Jme₁ꞌon₁ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂
6
Rɨnꞌ₅₄ jniog₄, në₁ꞌein₂ ꞌniaꞌ₂ ca₂tánꞌ₂ dso₄, ꞌniaꞌ₂ guëꞌ₂ conꞌ₂ i₂ma₂jiog₅ Jme₂dsí₂, ca₂tɨ́nꞌ₂ ꞌniaꞌ₂ jme₁ꞌoinꞌ₁, ia₁jaun₂ roinꞌ₂ táng₃, jmóꞌ₂ ꞌniaꞌ₂ ꞌua₁ ꞌauꞌ₂ ja₁coin₂. La₁ ꞌí₁ jmo₄, ia₁ conꞌ₂ tsá₃ ŋó₅ në₁le₂jiog₅ ꞌŋiagꞌ₂ ca₂tángꞌ₂ ján₃.
2 Jme₁ꞌon₁ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂, chi₂juaꞌ₂ ꞌe₂ caun₂ o₂meꞌ₅₄ dsɨ₅ guei₂ quian₅ rɨ́ngꞌ₂, ia₁ le₂në₅ bá₄ le₃tenꞌ₅₄ ꞌniaꞌ₂ ꞌéiꞌ₃ a₂ca₂quiog₂ Cristo.a
3 Ia₁ në₁juaꞌ₂ chan₂ ꞌein₂ lɨ́n₂ tɨin₂ jmo₂₃, në₁juaꞌ₂ tsá₃ ꞌe₂ ta₁ téin₄ guëꞌ₂ në́₃, jme₂gain₂₃ ꞌŋiog₅.
4 Le₂jan₂ le₂jan₂ bá₄ dsa₂ ca₂tɨ́in₂ con₂ ꞌí₁ ꞌa₂ liaꞌ₂ jŋiaꞌ₅₄ ma₂lë́₅ chain₂ guioin₅₄. Në₁juaꞌ₂ ca₂rë₃líꞌ₄ rë₂ ma₂chain₂, tióin₂ dse₃ guioin₅₄ bá₄, on₃juaꞌ₅₄ jŋiaꞌ₅₄ ꞌnio₃ cheinꞌ₃ dse₃ o₄quióꞌ₄ i₂siánꞌ₂.
5 Ia₁ i₂jma₃quén₅ cán₂ guei₂ o₂meꞌ₅₄ dsɨ₅ guion₅₄ bá₄ dsa₂ le₂jain₂ le₂jain₂.
6 Juɨ₁liaꞌ₂ dsa₂ i₂rë₂tɨn₂ jág₁ quióꞌ₅ Diú₄, ca₂tɨ́in₂ jme₃ꞌoin₅₄ të₅ quiáin₅ quianꞌ₅₄ ca₂le₃jë́₃ ne₅₄ a₂dse₃ a₂cha₂ quióꞌ₅.
7 Tsá₃ lë₁jme₂gán₁ ꞌniaꞌ₂ ꞌauꞌ₂ guiongꞌ₅₄: ia₁ ꞌi₁jan₂ tsá₃ ꞌein₂ lé₂ lë₁co₃jmáꞌ₂ Diú₄, ia₁ chi₂juaꞌ₂ ꞌe₂ caun₂ a₂jne₅ dsa₂, a₂jaun₂ bá₄ ráu₃ quióꞌ₅.
8 Juɨ₁liaꞌ₂ jan₂ dsa₂ i₂jne₅ a₂ꞌɨ́n₅ dsɨ́₅ nɨ₁ŋɨ₁ ꞌŋiog₅, juɨ₅ nɨ₁ŋɨ₁₂ jaun₂ bá₄ roꞌ₂ ꞌmú₃; la₁ dsa₂ i₂jne₅ të₂le₃ quióꞌ₅ Jme₂dsí₂, juɨ₅ Jme₂dsí₂ bá₄ ráu₃ quióꞌ₅ ján₃ a₂le₃chain₂ co₂tan₅₄.
9 Le₂në₅ bá₄, tsá₃ lë₁o₁ꞌúꞌ₄ dsɨ₅ jniog₄ a₂jmó₁ a₂dse₃; ia₁ në₁juaꞌ₂ tsá₃ ca₂ꞌág₂ caun₂-tɨn₃ dsɨ₅ jniog₄, já₅ bá₄ jmɨg₄ të₅₄ a₂ráu₃ quián₂.
10 Jaun₂ lë₃, liaꞌ₂ co₂ráun₂ lé₂ le₃jmó₁, o₁jmó₁ jniog₄ a₂dse₃ ja₁con₂ ca₂le₃jɨ́n₃, la₁ ja₂lɨn₃ guë́₄ le₃ja₁con₂ rɨnꞌ₅₄ jniog₄ i₂ꞌén₂.
ꞌË́₂ guë́₄ jág₁ të₃jŋiá₅, jë₁ꞌágꞌ₅ jág₁
11 Jag₄ ꞌniaꞌ₂ quianꞌ₅₄ letras ca₁caꞌ₅₄ jmo₂₃ quianꞌ₅₄ gu₃ ꞌŋió₃,b si₂ a₂tsíng₂ neꞌ₅₄ ꞌniaꞌ₂.
12 Dsa₂ i₂jŋiaꞌ₅₄ ꞌnio₃ le₃jniai₂ tióin₂ dse₃, chi₂quiáin₂ jmɨg₄ ꞌniaꞌ₂ a₂tíꞌ₁ ꞌniaꞌ₂ loꞌ₅₄; jmo₂₃ le₂jaun₂ ia₁jaun₂ tsá₃ ꞌein₂ co₃ꞌein₃ ꞌuɨg₅₄ ne₄ jág₁ quióꞌ₅ cróg₄ quióꞌ₅ Cristo.
13 Ca₂liaꞌ₂ jŋiaꞌ₅₄ guion₅₄ dsa₂ i₂ti₅ lo₄ ꞌéi₂, tsá₃ a₂jaun₂ jme₂ti₃ a₂juáꞌ₂ ca₂le₃jë́₃ ꞌÉiꞌ₃ Juáꞌ₅ jaun₂. La₁ ꞌnio₃ në́₃ a₂tíꞌ₁ ꞌniaꞌ₂ quiángꞌ₂, ia₁jaun₂ le₃jmo₃ táinꞌ₅ ja₁con₂ nɨ₁ŋɨꞌ₁ ꞌniaꞌ₂.
14 La₁ jniá₂ në́₃, o₁lɨ́gꞌ₂ tsá₃ ꞌnio₃ jmo₅₄ tángꞌ₅, jŋiaꞌ₅₄ liaꞌ₂ le₃quióꞌ₅ ꞌmú₃ a₂ca₂i₃ŋɨ́₂ Te₁guiꞌ₅₄ Jesucristo quián₂ jniog₄ ne₄ cróg₄ bá₄. Ia₁ ꞌuɨg₅₄ a₂ca₂jon₃ Cristo ne₄ cróg₄, ma₂ca₂ŋɨ́₂ bá₄ mɨ₂güɨ́g₃ ja₁con₂ jniá₂; ján₃ guëꞌ₂ le₂jaun₂ co₂ꞌnióꞌ₄ ma₂jon₅ bá₄ jniá₂ të₂le₃ ne₄ mɨ₂güɨ́g₃.
15 Jaun₂ në́₃, ꞌi₁caun₂ tsá₃ ꞌe₂ quen₅ a₂rë₂uɨng₄ o₃ a₂tsá₃ ꞌe₂ rë₂uɨng₄ lo₄ dsa₂; la₁ a₂léi₂ jniog₄ dsa₂ i₂ma₂ca₂rë₃ꞌmagꞌ₂ të₂dsɨ́₅, a₂në₅ bá₄ dsónꞌ₂ a₂quen₅.
16 Të₂le₃ ja₁con₂ ca₂le₃jɨ́n₃ dsa₂ i₂i₂nio₄ liaꞌ₂ conꞌ₂ lë́₅ jág₁ në₅, juɨ₁le₁ꞌág₄ bá₄ tei₄ ꞌauꞌ₂ ꞌniaꞌ₂, juɨ₁dsia₅₄ bá₄ Diú₄ ŋéi₂ dsɨ́₅ ja₁conꞌ₂ ꞌniaꞌ₂ i₂lɨ́ngꞌ₅ të₃dsónꞌ₂ dsa₂ juɨg₂ quiáin₅.
17 Në₃ në́₃, të₂le₃ ne₄ juɨ₅ ja₁dsau₅₄ në₅, ꞌi₁jan₂ tsá₃ ꞌein₂ juɨ₁cuë₅₄ o₂meꞌ₅₄ dsɨ₃, ia₁ ma₂quian₄ bá₄ jniá₂ ꞌŋió₃ léi₄ tioꞌ₅₄ nɨ₁ŋɨ₃ a₂jángꞌ₅ jág₁ dsau₅ a₂lɨ́ng₅ të₃dsónꞌ₂ jan₂ dsa₂ quián₅ Jesús.
18 Juɨ₁jme₂guꞌ₅₄ bá₄ Te₁guiꞌ₅₄ Jesucristo quián₂ jniog₄ jme₂dsí₂ quiánꞌ₂ ꞌniaꞌ₂, rɨnꞌ₅₄ jniog₄. A₂méi₃.
Co₂në₅.