4
A₂la₂ bá₄ juáꞌ₅ jniá₂: Të₁liaꞌ₂ bɨnꞌ₅₄ guein₂, i₂ca₂tɨ́n₂ gue₃ a₂lë́₅ jág₁ a₂cuë₃ jmei₂, tsá₃ juaꞌ₅₄ jma₃quén₅ lɨ́in₅ quianꞌ₅₄ dsa₂ i₂ꞌlianꞌ₅₄ quián₅ jmei₂, o₁jŋiaꞌ₅₄ a₂dsau₅ jan₂ i₂ꞌéi₂ bá₄ quióꞌ₅ ca₂le₃jë́₃.
2 Chan₂ dsa₂ i₂jmo₅ ꞌí₁ nio₅ gu₂ ca₂le₃jë́₃ a₂cha₂ quióꞌ₅ ꞌéi₂, ca₂liaꞌ₂ ca₂të́₂ jmɨg₄ a₂ꞌë₅ jmei₂.
3 Jaun₂ le₂në₅ bá₄ lë́₅ quianꞌ₅₄ jniog₄. Të₁liaꞌ₂ conꞌ₂ bɨgꞌ₅₄, jme₁chong₂ jniog₄ le₁ꞌŋeiꞌ₅₄ ne₄ ꞌéiꞌ₃, tag₄ a₂jiog₅ bí₂ ja₁con₂ dsa₂ mɨ₂güɨ́g₃.
4 La₁ jme₁ca₂dsɨn₃ jmɨg₄, ca₂chen₃ Diú₄ Ja₁ŋiꞌ₅₄, ca₂rë₃cháin₃ ca₂caun₃ jan₂ dsa₂ mɨ́₂ dsa₂ mɨ₂güɨ́g₃, ca₂guain₃ lɨ́in₅ jan₂ dsa₂ i₂rë₂ꞌen₅₄ ne₄ ꞌÉiꞌ₃ Juáꞌ₅.
5 Le₂në₅ bá₄ guain₃ a₂quí₃ a₂lió₂ ca₂le₃jág₃ jniog₄ conꞌ₂ dsa₂ jme₁tioꞌ₅₄ ꞌÉiꞌ₃ jaun₂, ia₁jaun₂ guéiꞌ₂ Diú₄ jniog₄ a₂ma₂lág₅ chiꞌ₂-guein₂ quiáin₅.
6 Jaun₂, ꞌuɨg₅₄ ia₁ a₂lɨ́nꞌ₅ ꞌniaꞌ₂ chiꞌ₂-guein₂ quiáin₅ në́₃, jaun₂ ca₂chein₃ Jme₂dsí₂ quián₅ Ja₁ŋiꞌ₅₄ të₂dsɨ₅ jniog₄, jaun₂ Jme₂dsí₂ në́₃ juáꞌ₂: “¡Abba!a ¡Tia₅₄ quiáng₃!.”
7 Le₂në₅ jaun₂, tsá₃ ma₂lɨ́nꞌ₅ ꞌne₂ jan₂ i₂chi₁ꞌŋeꞌ₅₄ ne₄ ꞌéiꞌ₃; ma₂lɨ́ngꞌ₅ jan₂ ja₁ŋiꞌ₅₄ bá₄. Jaun₂ chi₂juaꞌ₂ lɨ́ngꞌ₅ jan₂ ja₁ŋiꞌ₅₄, ján₃ bá₄ ma₂lɨ́ngꞌ₅ jan₂ i₂ca₂tɨ́n₂ gue₃ a₂lë́₅ jág₁ cuë₃.
ꞌƗ₅ dsɨ́₅ Pa₄ o₄quióꞌ₄ dsa₂ ꞌén₂
8 Le₂jŋiá₅, liaꞌ₂ conꞌ₂ tsá₃ Diú₄ jme₁ma₂cuɨnꞌ₂ ꞌniaꞌ₂, jme₁tiongꞌ₅₄ le₁ꞌŋegꞌ₅₄ ja₁con₂ diú₄ lag₄ i₂të₃dsónꞌ₂ on₃juaꞌ₅₄ i₂le₃juaꞌ₅₄ diú₄ dsónꞌ₂.
9 La₁ rë₂në́₃ në́₃ ma₂cuɨnꞌ₂ ꞌniaꞌ₂ Diú₄, co₂ꞌnióꞌ₄ juáꞌ₅, ma₂cuɨn₅ Diú₄ ꞌniaꞌ₂. Jaun₂ në́₃, ¿ꞌa₂ bá₄ liaꞌ₂ lë́₅ a₂o₂noꞌ₅₄ táng₃ ꞌniaꞌ₂ le₃caꞌ₃ tsá₃ caun₂ a₂qui₂ꞌnáuꞌ₂ ꞌauꞌ₂ a₂tóngꞌ₂ táng₃ ne₄ ꞌéiꞌ₃ tag₄ ꞌuan₅₄ a₂tsá₃ ta₁ tí₄?
10 Ia₁ jmoꞌ₂ bá₄ guë́₄ ꞌniaꞌ₂ ꞌauꞌ₂ a₂jme₂juë́ꞌ₁ a₂lɨn₅₄ jmɨg₄, tsɨꞌ₂, ŋi₂, jein₂ në́₃.
11 ꞌŊio₅ dsɨ₂góꞌ₃ dsɨ₃ ia₁ conꞌ₂ tsá₃ ŋó₅ në₁juaꞌ₂ tsá₃ ꞌe₂ ta₁ tí₄ ta₁ a₂ma₂jmo₃ jniá₂ jɨnꞌ₄ ꞌniaꞌ₂.
12 Rɨnꞌ₅₄ jniog₄, chi₂lenꞌ₄ jniá₂ ꞌniaꞌ₂ juɨ₁lenꞌ₅₄ bá₄ ꞌniaꞌ₂ liaꞌ₂ lɨ́n₅ jniá₂, ia₁ jniá₂ ma₂ca₂jmo₃ dsɨ₃ ján₃ a₂lɨ́ng₅ liaꞌ₂ lɨ́nꞌ₅ ꞌniaꞌ₂. Tsá₃ ꞌe₂ juaꞌ₅₄ a₂tsá₃ dsi₂ten₅₄ a₂ma₂jmogꞌ₅₄ ꞌniaꞌ₂.
13 Ia₁ ma₂ŋiꞌ₅₄ bá₄ ꞌniaꞌ₂, liaꞌ₂ jme₁ca₂ꞌë́₃ jniá₂ jág₁ dse₃ a₂lión₂ dsa₂ jɨnꞌ₄ ꞌniaꞌ₂ le₂ꞌuɨg₅₄, ca₂lë₃ le₂jaun₂ ꞌuɨg₅₄ caun₂ dso₄ a₂jme₁lɨ́ng₄.
14 Dso₄ a₂ca₂jéin₃ jniá₂ jaun₂ në́₃ co₂ꞌnióꞌ₄ a₂ca₂caun₃ táu₂ Diú₄ ꞌniaꞌ₂ bá₄ jaun₂. La₁ on₃juaꞌ₅₄ a₂jaun₂ tsá₃ ca₂gueiꞌ₅₄ ꞌniaꞌ₂ juaꞌ₅₄ a₂tsá₃ ca₂rë₃jeiꞌ₅₄. Të₂le₃ ꞌioꞌ₂ guë́₄ ca₂gueiꞌ₅₄ bá₄ ꞌniaꞌ₂ jniá₂ në₂jag₄ bá₄ jan₂ ángel quián₅ Diú₄, në₂jag₄ bá₄ lɨ́ng₅ Cristo Jesús ꞌŋiog₅.
15 ¿ꞌE₂ bá₄ ca₂lë₃ quianꞌ₅₄ a₂ŋɨ́₄ lë₃ dse₃ jme₁ca₂ꞌág₂ ꞌauꞌ₂ ꞌniaꞌ₂ le₂jaun₂? Lé₂ le₃juáꞌ₄ jniá₂, juaꞌ₅₄ meiꞌ₂ guë́₃ lé₂, jme₁ꞌuëꞌ₄ ꞌniaꞌ₂ mɨ́g₂ neꞌ₅₄ guiongꞌ₅₄, a₂jme₁cuë́ꞌ₁ jniá₂.
16 Jaun₂ në́₃, ¿on₃ bá₄ lɨ́nꞌ₂ ꞌniaꞌ₂ a₂ꞌiog₅₄ bá₄ jniá₂ ia₁ a₂juáꞌ₅ liaꞌ₂ tí₅ jág₁?
17 Dsa₂ ꞌéi₂ në́₃, ꞌŋio₅ dsen₅₄ dsɨ́₅ jmo₂₃ quianꞌ₅₄ ꞌniaꞌ₂, la₁ on₃juaꞌ₅₄ a₂dse₃ dsónꞌ₂ liaꞌ₂ dsɨ₂jiog₅ dsɨ́₅. A₂ꞌnoꞌ₂ juɨ₅ a₂téiꞌ₄ ꞌniaꞌ₂ jniaꞌ₅₄, ia₁jaun₂ le₃dsen₅₄ ꞌauꞌ₂ a₂ꞌéinꞌ₄ guioin₅₄.
18 A₂dsónꞌ₂ a₂dse₃ bá₄ jaun₂ a₂cuë́ꞌ₅ dsa₂ bí₂ rɨinꞌ₅₄, chi₂juaꞌ₂ a₂jaun₂ bá₄ a₂dse₃ a₂dsɨ₂jiog₅ dsɨ́₅. La₁ juɨ₁jmo₁₂ le₂jaun₂ co₂tan₅₄, on₃juaꞌ₅₄ rëꞌ₂ jmáꞌ₃ jme₁ꞌen₅₄ jniá₂ quianꞌ₅₄ ꞌniaꞌ₂.
19 ꞌNiaꞌ₂ chiꞌ₂-guein₂ quiáng₃, conꞌ₂ siáꞌ₂ táng₃ ma₂ŋag₅₄ uɨg₅ o₄quiánꞌ₂ ꞌniaꞌ₂, lɨ́ng₅ në₂jag₄ bá₄ jan₂ ꞌio₅₄ i₂chan₂ uɨg₅; caun₂ ŋag₅₄ uɨg₅ le₂në₅ bá₄ ca₂liaꞌ₂ ca₂lɨnꞌ₃ ꞌniaꞌ₂ a₂dsi₁nógꞌ₅ léngꞌ₂ liaꞌ₂ lɨ́n₅ Cristo.
20 ¡Juaꞌ₅₄ meiꞌ₂ bá₄ lé₂ le₃dsióg₄ jniá₂ të₂në₃ ja₁conꞌ₂ ꞌniaꞌ₂, ia₁jaun₂ jme₁tsɨ́ng₄ ꞌa₂ liaꞌ₂ dsia₅₄ jág₁ quianꞌ₅₄ ꞌniaꞌ₂! Ia₁ ꞌŋio₅ lɨn₃ tsá₃ guion₅₄ ꞌa₂ liaꞌ₂ jmo₅₄ quianꞌ₅₄ ꞌniaꞌ₂.
Jág₁ jángꞌ₅ léi₄ juɨ₁liaꞌ₂ Agar quianꞌ₅₄ Sara
21 ꞌNiaꞌ₂ conꞌ₂ dsa₂ i₂ꞌniogꞌ₂ tónꞌ₄ táng₃ ꞌÉiꞌ₃ Juáꞌ₅, ŋag₄ caun₂ ꞌniaꞌ₂ a₂juáꞌ₄ jniá₂ la₂: ¿Tsa₁ ma₂neiꞌ₂ ꞌniaꞌ₂ a₂juáꞌ₂ ꞌÉiꞌ₃ jaun₂?
22 Ia₁ juáꞌ₂ Si₂ ꞌɨin₂₃ Abraham, ꞌéi₂ në́₃ ca₂rë₃chán₃ on₃ ja₁ŋiꞌ₅₄. Jan₂ i₂ca₂can₃ dsa₂ mɨ́₂ i₂jme₁jme₂ti₃ ta₁ ne₅₄; jan₂ guëꞌ₂ i₂ca₂can₃ dsa₂ mɨ́₂ quiáin₅ dsónꞌ₂ i₂tsá₃ ꞌein₂ ne₄ dsa₂ siánꞌ₂ jme₂ti₃.
23 Guein₂ i₂ca₂can₃ dsa₂ mɨ́₂ i₂jme₂ti₃ ta₁ ne₄ Abraham, ca₂rë₃cháin₃ conꞌ₂ lë́₅ rë₂chan₂ guein₂ lë₁guein₂, la₁ guein₂ i₂ca₂can₃ dsa₂ mɨ́₂ quián₅ Abraham ꞌŋiog₅ në́₃ ca₂rë₃cháin₃ a₂ca₂rë₃ti₃ jág₁ a₂cuë́₁ quióꞌ₅ Diú₄.
24 Jág₁ në₅, lë́₅ caun₂ jág₁ a₂jángꞌ₅ léi₄. Le₃on₃ ꞌio₅₄ në₅ co₂ꞌnióꞌ₄ tɨn₃ jág₁ a₂lɨꞌ₅₄ Abraham quianꞌ₅₄ Diú₄. Caun₂ jág₁ në₅ lë́₅ co₂ꞌnióꞌ₄ Máꞌ₂ Sinaí a₂jángꞌ₅ léi₄ të₂le₃ quióꞌ₅ Agar i₂cán₂ guein₂ i₂ꞌi₄ ꞌéiꞌ₃ jme₃ti₃ ta₁ ne₄ dsa₂.
25 Jaun₂ lɨ́n₅ Agar co₂ꞌnióꞌ₄ Máꞌ₂ Sinaí, a₂chíꞌ₅ ꞌuë₃ Arabia, a₂lë́₅ caun₂ nióꞌ₄ quióꞌ₅ Jerusalén jmɨg₄ në₃, ia₁ tionꞌ₅₄ dsa₂ chan₂ ciudad jaun₂ jme₂ti₃ ꞌéiꞌ₃ co₂dsia₅ quiainꞌ₅₄ chiꞌ₂-guein₂ quiáin₅.
26 La₁ juɨ₁liaꞌ₂ Jerusalén ꞌmɨ́₂ quióꞌ₅ gueiꞌ₅₄ në́₃, rë₂na₄ bá₄ juɨ₅; jaun₂ ja₁jaun₂ bá₄ lë́₅ në₂jag₄ bá₄ chog₅₄ jniog₄.
27 Ia₁ ne₄ Si₂ juáꞌ₂:
Quian₂ o₂ꞌŋió₃ dsɨ₅, ꞌne₂ ꞌio₅₄ quen₂,
ꞌne₂ dsa₂ mɨ́₂ i₂tsá₃ guein₂ ma₂can₅,
ꞌú₅ co₂mɨꞌ₅₄ guioꞌ₅₄ a₂ꞌioꞌ₂ jéngꞌ₂,
ꞌne₂ i₂tsá₃ ꞌe₂ jme₁ma₂cuɨngꞌ₂ ꞌe₂ jaun₂ a₂changꞌ₂ uɨg₅.
Ia₁ të₂le₃ juɨn₅ guë́₄ guein₂ le₃chan₂ bá₄
quióꞌ₅ dsa₂ mɨ́₂ i₂ca₂téi₂ dsa₂,
liaꞌ₂ conꞌ₂ guë́₄ dsa₂ mɨ́₂ i₂chan₂ dsɨ₂i₂gu₂.b
28 Rɨnꞌ₅₄ jniog₄, lɨ́nꞌ₅ bá₄ ꞌniaꞌ₂ juɨ₁liaꞌ₂ Isaac; lɨ́nꞌ₅ ꞌniaꞌ₂ chiꞌ₂-guein₂ conꞌ₂ lë́₅ jág₁ ca₂cuë₃ Diú₄.
29 Le₂në₅ bá₄ juɨ₁liaꞌ₂ jmɨg₄ jaun₂, ja₁ŋiꞌ₅₄ i₂ca₂rë₃chán₃ conꞌ₂ lë́₅ rë₂chan₂ ca₂le₃jɨ́n₃, qui₂ca₂co₃ꞌein₃ bá₄ ja₁ŋiꞌ₅₄ Abraham i₂ca₂rë₃chán₃ conꞌ₂ ta₁ quióꞌ₅ jme₂dsí₂, le₂në₅ bá₄ lë́₅ rë₂në́₃ ján₃.
30 ¿La₁ ꞌe₂ juáꞌ₂ ne₄ Si₂? Juáꞌ₂: “Dsen₅₄ dsi₂néi₂ ꞌio₅₄ i₂jme₂ti₃ ta₁ neꞌ₅₄ në₅ liaꞌ₂ jma₃quiainꞌ₅₄ ja₁ŋiꞌ₅₄, ia₁ liaꞌ₂ o₁lɨ́gꞌ₂ jmɨg₄ juaꞌ₅₄ ja₁ŋiꞌ₅₄ ꞌio₅₄ ꞌlianꞌ₅₄ në₅ ca₂tɨ́n₂ tɨin₅₄ a₂dse₃ a₂ca₂tɨ́n₂ ja₁ŋiꞌ₅₄ ꞌio₅₄ i₂jɨn₅₄.”c
31 Jaun₂ në́₃, rɨnꞌ₅₄ jniog₄, tsá₃ lág₅ jniog₄ chiꞌ₂-guein₂ quián₅ ꞌio₅₄ i₂co₂ꞌnióꞌ₄ chi₁ꞌŋeꞌ₅₄ ꞌéi₂. Lág₅ bá₄ jniog₄ chiꞌ₂-guein₂ quián₅ ꞌio₅₄ i₂jɨn₅₄d bá₄.