ꞌA₂ liaꞌ₂ ꞌnióꞌ₅ le₃chan₂ chiꞌ₂-guein₂ quián₅ Diú₄
5
Ia₁ a₂lɨ́nꞌ₅ ꞌniaꞌ₂ chiꞌ₂-guein₂ i₂ꞌnió₁ quián₅ Diú₄, quenꞌ₂ ꞌniaꞌ₂ bí₂ léngꞌ₂ liaꞌ₂ lɨ́n₅ ꞌÉi₂.
2 Juɨ₁le₂chanꞌ₂ ꞌniaꞌ₂ ꞌniógꞌ₃ rɨ́ngꞌ₂, juɨ₁liaꞌ₂ ca₂rë₃ꞌnio₃ Cristo jniog₄ jaun₂ ca₂jɨ́inꞌ₂ o₄quián₂ jniog₄ a₂lɨ́in₅ co₂ꞌnióꞌ₄ jáꞌ₂ chaꞌ₂ ŋó₃ rë₂jenꞌ₅₄ ne₄ Diú₄ jain₂ ma₂juɨg₂ ma₂ro₂.
3 Ia₁ ma₂lɨ́nꞌ₅ ꞌniaꞌ₂ i₂tén₅ le₃quióꞌ₅ Diú₄, ca₂liaꞌ₂ jŋiaꞌ₅₄ tsá₃ ꞌnióꞌ₅ le₃cha₂ jág₁ jɨnꞌ₄ ꞌniaꞌ₂ juaꞌ₅₄ chan₂ i₂nióꞌ₅ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gu₂, on₃ guëꞌ₂ ꞌi₁caun₂ a₂siáꞌ₂ a₂lë₁ꞌiog₅ në́₃, on₃ guëꞌ₂ ma₃ꞌnióꞌ₅ le₃chan₂ guë́₄ i₂ꞌuaꞌ₂ dsɨ́₅, ia₁ tsá₃ dsi₂ten₅₄ co₂ŋɨ́₂ juaꞌ₅₄ dsa₂ i₂ma₂lë́₅ ꞌí₁ quián₅ Diú₄ jmo₃ guë́₄ le₂në₅.
4 Tsá₃ lë₁dsia₂ ꞌniaꞌ₂ jág₁ ꞌlɨgꞌ₅₄, on₃ guëꞌ₂ jág₁ ga₂, on₃ guëꞌ₂ juɨ₁liaꞌ₂ jág₁ ŋág₄ lë₁ꞌiog₅ në́₃. Ia₁ ca₂le₃jë́₃ jág₁ le₂në₅ tsá₃ dsi₂ten₅₄; ja₂lɨn₃ guë́₄ dse₃ cuëꞌ₅₄ ꞌniaꞌ₂ ti₁ꞌmagꞌ₄ Diú₄.
5 Tsá₃ juɨ₁dsi₂ꞌén₂ ꞌauꞌ₂ ꞌniaꞌ₂ a₂la₂: ꞌi₁jan₂ juɨ₁liaꞌ₂ i₂nióꞌ₅ jág₁ quianꞌ₅₄ i₂tsá₃ lɨ́n₅ dsɨ₂i₂gu₂, on₃ guëꞌ₂ ꞌi₁jan₂ juɨ₁liaꞌ₂ i₂jmo₅-dsáu₅ lë₁ꞌiog₅, on₃ guëꞌ₂ juɨ₁liaꞌ₂ dsa₂ i₂ꞌuaꞌ₂ dsɨ́₅, (ia₁ i₂co₂rɨn₂ bá₄ dsa₂ i₂ꞌuaꞌ₂ dsɨ́₅ quianꞌ₅₄ juɨ₁liaꞌ₂ dsa₂ i₂jme₂juɨnꞌ₂ diú₄ lag₄), o₁lɨ́gꞌ₂ tsá₃ lé₂ le₃tɨin₃ ja₁gon₂ Cristo quianꞌ₅₄ Diú₄.
6 ꞌI₁jan₂ tsá₃ ꞌein₂ juɨ₁jme₂gau₅ ꞌniaꞌ₂ quianꞌ₅₄ jág₁ a₂tsá₃ ta₁ tí₄, ia₁ ꞌuɨg₅₄ në₅ bá₄ já₅ uɨg₅ gau₂ quióꞌ₅ Diú₄ ne₄ quióꞌ₅ jaun₅ dsa₂ i₂tsá₃ neꞌ₅₄.
7 Jaun₂ ꞌniaꞌ₂ në́₃, co₂dsia₅ tsá₃ lë₁tóngꞌ₂ quianꞌ₅₄ dsa₂ le₂ꞌéi₂.
8 Ia₁ le₂jŋiá₅ jme₁ténꞌ₄ ꞌniaꞌ₂ caun₂ mɨ₂güɨ́g₃ qui₁néꞌ₃, la₁ rë₂në́₃ në́₃, ma₂ténꞌ₅ ꞌniaꞌ₂ le₃quióꞌ₅ Te₁guiꞌ₅₄ ja₁jniá₂ si₂. Juɨ₁le₂chanꞌ₂ ꞌniaꞌ₂ jaun₂, juɨ₁liaꞌ₂ ca₂tɨ́n₂ le₃chan₂ chiꞌ₂-guein₂ i₂tén₅ të₂le₃ ja₁jniá₂ si₂.
9 Ia₁ ja₁jniá₂ si₂ në́₃, rë₂jniá₂ ꞌua₁ dsɨ́₅ dsa₂, tí₅ jág₁ quióꞌ₅ dsa₂, a₂rë₂chan₂ dsa₂ quian₅ caun₂ juɨ₅ co₂dsau₅.
10 Dsen₅₄ jme₁tɨn₅ ꞌniaꞌ₂ ꞌauꞌ₂ jmóꞌ₂ na₅ a₂të₅ dsɨ́₅ Te₁guiꞌ₅₄.
11 Tsá₃ quenꞌ₅₄ ꞌniaꞌ₂ jë₄ ꞌe₂ a₂tsá₃ ta₁ tí₄ a₂niog₅ jmo₅-dsáu₅ dsa₂ i₂tén₅ jë₄ qui₁néꞌ₃; ja₂lɨn₃ guë́₄ dse₃ jme₁jnia₅ ꞌniaꞌ₂ a₂jaun₂ të₂le₃ ja₁jniá₂ si₂.
12 Ia₁ caun₂ lë₁o₂guíꞌ₃ bá₄, juaꞌ₅₄ la₂ dsia₃ dsa₂ a₂jmo₅ dsa₂ ꞌéi₂ jë₄ të₃coꞌ₅₄.
13 La₁ ca₂le₃jë́₃ bá₄ rë₂jniá₂ jë₁ma₂ca₂tágꞌ₃ si₂.
14 Ia₁ quianꞌ₅₄ si₂ bá₄ jmo₅ a₂rë₂jniá₂ ca₂le₃jë́₃. ꞌUɨg₅₄ jaun₂ guëꞌ₂ juáꞌ₂:
Jme₁jnio₂ neꞌ₅₄, ꞌne₂ i₂rë₂güɨ́n₃; nau₂, jú₅ jɨn₄ ꞌlag₄;
jaun₂ jmo₃ Cristo tág₅ si₂ quióꞌ₅ ja₁congꞌ₂.
15 Jaun₂ lë₃, rë₂ deꞌ₂ quion₂ ꞌniaꞌ₂ ꞌí₁ ꞌa₂ liaꞌ₂ i₂niogꞌ₅₄. Jaun₂ tsá₃ ma₃i₁niogꞌ₄ juɨ₁liaꞌ₂ i₂nio₄ dsa₂ i₂tsá₃ ꞌe₂ ŋɨ́ꞌ₂ dsɨ́₅; juɨ₁i₂nioꞌ₄ bá₄ ꞌniaꞌ₂ a₂lɨ́ngꞌ₅ dsa₂ i₂tɨn₂, i₂ŋɨ́ꞌ₂ dsɨ́₅.
16 Quenꞌ₂ ꞌniaꞌ₂ bí₂, në₃ liaꞌ₂ cuɨn₅ jmɨg₄, a₂jmóꞌ₂ ꞌniaꞌ₂ a₂dse₃, ia₁ ꞌŋio₅ juɨ₁si ma₂ꞌlɨnꞌ₅₄ dsa₂ jmɨg₄ rë₂në́₃.
17 Jaun₂ lë₃, tsá₃ jme₁con₅₄ ꞌniaꞌ₂ ꞌauꞌ₂; dsen₅₄ ꞌauꞌ₂ ꞌniaꞌ₂ jmo₄ juɨ₁le₂ŋɨ́gꞌ₂ na₅ a₂ꞌŋio₂ dsɨ́₅ Te₁guiꞌ₅₄.
18 Tsá₃ juɨ₁qui₂le₂ꞌenꞌ₅ ꞌniaꞌ₂ quianꞌ₅₄ ti₁jmɨ́g₃, ia₁ a₂në₅ bá₄ jiog₅ juɨ₅ ja₁dsɨ₂ꞌén₂ dsa₂; të₂le₃ juɨ₁jme₂canꞌ₂ ꞌniaꞌ₂ quianꞌ₅₄ Jme₂dsí₂ Jŋió₅.
19 Dsia₄ ꞌniaꞌ₂ le₂jangꞌ₂ le₂jangꞌ₂ qui₁juɨgꞌ₅₄ rɨ́ngꞌ₂ quianꞌ₅₄ salmos, quianꞌ₅₄ himnos, quianꞌ₅₄ son₅₄ a₂gu₂dsí₂, ꞌë₄ ꞌniaꞌ₂ jmo₄ son₅₄ juɨ₅ të₂ꞌauꞌ₂ a₂jme₁juɨngꞌ₂ Te₁guiꞌ₅₄.
20 Juɨ₁i₂nioꞌ₄ bá₄ ꞌniaꞌ₂ co₂tan₅₄ cuëꞌ₅₄ ti₁ꞌmagꞌ₄ Diú₄ i₂lɨ́n₅ Tia₅₄ quián₂ o₄quióꞌ₄ ca₂le₃jë́₃, liaꞌ₂ conꞌ₂ lë́₅ bí₂ quióꞌ₅ Te₁guiꞌ₅₄ Jesucristo quián₂ jniog₄.
ꞌA₂ liaꞌ₂ ꞌnióꞌ₅ le₃chan₂ dsa₂ ꞌén₂ ta₁caun₂ nióiꞌ₃ liaꞌ₂ caun₂ dsi₂néi₂
21 Tiónꞌ₂ ꞌniaꞌ₂ ꞌéiꞌ₃ quióꞌ₅ rɨ́ngꞌ₂ le₂jangꞌ₂ le₂jangꞌ₂, ia₁ a₂ganꞌ₃ ꞌniaꞌ₂ Cristo.a
22 ꞌNiaꞌ₂ dsa₂ mɨ́₂, tiónꞌ₂ ꞌniaꞌ₂ ꞌéiꞌ₃ quióꞌ₅ dsa₂ ŋeꞌ₂ quiángꞌ₂, juɨ₁liaꞌ₂ tionꞌ₅₄ ꞌniaꞌ₂ ꞌéiꞌ₃ quióꞌ₅ Te₁guiꞌ₅₄.
23 Ia₁ dsa₂ ŋeꞌ₂ bá₄ i₂lɨ́n₅ mɨ₂dsi₄ quián₅ ꞌio₅₄, juɨ₁liaꞌ₂ lɨ́n₅ Cristo mɨ₂dsi₄ quián₅ guáꞌ₅. Cristo bá₄ ján₃ i₂lɨ́n₅ i₂ma₂lió₂ quián₅ guáꞌ₅, ia₁ guáꞌ₅ guëꞌ₂ në́₃ lë́₅ co₂ꞌnióꞌ₄ nɨ₁ŋɨ₁₂ ꞌŋiog₅.
24 Le₂në₅ juɨ₁liaꞌ₂ guáꞌ₅ tioinꞌ₅₄ ꞌéiꞌ₃ quióꞌ₅ Cristo, ján₃ bá₄ le₂në₅ juɨ₁liaꞌ₂ dsa₂ mɨ́₂ ca₂tɨ́in₂ tóinꞌ₃ ꞌéiꞌ₃ quióꞌ₅ dsɨ₂i₂gu₂ jë₄ ca₂le₃jë́₃.
25 ꞌNiaꞌ₂ dsa₂ ŋeꞌ₂ guëꞌ₂ në́₃, jme₁ꞌnió₄ ꞌniaꞌ₂ dsa₂ mɨ́₂ quiángꞌ₂ juɨ₁liaꞌ₂ ca₂jmo₃ Cristo ca₂jme₃ꞌnioi₃ guáꞌ₅, ca₂le₃jë́₃ ca₂guein₃ ꞌmú₃ o₄quióꞌ₄ ꞌéi₂.
26 Le₂në₅ ca₂jmo₃ ia₁jaun₂ ma₂lë́₅ ꞌí₁ Guáꞌ₅ ca₂jme₃dse₃ ca₂rángꞌ₂ në₂jag₄ bá₄ quianꞌ₅₄ jmɨg₂ të₂le₃ quianꞌ₅₄ jág₁ quióꞌ₅;
27 ia₁jaun₂ jme₃jniog₂₃ cheiꞌ₃ ne₅₄ ꞌŋiog₅ a₂lág₅ guáꞌ₅ i₂jlánꞌ₁ i₂tsá₃ rë₂ꞌŋió₄ ꞌi₁caun₂, on₃ guëꞌ₂ cha₂ juaꞌ₅₄ ja₁lë́₄ qui₂lë₁tsɨ́nꞌ₃ quióꞌ₅, on₃ guëꞌ₂ ꞌi₁caun₂ guë́₄ juaꞌ₅₄ a₂siáꞌ₂ lë́₅, jaun₂ dsióg₄ lɨ́in₅ caun₂ guáꞌ₅ i₂lë́₅ ꞌí₁ quiáin₅ i₂dsen₃ guë́₄ lɨn₃.
28 Le₂në₅ bá₄ ján₃, ca₂tɨ́n₂ dsa₂ ŋeꞌ₂ jme₃ꞌnioi₃ dsa₂ mɨ́₂ quiáin₅, juɨ₁liaꞌ₂ ꞌnio₃ ŋɨ₅₄ ꞌŋiog₅. I₂ꞌnio₃ dsa₂ mɨ́₂ quián₅, ꞌnioi₃ ꞌŋiog₅ bá₄ ján₃.
29 Ia₁ ꞌi₁jan₂ tsá₃ juaꞌ₅₄ ꞌioꞌ₅₄ nɨ₁ŋɨ₁₂ ꞌŋiog₅, të₂le₃ jme₂tau₅₄, jmo₂₃ ꞌí₁, juɨ₁liaꞌ₂ jmo₅ Cristo ján₃ quianꞌ₅₄ guáꞌ₅,
30 ia₁ le₂jau₂ le₂jau₂ jniog₄ téi₅ nɨ₁ŋɨ₁b ꞌéi₂.
31 “Jaun₂ bá₄ lë₃ ca₂tɨ́n₂ dsa₂ ŋeꞌ₂ qui₃téin₂ chog₅₄-jmei₂, conꞌ₂ tiainꞌ₃ jme₃quiainꞌ₅₄ dsa₂ mɨ́₂ quiáin₅, ia₁jaun₂ dsióg₄ léin₂ caun₂ bá₄ ŋɨ́₅ jë₁le₃oin₃ le₂jaun₂.”c
32 Jág₁ në₅ lë́₅ caun₂ jág₁ juëꞌ₂ a₂ma₂ca₂rë₃jniá₂. La₁ juáꞌ₅ jniá₂ ꞌɨ́ng₅ Cristo quianꞌ₅₄ guáꞌ₅ quiáin₅.
33 La₁ në₃ në́₃, le₂janꞌ₂ le₂janꞌ₂ ꞌniaꞌ₂ jme₁ꞌnió₄ dsa₂ mɨ́₂ quiángꞌ₂, juɨ₁liaꞌ₂ ꞌniógꞌ₃ guiongꞌ₅₄; ján₃ guëꞌ₂ le₂jaun₂ dsa₂ mɨ́₂ ca₂tɨ́in₂ jme₃gain₃ dsɨ₂i₂gu₂.