A₂niog₅ gu₂ Pa₄ qui₃ꞌë́₂ jág₁ dse₃ ja₁con₂ dsɨ₂nau₂
3
ꞌUɨg₅₄ në₅ bá₄ në́₃, jniá₂ Pa₄, jme₂juɨ́ngꞌ₁ Diú₄, tonꞌ₂ rë₂ꞌeng₅₄ néꞌ₃ ꞌmá₃ ꞌuɨg₅₄ quióꞌ₄ Cristo Jesús a₂dse₃ o₄quiánꞌ₂ ꞌniaꞌ₂ i₂lɨ́ngꞌ₅ dsɨ₂nau₂.
2 Lɨ́ng₂ a₂ma₂le₁ŋiꞌ₅₄ dsónꞌ₂ bá₄ ꞌniaꞌ₂ a₂dse₃ dsɨ́₅ Diú₄ ma₂ca₂dsia₃ gu₃ ta₁ la₂, a₂dse₃ o₄quiánꞌ₂ ꞌniaꞌ₂.
3 Ma₂ca₂rë₃ŋiꞌ₅₄ bá₄ ꞌniaꞌ₂ jág₁ a₂jme₁rë₂ꞌma₄ le₂jŋiá₅, ꞌe₂ a₂niog₅ dsɨ́₅ jmo₃; ca₂jmo₃ ca₂rë₃guion₅₄, juɨ₁liaꞌ₂ ma₂juáꞌ₃ ca₂jon₄ jág₁ ne₄ si₂ le₂jŋiá₅.
4 Jë₁ma₂ca₂ꞌíꞌ₂ ꞌniaꞌ₂ si₂ në₅, le₃lenꞌ₅₄ ꞌniaꞌ₂ a₂ma₂ŋɨ́ꞌ₂ dsɨ₃ jë₂ jág₁ a₂jme₁rë₂ꞌma₄ quióꞌ₅ Cristo,
5 caun₂ jág₁ a₂tsá₃ ꞌein₂ ca₂rë₃ŋi₅ ca₃ma₂lɨ́gꞌ₂, la₁ rë₂në́₃ në́₃ ma₂ca₂jme₃jnia₅ Jme₂dsí₂ quián₅ Diú₄ ja₁con₂ dsa₂ jŋió₅ quiáin₅: dsa₂ i₂chen₄ quián₅ Jesús, quianꞌ₅₄ ja₁con₂ dsa₂ i₂jme₁ꞌë́₂ jág₁ o₄quióꞌ₄ në́₃.
6 Jág₁ a₂ma₂ca₂rë₃jniá₂, a₂la₂ bá₄ jaun₂: të₂le₃ quianꞌ₅₄ jág₁ dse₃ a₂lión₂ dsa₂, tɨn₃ dsɨ₂nau₂ gue₃ a₂lë́₅ jág₁ cuë₃ Diú₄ co₂rë₂ bá₄ quianꞌ₅₄ a₂tɨn₃ dsa₂ judíos. Lɨ́nꞌ₅ ꞌniaꞌ₂ dsa₂ i₂tén₅ caun₂ bá₄ ŋɨ́₅, ján₃ guëꞌ₂ tɨnꞌ₃ ꞌniaꞌ₂ jág₁ a₂ron₅ cuë́₁ quióꞌ₅ Diú₄ le₃quióꞌ₅ Cristo Jesús.
7 Jág₁ në₅ ma₂chéngꞌ₅ jmo₂₃ ta₁ a₂ꞌë́₅ jág₁ dse₃, liaꞌ₂ conꞌ₂ lë́₅ a₂lë₁ca₂cuë₃ Diú₄ a₂ꞌua₁ dsɨ́₅, liaꞌ₂ conꞌ₂ lë́₅ jmo₅ ta₁ juɨ₅bí₂ quióꞌ₅.
8 O₁jŋiaꞌ₅₄ la₂ lɨ́n₅ jniá₂ jan₂ i₂meꞌ₂ guë́₄ conꞌ₂ guë́₄ i₂tsá₃ ꞌe₂ quen₅ jë₄ quióꞌ₅ ca₂le₃jɨ́n₃ i₂tén₅ le₃quióꞌ₅ Diú₄,a la₁ ꞌéi₂ ma₂cuë₃ jniá₂ a₂dse₃ në₅ a₂ꞌë́₄ jág₁ jɨn₄ dsɨ₂nau₂, caun₂ jág₁ dse₃ a₂le₃chong₂ jniog₄ dse₃ guë́₄ lɨn₃ a₂jme₃guꞌ₅₄ Cristo, ca₂liaꞌ₂ tsá₃ lé₂ le₃juaꞌ₅₄ a₂le₃ŋɨ́ꞌ₂ dsɨ́₅ dsa₂.
9 Ma₂ca₂dsia₃ gu₃ ta₁ la₂ a₂jme₁jniag₅ ja₁con₂ ca₂le₃jɨ́n₃, jág₁ dse₃ a₂jme₁rë₂ꞌma₄, ca₂le₃ ca₂nio₃ mɨ₂güɨ́g₃, ꞌa₂ liaꞌ₂ ꞌnio₃ Diú₄ lé₂. Ia₁ ꞌéi₂ bá₄ i₂ca₂jmo₃ ca₂le₃jë́₃ ꞌe₂ a₂cha₂.
10 Ca₂i₃jiog₅ dsɨ́₅ jmo₃ të₂le₃ quianꞌ₅₄ dsa₂ quiáin₅, juɨ₁le₂ŋi₅ ca₂le₃jɨ́n₃ i₂ꞌio₅ juɨ₅bí₂, i₂lɨ́n₅ ta₁ tionꞌ₅₄ gueiꞌ₅₄, ꞌlióng₂ ne₅₄ ꞌŋio₅ lɨn₃ bá₄ a₂ŋɨ́ꞌ₂ dsɨ́₅ Diú₄;
11 jaun₂ juɨ₁le₂ŋi₅ bá₄, Diú₄ ca₂jmo₃ le₂në₅ conꞌ₂ lë́₅ i₃jiog₅ dsɨ́₅ jmo₃ co₂tan₅₄ të₂le₃ quianꞌ₅₄ Te₁guiꞌ₅₄ Jesucristo.
12 Të₂le₃ quianꞌ₅₄ Cristo cha₂ juɨ₅ quián₂ a₂lé₂ le₃jme₁quián₄ jniog₄ dsiá₁ tiá₂ dsɨ₅ ja₁con₂ Diú₄, caun₂ bá₄ le₁ꞌág₄ dsɨ₅ ꞌuɨg₅₄ ia₁ a₂ꞌéin₂ le₃quióꞌ₅ ꞌéi₂.
13 Jaun₂ lë₃, chi₂lenꞌ₄ jniá₂ ꞌniaꞌ₂ a₂tsá₃ ꞌágꞌ₂ caun₂-tɨn₃ ꞌauꞌ₂ ꞌuɨg₅₄ ia₁ a₂chang₂ ŋag₅₄ uɨg₅ o₄quiánꞌ₂ ꞌniaꞌ₂, la₁ia₁ dse₃ të₂le₃ ja₁conꞌ₂ ꞌniaꞌ₂, ia₁ le₂në₅ bá₄ dsióg₅ a₂le₃juɨnꞌ₂ ꞌniaꞌ₂.
ꞌA₂ liaꞌ₂ tson₂ ca₂rë₃ꞌnio₃ Cristo jniog₄
14 ꞌUɨg₅₄ në₅ bá₄, no₂₃ chi₂jne₅₄ ne₄ Diú₄ Jmei₂ Te₁guiꞌ₅₄ Jesucristo,
15 i₂lɨ́n₅ jmei₂ ca₂le₃jɨ́n₃ i₂chan₂ gueiꞌ₅₄ i₂juɨ́g₃ quianꞌ₅₄ i₂chan₂ ne₄ guaꞌ₅₄ ꞌuë₃.
16 Mɨ₅ jniá₂ ne₄ Tia₅₄ a₂jmo₃ të₂ꞌauꞌ₂ ꞌniaꞌ₂, cuë₃ juɨ₅bí₂ bén₂ jláꞌ₁ quióꞌ₅ të₂le₃ quianꞌ₅₄ Jme₂dsí₂ quiáin₅,
17 ia₁jaun₂ të₂le₃ jŋiaꞌ₅₄ ꞌa₂ conꞌ₂ ꞌénꞌ₂ bá₄ ꞌniaꞌ₂, jiá₃ Cristo ja₃guá₃ të₂ꞌauꞌ₂ ꞌniaꞌ₂. Le₂në₅ jë₁ma₂tiónꞌ₂ ꞌniaꞌ₂ tiá₂ lé₂ co₂ꞌnióꞌ₄ qui₂le₁ꞌmá₂ jmú₄ jɨꞌ₂ lɨn₃, jme₁ꞌnióꞌ₄ ꞌniaꞌ₂ rɨ́ngꞌ₂.
18 Mɨ₅ jniá₂ a₂lé₂ le₃ŋɨ́ꞌ₂ ꞌauꞌ₂ ꞌniaꞌ₂, quianꞌ₅₄ ca₂le₃jɨ́n₃ conꞌ₂ i₂ma₂lë́₅ ꞌí₁ quiáin₅,b a₂juëꞌ₂ lɨn₃, tonꞌ₂ a₂cu₂ lɨn₃, tonꞌ₂ a₂ŋei₅ lɨn₃, a₂jɨꞌ₂ lɨn₃ bá₄, ꞌa₂ liaꞌ₂ ꞌnio₃ Cristo jniog₄.
19 Mɨ₅ jniá₂ ne₅₄, juɨ₁le₂cuɨnꞌ₂ ꞌniaꞌ₂ a₂në₅ a₂lë́₅ a₂juëꞌ₂ lɨn₃, on₃juaꞌ₅₄ ia₁ a₂le₃cuɨ́ꞌ₅ le₃ŋɨ́ꞌ₂ dsɨ́₅ dsa₂; mɨ₅ jniá₂ ia₁jaun₂ le₂në₅ tiángꞌ₄ le₃changꞌ₂ co₂ŋeiꞌ₅₄ qui₂rë₂rɨn₅ të₂ꞌauꞌ₂ ca₂le₃jë́₃ ꞌa₂ liaꞌ₂ lɨ́n₅ Diú₄.
20 Jaun₂ në́₃, juɨ₁le₂juɨnꞌ₂ bá₄ Diú₄, i₂lé₂ le₃jmo₃ tson₂ guë́₄ liaꞌ₂ conꞌ₂ guë́₄ a₂mɨ₂ jniog₄, liaꞌ₂ conꞌ₂ guë́₄ dsɨ₂jiog₅ dsɨ₅ në́₃, të₂le₃ quianꞌ₅₄ bí₂ a₂jmo₂₃ ja₁con₂ jniog₄.
21 ¡Juɨ₁le₂juɨnꞌ₂ bá₄ Diú₄ ja₁con₂ guáꞌ₅ quiáin₅ të₂le₃ quianꞌ₅₄ Cristo Jesús, ca₂liaꞌ₂ conꞌ₂ tan₅₄ ca₂le₃jë́₃ tsɨ₁jon₂ dsa₂ i₂ja₃lén₂ chi₁quɨ́n₃ ca₂le₃jë́₃ ŋi₂ co₂tan₅₄! A₂méi₃.