i₂lɨn₅₄ i₂i₂nio₄ jmo₅ a₂dsɨ₂cónꞌ₅ ꞌauꞌ₂ ꞌniaꞌ₂. A₂ꞌnio₃ jme₃tsɨ́in₃ jág₁ dse₃ la₂ quióꞌ₅ Cristo a₂tɨ́nꞌ₄ dsa₂.
8 La₁ në₁juaꞌ₂ chan₂ i₂jme₂tɨn₅ ꞌniaꞌ₂ caun₂ jág₁ a₂juáꞌ₂ a₂tɨ́nꞌ₄ dsa₂, la₁ në₁juaꞌ₂ tsá₃ lë́₅ conꞌ₂ lë́₅ jág₁ a₂ma₂ꞌë́₄ jniaꞌ₅₄, dsa₂ ꞌéi₂ juɨ₁të₂tsɨnꞌ₅₄ náu₃ a₂dsɨ₃ꞌéin₂. Tsá₃ a₂nag₅₄ o₁jŋiaꞌ₅₄ guio₅₄ jniaꞌ₅₄, o₃ o₁jŋiaꞌ₅₄ jan₂ ángel i₂já₅ gueiꞌ₅₄ i₂juɨ́g₃.
9 Juɨ₁liaꞌ₂ ma₂juaꞌ₅₄ jniaꞌ₅₄ në₅, juáꞌ₄ táng₃ siáꞌ₂: në₁juaꞌ₂ chan₂ i₂ꞌë́₂ jág₁ a₂ma₂rë₂tsɨ́n₄, a₂tsá₃ lë́₅ conꞌ₂ lë́₅ a₂ma₂gueꞌ₅₄ ꞌniaꞌ₂, dsa₂ ꞌéi₂ juɨ₁të₂tsɨinꞌ₅₄ náu₃ a₂dsɨ₃ꞌéin₂.
10 ¿ꞌE₂ lɨ́nꞌ₂ ꞌniaꞌ₂? ¿O₃ bá₄ a₂jme₂ꞌuá₁ jniá₂ dsɨ́₅ dsa₂ mɨ₂güɨ́g₃ conꞌ₂ dsi₂ten₅₄? ¿O₃ bá₄ a₂jme₂ꞌuá₁ jniá₂ dsɨ́₅ Diú₄ ꞌe₂? ¿O₃ bá₄ jmo₅ jniá₂ a₂ꞌŋio₂ dsɨ́₅ dsa₂ mɨ₂güɨ́g₃ ꞌe₂? Tsá₃ ma₃le₃juaꞌ₅₄ a₂lɨ́ng₅ guë́₄ dsa₂ i₂jme₂ti₃ ja₁con₂ Cristo, juaꞌ₅₄ meiꞌ₂ guë́₃ le₂jaun₂.
ꞌA₂ liaꞌ₂ ca₂lɨn₃ Pa₄ jan₂ i₂chen₄ quián₅ Jesús
11 Juɨ₁le₂ŋiꞌ₅₄ ꞌniaꞌ₂ rɨnꞌ₅₄ jniog₄, jág₁ dse₃ a₂tɨ́nꞌ₄ dsa₂ a₂qui₂ꞌë́₅ jniá₂, on₃juaꞌ₅₄ jág₁ a₂le₃juaꞌ₅₄ a₂lë₁ꞌnoꞌ₂ dsa₂ mɨ₂güɨ́g₃ dsɨ́₅.
12 On₃ guëꞌ₂ juaꞌ₅₄ a₂ca₂gue₃ jniá₂ quióꞌ₅ ꞌi₁jan₂ dsa₂ mɨ₂güɨ́g₃, on₃ guëꞌ₂ juaꞌ₅₄ chan₂ dsa₂ i₂ca₂jme₃tag₅ jniá₂. ꞌŊiog₅ bá₄ Te₁guiꞌ₅₄ Jesucristo ca₂jme₃jniai₂₃ jág₁ në₅ ja₁cong₂.
13 Ia₁ ma₂ca₂rë₃ŋiꞌ₅₄ bá₄ ꞌniaꞌ₂ ꞌa₂ liaꞌ₂ jme₁lɨ́ng₄ le₂jŋiá₅, liaꞌ₂ conꞌ₂ jme₁ꞌeng₅₄ guë́₄ juáꞌ₅ quióꞌ₅ dsa₂ judíos*. Ma₂ŋiꞌ₅₄ bá₄ ꞌniaꞌ₂ në́₃ a₂dséi₂ dsɨ₃ guë́₄ lɨn₃ ca₂ꞌéng₃ dsa₂ quián₅ Diú₄, ꞌŋio₅ lɨn₃ jme₁quɨ́nꞌ₅ jniá₂ bí₂ a₂co₂dsia₅ jme₁ꞌéng₄ dsa₂ ꞌéi₂.
14 Ia₁ jniá₂ bá₄ i₂jme₁dsɨ₂jŋiág₄ ꞌŋio₅ lɨn₃ guë́₄ conꞌ₂ guë́₄ ca₂le₃jɨ́n₃ dsa₂ go₃ i₂co₂rɨng₂ quiangꞌ₅₄. Ia₁ jniá₂ ꞌŋio₅ lɨn₃ guë́₄ jme₁jme₂gó₁ jmo₂₃ ꞌí₁ tag₄ quióꞌ₅ dsa₂ canꞌ₅₄ quián₂ jniaꞌ₅₄ ma₂lɨ́gꞌ₂.
15 La₁ liaꞌ₂ conꞌ₂ néꞌ₃ a₂le₃chang₂, ca₂quióꞌ₂ Diú₄. A₂ꞌua₁ dsɨ́₅ guë́₄ lɨn₃ ca₂të₃ jniá₂. Ca₂rë₃ꞌŋió₃ dsɨ́₅,
16 ca₂jmo₃ ca₂rë₃cuɨ́ng₅ ca₂ꞌɨin₃ Ja₁ŋiꞌ₅₄, ia₁jaun₂ qui₁ꞌë́₄ jniá₂ jág₁ dse₃ quióꞌ₅, jɨn₄ dsɨ₂nau₂. Jaun₂ tsá₃ juaꞌ₅₄ ca₂ŋeg₅₄ ca₂i₁ꞌniagꞌ₂ dsa₂ mɨ₂güɨ́g₃ i₂toꞌ₂ jág₁,
17 on₃ guëꞌ₂ ca₂ŋeg₅₄ juɨg₂ Jerusalén juaꞌ₅₄ ca₂i₁jɨng₁₂ i₂ma₂lɨ́n₅ dsa₂ i₂chen₄* quián₅ Te₁guiꞌ₅₄, i₂ma₂ja₂lén₂ jŋiá₅ guë́₄ liaꞌ₂ conꞌ₂ guë́₄ jniá₂. Dsɨ₂juɨ₅ bá₄ ca₂ŋeg₅₄ le₂ꞌuɨg₅₄ juɨ₅ ꞌuë₃ Arabia. Cang₂ guë́₄ jaun₂ ca₂ŋágꞌ₃ juɨ₅ Damasco.
18 Jme₁ca₂dsɨn₃ ꞌnɨ₅ ŋi₂ cang₂ jaun₂, jaun₂ guë́₄ ca₂ŋeg₅₄ Jerusalén ca₂i₁dsia₂ jág₁ quianꞌ₅₄ Pe₄.a Ja₁jaun₂ ca₂jan₅₄ guia₃-ꞌŋiá₂ jmɨg₄.
19 La₁ ꞌi₁jan₂ i₂siánꞌ₂ i₂lɨ́n₅ i₂chen₄ quián₅ Jesús tsá₃ ca₂jɨng₅₄, jŋiaꞌ₅₄ liaꞌ₂ jan₂ Jacobo dsó₂ rɨnꞌ₅₄ Te₁guiꞌ₅₄ bá₄.
20 Jág₅ bá₄ Diú₄, jág₁ dsau₅ bá₄ tóꞌ₅ ne₄ si₂ la₂, tsá₃ të₂jɨ́ng₁.
21 Cang₂ jaun₂ guë́₄ në́₃, ca₂ŋó₃ le₂tan₅₄ juɨg₂ ja₁tén₄ ꞌuë₃ Siria quianꞌ₅₄ Cilicia.
22 Rɨnꞌ₅₄ jniog₄ quián₅ guáꞌ₅ chan₂ ꞌuë₃ Judea në́₃ i₂tión₂ le₃quióꞌ₅ Cristo, tsá₃ jme₁ma₂cuɨg₂₃ dsi₁ne₁.
23 Jŋiaꞌ₅₄ liaꞌ₂ jme₁ma₂nág₂ bá₄ dsia₅ rɨnꞌ₅₄ jniog₄ ꞌag₂₃ juáꞌ₂: “Dsa₂ i₂jme₁co₂ꞌein₅ jniog₄ le₂jŋiá₅, la₁ rë₂në́₃ në́₃ ma₂ŋɨ₂₃ ján₃ ꞌë́₂ jág₁ a₂jme₁ꞌnio₃ jme₁ꞌéin₂ le₂jŋiá₅.”
24 Jaun₂ ca₂jme₃juɨinꞌ₂ Diú₄ bá₄ o₄quió₃.