Chong₂ jniog₄ ꞌei₅ caun₂ jág₁ të₂le₃ quianꞌ₅₄ Jme₂dsí₂
4
ꞌUɨg₅₄ në₅ bá₄ në́₃, rë₂jnɨ́g₅ néꞌ₃ ꞌmá₃ o₄quióꞌ₄ Te₁guiꞌ₅₄, chi₂lenꞌ₄ jniá₂ ꞌniaꞌ₂ a₂tiángꞌ₄ liaꞌ₂ conꞌ₂ dsi₂ten₅₄ ca₂tɨ́n₂ le₃chan₂ dsa₂ i₂té₄ quián₅ Diú₄, ia₁ a₂jaun₂ bá₄ ca₂të́ꞌ₃ ꞌniaꞌ₂.
2 Jmo₄ ꞌniaꞌ₂ megꞌ₂, ꞌua₁ ꞌauꞌ₂ quiangꞌ₅₄ rɨ́ngꞌ₂. Jmo₄ ꞌniaꞌ₂ juɨnꞌ₂ ꞌauꞌ₂, tióꞌ₃ ꞌauꞌ₂ jmo₄ quiangꞌ₅₄ rɨ́ngꞌ₂ le₂jangꞌ₂ le₂jangꞌ₂ ia₁ a₂ꞌniógꞌ₃ rɨ́ngꞌ₂.
3 Dsen₅₄ ꞌauꞌ₂ ꞌniaꞌ₂ jmo₄ tiongꞌ₅₄ ꞌei₅ tián₂ caun₂ jág₁ të₂le₃ quianꞌ₅₄ Jme₂dsí₂ Jŋió₅, co₂ꞌnióꞌ₄ bá₄ chanꞌ₂ ꞌniaꞌ₂ qui₂rë₂quengꞌ₅₄ quianꞌ₅₄ rɨ́ngꞌ₂ ꞌei₅ tei₄.
4 Lág₅ jniog₄ caun₂ bá₄ ŋɨ́₅ ta₁caun₂ nióꞌ₃, ján₃ guëꞌ₂ jan₂ bá₄ Jme₂dsí₂ táng₃, a₂tiánꞌ₄ ꞌniaꞌ₂ le₂në₅ bá₄ ma₂ca₂të₃ Diú₄ caun₂ bá₄ jmɨg₄ a₂ꞌɨ́n₂ ꞌauꞌ₂ ꞌniaꞌ₂ changꞌ₂.
5 Jan₂ bá₄ Te₁guiꞌ₅₄ i₂lɨ́n₅ juɨg₅₄ jniog₄ chan₂, caun₂ bá₄ a₂ꞌéin₂ jniog₄, ján₃ guëꞌ₂ ca₂le₃jág₃ bá₄ jniog₄ ca₂jŋó₂ jmɨg₂ le₃quióꞌ₅ jan₂ bá₄ Te₁guiꞌ₅₄.
6 Jan₂ bá₄ Diú₄ chan₂ i₂lɨ́n₅ Tia₅₄ quián₂ jniog₄ ca₂le₃jág₃. ꞌÉi₂ bá₄ i₂niog₅ gu₂ jniog₄ ca₂le₃jág₃; ꞌéi₂ bá₄ i₂jmo₅ ta₁ ja₁con₂ jniog₄ ca₂le₃jág₃; ꞌein₅₄ ja₁con₂ jniog₄ ca₂le₃jág₃ në́₃.
7 La₁ le₂jau₂ le₂jau₂ bá₄ jniog₄ jma₃quén₅ lë́₅ bí₂ a₂ma₂ca₂ŋag₂, liaꞌ₂ conꞌ₂ lë́₅ ma₂ca₂dsióꞌ₃ Cristo quióꞌ₅.
8 Jaun₂ lë₃ juáꞌ₂ ne₄ Si₂:
Ca₂uɨ́g₂ gueiꞌ₅₄ i₂juɨ́g₃
te₂ le₁ꞌŋeꞌ₅₄ ca₂le₃jɨ́n₃ i₂ca₂lɨ́ꞌ₃,
jaun₂ ca₂dsióꞌ₃ bí₂ jma₃quén₅
ca₂cuë́ꞌ₃ dsa₂ mɨ₂güɨ́g₃.a
9 Jaun₂, ¿ꞌe₂ jág₁ dsau₅ jein₅ jág₁ “A₂ca₂uɨ́g₂” në₅ në́₃? Jŋiaꞌ₅₄ liaꞌ₂ juáꞌ₂ le₂ꞌuɨg₅₄ ca₂sióin₃ ja₁lë́₄ ja₁ꞌuɨn₃ guë́₄ ꞌŋio₅ lɨn₃ ne₄ guaꞌ₅₄ ꞌuë₃.
10 I₂ca₂sión₃ ꞌéi₂ bá₄ ján₃, i₂ca₂uɨ́g₂ táng₃ ja₁lë́₄ ja₁ŋei₅ guë́₄ gueiꞌ₅₄ i₂juɨ́g₃, ia₁jaun₂ jme₃cainꞌ₂ ca₂le₂con₂ quianꞌ₅₄ Jme₂dsí₂ quiáin₅.
11 Jaun₂ jma₃quén₅ ca₂cheinꞌ₃ dsa₂ quiáin₅ ca₂cuë₃ bí₂ ca₂cuë́ꞌ₃ le₂jan₂ le₂jan₂; i₂lɨn₅₄ ca₂cheinꞌ₃ a₂léin₂ i₂chen₄* quiáin₅; i₂lɨn₅₄ guëꞌ₂ ca₂ŋɨ₂ bí₂ a₂lé₂ ŋág₃ jág₁ a₂guéiꞌ₅ quióꞌ₅ Diú₄; i₂lɨn₅₄ guëꞌ₂ ca₂cuë́ꞌ₃ bí₂ a₂qui₂dsɨ₃ꞌë́₃ jág₁ dse₃ a₂lión₂ dsa₂; i₂lɨn₅₄ guëꞌ₂ ca₂cuë́ꞌ₃ bí₂ a₂léin₂ dsa₂ i₂ꞌë́₂ jág₁ i₂jme₂tɨn₅ guáꞌ₅.
12 Le₂në₅ qui₂ca₂cheinꞌ₃ dsa₂ guáꞌ₅ ia₁jaun₂ jmo₃ co₂jŋia₅₄ dsa₂ quiáin₅ a₂jme₃ti₃ ta₁ a₂ꞌnio₃ ꞌéi₂ lé₂, ia₁jaun₂ caun₂ qui₂dsɨ₃cón₃ bá₄ ŋɨ₅₄ ꞌŋiog₅,
13 ca₂liaꞌ₂ ca₂dsi₃náu₅ ꞌei₅ caun₂ jág₁ quianꞌ₅₄ rɨnꞌ₅₄, ꞌéin₂ rë₂, ŋɨ́ꞌ₂ dsɨ₅ le₃quióꞌ₅ Ja₁ŋiꞌ₅₄ Diú₄. Le₂në₅ bá₄ dsi₁náu₅ léi₂ dsa₂ i₂ma₂ca₂canꞌ₅₄ co₂ŋeiꞌ₅₄ liaꞌ₂ conꞌ₂ lë́₅ lɨ́n₅ Cristo ꞌŋiog₅.
14 Jaun₂ tsá₃ ma₃léi₂ jniog₄ liaꞌ₂ lɨ́n₅ i₂bëꞌ₅₄ i₂caun₂ lë₁qui₂rë₂gan₂ tsá₃ uɨn₅ qui₂jme₂tsɨ́in₃; në₂jag₄ bá₄ a₂qui₂tsagꞌ₂ dsí₂ a₂caun₂ ꞌŋio₂ dsɨ́₅ bá₄ juɨ₁ꞌe₂ guë́₃ a₂jme₂tag₅ dsa₂, qui₂së₂seinꞌ₂ jë₁jme₂gau₅ dsa₂ i₂ŋɨ́₄ ꞌŋio₅ ꞌio₅ mai₅₄, ꞌnio₃ jiog₃ juɨ₅ jë₁tsá₃ dsau₅.
15 Të₂le₃ ꞌnióꞌ₅ dsiá₁ jniog₄ jág₁ tí₅ a₂ꞌnio₃ jniog₄ rɨnꞌ₅₄. Ca₂tág₂ bá₄ jniog₄ qui₂dsɨ₃cauꞌ₅₄ ne₄ ca₂le₃jë́₃ le₃quióꞌ₅ ꞌéi₂ i₂lɨ́n₅ mɨ₂dsi₄ quián₂ jniog₄, le₃quióꞌ₅ Cristo bá₄ guëꞌ₂.
16 Të₂le₃ quianꞌ₅₄ ꞌéi₂ qui₂dsɨ₃cauꞌ₅₄ jniog₄ ꞌa₂ liaꞌ₂ jme₁ꞌnió₄ jniog₄ rɨnꞌ₅₄. Lág₅ jniog₄ në₂jag₄ bá₄ caun₂ nɨ₁ŋɨ́₅ a₂qui₂rë₂tionꞌ₅₄ rë₂ le₂caun₂ le₂caun₂ ja₁qui₂le₁chanꞌ₂ quióꞌ₅ dsa₂, jma₃quén₅ bá₄ lë́₅ ta₁ quióꞌ₅ qui₂jme₂ꞌon₅₄ rɨnꞌ₅₄, ca₂liaꞌ₂ ca₂i₃cón₃ rë₂, dse₃ le₁ꞌág₄ dsɨ́₅, ꞌnioi₃ rɨinꞌ₅₄ në́₃.
Juɨ₅ ꞌmɨ́₂ le₃quióꞌ₅ Cristo
17 A₂la₂ bá₄, juáꞌ₅ jniá₂ chi₂quiang₅₄ jmɨg₄ ꞌniaꞌ₂ o₄quióꞌ₄ Te₁guiꞌ₅₄: tsá₃ ma₃juɨ₁le₂chanꞌ₂ ꞌniaꞌ₂ juɨ₁liaꞌ₂ chan₂ dsa₂ i₂tsá₃ Diú₄ cuɨn₅, ia₁ ꞌéi₂ në́₃ chain₂ liaꞌ₂ conꞌ₂ lë́₅ niog₅ dsi₅₄ tsá₃ ꞌe₂ ta₁ tí₄.
18 ꞌŊio₅ të₂le₃ jen₅ bá₄ ma₂ŋɨ́ꞌ₂ dsɨ́₅, uɨ́ng₂ bá₄ chain₂ ja₁jme₁ca₂tɨ́in₂ le₃chain₂ le₃quióꞌ₅ Diú₄, ia₁ lɨ́in₅ dsa₂ i₂co₂ŋeiꞌ₅₄ tsá₃ ꞌe₂ tɨn₂ tsá₃ ꞌe₂ ŋi₅ ia₁ a₂ma₂ca₂rë₃ꞌuáꞌ₃ dsɨ́₅.
19 Tsá₃ ma₃líꞌ₄ ꞌe₂ jaun₂ o₂guíꞌ₃, co₂dsia₅ ma₂ca₂jɨ́inꞌ₂ bá₄ guioin₅₄ ne₄ ca₂le₃jë́₃ jmáꞌ₃ liaꞌ₂ a₂mɨ₅ nɨ₁ŋɨ₁₂, caun₂ ma₂ꞌŋio₂ dsɨ́₅ bá₄ jmo₂₃ ca₂le₃jë́₃ ne₅₄ a₂lë₁ꞌiog₅.
20 La₁ ꞌniaꞌ₂ në́₃, tsá₃ le₂në₅ ca₂rë₃tɨ́ngꞌ₃ le₃quióꞌ₅ Cristo.
21 Ia₁ dsónꞌ₂ bá₄ ma₂ca₂neiꞌ₂ ꞌniaꞌ₂ le₃quióꞌ₅ ꞌéi₂ lɨ́n₂ jniá₂, jaun₂ ca₂rë₃tɨ́ngꞌ₃ bá₄ liaꞌ₂ conꞌ₂ lë́₅ ca₂jme₃tag₅ ꞌéi₂, liaꞌ₂ conꞌ₂ lë́₅ jág₁ tí₅ dsónꞌ₂ a₂cha₂ ja₁con₂ Jesús.
22 Ca₂rë₃tíngꞌ₃ a₂co₂dsia₅ jŋiáꞌ₄ cau₅ liaꞌ₂ conꞌ₂ lë́₅ jme₁lɨ́ngꞌ₄ le₂jŋiá₅, në₂jag₄ bá₄ dsa₂ i₂co₂ŋeiꞌ₅₄ jŋiáꞌ₂ tsɨnꞌ₅₄; a₂jme₁rë₂ꞌénꞌ₄ ne₄ a₂jme₁qui₂rë₂gángꞌ₃ ne₄ ca₂le₃jë́₃ a₂jme₁ꞌɨ́n₅ ꞌauꞌ₂ ꞌniaꞌ₂, conꞌ₂ lë́₅ jme₁changꞌ₂.
23 Ca₂rë₃tɨ́ngꞌ₃, a₂ca₂tɨ́nꞌ₂ ꞌniaꞌ₂ jme₁ꞌmagꞌ₂ liaꞌ₂ lë́₅ dsɨ₂jiog₅ ꞌauꞌ₂.
24 Ca₂rë₃tɨ́ngꞌ₃ a₂jmogꞌ₅₄ le₁lɨngꞌ₄ a₂lɨ́ngꞌ₅ në₂jag₄ bá₄ jan₂ dsa₂ ꞌmɨ́₂ i₂ca₂rë₃chán₃ liaꞌ₂ conꞌ₂ lë́₅ ꞌnio₃ Diú₄, a₂léngꞌ₂ dsa₂ dsen₃ dsónꞌ₂ i₂jŋió₅ quiáin₅.
25 Jaun₂ në́₃, jŋiáꞌ₃ ꞌniaꞌ₂ cau₅ jág₁ të₂jág₁, le₂jangꞌ₂ le₂jangꞌ₂, dsia₄ ꞌniaꞌ₂ jág₁ tí₅ quianꞌ₅₄ dsa₂ mɨ₂güɨ́g₃ rɨ́ngꞌ₂, ia₁ ca₂le₃jág₃ bá₄ jniog₄ téi₅ caun₂ nɨ₁ŋɨ́₅.
26 “Chi₂juaꞌ₂ ca₂rë₃ꞌnéꞌ₃ ꞌniaꞌ₂, tsá₃ lë₁ꞌnau₂ ꞌniaꞌ₂ dso₄”;b tsá₃ cuë₂ ꞌniaꞌ₂ jmɨg₄ juaꞌ₅₄ ꞌí₁ ꞌnei₂ ꞌauꞌ₂ të₁ne₁ jmɨg₄, ca₂liaꞌ₂ jŋiaꞌ₅₄ liaꞌ₂ ca₂rɨn₂ ꞌiog₂;
27 tsá₃ ná₂ ꞌniaꞌ₂ juɨ₅ quióꞌ₅ i₂së₃dsen₃.
28 I₂jme₁ꞌang₅ guëꞌ₂, tsá₃ ma₃o₁ꞌang₁₂, të₂le₃ juɨ₁jmo₁₂ ta₁ quianꞌ₅₄ gu₂-tag₅₄ ꞌe₂ caun₂ ta₁ dse₃ cha₂, ia₁jaun₂ le₃cha₂ a₂lé₂ jme₃ꞌoin₅₄ ca₂la₂ dsa₂ i₂ꞌnióꞌ₅ quióꞌ₅.
29 Tsá₃ lë₁ꞌuëꞌ₅₄ ꞌniaꞌ₂ jág₁ ꞌlɨgꞌ₅₄ mɨ₂ꞌoꞌ₅₄; jme₁tɨn₅ ꞌniaꞌ₂ dsiáꞌ₁ jmáꞌ₃ liaꞌ₂ jág₁ dse₃, ia₁ a₂në₅ bá₄ jme₃ꞌo₅₄ a₂qui₂dsɨ₃cón₃ rɨ́ngꞌ₂ i₂ꞌnióꞌ₅ quióꞌ₅ le₃quióꞌ₅ jme₂dsí₂, tonꞌ₂ dse₃ quióꞌ₅ i₂nag₅ në́₃.
30 Tsá₃ jmo₂ ꞌniaꞌ₂ jén₂ dsɨ́₅ Jme₂dsí₂ Jŋió₅ quián₅ Diú₄, ia₁ të₂le₃ quianꞌ₅₄ ꞌéi₂ ma₂lɨ́nꞌ₅ ꞌniaꞌ₂ léi₄ i₂ma₂lë́₅ ꞌí₁ quián₅ Diú₄ ca₂liaꞌ₂ ca₂të́₂ jmɨg₄ i₁liónꞌ₂ ꞌniaꞌ₂ co₂ŋeiꞌ₅₄.
31 Co₂dsia₅ jŋiáꞌ₃ ꞌniaꞌ₂ a₂dsiꞌ₃ cha₂ të₂ꞌauꞌ₂, ca₂le₃jë́₃ guë́₄ a₂dsénꞌ₂ ꞌniaꞌ₂, ꞌnei₂ a₂ꞌi₄ ꞌauꞌ₂ në́₃; ca₂le₃jë́₃ a₂co₂mɨꞌ₅₄ co₂dsioꞌ₅₄ a₂ꞌneꞌ₂ ꞌniaꞌ₂, ca₂le₃jë́₃ guë́₄ jág₁ uɨg₅ a₂qui₂ꞌɨ́nꞌ₅ ꞌniaꞌ₂ rɨ́ngꞌ₂, ca₂le₃jë́₃ ne₅₄ a₂ꞌlɨgꞌ₅₄ në́₃.
32 Të₂le₃ jmo₄ ꞌniaꞌ₂ a₂dse₃ ja₁con₂ rɨ́ngꞌ₂ le₂jangꞌ₂ le₂jangꞌ₂, juɨ₁le₂cha₂ bá₄ a₂ŋéi₂ ꞌauꞌ₂ ꞌniaꞌ₂, ꞌén₃ ꞌniaꞌ₂ dsáu₁ rɨ́ngꞌ₂ le₂jangꞌ₂ le₂jangꞌ₂ juɨ₁liaꞌ₂ ca₂ꞌén₂ Diú₄ dsáuꞌ₂ ꞌniaꞌ₂ të₂le₃ o₄quióꞌ₄ Cristo.