Ca₂rë₃chóng₃ jniog₄ le₃quióꞌ₅ Cristo
2
ꞌNiaꞌ₂ në́₃, jme₁tiongꞌ₅₄ le₂jŋiá₅ lɨ́ngꞌ₅ ꞌlag₄ ne₄ ꞌuɨg₅₄ a₂jme₁i₂niogꞌ₅₄ i₁juɨngꞌ₅₄, le₁cángꞌ₄ dsáuꞌ₂,
2 liaꞌ₂ conꞌ₂ jme₁changꞌ₂ tiongꞌ₅₄ ꞌéngꞌ₅ juɨ₅ conꞌ₂ lë́₅ jiog₅ mɨ₂güɨ́g₃ la₂, jme₁jme₂tíꞌ₁ ꞌniaꞌ₂ conꞌ₂ lë́₅ ꞌŋio₂ dsɨ́₅ jme₂dsí₂ i₂gon₂ ne₄ ꞌéiꞌ₃ a₂cha₂ jë₄ dsí₂, i₂jmo₅ ta₁ të₂dsɨ́₅ jaun₅ dsa₂ i₂tsá₃ neꞌ₅₄, i₂tsá₃ gan₃ Diú₄.
3 Le₂në₅ bá₄ jme₁i₂nio₄ jniog₄ ján₃, jmɨg₄ jaun₂, jme₁chong₂ jme₁jme₂tí₁ ꞌa₂ conꞌ₂ lë́₂ dsi₄ guio₅₄, jme₁jme₂tí₁ a₂mɨ₅ nɨ₁ŋɨ₁₂. ꞌUɨg₅₄ liaꞌ₂ conꞌ₂ lë́₅ jme₁lág₄ jniog₄ jme₁ca₂tág₂ guéi₁ co₂rë₂ uɨg₅ gau₂ quióꞌ₅ Diú₄, juɨ₁liaꞌ₂ lë́₅ tɨn₃ ca₂le₃jɨ́n₃ i₂siánꞌ₂.
4 La₁ Diú₄ në́₃, ꞌuɨg₅₄ ia₁ a₂ŋɨ́₄ lë₃ ŋéi₂ dsɨ́₅ bá₄, ca₂rë₃ꞌnio₃ lɨn₃ jniog₄.
5 Ca₂toꞌ₂ jme₂dsí₂ ca₂jme₃jeinꞌ₅₄ jniog₄ co₂lë₅ quianꞌ₅₄ Cristo, liaꞌ₂ conꞌ₂ jme₁lág₄ guë́₄ jniog₄ ꞌlag₄ ꞌuɨg₅₄ dsáu₁. Ia₁ jmáꞌ₃ liaꞌ₂ quianꞌ₅₄ a₂ꞌua₁ dsɨ́₅ Diú₄ ꞌŋiog₅ bá₄ ma₂lónꞌ₂ ꞌniaꞌ₂.
6 Jaun₂ le₂në₅ ca₂chóꞌ₂ co₂lë₅ quianꞌ₅₄ Cristo Jesús jaun₂ ma₂ca₂dsiog₃ co₂lë₅ quiongꞌ₅₄ gueiꞌ₅₄ i₂juɨ́g₃. Le₂në₅ ma₂ca₂jmo₃ ca₂le₃jë́₃, ne₄ ꞌuɨg₅₄ ia₁ a₂chong₂ jniog₄ rë₂në́₃ le₃quióꞌ₅ Cristo Jesús.
7 Le₂në₅ ca₂cuë₃ léi₄ a₂ꞌnio₃ jniog₄ ꞌŋio₅ lɨn₃ ca₂le₃jë́₃ jmɨg₄ ja₁já₄ në₅, ꞌa₂ liaꞌ₂ ŋɨ́₄ lë₃ tson₂ a₂ꞌua₁ dsɨ́₅ a₂ca₂jmo₃ dse₃ dsɨ́₅ ia₁ a₂chong₂ le₃quióꞌ₅ Cristo Jesús.
8 Në₃ në́₃, të₂le₃ ia₁ a₂ꞌua₁ dsɨ́₅ bá₄ Diú₄ ma₂ca₂lónꞌ₂ ꞌniaꞌ₂, të₂le₃ ia₁ a₂ꞌéngꞌ₂. A₂ca₂lónꞌ₂ ꞌniaꞌ₂ në₅ në́₃, on₃juaꞌ₅₄ ia₁ ꞌe₂ cha₂ tɨ́nꞌ₂ ꞌniaꞌ₂ juaꞌ₅₄ a₂ma₂jmoꞌ₅₄ guiongꞌ₅₄; a₂lë₁ca₂ŋɨꞌ₂ bá₄ ꞌniaꞌ₂ në₅ ca₂cuë₃ Diú₄.
9 On₃juaꞌ₅₄ të₂le₃ quianꞌ₅₄ a₂jmo₅ dsa₂ guioin₅₄ ia₁jaun₂ ꞌi₁jan₂ tsá₃ ꞌein₂ jmo₃ tánꞌ₅.
10 Ia₁ lág₅ bá₄ jniog₄ co₂ꞌnióꞌ₄ ta₁ quióꞌ₅ Diú₄ ꞌŋiog₅; ca₂jmógꞌ₂ jniog₄ le₃quióꞌ₅ Cristo Jesús ia₁jaun₂ quián₁ juɨ₅ jmó₁ a₂dse₃, juɨ₅ a₂ma₂ca₂jmo₃ ꞌéi₂ co₂jŋia₅₄ a₂i₁nio₁.
ꞌEi₅ tei₄ dsɨ₅ jniog₄ le₃quióꞌ₅ Cristo
11 Le₂në₅ bá₄, juɨ₁dsiogꞌ₂ ꞌauꞌ₂ ꞌniaꞌ₂ ꞌa₂ liaꞌ₂ jme₁lɨ́ngꞌ₄ le₂jŋiá₅. ꞌNiaꞌ₂ conꞌ₂ i₂lɨ́ngꞌ₅ dsɨ₂nau₂ i₂tsá₃ rë₂uɨng₄ lo₄,* quiong₅ dsa₂ i₂rë₂uɨng₄ lo₄, (ta₁ jaun₂ a₂jmo₅ dsa₂ mɨ₂güɨ́g₃ quianꞌ₅₄ gu₂);
12 juɨ₁dsiogꞌ₂ ꞌauꞌ₂ ꞌniaꞌ₂: jmɨg₄ jaun₂ liaꞌ₂ conꞌ₂ jme₁changꞌ₂ tsá₃ I₂rë₂ꞌɨ́n₁* quián₅ Diú₄ jme₁chan₂ ja₁conꞌ₂ ꞌniaꞌ₂; uɨ́ng₂ bá₄ jme₁tiónꞌ₂ ꞌniaꞌ₂ ja₁lë́₄ juɨg₂ Israel, tsá₃ jme₁cuɨnꞌ₂ ꞌniaꞌ₂ jág₁ a₂jme₁lɨꞌ₅₄ dsa₂ juɨg₂ quián₂ jniaꞌ₅₄ quianꞌ₅₄ Diú₄. Jme₁chanꞌ₂ ꞌniaꞌ₂ mɨ₂güɨ́g₃ la₂ tsá₃ Diú₄ chan₂ quiánꞌ₂ ꞌniaꞌ₂ on₃ guëꞌ₂ jme₁cha₂ jmɨg₄ juaꞌ₅₄ a₂jme₁tɨ́nꞌ₄ ꞌniaꞌ₂.
13 La₁ rë₂në́₃ në́₃, ma₂quianꞌ₅₄ ꞌniaꞌ₂ Cristo Jesús, ꞌniaꞌ₂ i₂jme₁tióngꞌ₂ uɨ́ng₂ le₂jŋiá₅. Quián₅ bá₄ ma₂tióngꞌ₂ rë₂në́₃ të₂le₃ quianꞌ₅₄ jmɨ₂ ꞌan₅₄ Cristo.
14 Le₂në₅ bá₄ ca₂dsióg₃: ꞌŋiog₅ bá₄ Cristo i₂jmo₅ ꞌei₅ tei₄ quián₂ jniog₄. ꞌÉi₂ bá₄ ca₂jmo₃ në́₃ ca₂chainꞌ₃ co₂ŋeiꞌ₅₄ jniaꞌ₅₄ dsa₂ judíos quianꞌ₅₄ ꞌniaꞌ₂ dsɨ₂nau₂, caun₂ juɨg₂ bá₄ ca₂jmo₃, ca₂góin₂ bá₄ co₂ꞌnióꞌ₄ nɨ₁ꞌiaꞌ₂ a₂jme₁chíꞌ₄ a₂jángꞌ₅ léi₄ a₂jme₁jmo₅ jma₃quén₅ jɨn₄ jniog₄.
15 Quianꞌ₅₄ nɨ₁ŋɨ₁₂ ꞌŋiog₅, ca₂jme₃dsiain₂₃ ꞌÉiꞌ₃ Juáꞌ₅ a₂jme₁të₂néiꞌ₂ chi₂quióng₂ jmɨg₄ jmáꞌ₃ ꞌéiꞌ₃. Ca₂lë₃ bá₄ në́₃ liaꞌ₂ conꞌ₂ lë́₅ ca₂i₃jiog₅ dsɨ́₅, ca₂jmo₃ caun₂ juɨg₂ ꞌmɨ́₂ quióꞌ₅ ꞌŋiog₅, ca₂ꞌág₂ tei₄ quióꞌ₅ dsa₂ le₃tɨn₃ juɨg₂.
16 Le₂në₅ bá₄ ca₂dsióg₃ ca₂lë₃ co₂nióꞌ₃ dsa₂ jë₁ca₂le₃jɨ́in₃. Të₂le₃ quianꞌ₅₄ ꞌmú₃ quióꞌ₅ ne₄ cróg₄, ca₂jme₃dsian₅ Cristo mɨꞌ₅₄ a₂jme₁nióꞌ₅ le₃tɨn₃ juɨg₂, ca₂ꞌág₂ caun₂ jág₁ quianꞌ₅₄ Diú₄.
17 Ca₂guan₃ Cristo quian₅ jág₁ dse₃ a₂ꞌag₃ tei₄ quióꞌ₅ ca₂le₃jɨ́n₃: le₃quiánꞌ₂ ꞌniaꞌ₂ dsa₂ i₂jme₁tión₂ uɨ́ng₂, liaꞌ₂ le₃quián₂ jniaꞌ₅₄ dsa₂ judíos i₂jme₁tioꞌ₅₄ quián₅.
18 Jaun₂ të₂le₃ quianꞌ₅₄ Cristo, lé₂ le₃jme₁quián₄ jniog₄ ja₁con₂ Tia₅₄ quián₂ të₂le₃ quianꞌ₅₄ jan₂ Jme₂dsí₂, tsá₃ a₂nag₅₄ o₁jŋiaꞌ₅₄ la₂ lág₅ jniog₄ dsa₂ judíos o₃ dsɨ₂nau₂ ꞌe₂.
19 ꞌUɨg₅₄ në₅, ma₂lɨ́nꞌ₅ bá₄ ꞌniaꞌ₂ co₂ꞌnióꞌ₄ dsa₂ i₂ꞌén₂ rɨnꞌ₅₄ jniog₄ i₂lë́₅ ꞌí₁ quián₅ Diú₄;a tsá₃ ma₃lɨ́nꞌ₅ ꞌniaꞌ₂ dsɨ₂nau₂ juaꞌ₅₄ tsá₃ cuɨn₅ jniog₄ rɨnꞌ₅₄. Ma₂lɨ́nꞌ₅ ꞌniaꞌ₂ chiꞌ₂-guein₂ quián₅ Diú₄ në́₃.
20 Ca₂dsióg₃ lɨ́nꞌ₅ ꞌniaꞌ₂ co₂ꞌnióꞌ₄ caun₂ ꞌné₅ pa₁; lɨ́nꞌ₅ ꞌniaꞌ₂ ján₃ co₂ꞌnióꞌ₄ nɨ₁cang₁ a₂juɨ₅ dsa₂ ne₄ ꞌuɨg₅₄ ꞌiaꞌ₂ a₂ca₂chiꞌ₃ dsa₂ i₂chen₄ quián₅ Jesús, quianꞌ₅₄ dsa₂ i₂jme₁ꞌë́₂ jág₁ o₄quióꞌ₄ Diú₄ ma₂lɨ́gꞌ₂. ꞌŊiog₅ guëꞌ₂ Jesucristo lɨ́in₅ co₂ꞌnióꞌ₄ nɨ₁cang₁ a₂dsen₅₄ guë́₄.
21 Le₃quióꞌ₅ ꞌéi₂ në́₃, tsau₂ ta₁ ta₁caun₂ tsɨ₁ꞌné₅, lë́₂ rë₂juɨ́₄ rë₂, ca₂liaꞌ₂ ca₂dsióg₃ lé₂ caun₂ guáꞌ₅ a₂lë́₅ ꞌí₁ quióꞌ₅ Te₁guiꞌ₅₄.
22 Le₃quióꞌ₅ ꞌéi₂ në́₃, ꞌniaꞌ₂ bá₄ ján₃ lɨ́ngꞌ₅ co₂ꞌnióꞌ₄ nɨ₁cang₁ a₂caun₂ juɨ₅ nɨ₁ꞌiaꞌ₂, ca₂liaꞌ₂ ca₂dsi₃nóꞌ₅ ꞌniaꞌ₂ léngꞌ₂ caun₂ dsi₂néi₂ ja₁guá₄ Diú₄ a₂gu₂dsí₂.