3 Cuë́₅ ti₁ꞌmagꞌ₄ Diú₄ quiáng₃ liaꞌ₂ co₂ráun₂ dsauꞌ₂ dsɨ₃ ꞌniaꞌ₂.

4 Liaꞌ₂ co₂ráun₂ chi₂lenꞌ₄ jniá₂ Diú₄, o₄quiánꞌ₂ ꞌniaꞌ₂ ca₂le₃jɨ́ngꞌ₃, co₂tan₅₄ liaꞌ₂ ꞌioꞌ₂ jéin₅,

5 ia₁ co₂dsia₅ bá₄ ma₂ja₂náu₅ jniog₄ quenꞌ₂ bí₂ o₄quióꞌ₄ jág₁ dse₃ ca₃le₃ jmɨg₄ le₂ꞌuɨg₅₄ ca₂liaꞌ₂ jŋió₂ jmɨg₄ në₃.

6 Caun₂ bá₄ ꞌei₅ dsɨ₃ lɨ́ng₂, Diú₄ bá₄ i₂ca₂jme₃lióg₃ jmo₂₃ ta₁ dse₃ ja₁conꞌ₂ ꞌniaꞌ₂, jme₃ꞌŋiai₂₃ ca₂liaꞌ₂ ca₂të́₂ jmɨg₄ quióꞌ₄ Cristo Jesús.

7 Dsi₂ten₅₄ bá₄ ꞌag₅₄ dsɨ₃ le₂në₅ o₄quiánꞌ₂ ꞌniaꞌ₂ ca₂le₃jɨ́ngꞌ₃, ia₁ ꞌi₄ dsɨ₃ jniá₂ ꞌniaꞌ₂. Ia₁ quianꞌ₅₄ jniog₄ rɨnꞌ₅₄ co₂dsia₅ bá₄ guei₂ jniog₄ a₂jme₂guꞌ₅₄ Diú₄, tsá₃ a₂nag₅₄ jaun₂ a₂ꞌeng₅₄ néꞌ₃ ꞌmá₃, o₃ jŋiaꞌ₅₄ ne₄ dsɨ₂tan₅₄ dsióg₄ jniá₂ ja₁lé₂ le₃long₅₄ jág₁ dse₃, tonꞌ₂ lé₂ le₃jángꞌ₄ jág₁ dsau₅ a₂të₃dsónꞌ₂ bá₄ tí₅ jág₁.

8 I₂ŋi₅ dsɨ₂jóꞌ₃ bá₄ Diú₄ a₂ŋɨ́₄ lë₃ dsen₅₄ dsɨ₃ jniá₂ ꞌniaꞌ₂ ca₂le₃jɨ́ngꞌ₃, liaꞌ₂ conꞌ₂ lë́₅ ŋɨ́₄ lë₃ Cristo.

9 Le₂la₂ bá₄ chi₂lenꞌ₄ jniá₂ Diú₄: a₂qui₂dsɨ₃jón₃ a₂jme₁ꞌnióꞌ₄ ꞌniaꞌ₂ rɨ́ngꞌ₂ ꞌŋio₅ lɨn₃, liaꞌ₂ ma₂të₂dsi₅₄ jaun₂ a₂qui₂rë₂ŋɨ́ꞌ₂ dseiꞌ₂ ꞌniaꞌ₂ a₂qui₂le₃quɨngꞌ₅₄ ꞌniaꞌ₂ jmɨg₄,

10 ia₁jaun₂ lé₂ le₃caunꞌ₅₄ ꞌí₁ ꞌe₂ jaun₂ a₂dsen₅₄ guë́₄. Jaun₂ le₂në₅ bá₄ le₃chanꞌ₂ ꞌniaꞌ₂ tsá₃ qui₂le₁ꞌióg₄ jme₂dsí₂ quiánꞌ₂ ꞌniaꞌ₂, juaꞌ₅₄ qui₂le₁cánꞌ₄ ꞌniaꞌ₂ dso₄ jë₁ma₂të́₂ rë₁të₃ jmɨg₄ quióꞌ₄ Cristo.

11 Le₂në₅ bá₄ ján₃, lé₂ juɨ₅ a₂i₁nioꞌ₄ ꞌniaꞌ₂ a₂léi₄ a₂le₃jniá₂ ca₂le₃jë́₃ ne₅₄ a₂dse₃ a₂niog₅ qui₂ma₂jmoꞌ₅₄ ꞌniaꞌ₂ të₂le₃ quianꞌ₅₄ Jesucristo. Ca₂le₃jë́₃ a₂në₅, Diú₄ bá₄ i₂gue₃ ti₁ꞌmagꞌ₄, qui₂le₃juɨinꞌ₂ në́₃.

12 Rɨnꞌ₅₄ jniog₄, ꞌnio₃ jniá₂ le₃ŋiꞌ₅₄ ꞌniaꞌ₂, ca₂le₃jë́₃ a₂niog₅ ma₂i₃ŋɨ́g₂, të₂le₃ lë́₅ guë́₄ dsónꞌ₂ cuë₂₃ bí₂ a₂dsɨ₃ꞌag₅ jág₁ dse₃.

13 Le₂në₅ bá₄ le₁ŋi₅ ca₂le₃jɨ́n₃ ꞌlióg₂ i₂tionꞌ₅₄ ne₄ta₁ quianꞌ₅₄ ca₂le₃jɨ́n₃ guë́₄ rɨinꞌ₅₄ në́₃, a₂ꞌeng₅₄ rë₂jnɨ́g₅ ꞌuɨg₅₄ ia₁ a₂ꞌéng₂ le₃quióꞌ₅ Cristo.

14 ꞌUɨg₅₄ ia₁ a₂rë₂jnɨ́g₅ në́₃, meiꞌ₂ tsá₃ ca₂le₃jɨ́n₃ bá₄ rɨnꞌ₅₄ jniog₄ le₃quióꞌ₅ Te₁guiꞌ₅₄ ma₂qui₂ma₂tɨ́in₂ bí₂ a₂ꞌë́₂ jág₁ quióꞌ₅ Diú₄ a₂tiá₂ dsɨ́₅, tsá₃ ꞌe₂ gau₂ cha₂.

15 A₂dsau₅ bá₄ jaun₂ chan₂ i₂lɨn₅₄ dsia₂₃ ꞌɨin₂₃ Cristo a₂uɨg₅ dsɨ́₅, dsia₂₃ mɨꞌ₅₄, tonꞌ₂ chan₂ guëꞌ₂ i₂lɨn₅₄ dsia₂₃ a₂dse₃ dsɨ́₅ ꞌɨin₂₃ Cristo.

16-17 I₂le₂ꞌéi₂ në́₃ jmo₂₃ ia₁ a₂ꞌnio₃, ia₁ ŋi₅ rë₂ꞌeng₅₄ ja₁lá₃ ꞌuɨg₅₄ ia₁ a₂long₅₄ jág₁ dse₃. Dsa₂ i₂le₂ne₁ në́₃, dsia₂₃ ꞌɨin₂₃ Cristo cha₂ a₂ꞌɨ́n₅ dsɨ́₅ a₂jŋiaꞌ₅₄ conꞌ₂ ꞌɨ́n₂ dsɨ́₅ le₃chain₂ dse₃ guioin₅₄ bá₄, on₃juaꞌ₅₄ rëꞌ₂ a₂të₃dsónꞌ₂ lë́₅ dsɨ́₅; a₂ꞌnio₃ jmógꞌ₂ jniá₂ cuë₃ o₂meꞌ₅₄ dsɨ₅ të₁liaꞌ₂ ꞌeng₅₄ rë₂jnɨ́g₅.

18 La₁ tsá₃ cha₂ ꞌe₂ a₂jaun₂. Jŋiaꞌ₅₄ liaꞌ₂ juɨ₁ꞌë₅₄ dsa₂ jág₁ quióꞌ₅ Cristo, ca₂le₃jë́₃ ne₅₄ ꞌa₂ liaꞌ₂ jmo₃ dsa₂, juaꞌ₅₄ a₂dse₃ dsɨ́₅ o₃ a₂tsá₃ dse₃ dsɨ́₅ ꞌe₂. Tion₅₄ bá₄ jéin₅ jniá₂ ꞌioꞌ₂.

19 ia₁ guion₄ bá₄ jniá₂ jaun₂, quianꞌ₅₄ ca₂le₃jë́₃ a₂në₅, o₃ꞌɨng₅ a₂lióng₂ conꞌ₂ dse₃, të₂le₃ ia₁ a₂mɨꞌ₂ ꞌniaꞌ₂ ne₄ Diú₄ o₄quió₃, të₂le₃ quianꞌ₅₄ bí₂ a₂cuë₅ jme₂ꞌo₅₄ Jme₂dsí₂ quián₅ Jesucristo në́₃.

20 Ia₁ chi₁jan₁ jniá₂ ꞌɨ́n₂ dsɨ₃ a₂tsá₃ të₃tsɨngꞌ₅₄ o₂guíꞌ₃ quianꞌ₅₄ ꞌi₁caun₂, jaun₂ të₂le₃ lë́₅ guë́₄ ꞌag₃ caun₂ dsɨ₃, ia₁jaun₂ le₃jniá₂ a₂jlánꞌ₁ Cristo juɨ₅ nɨ₁ŋɨ₃ jniá₂, o₁jŋiaꞌ₅₄ la₂ chang₂, o₃ jóng₂ ꞌe₂.

21 Ia₁ të₂le₃ quió₃ jniá₂, o₄quióꞌ₄ Cristo bá₄ chang₂, ján₃ bá₄ a₂ca₂lág₃ co₂ꞌnióꞌ₄ a₂të₁dsɨ₅₄ në₁ca₂jong₃.

22 Ia₁ në₁juaꞌ₂ caun₂ chang₂ ꞌŋióꞌ₃ nɨ₁ŋɨ́₅ la₂, caun₂ lé₂ le₃jmo₅₄ bá₄ ta₁ a₂dse₃ o₄quióꞌ₄ Te₁guiꞌ₅₄. Jaun₂ lë₃ tsá₃ guion₄ jniá₂ ꞌe₂ quioꞌ₅₄.

23 ꞌŊio₅ juɨ́ꞌ₅ lɨ́ng₂ na₅ bá₄ jaun₂ a₂quioꞌ₄ jniá₂ jë₁le₃tɨn₃ le₂në₅: të₂le₃ ca₂ton₂, ꞌnio₃ juaꞌ₅₄ jóng₂ négꞌ₄ i₁gua₃ quianꞌ₅₄ Cristo, a₂në₅ bá₄ ja₂lɨn₃ guë́₄ dse₃ të₂le₃ quió₃ jniá₂;

24 la₁ të₂le₃ ca₂ton₂ guëꞌ₂ në́₃, ꞌŋio₅ guë́₄ dsen₅₄ ta₁ ja₁conꞌ₂ ꞌniaꞌ₂, ꞌnióꞌ₅ le₃chang₂ ꞌŋióꞌ₃ nɨ₁ŋɨ́₅ la₂.

25 Jaun₂ caun₂ bá₄ ꞌei₅ dsɨ₃ lɨ́ng₂ le₂në₅, jaun₂ jan₅₄ bá₄ guë́₄ jniá₂ quianꞌ₅₄ ꞌniaꞌ₂, ia₁jaun₂ lé₂ le₃jme₁ꞌon₁ jniá₂ ꞌniaꞌ₂ a₂náuꞌ₁ tiá₂ a₂o₁nógꞌ₅ ne₄ juɨ₅ a₂jmóꞌ₂ ꞌniaꞌ₂ ꞌioꞌ₂ guë́₄ a₂ꞌéngꞌ₂,

26 ia₁jaun₂ dsɨ₃tsón₃ a₂jmóꞌ₂ ꞌniaꞌ₂ ꞌioꞌ₂ le₃quióꞌ₅ Cristo Jesús o₄quió₃ jniá₂, ꞌuɨg₅₄ ia₁ a₂quianꞌ₄ jniá₂ ꞌniaꞌ₂.

27 Jŋiaꞌ₅₄ liaꞌ₂ cán₂ ꞌniaꞌ₂ caun₂ juɨ₅ conꞌ₂ dsi₂ten₅₄ liaꞌ₂ conꞌ₂ lë́₅ jág₁ dse₃ quióꞌ₅ Cristo. Le₂në₅ jaun₂, o₁jŋiaꞌ₅₄ la₂ ca₂dsióg₃ jniá₂ i₁jag₁₂, o₃ tsá₃ ca₂dsióg₃, o₃ chi₂juaꞌ₂ të₂le₃ ca₂ŋó₃ guë́₄ uɨ́ng₂ ꞌe₂, la₁ ꞌnio₃ jniá₂ dsi₁lé₂ jág₁ le₃guion₅₄ a₂chanꞌ₂ ꞌniaꞌ₂ tióngꞌ₂ tiá₂, ꞌei₅ caun₂ jág₁ le₃quióꞌ₅ jme₂dsí₂, jme₂ꞌŋióꞌ₄ ꞌniaꞌ₂ ca₂le₃jɨ́ngꞌ₃ co₂dsia₅ o₄quióꞌ₄ jág₁ dse₃ a₂ꞌéin₂ jniog₄.

28 Tsá₃ lë₁can₂ ꞌniaꞌ₂ juë́ꞌ₅ ꞌe₂ qui₂quiong₅ juɨ₁liaꞌ₂ dsa₂ i₂ꞌiog₅₄ ꞌniaꞌ₂. Ia₁ a₂në₅ jauꞌ₂ ꞌí₁ rë₂ a₂lén₄ dsa₂ ꞌéi₂ a₂tioinꞌ₅₄ juɨ₅ ja₁dsɨ₃ꞌéin₂; la₁ le₂jaun₂ guëꞌ₂ ján₃ jauꞌ₂ léi₄ rë₂ táng₃ a₂tionꞌ₅₄ ꞌniaꞌ₂ juɨ₅ ja₁tɨ́ngꞌ₄; a₂në₅ bá₄ a₂já₅ quióꞌ₅ Diú₄.

29 Ia₁ ꞌuɨg₅₄ quióꞌ₄ Cristo ca₂ŋɨꞌ₂ ꞌniaꞌ₂, on₃juaꞌ₅₄ jmáꞌ₃ le₃ꞌénꞌ₂ ꞌniaꞌ₂ le₃quióꞌ₅, ján₃ guëꞌ₂ le₂jaun₂ ŋagꞌ₅₄ uɨg₅ o₄quióꞌ₄,

30 ia₁ co₂rë₂ bá₄ ꞌnei₂ dsɨ₂ŋɨ́ꞌ₂ ꞌniaꞌ₂ juɨ₁liaꞌ₂ ma₂të́₂ neꞌ₅₄ ꞌniaꞌ₂ a₂dsɨ₂ŋɨ́₂ jniá₂, conꞌ₂ siáꞌ₂ táng₃ rë₂në́₃ rë₂ŋiꞌ₅₄ ꞌniaꞌ₂ liaꞌ₂ ma₂dsɨ₂ŋɨ́g₂ jaun₂ bá₄.