Si₂ carta a₂ca₂jmo₃ San Pablo ne₄ dsa₂
COLOSENSES
Jmo₅ Pa₄ si₂ a₂chein₃ ne₄ Guáꞌ₅ i₂chan₂ juɨg₂ Colosas të₁liaꞌ₂ ꞌein₅₄ néꞌ₃ ꞌmá₃
1
Jniá₂, Pa₄, ia₁ co₂në₅ ꞌnio₃ Diú₄ bá₄, lɨ́ng₅ jan₂ i₂chen₄ quián₅ Jesucristo. Co₂lë₅ quiangꞌ₅₄ rɨnꞌ₅₄ jniog₄ Timoteo,
2 jmo₂₃ si₂ carta la₂ a₂dsiangꞌ₅₄ neꞌ₅₄ ꞌniaꞌ₂ rɨnꞌ₅₄ jniog₄a i₂changꞌ₂ juɨg₂ Colosas, dsa₂ i₂lë́₅ ꞌí₁ i₂jme₂ti₃ ja₁con₂ Cristo:
Juɨ₁jme₂guꞌ₅₄ bá₄ Diú₄ i₂lɨ́n₅ Tia₅₄ quián₂, juɨ₁jmo₁₂ bá₄ ꞌag₃ tei₄ tionꞌ₅₄ ꞌniaꞌ₂.
Mɨ₅ Pa₄ ne₄ Diú₄ o₄quióꞌ₄ dsa₂ i₂ꞌén₂
3 Cuë₂ jniaꞌ₅₄ ti₁ꞌmagꞌ₄ Diú₄ Jmei₂ Jesucristo Te₁guiꞌ₅₄ quián₂, co₂tan₅₄ bá₄ mɨ₂ jniaꞌ₅₄ ne₅₄ o₄quiánꞌ₂ ꞌniaꞌ₂.
4 Ia₁ ma₂ca₂rë₃ne₄ bá₄ jniaꞌ₅₄ ꞌa₂ liaꞌ₂ lë́₅ a₂ꞌénꞌ₂ ꞌniaꞌ₂ le₃quióꞌ₅ Cristo Jesús, ꞌa₂ liaꞌ₂ lë́₅ ꞌnióꞌ₃ ꞌniaꞌ₂ ca₂le₃jɨ́n₃ i₂ma₂tén₅ le₃quióꞌ₅ Diú₄,a
5 ia₁ cha₂ a₂ꞌɨ́n₂ ꞌauꞌ₂ ꞌniaꞌ₂ a₂ma₂rë₂ꞌma₄ a₂lé₂ quiánꞌ₂ ꞌniaꞌ₂ gueiꞌ₅₄ i₂juɨ́g₃, jág₁ dse₃ a₂tí₅ a₂jme₁ma₂neiꞌ₂ ꞌniaꞌ₂ le₂jŋiá₅,
6 a₂jme₁ma₂dsióg₃ ja₁conꞌ₂ ꞌniaꞌ₂. Ca₂le₂con₂ ta₁caun₂ mɨ₂güɨ́g₃, ma₂léi₄ ma₂rë₂rau₂ a₂rë₂ꞌén₂ dsa₂, le₂jaun₂ qui₂dsɨ₂cón₃ jág₁. Lë́₂ juɨ₁liaꞌ₂ ma₂qui₂ma₂lë₅ quianꞌ₅₄ ꞌniaꞌ₂ ca₂le₃ jmɨg₄ jme₁ca₂neiꞌ₂ ꞌniaꞌ₂ jág₁ dse₃ a₂lión₂ dsa₂, jme₁ca₂rë₃ŋɨ́ꞌ₂ ꞌauꞌ₂ ꞌniaꞌ₂ në́₃, ꞌa₂ liaꞌ₂ lë́₅ a₂të₃dsónꞌ₂ bá₄ dsau₅ ꞌua₁ dsɨ́₅ Diú₄.
7 A₂në₅ ma₂ca₂rë₃tɨ́nꞌ₃ ꞌniaꞌ₂ ca₂jme₃tag₅ Epafras i₂ꞌnióg₃ guë́₄ lɨn₃, i₂ma₂já₅ co₂lë₅ quianꞌ₅₄ jniaꞌ₅₄ jme₂ti₃ ta₁ ne₄ Cristo. ꞌÉi₂ bá₄ chénꞌ₅ ja₁conꞌ₂ ꞌniaꞌ₂ a₂lɨ́in₅ dsa₂ rë₂tiꞌ₅₄ i₂jmo₅ ta₁ quióꞌ₅ Cristo, o₄quiánꞌ₂ ꞌniaꞌ₂.
8 ꞌÉi₂ bá₄ ma₂o₃can₅ jág₁ ꞌa₂ liaꞌ₂ ꞌnióꞌ₃ ꞌniaꞌ₂ rɨ́ngꞌ₂ le₃quióꞌ₅ Jme₂dsí₂.
9 ꞌUɨg₅₄ jaun₂, jniaꞌ₅₄ në́₃, ca₂le₃ jmɨg₄ jme₁ca₂rë₃ne₄ jniaꞌ₅₄, ma₂ja₂náu₅ tsá₃ ma₂tí₄ jniaꞌ₅₄ juaꞌ₅₄ tsá₃ chi₂lenꞌ₄ jniaꞌ₅₄ Diú₄ o₄quiánꞌ₂ ꞌniaꞌ₂. Mɨ₂ jniaꞌ₅₄ juɨ₁jmo₁₂ juɨ₁qui₂le₂ꞌan₂ ꞌauꞌ₂ ia₁jaun₂ qui₂le₃ŋɨ́gꞌ₂ le₃ŋiꞌ₅₄ ꞌniaꞌ₂ le₃quióꞌ₅ jme₂dsí₂, ꞌe₂ jaun₂ a₂ꞌnio₃ ꞌéi₂,
10 ia₁jaun₂ bá₄ i₁nioꞌ₄ ꞌniaꞌ₂ conꞌ₂ dsi₂ten₅₄ jmo₃ dsa₂ quián₅ Te₁guiꞌ₅₄, liaꞌ₂ conꞌ₂ lë́₅ ꞌŋio₂ dsɨ́₅ ꞌéi₂. Juɨ₁le₂rau₂ bá₄ conꞌ₂ dse₃ ca₂le₃jë́₃ ne₅₄ a₂dse₃ jmoꞌ₂ ꞌniaꞌ₂, caun₂ dsi₁nóꞌ₅ ꞌniaꞌ₂ le₃cuɨngꞌ₂ guë́₄ dse₃ Diú₄.
11 Mɨ₂ jniaꞌ₅₄ ne₄ ꞌéi₂ a₂cheinꞌ₃ ꞌniaꞌ₂ tiá₂ quianꞌ₅₄ juɨ₅bí₂ ꞌuanꞌ₂ quióꞌ₅, ia₁jaun₂ bá₄ tianꞌ₃ ꞌniaꞌ₂ ca₂le₃jɨ́ngꞌ₃ a₂tióꞌ₃ ꞌauꞌ₂, a₂juɨnꞌ₂ ꞌauꞌ₂, tonꞌ₂ o₂ꞌŋió₃ ꞌauꞌ₂ në́₃.
12 Mɨ₂ jniaꞌ₅₄ ia₁jaun₂ bá₄ cuëꞌ₅₄ ꞌniaꞌ₂ ti₁ꞌmagꞌ₄ Tia₅₄, ia₁ ma₂jmo₃ a₂lénꞌ₄ ꞌniaꞌ₂b dsa₂ i₂lë́₅ ꞌí₁c quiáin₅, i₂ca₂tɨ́n₂ le₃quenꞌ₄ ja₁tág₅ si₂.
13 Ma₂ca₂lió₂ Diú₄ jniog₄ o₄gú₃ i₂gon₂ jë₄ qui₁néꞌ₃, a₂ma₂ca₂dsiog₃ táng₃ ja₁gon₂ Ja₁ŋiꞌ₅₄ i₂ŋɨ́₄ lë₃ ꞌnioi₃.
14 ꞌÉi₂d bá₄ ca₂láu₂, ca₂ꞌéin₂ dsáu₁ jniog₄.
ꞌEi₅ tei₄ quianꞌ₅₄ Diú₄ o₄quióꞌ₄ a₂ca₂jon₃ Cristo
15 ꞌÉi₂ bá₄ lɨ́n₅ nióꞌ₄ quióꞌ₅ Diú₄ i₂tsá₃ jniá₂; ꞌéi₂ bá₄ i₂ca₂tɨ́n₂ lén₂ gon₂ ne₄ ca₂le₃jë́₃ a₂ca₂rë₃chá₃.
16 Të₂le₃ quianꞌ₅₄ ꞌéi₂ bá₄, ca₂jmo₃ Diú₄ ca₂le₃jë́₃ ꞌe₂ a₂cha₂ gueiꞌ₅₄ i₂juɨ́g₃ quianꞌ₅₄ guaꞌ₅₄ ꞌuë₃, ca₂le₃jë́₃ a₂jniá₂ quianꞌ₅₄ guë́₄ ca₂le₃jë́₃ a₂tsá₃ jniá₂ në́₃: co₂ꞌnióꞌ₄ a₂ca₂jmóiꞌ₂ ca₂le₃jɨ́n₃ i₂jmo₅ ꞌéiꞌ₃, ca₂le₃jɨ́n₃ i₂ꞌio₅ bí₂, ca₂le₃jɨ́n₃ i₂gon₂, ca₂le₃jɨ́n₃ i₂lɨ́n₅ ta₁ në́₃. Ca₂le₃jɨ́n₃ i₂në₅ ca₂lɨn₃ të₂le₃ quianꞌ₅₄ ꞌéi₂, tonꞌ₂ o₄quióꞌ₄ ꞌéi₂ në́₃.
17 ꞌÉi₂ bá₄ i₂jme₁ma₂chan₂ liaꞌ₂ conꞌ₂ néꞌ₃ guë́₄ a₂le₃cha₂ ca₂le₃jë́₃; ꞌéi₂ bá₄ jmo₅ a₂niog₅ lë́₂ rë₂ ca₂le₃jë́₃.
18 ꞌÉi₂ bá₄ lɨ́n₅ ján₃ mɨ₂dsi₄ nɨ₁ŋɨ₁₂, co₂ꞌnióꞌ₄ le₃juaꞌ₅₄ guáꞌ₅ quiáin₅. ꞌÉi₂ bá₄ lɨ́n₅ i₂ca₂jme₃lióg₃ ca₂le₃jë́₃; tonꞌ₂ ꞌéi₂ bá₄ lɨ́n₅ ján₃ i₂le₂ꞌuɨg₅₄ i₂ca₂jenꞌ₅₄ jɨn₄ ꞌlag₄, ia₁jaun₂ lén₂ ꞌéi₂ i₂dsen₅₄ guë́₄ ne₄ quióꞌ₅ ca₂le₃jë́₃.
19 Ia₁ ca₂rë₃ꞌŋió₃ dsɨ́₅ Diú₄ ca₂të₁gua₁ të₂le₃ ja₁con₂ ꞌéi₂ ca₂le₃jë́₃ ꞌa₂ liaꞌ₂ lɨ́in₅ ꞌŋiog₅;
20 ca₂rë₃ꞌŋió₃ dsɨ́₅ ján₃, të₂le₃ quianꞌ₅₄ ꞌéi₂, ca₂ꞌág₂ táng₃ caun₂ jág₁ quiainꞌ₅₄ ꞌŋiog₅, ca₂le₃jë́₃ a₂cha₂: liaꞌ₂ ta₁caun₂ gueiꞌ₅₄ mɨ₂güɨ́g₃ liaꞌ₂ quianꞌ₅₄ ne₄ guaꞌ₅₄ ꞌuë₃, ca₂jmo₃ ca₂ꞌág₂ táng₃ tei₄ të₂le₃ quianꞌ₅₄ jmɨ₂ ꞌain₅₄ a₂ca₂tein₃ ne₄ cróg₄.
21 ꞌNiaꞌ₂ në́₃, tsá₃ jág₁ jme₁niógꞌ₅ quianꞌ₅₄ Diú₄ le₂jŋiá₅; të₂le₃ jme₁ꞌŋiaiꞌ₅₄ bá₄ ꞌniaꞌ₂, juɨ₅ ꞌa₂ liaꞌ₂ jme₁qui₂dsɨ₂jiog₅ ꞌauꞌ₂, juɨ₅ ꞌa₂ liaꞌ₂ jme₁jmoꞌ₂-dsáuꞌ₅ ꞌniaꞌ₂ në́₃.
22 La₁ rë₂në́₃ në́₃, ma₂ca₂jmo₃ Diú₄ ca₂ꞌág₂ táng₃ caun₂ jág₁ ꞌniaꞌ₂ quiainꞌ₅₄, të₂le₃ quianꞌ₅₄ ꞌmú₃ a₂ca₂can₃ Cristo juɨ₅ ŋɨ₅₄. A₂në₅ ca₂jmo₃ ia₁jaun₂ cheinꞌ₃ ꞌniaꞌ₂ ne₅₄, jme₃jniai₂₃ ꞌniaꞌ₂ dsa₂ i₂ma₂lë́₅ ꞌí₁,a i₂tsá₃ ma₃ꞌe₂ rë₂ꞌŋió₄, on₃ guëꞌ₂ ma₂ꞌe₂ dso₄ rɨnꞌ₂ ꞌniaꞌ₂.
23 A₂jaun₂ chi₂juaꞌ₂ caun₂ náuꞌ₂ ꞌniaꞌ₂ tiá₂ a₂ꞌéngꞌ₂, në₂jag₄ quianꞌ₅₄ jmú₄ tioꞌ₅₄ ꞌei₄; jaun₂ tsá₃ qui₂dsɨ₃múꞌ₃ ꞌniaꞌ₂ cau₅ a₂ꞌɨ́n₂ ꞌauꞌ₂ të₂le₃ quianꞌ₅₄ jág₁ dse₃ a₂ma₂neiꞌ₂ ꞌniaꞌ₂. Jág₁ dse₃ në₅ ma₂qui₂rë₂ꞌë́₂ ne₄ le₂jan₂ le₂jan₂ i₂chan₂ ne₄ guaꞌ₅₄ ꞌuë₃. Jniá₂ Pa₄, jaun₂ në́₃, lɨ́ng₅ jan₂ i₂qui₂jme₂ꞌo₅₄ dsɨ₂ꞌë́₃ jág₁ jaun₂.
Jme₂ti₃ Pa₄ ja₁con₂ guáꞌ₅
24 Në₃ në́₃ ꞌioꞌ₂ jéin₅ jë₄ dsɨ₂ŋɨ́g₂ uɨg₅ o₄quiánꞌ₂ ꞌniaꞌ₂, ia₁ le₂la₂ bá₄ ꞌeng₅₄ juɨ₅ a₂jme₁ꞌŋiag₅, quianꞌ₅₄ ŋɨ₃ ꞌŋió₃ a₂ꞌnióꞌ₅ guë́₄ juɨ₁liaꞌ₂ jmɨ₁uɨg₅ a₂ca₂i₃ŋɨ́₂ Cristo o₄quióꞌ₄ guáꞌ₅ quiáin₅, a₂lë́₅ ŋɨ₅₄.
25 A₂ma₂ca₂dsióg₃ jniá₂ a₂lɨ́ng₅ jan₂ i₂jme₂ti₃ ja₁con₂ guáꞌ₅ ján₃, conꞌ₂ lë́₅ ca₂dsia₃ Diú₄ gu₃, a₂dse₃ quiánꞌ₂ ꞌniaꞌ₂, a₂ꞌë́₄ jniá₂ liaꞌ₂ qui₂rë₂ꞌŋia₅ jág₁ quióꞌ₅,
26 co₂ꞌnióꞌ₄ le₃juaꞌ₅₄, jág₁ a₂tsá₃ jme₁ca₂rë₃jniá₂ a₂jme₁rë₂ꞌma₄ quióꞌ₅ Diú₄ ca₂le₃ ma₂lɨ́gꞌ₂ lɨn₃ ma₂qui₂ma₂ŋɨ́₂ juɨn₅ lɨn₃ tsɨ₁jon₂ dsa₂ në́₃. La₁ rë₂në́₃ ma₂cuë₃ a₂le₃cuɨ́ꞌ₅ dsa₂ i₂lë́₅ ꞌí₁e quiáin₅.
27 Ja₁con₂ dsa₂ quiáin₅ ꞌéi₂ bá₄ ca₂rë₃ꞌŋió₃ dsɨ́₅ Diú₄ ca₂jmo₃ a₂le₃cuɨ́ꞌ₅ dsɨ₂nau₂ ꞌe₂ jaun₂ a₂jláꞌ₁ lɨn₃ jág₁ a₂jme₁rë₂ꞌma₄ jaun₂: co₂ꞌnióꞌ₄ le₃juaꞌ₅₄, ꞌen₅₄ bá₄ Cristo jë₄ quiánꞌ₂ ꞌniaꞌ₂, ꞌéi₂ bá₄ lɨ́n₅ i₂ꞌɨ́n₂ ꞌauꞌ₂ ja₁dse₃ ja₁jláꞌ₁ a₂guéiꞌ₁ ꞌniaꞌ₂.
28 Jniaꞌ₅₄ në́₃ qui₂ꞌë́₅ jág₁ a₂ꞌɨ́n₅ ꞌéi₂, le₂jan₂ le₂jan₂ dsa₂ qui₂tioinꞌ₂ jniaꞌ₅₄ jág₁, le₂jan₂ le₂jan₂ bá₄ dsa₂ qui₂jme₂tɨ́in₁ ia₁jaun₂ le₃ŋɨ́iꞌ₂, ia₁jaun₂ lé₂ jme₁jnia₅ jniaꞌ₅₄ le₂jan₂ le₂jan₂ dsa₂ a₂ma₂lɨ́in₅ dsa₂ ma₂ron₂ le₃quióꞌ₅ Cristo.
29 ꞌUɨg₅₄ jaun₂ bá₄ në́₃, jmo₅ jniá₂ ta₁, quɨ́nꞌ₅ jniá₂ bí₂ liaꞌ₂ conꞌ₂ lë́₅ ta₁ bén₂ a₂jmo₅ ꞌéi₂ ja₁cong₂.