ꞌA₂ liaꞌ₂ ca₂jmo₃ Cristo sioin₅, ꞌa₂ liaꞌ₂ ca₂rë₃juɨinꞌ₂ táng₃
2
Jaun₂ le₂në₅, chi₂juaꞌ₂ qui₂gueꞌ₂ ꞌniaꞌ₂ liánꞌ₂ le₃quióꞌ₅ Cristo, chi₂juaꞌ₂ ꞌa₂ liaꞌ₂ ꞌnio₃ ꞌéi₂ ꞌniaꞌ₂ qui₂ꞌag₂₃ bá₄ dse₃ ꞌauꞌ₂, chi₂juaꞌ₂ ꞌei₅ caun₂ jág₁ quianꞌ₅₄ Jme₂dsí₂ quiáin₅, chi₂juaꞌ₂ cha₂ a₂ꞌua₁ ŋéi₂ ꞌauꞌ₂ ꞌniaꞌ₂ rɨ́ngꞌ₂:
2 jme₁ꞌŋia₅ ꞌniaꞌ₂ o₂ꞌŋió₃ dsɨ₃ jniá₂, a₂tiónꞌ₂ ꞌniaꞌ₂ ꞌei₅ caun₂ jág₁, quianꞌ₅₄ ꞌniaꞌ₂ rɨ́ngꞌ₂ ꞌnióꞌ₃ ꞌniaꞌ₂, të₂le₃ quianꞌ₅₄ jan₂ Jme₂dsí₂, ca₂ne₅₄ bá₄ ta₁ tiónꞌ₂ ꞌniaꞌ₂.
3 ꞌI₁caun₂ tsá₃ lë₁jmo₂ ꞌniaꞌ₂ juaꞌ₅₄ a₂jŋiaꞌ₅₄ dse₃ ja₁conꞌ₂ ꞌniaꞌ₂ guiongꞌ₅₄ on₃ guëꞌ₂ jmo₂ ꞌniaꞌ₂ róngꞌ₂. Jmo₄ bá₄ ꞌniaꞌ₂ megꞌ₂, jmo₄ ꞌniaꞌ₂ ꞌauꞌ₂ ja₂lɨn₃ guë́₄ dsen₃ rɨ́nꞌ₂ ꞌniaꞌ₂ conꞌ₂ guë́₄ guionꞌ₅₄ ꞌniaꞌ₂.
4 ꞌI₁janꞌ₂ ꞌniaꞌ₂ tsá₃ ca₂ne₅₄ ꞌnoꞌ₂ juaꞌ₅₄ a₂jŋiaꞌ₅₄ conꞌ₂ dse₃ ja₁conꞌ₂ ꞌniaꞌ₂ guiongꞌ₅₄, ꞌnioꞌ₂ bá₄ ꞌniaꞌ₂ a₂dse₃ quióꞌ₅ ja₁con₂ i₂siánꞌ₂ ján₃.
5 Juɨ₁le₅₄ bá₄ ꞌauꞌ₂ ꞌniaꞌ₂ juɨ₁liaꞌ₂ ca₂lë₃ dsɨ́₅ Cristo Jesús:
6 Ia₁ o₁jŋiaꞌ₅₄ la₂ lɨ́n₅ ꞌéi₂ nióꞌ₄ quióꞌ₅ Diú₄,
on₃juaꞌ₅₄ jaun₂ ca₂jmo₃ dsɨ́₅ a₂ca₂tɨ́in₂ tion₅₄
a₂léin₂ co₂rɨin₂ quiainꞌ₅₄ Diú₄,
7 të₂le₃ ca₂jmo₃ bá₄ ꞌéi₂ cau₅ a₂jme₁tɨ́in₂ në́₃,
në₂jag₄ bá₄ a₂tsá₃ ꞌe₂ quein₅,
ca₂can₃ juɨ₅ ca₂já₃ a₂lɨ́in₅ dsa₂ i₂jme₂ti₃,
jme₁ca₂rë₃cháin₃ a₂lɨ́in₅ dsa₂ mɨ₂güɨ́g₃.
8 Jme₁ma₂ca₂rë₃jniái₂ a₂lɨ́in₅ dsa₂ në́₃,
ca₂jmo₃ meiꞌ₂.
Jaun₂ guë́₄ ca₂lɨin₃ jan₂ i₂ca₂rë₃neꞌ₅₄,
ca₂jme₃ti₃ në́₃,
ca₂le₃jë́₃ ca₂guein₃ ꞌmú₃,
ca₂liaꞌ₂ jŋiaꞌ₅₄ liaꞌ₂ ca₂dsióg₃ ꞌmú₃ të₃toin₅₄ cróg₄.
9 ꞌUɨg₅₄ jaun₂, Diú₄ në́₃, ja₂lɨn₃ guë́₄ ŋei₅ ca₂jme₃juagꞌ₂,
ján₃ guëꞌ₂ ca₂dsiog₃ a₂lɨ́in₅ ta₁ juëꞌ₂ a₂goin₂
a₂quein₅ guë́₄ ꞌŋio₅ lɨn₃ conꞌ₂ guë́₄ ca₂le₃jɨ́n₃,
10 ia₁jaun₂ të₂le₃ ne₄ ꞌéiꞌ₃ a₂gon₂ Jesús,
juɨ₁chi₂jné₃ ca₂le₃jɨ́n₃ i₂tionꞌ₅₄ gueiꞌ₅₄ i₂juɨ́g₃,
quianꞌ₅₄ i₂tionꞌ₅₄ guaꞌ₅₄ ꞌuë₃,
quianꞌ₅₄ i₂tionꞌ₅₄ le₃néꞌ₃ ꞌuë₃ në́₃;
11 ia₁jaun₂ tion₃ ca₂le₃jë́₃ le₁tsɨꞌ₂ dsa₂
a₂dsónꞌ₂ bá₄ lɨ́n₅ Jesucristo Te₁guiꞌ₅₄,
jaun₂ le₂në₅ le₃juɨnꞌ₂ Diú₄ Jmei₂.
Lɨ́n₅ dsa₂ quián₅ Cristo në₂jag₄ bá₄ si₂ të₂le₃ ja₁con₂ dsa₂ mɨ₂güɨ́g₃
12 ꞌUɨg₅₄ jaun₂ në́₃, ꞌniaꞌ₂ rɨnꞌ₅₄ jniog₄, juɨ₁liaꞌ₂ ma₂ja₂nógꞌ₅ ma₂rë₂tenꞌ₅₄ tián₂ ꞌniaꞌ₂ liaꞌ₂ conꞌ₂ jme₁ꞌeng₅₄ quianꞌ₅₄ ꞌniaꞌ₂, të₂le₃ ꞌŋio₅ lɨn₃ guë́₄ ca₂tɨ́nꞌ₂ ꞌniaꞌ₂ nágꞌ₁ gau₂ rë₂në́₃, të₁liaꞌ₂ ꞌeng₅₄ uɨ́ng₂. Jme₁le₅₄ bá₄ ꞌniaꞌ₂ guiongꞌ₅₄ juɨ₁liaꞌ₂ ta₁ a₂ma₂lóngꞌ₂, jmo₂ ꞌniaꞌ₂ megꞌ₂ ꞌei₅ gau₂.
13 Ia₁ Diú₄ bá₄ i₂jmo₅ ta₁ ja₁conꞌ₂ ꞌniaꞌ₂, a₂qui₂lë́₂ ꞌauꞌ₂ ꞌniaꞌ₂ a₂dse₃, a₂qui₂lë́₂ ta₁ ján₃, liaꞌ₂ conꞌ₂ lë́₅ a₂ꞌŋio₂ dsɨ́₅.
14 Jmo₄ ca₂le₃jë́₃, la₁ tsá₃ jmo₂ juaꞌ₅₄ tsá₃ dsáu₅ ꞌauꞌ₂ ꞌniaꞌ₂ rɨ́ngꞌ₂ a₂chi₂ꞌɨ́inꞌ₄ ꞌniaꞌ₂, on₃ guëꞌ₂ jmo₂ ꞌniaꞌ₂ mɨꞌ₅₄,
15 ia₁jaun₂ bá₄ ꞌi₁jan₂ tsá₃ ꞌein₂ le₃bógꞌ₂ dso₄ on₃ guëꞌ₂ juaꞌ₅₄ cha₂ a₂rë₂cánꞌ₄ ꞌniaꞌ₂, jmo₄ ꞌniaꞌ₂ a₂lɨ́ngꞌ₅ chiꞌ₂-guein₂ quián₅ Diú₄ i₂tsá₃ ꞌe₂ rë₂cánꞌ₄, i₂tsá₃ ꞌe₂ rë₂ꞌŋió₄ jë₄ quióꞌ₄ dsa₂ ꞌlɨnꞌ₅₄ i₂rë₂gán₃ dsɨ́₅. ꞌNiaꞌ₂ bá₄ lɨ́ngꞌ₅ juɨ₁liaꞌ₂ nei₅, a₂jmoꞌ₂ tág₅ ne₄ quióꞌ₅ caun₂ mɨ₂güɨ́g₃ qui₁néꞌ₃,
16 ja₁o₂canꞌ₄ ꞌniaꞌ₂ jág₁ dse₃ a₂le₃chan₂ dsa₂. Le₂në₅, jë₁ma₂të́₂ rë₁guanꞌ₂ Cristo, lé₂ le₃jmo₅₄ jniá₂ dsɨ₃ në₂jag₄ a₂rë₃tan₅₄ jniá₂ o₄quiánꞌ₂ ꞌniaꞌ₂, jë₁ma₂cha₂ caun₂ léi₄ a₂tsá₃ juaꞌ₅₄ a₂lë₁ca₂ŋɨ₃ co₂chiꞌ₅₄, on₃ guëꞌ₂ juaꞌ₅₄ ca₂jmo₃ ta₁ a₂tsá₃ ꞌe₂ ta₁ tí₄.
17 La₁ juɨ₁ꞌa₂ guë́₃ la₂ ca₂quɨ́ng₂ a₂léng₂ rë₂jengꞌ₅₄ ne₄ Diú₄, o₄quióꞌ₄ a₂ꞌénꞌ₂ ꞌniaꞌ₂, ꞌŋio₅ lɨn₃ ꞌioꞌ₂ jéin₅ jniá₂, quianꞌ₅₄ bá₄ jniog₄ rɨnꞌ₅₄ a₂jmó₁ ꞌioꞌ₂ ca₂le₃jág₃.
18 Jmo₄ ꞌniaꞌ₂ ꞌioꞌ₂ ján₃, jme₁quiongꞌ₅₄ bá₄ ꞌniaꞌ₂ jniá₂ a₂jéinꞌ₅ jniá₂ ꞌioꞌ₂.
Timoteo quianꞌ₅₄ Epafrodito
19 Në₁juaꞌ₂ ꞌnio₃ Te₁guiꞌ₅₄ Jesús, ꞌɨ́n₂ dsɨ₃ jniá₂ tsɨng₅₄ ŋiꞌ₅₄ ta₁ Timoteo dsɨ₃jɨin₅₄ ꞌniaꞌ₂, ia₁jaun₂ ꞌŋio₅ lɨn₃ guë́₄ ꞌioꞌ₂ jmo₅₄ jë₁ma₂ca₂rë₃guion₅₄ jniá₂ ꞌa₂ liaꞌ₂ chanꞌ₂ ꞌniaꞌ₂.
20 Ia₁ ꞌi₁jan₂ i₂siánꞌ₂ tsá₃ chan₂ i₂lë́₅ dsɨ₂jiog₅ dsɨ́₅ co₂rë₂ juɨ₁liaꞌ₂ dsɨ₂jiog₅ dsɨ₃ jniá₂, juaꞌ₅₄ i₂ꞌɨ₅ dsɨ́₅ të₃dsónꞌ₂ a₂dse₃ të₂le₃ ja₁conꞌ₂ ꞌniaꞌ₂;
21 ia₁ ca₂le₃jɨ́n₃ bá₄ dsa₂ ꞌnoꞌ₂ a₂dse₃ quióꞌ₅ guioin₅₄, tsá₃ dsan₂ dsɨ́₅ a₂ꞌɨ́n₅ dsɨ́₅ ja₁con₂ Cristo Jesús.
22 La₁ ca₂le₃jɨ́nꞌ₃ bá₄ ꞌniaꞌ₂ ma₂ŋiꞌ₅₄ ꞌa₂ liaꞌ₂ ma₂ca₂jme₃jnia₅ Timoteo a₂tɨin₂ a₂ŋi₅ a₂ma₂ja₂náu₅ jniaꞌ₅₄ quiainꞌ₅₄ a₂jme₂tí₁ a₂qui₂ꞌë́₅ jág₁ dse₃, ma₂já₅ jme₂ti₃ co₂lë₅ ne₄ Te₁guiꞌ₅₄ juɨ₁liaꞌ₂ jan₂ chiꞌ₂ i₂jme₂ꞌon₅₄ jmei₂.
23 Le₂në₅ ꞌɨ́n₂ dsɨ₃ caun₂ jmɨg₄ a₂tsɨin₅₄ dsi₁jɨin₁₂ ꞌniaꞌ₂ jë₁ma₂ca₂rë₃guion₅₄ ꞌa₂ liaꞌ₂ lë́₅ të₂le₃ quió₃ ja₁lá₃.
24 La₁ia₁ caun₂ bá₄ ꞌei₅ dsɨ₃ ja₁con₂ Te₁guiꞌ₅₄, ꞌnio₃ bá₄ jniá₂ dsióg₄ ŋiꞌ₅₄ ta₁ i₁jɨng₁₂ ꞌniaꞌ₂.
25 La₁ tion₅₄ ꞌnióꞌ₅ ján₃, lɨ́n₂ jniá₂, dsiangꞌ₅₄ Epafrodito, i₂lɨ́n₅ i₂quiangꞌ₅₄ jmo₂₃ ta₁ quenꞌ₂ jniaꞌ₅₄ bí₂ co₂dsia₅ quiainꞌ₅₄, i₂ca₂chenꞌ₂ ꞌniaꞌ₂ guiongꞌ₅₄ o₃can₅ a₂ꞌnióꞌ₅ quió₃.
26 ꞌÉi₂ në́₃ ꞌŋio₅ lɨn₃ ꞌɨ́n₅ dsɨ́₅ jɨ́in₂ ca₂le₃jɨ́nꞌ₃ ꞌniaꞌ₂, ꞌŋio₅ ꞌɨ₅ dsɨ́₅ ia₁ ca₂rë₃ŋiꞌ₅₄ bá₄ ꞌniaꞌ₂ a₂ca₂rë₃dsoꞌ₅₄ ꞌéi₂.
27 Dsónꞌ₂ bá₄ jaun₂ ca₂rë₃dsoꞌ₅₄, jŋiaꞌ₅₄ meiꞌ₂ tsá₃ ca₂join₃; la₁ ca₂dsia₃ bá₄ Diú₄ ŋéi₂ dsɨ́₅ quióꞌ₅, on₃juaꞌ₅₄ rëꞌ₂ jmáꞌ₃ ja₁con₂ ꞌéi₂, ia₁ ca₂dsia₃ bá₄ ŋéi₂ dsɨ́₅ jniá₂ në́₃, ia₁jaun₂ tsá₃ ŋɨ́₄ lë₃ ꞌliaꞌ₂ dsɨ₃ tsá₃ len₅ ꞌa₂ conꞌ₂ ma₂chang₂ quian₅₄ o₂i₁ dsɨ₅.
28 ꞌUɨg₅₄ jaun₂ në́₃ ꞌŋio₅ guë́₄ lë́₂ dsɨ₃ dsiainꞌ₅₄, ia₁jaun₂ jmóꞌ₂ ꞌniaꞌ₂ ꞌioꞌ₂ jɨinꞌ₅₄ táng₃, ia₁jaun₂ tsá₃ ŋɨ́₄ lë₃ chang₂ ꞌɨ₅ dsɨ₃.
29 Guein₅₄ ꞌniaꞌ₂ ca₂liaꞌ₂ a₂ꞌŋio₂ ꞌauꞌ₂ guë́₄ lɨn₃, a₂lɨ́n₅ ꞌéi₂ jan₂ rɨ́nꞌ₂ ꞌniaꞌ₂ të₂le₃ ja₁con₂ Te₁guiꞌ₅₄, jme₁gonꞌ₃ bá₄ ꞌniaꞌ₂ juɨ₁liaꞌ₂ i₂lɨ́n₅ liaꞌ₂ lɨ́n₅ ꞌéi₂;
30 ia₁ ca₂juɨg₄ bá₄ meiꞌ₂ tsá₃ ca₂join₃ ꞌuɨg₅₄ ia₁ a₂jme₂ti₃ ta₁ ne₄ Cristo. Ca₂can₃ caun₂ juɨ₅ goꞌ₂ ja₁lé₂ le₃quɨn₃ jme₂dsí₂ quióꞌ₅ a₂jme₃ꞌŋiai₂₃ jme₃ꞌo₅₄ a₂tsá₃ lé₂ le₃jme₁ꞌoꞌ₁ ꞌniaꞌ₂.