3 Juɨ₁jme₁juɨnꞌ₂ jniog₄ Diú₄ Jmei₂ Jesucristo Te₁guiꞌ₅₄ quián₂, ia₁ le₃quióꞌ₅ Cristo bá₄ ma₂ca₂jme₃guꞌ₅₄ ꞌéi₂ jniog₄ ꞌŋio₅ lɨn₃ quianꞌ₅₄ ca₂le₃jë́₃ ne₅₄ a₂dse₃ a₂gu₂dsí₂ a₂já₅ gueiꞌ₅₄ i₂juɨ́g₃.

4 Liaꞌ₂ conꞌ₂ néꞌ₃ a₂jmo₃ Diú₄ mɨ₂güɨ́g₃, ca₂quióꞌ₂ jniog₄ a₂léi₂ dsa₂ i₂náu₁ le₃quióꞌ₅ Cristo, ia₁jaun₂ le₃chong₂ le₃ne₅₄ lë́₅ ꞌí₁ quiáin₅, tsá₃ ma₃ꞌe₂ dsáu₁ jniog₄ cha₂. ꞌUɨg₅₄ ia₁ a₂ꞌnio₃ bá₄ jniog₄,

5 ca₂quióꞌ₂ ca₂le₂jŋiá₅, a₂guéiꞌ₂ léi₂ jniog₂ chiꞌ₂-guein₂ quiáin₅ të₂le₃ quianꞌ₅₄ Jesucristo, liaꞌ₂ conꞌ₂ lë́₅ ca₂i₃jiog₅ dsɨ́₅. Ia₁ le₂në₅ ca₂rë₃ꞌŋió₃ dsɨ́₅ ꞌŋiog₅.

6 ꞌUɨg₅₄ në₅ në́₃ jme₂juɨ́nꞌ₁ jniog₄ Diú₄ ia₁ ꞌua₁ dsɨ́₅ ꞌŋio₅ lɨn₃, jaun₂ ca₂jme₃guꞌ₅₄ jniog₄ le₃quióꞌ₅ Ja₁ŋiꞌ₅₄ i₂ŋɨ́₄ ꞌnioi₃ lɨn₃.

7 ꞌÉi₂ bá₄ ca₂quí₃ ca₂láu₂ jniog₄ të₂le₃ quianꞌ₅₄ jmɨ₂ ꞌain₅₄, ca₂ꞌéin₂ dsáu₁ jniog₄ a₂jme₁le₁cáuꞌ₄, të₂le₃ ia₁ a₂ŋɨ́₄ lë₃ ꞌua₁ dsɨ́₅.

8 A₂dse₃ dsɨ́₅ lɨn₃ bá₄ Diú₄ ca₂jmo₃ a₂le₃ŋɨ́ꞌ₂ dsɨ₅ jniog₄ a₂le₃tag₂ ca₂le₃jë́₃,

9 a₂ma₂ca₂jme₃jniai₂₃ ja₁con₂ jniog₄ jág₁ quióꞌ₅ a₂jme₁rë₂ꞌma₄, a₂i₃jiog₅ dsɨ́₅ jmo₃, liaꞌ₂ conꞌ₂ lë́₅ ca₂rë₃ꞌŋió₃ dsɨ́₅ jmo₃ a₂dse₃ dsɨ́₅. ꞌŊiog₅ bá₄ Diú₄ ca₂lë₃ dsɨ́₅ jmo₃ le₃quióꞌ₅ Cristo.

10 Liaꞌ₂ conꞌ₂ lë́₅ jág₁, jme₃ti₃ bá₄ liaꞌ₂ tí₅ jág₁ quióꞌ₅ jë₁ma₂ca₂të́₂ jmɨg₄ a₂ꞌi₄ ꞌéiꞌ₃ dsia₃ o₄gú₃ Cristo a₂jmo₃ ꞌéi₂ ꞌéiꞌ₃ liaꞌ₂ gueiꞌ₅₄ i₂juɨ́g₃ liaꞌ₂ ne₄ guaꞌ₅₄ ꞌuë₃.

11 Ján₃ bá₄ le₂në₅, a₂tióng₂ jniaꞌ₅₄ le₃quióꞌ₅ Cristo, ca₂quióꞌ₂ Diú₄ të₃jŋiá₅ liaꞌ₂ conꞌ₂ lë́₅ ta₁ quióꞌ₅ a₂ma₂i₂jiog₅ dsɨ́₅ jmo₃ le₂jŋiá₅. Ia₁ Diú₄ bá₄ i₂jmo₅ ꞌe₂ niog₅ lë́₂, liaꞌ₂ conꞌ₂ lë́₅ dsɨ₂jiog₅ dsɨ́₅ jmo₃.

12 Le₂në₅ ma₂ca₂jmo₃ ia₁jaun₂ jniaꞌ₅₄ i₂le₂ꞌuɨg₅₄ ꞌéi₁ caun₂ dsɨ₅ të₂le₃ quióꞌ₅ Cristo, le₃chong₂ jniaꞌ₅₄ jmó₁ juëꞌ₂ a₂co₂tág₅ quióꞌ₅.

13 Ján₃ bá₄ le₂jaun₂ jme₁ca₂neiꞌ₂ ꞌniaꞌ₂ jág₁ tí₅, jme₁ca₂rë₃ꞌë́₂ jág₁ a₂lión₂ dsa₂, jaun₂ ca₂rë₃ꞌénꞌ₂ bá₄ ꞌniaꞌ₂. Jaun₂ ca₂jme₁quianꞌ₄ bá₄ ꞌniaꞌ₂ Cristo ca₂lɨnꞌ₃ ꞌniaꞌ₂ léi₄ a₂lɨ́ngꞌ₅ i₂quián₅ Diú₄ të₂le₃ quianꞌ₅₄ Jme₂dsí₂ Jŋió₅ i₂ma₂lë́₅ jág₁ cuɨn₃ Diú₄.

14 Jme₂dsí₂ Jŋió₅ ꞌéi₂ bá₄ në́₃ lɨ́in₅ co₂ꞌnióꞌ₄ caun₂ cu₄ a₂ma₂quiog₂ dsa₂ të₃jŋiá₅ co₂ꞌnióꞌ₄ a₂ma₂lë́₅ chi₁quian₅ quián₂ jniog₄ a₂të₃dsónꞌ₂ guéi₁ a₂ca₂tág₂ a₂cuë₃ Diú₄ jë₁ma₂ca₂ꞌŋia₅ a₂lióin₂ dsa₂ quiáin₅, ia₁jaun₂ jme₃juëꞌ₂ dsa₂ a₂co₂tág₅ quióꞌ₅.

15 ꞌUɨg₅₄ jaun₂ jniá₂ në́₃, jme₁ca₂rë₃guion₅₄ a₂ꞌénꞌ₂ ꞌniaꞌ₂ të₂le₃ quióꞌ₅ Te₁guiꞌ₅₄ Jesús, conꞌ₂ siáꞌ₂ táng₃ ia₁ ꞌnióꞌ₃ bá₄ ꞌniaꞌ₂ ca₂le₃jɨ́n₃ i₂tén₅ le₃quióꞌ₅ Diú₄,

16 jaun₂ në́₃ ca₂le₃o₃ jmɨg₄ bá₄ tsá₃ lë́₅ juaꞌ₅₄ tsá₃ cuë́₅ ti₁ꞌmagꞌ₄ o₄quiánꞌ₂ ꞌniaꞌ₂, ꞌɨ́n₅ jniá₂ ꞌniaꞌ₂ ne₅₄.

17 Caun₂ qui₂mɨ₅ jniá₂ juɨ́g₂ Diú₄ quián₅ Te₁guiꞌ₅₄ Jesucristo quián₂ jniog₄, i₂lɨ́n₅ Tia₅₄ juɨnꞌ₂, juɨ₁jmo₁₂ bá₄ a₂lénꞌ₂ ꞌniaꞌ₂ dsa₂ i₂tɨn₂ i₂niog₅ dsi₄ të₂le₃ quióꞌ₅ jme₂dsí₂, a₂le₃ŋɨ́ꞌ₂ ꞌauꞌ₂ ꞌniaꞌ₂ a₂jme₃jniai₂₃ ia₁jaun₂ le₃cuɨinꞌ₂ guë́₄ ꞌniaꞌ₂ dse₃.

18 Mɨ₅ jniá₂ ján₃, juɨ₁jme₂jnio₅₄ neꞌ₅₄ ꞌniaꞌ₂, ia₁jaun₂ le₃ŋiꞌ₅₄ ꞌe₂ jaun₂ a₂le₁ꞌág₄ caun₂ ꞌauꞌ₂ ꞌniaꞌ₂ a₂ma₂të₂₃ a₂cuë₃; a₂quen₅ lɨn₃ bá₄ ca₂le₃jë́₃ a₂jláꞌ₁ a₂ca₂tɨ́n₂ dsa₂ i₂lë́₅ ꞌí₁ quiáin₅;^c

19 mɨ₅ jniá₂ juɨ₁le₂ŋiꞌ₅₄ ꞌniaꞌ₂ ján₃, ꞌe₂ guë́₄ tson₂ juëꞌ₂ bí₂ quióꞌ₅, a₂niog₅ jmo₂₃ le₃quián₂ jniog₄ i₂ꞌéin₂. Juɨ₅bí₂ në₅ në́₃ a₂le₂jaun₂ bá₄ në₅ juɨ₁liaꞌ₂ a₂ca₂jme₃jnia₅ Diú₄

20 jme₁ca₂jme₃jeinꞌ₅₄ Cristo ja₁jme₁rë₂ꞌlɨin₅₄ a₂ca₂dsiog₃ jaun₂ në́₃ le₃gu₂ ne₁ quióꞌ₅, gueiꞌ₅₄ i₂juɨ́g₃.

21 Ja₁jaun₂ ca₂dsiog₃ ca₂ꞌag₃ a₂lɨ́in₅ ta₁ juëꞌ₂ lɨn₃ a₂goin₂ ne₄ quióꞌ₅ ca₂le₃jë́₃ ꞌéiꞌ₃, ne₄ quióꞌ₅ ca₂le₃jë́₃ juɨ₅bí₂ a₂cha₂. ꞌÉi₂ bá₄ juɨnꞌ₂ ne₄ quióꞌ₅ ca₂le₃jɨ́n₃ dsɨ₂tan₅₄ i₂ꞌuanꞌ₂ gon₂, ne₄ ca₂le₃jɨ́n₃ i₂juɨnꞌ₂ i₂lɨ́n₅ juɨg₅₄, ján₃ bá₄ ꞌéi₂ juɨnꞌ₂ ne₄ ca₂le₃jë́₃ ne₅₄ ta₁ a₂lé₂ le₃lén₂ dsa₂, on₃juaꞌ₅₄ jmáꞌ₃ mɨ₂güɨ́g₃ la₂, ŋó₅ në₅ jmo₂₃ ꞌéiꞌ₃ le₂tan₅₄ mɨ₂güɨ́g₃ caun₂.

22 O₄tag₄ Cristo bá₄ ca₂tonꞌ₂ Diú₄ ca₂le₃jɨ́n₃ i₂chan₂, ca₂le₃jë́₃ a₂cha₂ në́₃, jaun₂ ꞌŋiog₅ guëꞌ₂ Cristo ca₂ꞌɨin₃ a₂lɨ́in₅ mɨ₂dsi₄ ne₄ ca₂le₃jë́₃ le₃quióꞌ₅ guáꞌ₅ quiáin₅.

23 Jaun₂ guáꞌ₅ quiáin₅ në́₃, lë́₅ co₂ꞌnióꞌ₄ nɨ₁ŋɨ₁₂ ꞌŋiog₅ a₂rë₂ꞌŋia₅ ta₁jain₂; jaun₂ Cristo ꞌŋiog₅ bá₄ jme₃ꞌŋiai₂₃ ca₂le₃jë́₃ guë́₄ a₂ꞌnióꞌ₅ ca₂le₂con₂.