Tiá₂ nau₂ ꞌniaꞌ₂ juɨ₅ rë₂na₄
5
Cristo ca₂chéiꞌ₂ jniog₄, ia₁jaun₂ tsá₃ ma₃le₃chong₂ juaꞌ₅₄ a₂le₁ꞌŋeiꞌ₅₄ guë́₄. Jaun₂ tiá₂ nau₂ ꞌniaꞌ₂ juɨ₅ rë₂na₄, tsá₃ ma₃tónꞌ₂ ꞌniaꞌ₂ táng₃ uɨg₅ ꞌéiꞌ₃ guei₂ co₂ꞌnióꞌ₄ a₂jmo₅ a₂rë₂ꞌŋeꞌ₅₄ dsa₂.
2 Jaun₂ rë₂ nei₂ ꞌniaꞌ₂. Jniá₂ Pa₄, juɨ́g₂ ꞌniaꞌ₂: Në₁juaꞌ₂ cuɨ́nꞌ₅ ꞌniaꞌ₂ a₂ti₃ dsa₂ nɨ₁loꞌ₄*, jaun₂ dsióg₅ ꞌi₁ca₂juɨg₄ tsá₃ ꞌe₂ ta₁ tén₄ Cristo ja₁conꞌ₂ ꞌniaꞌ₂.
3 ꞌNio₃ jniá₂ juáꞌ₄ táng₃: në₁ꞌein₂ cuɨn₅ a₂ti₃ dsa₂ nɨ₁lo₁₂, ca₂tɨ́in₂ jme₃ti₃ ca₂le₃jë́₃ ꞌéiꞌ₃ quíꞌ₅ Si₂ quióꞌ₅ Moisés.
4 ꞌNiaꞌ₂ i₂ꞌnáuꞌ₂ juɨ₅ a₂guéiꞌ₂ Diú₄ a₂lɨ́ngꞌ₅ dsa₂ dsen₃ të₂le₃ ꞌuɨg₅₄ ia₁ a₂rë₂tenꞌ₅₄ ꞌniaꞌ₂ ꞌÉiꞌ₃, ca₂dsióg₃ táng₃ co₂dsia₅ ma₂ca₂ꞌniaꞌ₅₄ bá₄ ꞌniaꞌ₂ jág₁ quianꞌ₅₄ Cristo; ma₂i₂uɨ́nꞌ₃ bá₄ táng₃ ꞌniaꞌ₂ ja₁dsia₅ Diú₄ ꞌua₁ dsɨ́₅ ja₁conꞌ₂ ꞌniaꞌ₂.
5 Ia₁ të₂le₃ quianꞌ₅₄ Jme₂dsí₂, të₂le₃ jŋiaꞌ₅₄ ꞌa₂ conꞌ₂ ꞌéin₂ bá₄ jniog₄, chong₂ a₂ꞌɨ́n₂ dsɨ₅ le₁jŋia₁ a₂já₅ caun₂ jmɨg₄ jë₁léi₂ dsónꞌ₂ jniog₄ dsa₂ dsen₃.
6 Ia₁ në₁juaꞌ₂ chong₂ le₃quióꞌ₅ Cristo Jesús, tsá₃ ꞌe₂ ta₁ jmo₃ o₁jŋiaꞌ₅₄ a₂rë₂uɨng₄ o₃ tsá₃ rë₂uɨng₄ ꞌe₂ lo₄ dsa₂. Ia₁ a₂le₃ꞌéin₂ bá₄ të₃dsónꞌ₂ quen₅, a₂le₃jniá₂ të₂le₃ quianꞌ₅₄ a₂jme₁ꞌnió₄ jniog₄ rɨnꞌ₅₄.
7 Dse₃ bá₄ liaꞌ₂ conꞌ₂ jme₁ma₂ja₂nóꞌ₅ ꞌniaꞌ₂. ¿ꞌEin₂ bá₄ ca₂jmo₃ jnág₅ juɨ₅ jaun₂ tsá₃ ma₃nágꞌ₁ gau₂ jág₁ a₂tí₅ dsónꞌ₂?
8 On₃juaꞌ₅₄ a₂jaun₂ a₂ma₂të₅ Diú₄ ꞌniaꞌ₂ juaꞌ₅₄ a₂jmóꞌ₂ le₂në₅.
9 Lë́₅ juɨ₁liaꞌ₂ juáꞌ₂ jág₁ quióꞌ₅ dsa₂ ma₂lɨ́gꞌ₂: “Quianꞌ₅₄ ca₂juɨg₄ bá₄ juɨ₁ levadura, jmo₃ ta₁ guionꞌ₂ ca₂le₃jë́₃ ti₁can₁.”
10 Caun₂ bá₄ ꞌei₅ dsɨ₃ të₂le₃ ja₁con₂ Te₁guiꞌ₅₄, a₂tsá₃ ma₃dsɨ₃jiog₅ ꞌauꞌ₂ ꞌniaꞌ₂ le₂siáꞌ₂; Diú₄ bá₄ ꞌë́₂ uɨg₅ quióꞌ₅ dsa₂ i₂chi₂jan₅ chi₂nei₂₃ jág₁ jɨnꞌ₄ ꞌniaꞌ₂, tsá₃ a₂lë́₅ jaun₂ juɨ₁ꞌein₂ guë́₃.
11 Të₂le₃ quió₃ guëꞌ₂ rɨnꞌ₅₄ jniog₄, juaꞌ₅₄ meiꞌ₂ guë́₃ ŋɨ₅ jniá₂ te₁negꞌ₅₄ dsa₂ a₂ti₃ lo₅₄, ¿ꞌe₂ guëꞌ₂ lë₃ qui₂co₂ꞌein₅ dsa₂ jniá₂? Jág₁ dse₃ a₂rë₂ꞌë́₂ quióꞌ₅ Cristo a₂ca₂join₃ ne₄ cróg₄, tsá₃ ꞌlɨgꞌ₅₄ jme₁tɨin₃ juaꞌ₅₄ meiꞌ₂ guë́₃ le₂jaun₂.
12 La₁ juɨ₁liaꞌ₂ dsa₂ i₂cuë₅ o₂meꞌ₅₄ dsɨ₅ ꞌniaꞌ₂ a₂ꞌë₂₃ a₂ti₃ dsa₂ lo₅₄, ¡juaꞌ₅₄ co₂ŋeiꞌ₅₄ bá₄ ti₃ quióꞌ₅ guioin₅₄!
13 Ia₁ ꞌniaꞌ₂, rɨnꞌ₅₄ jniog₄, ma₂ca₂rë₃té₄ a₂lénꞌ₂ ꞌniaꞌ₂ dsa₂ i₂i₂nio₄ lon₄. Jŋiaꞌ₅₄ liaꞌ₂ tsá₃ cuɨ́n₅ ꞌniaꞌ₂ jmɨg₄ juaꞌ₅₄ a₂jme₁tiꞌ₄ guë́₄ ꞌniaꞌ₂ a₂mɨ₅ nɨ₁ŋɨꞌ₁ ia₁ a₂lɨ́ngꞌ₅ dsa₂ i₂ma₂lón₂. Të₂le₃ jme₁ti₁ ꞌniaꞌ₂ ja₁con₂ rɨ́ngꞌ₂ le₂jangꞌ₂ le₂jangꞌ₂, të₂le₃ ia₁ a₂ꞌnióꞌ₃ ꞌniaꞌ₂ rɨ́ngꞌ₂.
14 Ia₁ quianꞌ₅₄ ca₂jon₄ jág₁ bá₄ a₂rë₂ꞌŋia₅ ca₂le₃jë́₃ ꞌÉiꞌ₃ Juáꞌ₅: “Jme₁ꞌnió₄ dsa₂ mɨ₂güɨ́g₃ rɨ́ngꞌ₂ juɨ₁liaꞌ₂ ꞌniógꞌ₃ ꞌŋiagꞌ₂.”a
15 La₁ në₁juaꞌ₂ tionꞌ₅₄ ꞌniaꞌ₂ quɨ́ngꞌ₅ rɨ́ngꞌ₂ quianꞌ₅₄ i₂la₂ i₂ó₃, të₃ŋiꞌ₅₄ quiánꞌ₂ ꞌniaꞌ₂ ia₁ conꞌ₂ tsá₃ ŋó₅ në₁juaꞌ₂ guionꞌ₅₄ bá₄ ꞌniaꞌ₂ qui₂co₂dsɨ₃ꞌéngꞌ₅.
ꞌA₂ liaꞌ₂ le₃chan₂ dsa₂ të₂le₃ quióꞌ₅ Jme₂dsí₂ mɨ₂güɨ́g₃ la₂
16 A₂la₂ bá₄ a₂juɨ́g₂ jniá₂ ꞌniaꞌ₂: Juɨ₁le₂chanꞌ₂ bá₄ ꞌniaꞌ₂ conꞌ₂ lë́₅ jiog₅ Jme₂dsí₂, jaun₂ bá₄ dsióg₄ a₂tsá₃ ma₃jme₁tiꞌ₄ ꞌniaꞌ₂ a₂mɨ₅ nɨ₁ŋɨꞌ₁.
17 Ia₁ ca₂le₃jë́₃ a₂ꞌɨ́n₅ dsɨ́₅ nɨ₁ŋɨ₁ dsa₂, ꞌioꞌ₅₄ Jme₂dsí₂ quián₅ Diú₄. Ján₃ guëꞌ₂ le₂jaun₂ a₂ꞌɨ́n₅ dsɨ́₅ Jme₂dsí₂ ꞌioꞌ₅₄ nɨ₁ŋɨ́₅ táng₃. Tsá₃ jeinꞌ₂; lë́₅ ꞌnei₂. ꞌUɨg₅₄ jaun₂ bá₄ tsá₃ lé₂ le₃jmóꞌ₂ ꞌniaꞌ₂ a₂ꞌniogꞌ₂.
18 Ia₁ në₁juaꞌ₂ jiog₅ Jme₂dsí₂, tsá₃ ma₃tiongꞌ₅₄ ꞌÉiꞌ₃ Juáꞌ₅.
19 Ia₁ a₂rë₂jniá₂ dse₃ bá₄ ꞌa₂ liaꞌ₂ lë́₅ chan₂ dsa₂ i₂i₂nio₄ conꞌ₂ lë́₅ ꞌŋio₂ dsɨ́₅ nɨ₁ŋɨ₁₂: nióꞌ₅ jág₁ a₂tsá₃ dsi₂ten₅₄ nióꞌ₃; i₂nioi₅₄ ꞌŋio₅ lë₁ꞌŋioi₅ ꞌe₂ guë́₃ a₂jmo₅-dsáu₅; tsá₃ con₂ dsɨ́₅;
20 qui₂jme₂gain₃ diú₄ lag₄; jmo₂₃ mɨ́₅ a₂chan₂ dsɨ́₅;b i₂ꞌŋia₅₄ dsa₂ mɨ₂güɨ́g₃ rɨnꞌ₅₄; i₂quɨ₂tsɨn₅ quianꞌ₅₄ rɨnꞌ₅₄; i₂dsíꞌ₅ ꞌuɨn₅ dsɨ́₅; i₂caun₂ lë₁rë₂ꞌne₂; i₂ꞌëꞌ₂ a₂cha₂ quióꞌ₅; i₂dsia₅ mɨꞌ₅₄ jmo₅ le₁dsonꞌ₅₄ dsa₂; i₂jmo₅ jmáꞌ₃ co₂nióꞌ₃ quianꞌ₅₄ rɨinꞌ₅₄;
21 i₂uɨg₅ dsɨ́₅; [i₂jme₂dsian₅ rɨnꞌ₅₄];c i₂i₂nio₄ lë₁ꞌen₅; qui₂jmo₂₃ jmɨg₄ ja₁qui₂jmo₅-dsáu₅ a₂ꞌlɨgꞌ₅₄ në́₃. ꞌLióng₂ bá₄ guë́₄ a₂siáꞌ₂ jmo₅ i₂lɨn₅₄ a₂meiꞌ₂ tsá₃ co₂rë₂ ján₃. Jaun₂ ꞌë́₅ jniá₂ jág₁ të₃jŋiá₅, juɨ₁liaꞌ₂ ma₂juáꞌ₃ jniá₂ le₂jŋiá₅ ma₂juɨ́g₂ ꞌniaꞌ₂, ca₂le₃jɨ́n₃ dsa₂ i₂qui₂jmo₅-dsáu₅ a₂në₅ o₁lɨ́gꞌ₂ jmɨg₄ tsá₃ tɨ́inꞌ₄ ja₁gon₂ Diú₄.
22 La₁ le₂la₂ bá₄ chan₂ dsa₂ i₂jiog₅ Jme₂dsí₂: A₂ꞌnioi₃ rɨinꞌ₅₄; chain₂ o₂ꞌŋió₃ dsɨ₅; tei₄ le₁ꞌág₄ dsɨ́₅ në́₃, tonꞌ₂ juɨnꞌ₂ dsɨ́₅ lɨ́in₅; ꞌŋio₂ dsɨ́₅ quiainꞌ₅₄ rɨinꞌ₅₄; jmo₂₃ a₂dse₃ dsɨ́₅ ja₁con₂ rɨinꞌ₅₄ në́₃; tí₅ jág₁ quióꞌ₅ në₁ꞌe₂ jág₁ jmo₂₃ quiainꞌ₅₄ rɨinꞌ₅₄.
23 ꞌUa₁ dsɨ́₅ lɨ́in₅ ja₁con₂ rɨinꞌ₅₄; ŋi₅ ꞌa₂ liaꞌ₂ jme₃ꞌuáin₂ dsɨ́₅ ꞌŋiog₅ ꞌe₂ jme₁ja₂ dsɨ́₅ jmo₃. ꞌI₁caun₂ ꞌéiꞌ₃ tsá₃ cha₂ juaꞌ₅₄ a₂lé₂ le₃ꞌliogꞌ₃ quióꞌ₅ dsa₂ i₂chan₂ le₂në₅.
24 Ia₁ dsa₂ i₂ma₂lɨ́n₅ quián₅ Cristo, në₂jag₄ bá₄ a₂ma₂ca₂i₃lé₂ ne₄ cróg₄ ca₂le₃jë́₃ liaꞌ₂ lë́₅ jme₁lɨ́in₄ chain₂ mɨ₂güɨ́g₃, co₂dsia₅ quianꞌ₅₄ a₂jme₁ꞌɨ́n₅ dsɨ́₅, a₂jme₁qui₂dsɨ₂jiog₅ dsɨ́₅ jmo₃ në́₃.
25 Le₂në₅ chi₂juaꞌ₂ chong₂ jniog₄ të₂le₃ quianꞌ₅₄ Jme₂dsí₂, ján₃ bá₄ juɨ₁i₁nio₁ jniog₄ liaꞌ₂ jiog₅ Jme₂dsí₂.
26 Tsá₃ ca₂tág₂ jniog₄ jmó₁ táuꞌ₅, on₃ guëꞌ₂ dsiá₁ mɨꞌ₅₄ le₂jau₂ le₂jau₂, on₃ guëꞌ₂ jmó₁ uɨg₅ dsɨ₅ quianꞌ₅₄ rɨnꞌ₅₄.