ꞌA₂ liaꞌ₂ guénꞌ₂ Diú₄ dsa₂
3
¡ꞌEn₁ jmáꞌ₃ tsá₃ rë₂ꞌen₅₄ ꞌauꞌ₂ ꞌniaꞌ₂ dsa₂ gálatas! ¿ꞌEin₂ bá₄ je₂naꞌ₅₄ i₂ca₂jme₃gau₅ ꞌniaꞌ₂? Juaꞌ₂ ma₂ca₂të́₂ bá₄ neꞌ₅₄ ꞌniaꞌ₂ guiongꞌ₅₄ a₂ma₂ca₂jme₁jnia₅ jniaꞌ₅₄ të₃dsónꞌ₂ ꞌŋiog₅ Jesucristo i₂të₁ton₅₄ cróg₄.
2 Ŋag₄ caun₂ ꞌniaꞌ₂ a₂juáꞌ₄ la₂: ¿ꞌA₂ liaꞌ₂ ca₂guenꞌ₅₄ ꞌniaꞌ₂ Jme₂dsí₂ quián₅ Diú₄? ¿Ca₁gueinꞌ₅₄ ꞌniaꞌ₂ ia₁ a₂ca₂jme₁tiꞌ₄ ta₁ quíꞌ₅ ꞌÉiꞌ₃ quióꞌ₅ Moisés? ¿O₃ bá₄ ca₂gueinꞌ₅₄ ꞌniaꞌ₂ jme₁ca₂rë₃ꞌéngꞌ₂ jág₁ a₂ma₂neiꞌ₂ ꞌe₂ ꞌniaꞌ₂?
3 ¿ꞌA₂ bá₄ liaꞌ₂ ŋɨ́₄ tsá₃ rë₂ꞌen₅₄ ꞌauꞌ₂ ꞌniaꞌ₂? ¿O₃ bá₄ ꞌnáuꞌ₂ ꞌniaꞌ₂ ꞌauꞌ₂ a₂jme₁ꞌŋiagꞌ₂ quianꞌ₅₄ juɨ₅bí₂ quiángꞌ₂ guiongꞌ₅₄ a₂ma₂ca₂jme₁liógꞌ₄ quianꞌ₅₄ Jme₂dsí₂?
4 ¿O₃ bá₄ tsá₃ ꞌe₂ ta₁ tí₄ ca₂le₃jë́₃ a₂ma₂ca₂i₃ŋɨ́ꞌ₂ ꞌniaꞌ₂? Juɨ₁le₅₄ bá₄ a₂cha₂ ta₁ jmo₃ bá₄ ca₂la₂ a₂jaun₂.
5 Jë₁ma₂ca₂cuɨn₃ Diú₄ Jme₂dsí₂ quiáin₅ jmo₂₃ léi₄ juëꞌ₂ jɨnꞌ₄ ꞌniaꞌ₂, ¿ꞌe₂ lë₃ jmo₂₃? On₃juaꞌ₅₄ a₂jaun₂ guëꞌ₂ jmo₂₃ ia₁ a₂jme₂tiꞌ₅₄ ꞌniaꞌ₂ ꞌÉiꞌ₃. A₂jaun₂ bá₄ jmo₂₃ léi₄ juëꞌ₂ të₂le₃ ia₁ a₂ca₂rë₃ꞌénꞌ₂ ꞌniaꞌ₂ jág₁ a₂ma₂neiꞌ₂ bá₄.
6 Ia₁ Abraham në́₃, ca₂rë₃ꞌéin₂ të₂le₃ quióꞌ₅ Diú₄. A₂ca₂rë₃ꞌéin₂ jaun₂, ca₂guéiꞌ₂ Diú₄ në₂jag₄ bá₄ i₂ca₂rë₃tiꞌ₅₄ ꞌéiꞌ₃.a
7 ꞌUɨg₅₄ jaun₂ në́₃, ca₂tɨ́nꞌ₂ ꞌniaꞌ₂ le₃ŋiꞌ₅₄: juɨ₁liaꞌ₂ dsa₂ i₂ꞌén₂, i₂ꞌéi₂ bá₄ i₂lɨ́n₅ të₃dsónꞌ₂ co₂ꞌnióꞌ₄ tsɨ₁jon₂ Abraham.
8 Ne₄ Si₂ guiꞌ₅₄ jaun₂ ca₂juáꞌ₂ Diú₄ të₃jŋiá₅ ca₂tsɨ́ꞌ₃ Abraham a₂guein₃ le₂jiog₅ dsɨ₂nau₂ të₂le₃ jŋiaꞌ₅₄ conꞌ₂ le₃ꞌéin₂ bá₄, co₂ꞌnióꞌ₄ në₂jag₄ bá₄ i₂le₃tiꞌ₅₄ ꞌéiꞌ₃, jme₁ca₂juáꞌ₂ le₂la₂: “Ca₂le₃jë́₃ juɨg₂ te₁ꞌi₁ guaꞌ₅₄ ꞌuë₃ jme₁gonꞌ₅₄ jniá₂ të₂le₃ quianꞌ₅₄ ꞌne₂.”b
9 Jaun₂ le₂në₅ bá₄ në́₃, juɨ₁liaꞌ₂ dsa₂ i₂ꞌén₂ në́₃, i₂ꞌéi₂ bá₄ i₂lɨ́n₅ dsa₂ i₂rë₂gonꞌ₅₄ quián₅ Diú₄ co₂dsia₅ quiainꞌ₅₄ Abraham i₂ca₂rë₃ꞌén₂ ꞌéi₂.
10 Dsa₂ i₂jmo₅ dsɨ́₅ a₂tioinꞌ₅₄ ꞌÉiꞌ₃ tióin₂ juɨ₅ ꞌéiꞌ₃ a₂dsɨ₃ꞌéin₂. Ia₁ juáꞌ₂ ne₄ Si₂: “Ca₂le₃jɨ́n₃ i₂tsá₃ jme₂ti₃ ca₂le₃jë́₃ ꞌéiꞌ₃ a₂tioꞌ₅₄ ne₄ Si₂ tioinꞌ₅₄ ꞌéiꞌ₃ a₂dsɨ₃ꞌéin₂.”c
11 Rë₂ bá₄ léi₄ jaun₂ në́₃, ꞌi₁jan₂ tsá₃ ꞌein₂ lé₂ le₃náu₃ rë₂ ne₄ Diú₄ të₂le₃ ia₁ a₂jme₃ti₃ ꞌÉiꞌ₃. Ia₁ ne₄ Si₂ juáꞌ₂: “Dsa₂ i₂guénꞌ₂ Diú₄ co₂ꞌnióꞌ₄ i₂lɨ́n₅ i₂dsen₃, të₂le₃ a₂jŋiaꞌ₅₄ conꞌ₂ a₂ꞌéin₂ bá₄ le₃chain₂.”d
12 La₁ ꞌÉiꞌ₃ Juáꞌ₅ quióꞌ₅ Moisés në́₃, on₃juaꞌ₅₄ a₂cha₂ ja₁já₄ ꞌuɨg₅₄ a₂ꞌén₂ dsa₂ jaun₂. Ia₁ të₂le₃ le₂la₂ bá₄ juáꞌ₂: “Dsa₂ i₂jmo₅ liaꞌ₂ conꞌ₂ lë́₅ juáꞌ₂ ꞌÉiꞌ₃, quianꞌ₅₄ ꞌÉiꞌ₃ jaun₂ le₃chain₂.”e
13 Cristo ca₂quí₃ ca₂lió₂ jniog₄ uɨg₅ a₂jme₁ca₂tág₂ guéi₁ conꞌ₂ lë́₅ ꞌÉiꞌ₃. Ia₁ ne₄ Si₂ juáꞌ₂: “Ma₂rë₂ꞌë́₂ uɨg₅ ja₁con₂ chi₂juaꞌ₂ ꞌein₂ i₂të₂ton₅₄ gueiꞌ₅₄ ꞌma₂.”f
14 Le₂në₅ ca₂quí₃ ia₁jaun₂ a₂dse₃ jaun₂ a₂ca₂jme₃gonꞌ₅₄ Diú₄ Abraham, ŋag₅ le₃ja₁con₂ dsɨ₂nau₂ të₂le₃ quianꞌ₅₄ Cristo Jesús. Ca₂quí₃ ia₁jaun₂ guéi₁ jniog₄ ca₂le₃jág₃ të₂le₃ ia₁ a₂ꞌéin₂, guén₄ Jme₂dsí₂ Jŋió₅ a₂ma₂juáꞌ₂ cuɨin₃.
Juɨ₁liaꞌ₂ ꞌÉiꞌ₃ Juáꞌ₅, quianꞌ₅₄ jág₁ a₂ma₂cuë₃ Diú₄
15 Rɨnꞌ₅₄ jniog₄, la₂ cuë₅₄ jniá₂ caun₂ jág₁ jángꞌ₅ léi₄ ꞌa₂ liaꞌ₂ lë́₅ jmo₅ dsa₂ mɨ₂güɨ́g₃: Juɨ₁liaꞌ₂ jme₁quiog₂ dsa₂ caun₂ si₂ ja₁tioꞌ₅₄ jág₁ a₂lɨꞌ₅₄ jaun₂ tioꞌ₅₄ firma quióꞌ₅, jaun₂ ꞌi₁jan₂ tsá₃ ꞌein₂ lé₂ le₃jmo₃ tsá₃ quen₅ si₂ jaun₂, on₃ guëꞌ₂ ma₃lé₂ juaꞌ₅₄ jmo₃ guë́₄ ŋag₅₄ ꞌi₁caun₂ conꞌ₂ lë́₅ jaun₂.
16 Jaun₂ le₂në₅ ca₂cuë₃ Diú₄ jág₁ quióꞌ₅ ca₂cuë́ꞌ₃ Abraham quianꞌ₅₄ chiꞌ₂ dsio₄ ꞌéi₂. Ne₄ Si₂ quióꞌ₅ tsá₃ juáꞌ₂ juaꞌ₅₄ a₂ꞌɨin₂₃ “juɨn₅ tsɨ₁jon₂” ꞌéi₂. Ca₂juáꞌ₂ “tsɨ₁jon₂ quiángꞌ₂”,g ꞌɨin₂₃ jan₂ dsa₂ bá₄. I₂jan₂ ꞌéi₂ lɨ́n₅ Cristo.
17 Le₂la₂ bá₄ ꞌë₅ jniá₂: Ca₂jmo₃ Diú₄ caun₂ jág₁ quiainꞌ₅₄ Abraham. Jaun₂ jme₁ca₂gua₃ ꞌÉiꞌ₃ Juáꞌ₅ në́₃, quén₂ ꞌŋiá₂-láu₂ rë₂dsɨ́₂ guióg₂-guiá₂ (430) ŋi₂ cang₂ jaun₂, la₁ tsá₃ le₃juaꞌ₅₄ juaꞌ₅₄ a₂tsá₃ quen₅ jág₁ a₂lɨꞌ₅₄ Diú₄ quiainꞌ₅₄ Abraham, on₃ guëꞌ₂ le₃juaꞌ₅₄ a₂tsá₃ jma₃quen₅ jág₁ ron₅ a₂rë₂cuë́₁ quióꞌ₅ Diú₄.
18 Ia₁ juaꞌ₅₄ meiꞌ₂ guë́₃ lé₂ gue₃ dsa₂ a₂ca₂tíin₂ a₂cuë₃ Diú₄ të₂le₃ ia₁ a₂jme₂ti₃ ꞌÉiꞌ₃, jaun₂ tsá₃ ma₃le₃juaꞌ₅₄ juaꞌ₅₄ a₂gue₃ guë́₄ dsa₂ të₂le₃ ia₁ a₂ma₂cuë₃ Diú₄ jág₁ quióꞌ₅. La₁ ca₂cuë₃ Diú₄ jág₁ quióꞌ₅ në́₃ ca₂cuë́ꞌ₃ Abraham a₂ca₂tɨ́in₂ gue₃ a₂lë₁gue₃ co₂ŋɨ́₂ bá₄.
19 ¿ꞌE₂ ta₁ quíꞌ₅ ꞌÉiꞌ₃ Juáꞌ₅ jaun₂ në́₃? Cang₂ jaun₂ bá₄ ca₂já₃, a₂quíꞌ₃ ta₁ a₂ꞌë₃ ꞌa₂ liaꞌ₂ lë́₅ qui₂i₁juɨn₅₄ dsa₂ ꞌno₂₃ dso₄. ꞌÉiꞌ₃ jaun₂ ca₂gua₃ ca₂liaꞌ₂ ca₂guan₃ “tsɨ₁jon₂ i₂jan₂ i₂ꞌɨin₂₃ ꞌéi₂” conꞌ₂ lë́₅ jág₁ ma₂cuë₃ Diú₄. ꞌÉiꞌ₃ jaun₂ në́₃, ca₂të₁ron₅₄ të₂le₃ quianꞌ₅₄ ángel i₂ca₂ꞌë́₂ jág₁. Ca₂të₁tsɨnꞌ₅₄ jan₂ dsa₂ i₂chénꞌ₅ ne₄ jág₁.
20 La₁ jme₁ca₂dsia₃ Diú₄ jág₁ quiainꞌ₅₄ Abraham le₂ꞌuɨg₅₄, ꞌŋiog₅ bá₄ ca₂dsia₃ jág₁. Tsá₃ ꞌein₂ siánꞌ₂ ca₂nau₂ ne₄ jág₁. Ia₁ i₂jan₂ tan₅₄ ꞌéi₂ bá₄ Diú₄ i₂ca₂juáꞌ₂ jme₁ca₂juáꞌ₂.
Ta₁ a₂quíꞌ₅ ꞌÉiꞌ₃ Juáꞌ₅
21 ¿O₃ bá₄ co₂ꞌnióꞌ₄ juáꞌ₂ jaun₂ në́₃, a₂quíꞌ₅ ta₁ ꞌÉiꞌ₃ a₂ꞌnio₃ ꞌéin₂ jág₁ a₂ma₂cuë₃ Diú₄? On₃juaꞌ₅₄ le₂jaun₂. Juaꞌ₅₄ meiꞌ₂ guë́₃ lé₂ le₃cuë₃ ꞌÉiꞌ₃ Juáꞌ₅ caun₂ juɨ₅ ja₁lé₂ le₃chan₂ jme₂dsí₂, jaun₂ bá₄ jme₁lé₂ le₃guen₃ Diú₄ dsa₂ të₂le₃ quianꞌ₅₄ a₂jme₃ti₃ dsa₂ ꞌÉiꞌ₃ jaun₂.
22 La₁ liaꞌ₂ conꞌ₂ lë́₅ juáꞌ₂ ne₄ Si₂, ca₂le₃jɨ́n₃ bá₄ dsa₂ tioinꞌ₅₄ le₁ꞌŋeiꞌ₅₄ juɨ₅ ja₁ꞌno₂₃ dso₄, ia₁jaun₂ të₂le₃ a₂jŋiaꞌ₅₄ conꞌ₂ ꞌéin₂ bá₄ të₂le₃ quióꞌ₅ Jesucristo le₃gue₃ a₂ma₂juáꞌ₂ Diú₄ cuë₃.
23 Néꞌ₃ a₂guá₂ jág₁ a₂le₃ꞌén₂ dsa₂ në́₃, jme₁tioꞌ₅₄ jniog₄ le₁jnág₅ quianꞌ₅₄ ꞌÉiꞌ₃, co₂ꞌnióꞌ₄ a₂jme₁jmo₂₃ ꞌí₁ jniog₄, qui₂le₁jŋia₁ a₂le₃jniá₂ a₂le₃ꞌéin₂ jaun₂.
24 ꞌUɨg₅₄ jaun₂ bá₄ në́₃, ꞌÉiꞌ₃ ca₂jme₃góin₃ ne₄ quián₂ jniog₄, në₂jag₄ bá₄ jan₂ të₅ i₂ca₂jiog₃ ca₂të₂ ja₁con₂ Cristo, ia₁jaun₂ jë₁ma₂ca₂rë₃ꞌéin₂ të₂le₃ quióꞌ₅ ꞌéi₂, lé₂ le₃të₃tsagꞌ₅₄ jniog₄ rë₂ ne₄ Diú₄.
25 Jaun₂ rë₂në́₃ në́₃ ma₂gua₅ bá₄ a₂ꞌéin₂ jniog₄, tsá₃ ma₃tioꞌ₅₄ ne₄ ꞌÉiꞌ₃ juaꞌ₅₄ a₂jaun₂ a₂jiog₅ guë́₄ jniog₄, jmo₅ ꞌí₁.
26 A₂lɨ́nꞌ₅ ꞌniaꞌ₂ ca₂le₃jɨ́ngꞌ₃ chiꞌ₂-guein₂ quián₅ Diú₄, të₂le₃ ia₁ a₂ꞌénꞌ₂ ꞌniaꞌ₂ le₃quióꞌ₅ Cristo Jesús.
27 Jaun₂ ca₂le₃jɨ́nꞌ₃ ꞌniaꞌ₂ conꞌ₂ i₂ma₂tionꞌ₅₄ ꞌei₅ caun₂ jág₁ quianꞌ₅₄ Cristo liaꞌ₂ conꞌ₂ jme₁ca₂jŋógꞌ₂ jmɨg₂, tiónꞌ₂ ꞌniaꞌ₂ a₂rë₂jniágꞌ₁ rë₂lɨngꞌ₅₄ në₂jag₄ bá₄ Cristo ꞌŋiog₅.
28 Tsá₃ ma₃jma₃quén₅ tión₂ dsa₂, tsá₃ a₂nag₅₄ o₁jŋiaꞌ₅₄ i₂lɨ́n₅ judíos, o₃ griegos, on₃ guëꞌ₂ i₂lɨ́n₅ dsa₂ i₂jme₂ti₃ ta₁ ne₄ juɨg₅₄, on₃ guëꞌ₂ dsa₂ i₂tsá₃ ꞌein₂ ne₄ jme₂ti₃ në́₃; dsa₂ ŋeꞌ₂, o₃ dsa₂ mɨ́₂ ꞌe₂; ia₁ i₂co₂rɨn₂ bá₄ ꞌniaꞌ₂ le₃quióꞌ₅ Cristo Jesús.
29 Chi₂juaꞌ₂ ténꞌ₅ ꞌniaꞌ₂ le₃quióꞌ₅ Cristo, jaun₂ guë́₄ lɨ́ngꞌ₅ dsa₂ tsɨ₁jon₂ Abraham, jaun₂ ca₂tɨ́nꞌ₂ ꞌniaꞌ₂ guéiꞌ₁ a₂lë́₅ jág₁ a₂cuë₃ Diú₄.