Dsa₂ i₂chen₄ siánꞌ₂ guein₂₃ Pa₄
2
Jme₁ca₂ŋɨ́₂ guia₃-quén₂ ŋi₂ cang₂, jaun₂ guë́₄ ca₂ŋeg₅₄ táng₃ Jerusalén quiangꞌ₅₄ Bernabé. Tito në́₃, ca₂jáng₂.
2 Ca₂ŋeg₅₄ ja₁jaun₂ ia₁ ca₂jme₃jnia₅ Diú₄ ne₃ a₂ca₂tɨ́ng₂ nei₅₄. Jaun₂ ca₂dsia₃ bá₄ jniá₂ ne₄ dsa₂ i₂tiánꞌ₅ Jerusalén ꞌéi₂ jág₁ dse₃ në₅ a₂ꞌë́₅ jniá₂ jɨn₄ dsɨ₂nau₂, la₁ jmáꞌ₃ liaꞌ₂ quianꞌ₅₄ dsa₂ i₂liaꞌ₂ lë́₅ i₂quian₅ ne₄ juɨ₅ bá₄, jë₄ conꞌ₂ jmáꞌ₃ guio₅₄ bá₄ jniaꞌ₅₄, ca₂dsiá₁ jág₁ ia₁jaun₂ tsá₃ lë́₅ juaꞌ₅₄ a₂lë₁ŋɨ₅ jniá₂ jmo₂₃ ta₁ a₂tsá₃ ta₁ tí₄.
3 Ca₂liaꞌ₂ jŋiaꞌ₅₄ Tito, i₂jme₁quianꞌ₅₄ jniá₂, tsá₃ ca₂chi₃quióng₂ dsa₂ jmɨg₄ juaꞌ₅₄ a₂tion₅₄ jme₃ti₃ ꞌéiꞌ₃ a₂jme₁ti₃ nɨ₁lo₁₂*, o₁jŋiaꞌ₅₄ jme₁lɨ́n₄ ꞌéi₂ griego.
4 Jág₁ në₅ ca₂ŋó₃ ia₁ i₂lɨn₅₄ dsa₂ i₂juɨ₁gan₂ i₂juáꞌ₂ lɨ́in₅ rɨnꞌ₅₄ jniog₄, ca₂i₃toinꞌ₅₄ conꞌ₂ të₃coꞌ₅₄ jë₄ quián₂ jniaꞌ₅₄, a₂jme₁ꞌnio₃ tiog₃ con₂ ꞌí₁ ꞌa₂ liaꞌ₂ lë́₅ chong₂ jniaꞌ₅₄ conꞌ₂ dsa₂ ma₂lón₂ le₃quióꞌ₅ Cristo Jesús, ia₁ tsá₃ ma₃tioꞌ₅₄ jniog₄ ꞌéiꞌ₃; la₁ ꞌéi₂ në́₃ jme₁ꞌnio₃ jme₁toꞌ₂ táng₃ ꞌéiꞌ₃ guei₂ jaun₂.
5 La₁ tsá₃ ꞌein₂ ca₂cuë₃ jniaꞌ₅₄ jmɨg₄ jŋiaꞌ₅₄ ꞌi₁ca₂tiá₂ tei₄ juaꞌ₅₄ jme₃gau₅ ꞌéi₂, ia₁ ꞌniog₂ jniaꞌ₅₄ a₂caun₂ o₁nógꞌ₅ cha₂ jág₁ dsau₅ ja₁conꞌ₂ ꞌniaꞌ₂ jág₁ dse₃ a₂lión₂ dsa₂.
6 Juɨ₁liaꞌ₂ dsa₂ i₂liaꞌ₂ lë́₅ lɨ́n₅ dsa₂ dsen₅₄ i₂juáꞌ₅ jniá₂, (tonꞌ₂ ján₃ bá₄ tsá₃ a₂jaun₂ tion₅₄ ꞌɨ́n₅ dsɨ₃ le₃guion₅₄ ꞌa₂ liaꞌ₂ ma₂ja₂lén₂ ꞌéi₂ jmo₂₃ guioin₅₄. Ia₁ tsá₃ ꞌí₁ jaun₂ con₂ Diú₄ juaꞌ₅₄ ꞌa₂ liaꞌ₂ jniá₂ dsa₂), juɨ₁liaꞌ₂ dsa₂ ꞌéi₂ në́₃, tsá₃ ꞌe₂ ŋag₅₄ juaꞌ₅₄ a₂ca₂jme₃tag₂₃ guë́₄ conꞌ₂ lë́₅ jág₁ a₂ꞌë́₅ jniá₂.
7 Ia₁ të₂le₃ ca₂rë₃líꞌ₄ bá₄ guioin₅₄, co₂jaun₂ bá₄ ta₁ a₂ma₂cuë₃ Diú₄ a₂ꞌë́₄ jniá₂ jág₁ dse₃ jɨn₄ dsɨ₂nau₂,a juɨ₁liaꞌ₂ lë́₅ ta₁ ma₂dsia₃ gu₂ Pe₄ a₂ꞌë́₂ jág₁ dse₃ jɨn₄ dsa₂ judíos.b
8 Jaun₂ Diú₄ i₂jan₂ tan₅₄ ꞌéi₂ bá₄ ca₂chein₃ guëꞌ₂ Pe₄ a₂lɨ́n₅ ꞌéi₂ dsa₂ i₂chen₄ quiáin₅ të₂le₃ jɨn₄ dsa₂ judíos, le₂jaun₂ bá₄ ca₂chei₃ guëꞌ₂ jniá₂ ján₃ a₂lɨ́ng₅ i₂chen₄ quiáin₅ të₂le₃ jɨn₄ dsɨ₂nau₂.
9 Jaun₂ lë₃, Jacobo, Pe₄,c quianꞌ₅₄ Juan₅₄ në́₃, co₂ꞌnióꞌ₄ i₂lɨ́n₅ dsa₂ dsen₅₄ quián₅ guáꞌ₅, ca₂rë₃líꞌ₄ bá₄ guioin₅₄, ꞌŋiog₅ bá₄ Diú₄ ma₂cuë₃ ta₁ në₅, jaun₂ ca₂cuë₃ gu₂ a₂ca₂jmo₃ léi₄, jniá₂ quianꞌ₅₄ Bernabé co₂ꞌnióꞌ₄ a₂ꞌei₅ caun₂ jág₁ quiainꞌ₅₄ a₂dsau₅₄ jniaꞌ₅₄ dsɨ₁jmó₁ ta₁ ja₁con₂ dsɨ₂nau₂. Guioin₅₄ guëꞌ₂ táng₃ dsɨ₂jmó₂ ta₁ jɨn₄ dsa₂ judíos.
10 Jŋiaꞌ₅₄ liaꞌ₂ a₂jaun₂ bá₄ jág₁ a₂ca₂cuë₃ a₂jmó₁ jniaꞌ₅₄ dsiogꞌ₂ dsɨ₅ dsa₂ te₂ŋé₂, a₂në₅ bá₄ guëꞌ₂ a₂ꞌɨ́n₅ dsɨ₃ jniá₂ quɨ́nꞌ₅ jniá₂ bí₂ jmo₂₃.
Ca₂jí₂ Pa₄ ca₂jéin₂ Pe₄ juɨg₂ Antioquía
11 La₁ liaꞌ₂ conꞌ₂ ŋe₄ Pe₄ juɨg₂ Antioquía, ca₂jéin₂ jniá₂ dsi₁ne₁, ꞌuɨg₅₄ ia₁ a₂jmo₂₃ a₂tsá₃ dsi₂ten₅₄ jmo₃.
12 Ia₁ le₂jŋiá₅ jme₁guë́ꞌ₅ co₂dsia₅ quiainꞌ₅₄ dsɨ₂nau₂; la₁ jme₁ca₂dsi₃lén₂ i₂chen₄ quián₅ Jacobo, jaun₂ guë́₄ ca₂jme₃lióg₃ ca₂ŋó₃ cau₅, tsá₃ ma₃ca₂guë́ꞌ₃ quiainꞌ₅₄ dsa₂ ꞌéi₂, ꞌuɨg₅₄ ia₁ a₂gain₃ dsa₂ i₂ti₅ lo₄*.
13 Jaun₂ dsa₂ judíos i₂ꞌén₂ siánꞌ₂ ca₂jme₃quiainꞌ₅₄ bá₄ Pe₄ a₂lë₁co₂jmo₂₃ o₁ne₁ quiongꞌ₅₄; ca₂liaꞌ₂ le₂jiog₅ Bernabé ca₂ŋó₃ quiongꞌ₅₄ ján₃.
14 La₁ jme₁ca₂jág₃ jniá₂ tsá₃ jmo₂₃ liaꞌ₂ conꞌ₂ lë́₅ tí₅ dsónꞌ₂ juáꞌ₂ jág₁ dse₃, jaun₂ ca₂juɨ́g₂ jniá₂ Pe₄ të₃nag₅ le₃jɨ́n₃ dsa₂:
―ꞌNe₂ guëꞌ₂ lɨ́ngꞌ₅ jan₂ dsa₂ judío, le₂jaun₂ bá₄ guëꞌ₂ changꞌ₂ jmoꞌ₂ liaꞌ₂ lë́₅ chan₂ dsɨ₂nau₂, on₃juaꞌ₅₄ rëꞌ₂ conꞌ₂ lë́₅ jme₁jmóꞌ₂ ia₁ a₂lɨ́ngꞌ₅ dsa₂ judío, ¿ꞌa₂ bá₄ liaꞌ₂ jaun₂ chi₁quiangꞌ₅₄ jmɨg₄ dsɨ₂nau₂ a₂le₃chain₂ conꞌ₂ lë́₅ chan₂ dsa₂ judíos?
15 ꞌLág₅ jniog₄ judíos conꞌ₂ lë́₅ chong₂, ―ca₂juɨ́g₂ jniá₂ Pe₄―, on₃juaꞌ₅₄ rëꞌ₂ juɨ₁liaꞌ₂ dsɨ₂nau₂ i₂qui₂rë₂cánꞌ₄ dso₄.
16 Jaun₂, a₂ne₄ bá₄ jniog₄, ꞌi₁jan₂ tsá₃ ꞌein₂ guénꞌ₂ Diú₄ në₂jag₄ i₂tsá₃ ꞌe₂ dso₄ rɨn₂, juaꞌ₅₄ a₂jme₃ti₃ ꞌÉiꞌ₃, jŋiaꞌ₅₄ liaꞌ₂ a₂le₃ꞌén₂ bá₄ dsa₂ të₂le₃ quióꞌ₅ Jesucristo. ꞌUɨg₅₄ jaun₂ ca₂të₂ jniog₄ ján₃ ma₂ca₂rë₃ꞌéin₂ të₂le₃ quióꞌ₅ Jesucristo ia₁jaun₂ bá₄ guéiꞌ₂ Diú₄ jniog₄ në₂jag₄ a₂tsá₃ ma₃ꞌe₂ dso₄ rë₂cáuꞌ₄, të₂le₃ a₂jŋiaꞌ₅₄ conꞌ₂ ꞌéin₂ bá₄, on₃juaꞌ₅₄ rëꞌ₂ a₂ꞌnióꞌ₅ jme₁ti₁ ta₁ quíꞌ₅ ꞌÉiꞌ₃. Ia₁ ꞌi₁jan₂ tsá₃ ꞌein₂ chénꞌ₅ rë₂ ne₄ Diú₄ të₂le₃ quianꞌ₅₄ a₂jme₂ti₃ ꞌÉiꞌ₃.
17 Në₃ në́₃, chi₂juaꞌ₂ ꞌniog₂ jniog₄ të₃tsagꞌ₅₄ dse₃ të₂le₃ ne₄ Diú₄, ꞌuɨg₅₄ ia₁ a₂ma₂tióng₂ le₃quióꞌ₅ Cristo, jaun₂ guë́₄ ca₂dsióg₃ rë₂jniá₂ a₂lág₅ jniog₄ dsa₂ i₂qui₂rë₂cánꞌ₄ dso₄ bá₄ ján₃, ¿on₁ bá₄ ꞌnióꞌ₄ le₃juaꞌ₅₄ Cristo të₂le₃ cuë₅ bí₂ bá₄ jniog₄ a₂caun₂ ꞌnióg₁ dso₄? ¡Dsónꞌ₂ bá₄ on₃juaꞌ₅₄ le₂jaun₂!
18 Ia₁ chi₂juaꞌ₂ co₂dsia₅ ma₂ca₂ꞌéng₃ caun₂ cosa, conꞌ₂ siáꞌ₂ guëꞌ₂ ꞌnio₃ chogꞌ₅₄ táng₃, jaun₂ guë́₄ dsónꞌ₂ a₂jme₂jniág₁ ꞌŋió₃, a₂ma₂ca₂i₁juɨng₅₄ ꞌéiꞌ₃.
19 Tsá₃ ꞌio₅ bí₂ ꞌÉiꞌ₃ juaꞌ₅₄ a₂cheiꞌ₃ rë₂ ne₄ Diú₄. Jaun₂ në₂jag₄ bá₄ i₂co₂dsia₅ ma₂jon₅ bá₄ jniá₂ të₂le₃ ne₄ ꞌÉiꞌ₃ ia₁jaun₂ le₃chang₂ táng₃ të₂le₃ ne₄ Diú₄.
20 Jaun₂ co₂ꞌnióꞌ₄ ca₂të₁ton₅₄ bá₄ jniá₂ co₂lë₅ quianꞌ₅₄ Cristo ne₄ cróg₄; jaun₂ on₃juaꞌ₅₄ ꞌŋió₃ jniá₂ chang₂; ꞌŋiog₅ bá₄ Cristo i₂chan₂ juɨ₅ jme₂dsí₂ quió₃. Liaꞌ₂ conꞌ₂ lë́₅ chang₂ nɨ₁ŋɨ́₅ la₂, chang₂ të₂le₃ a₂jŋiaꞌ₅₄ conꞌ₂ ꞌéng₂ të₂le₃ quióꞌ₅ Ja₁ŋiꞌ₅₄ Diú₄, i₂ca₂rë₃ꞌnio₃ jniá₂, ca₂jɨ́inꞌ₂ ꞌŋiog₅ o₄quió₃ jniá₂.
21 Jaun₂ tsá₃ ꞌnio₃ jniá₂ juaꞌ₅₄ a₂jmo₅₄ cau₅ a₂ꞌua₁ dsɨ́₅ Diú₄; ia₁ juaꞌ₅₄ meiꞌ₂ guë́₃ guion₅₄ dsa₂ lé₂ le₃jmo₃ a₂cheinꞌ₃ rë₂ ne₄ Diú₄ të₂le₃ quianꞌ₅₄ a₂jme₃ti₃ ꞌÉiꞌ₃, tsá₃ ꞌe₂ ta₁ tí₄ a₂ca₂jon₃ Cristo juaꞌ₅₄ meiꞌ₂ guë́₃ le₂jaun₂.