Si₂ carta le₂ꞌuɨg₅₄ a₂ca₂jmo₃ San Pablo ne₄ dsa₂
TESALONICENSES
Pablo quiainꞌ₅₄ rɨinꞌ₅₄ jmo₂₃ si₂ a₂chein₃ ne₄ Guáꞌ₅ i₂chan₂ juɨg₂ Tesalónica
1
Jniá₂ Pa₄, quianꞌ₅₄ Silvano,a Timoteo në́₃, jmo₂₃ si₂ la₂ a₂dsiangꞌ₅₄ ne₄ dsa₂ i₂ma₂ꞌén₂ le₃quióꞌ₅ Jesús, i₂chan₂ juɨg₂ Tesalónica, dsa₂ i₂ꞌei₅ caun₂ jág₁ quianꞌ₅₄ Diú₄, quianꞌ₅₄ Te₁guiꞌ₅₄ Jesucristo në́₃. Juɨ₁jme₂guꞌ₅₄ Diú₄ ꞌniaꞌ₂. Juɨ₁ꞌei₅ bá₄ tei₄ tionꞌ₅₄ ꞌniaꞌ₂ quianꞌ₅₄ ꞌéiꞌ₃ quióꞌ₅ Diú₄ Jmei₂ jniog₄, quianꞌ₅₄ ꞌéiꞌ₃ quióꞌ₅ Te₁guiꞌ₅₄ Jesucristo në́₃.
Cha₂ léi₄ ja₁con₂ dsa₂ chan₂ Tesalónica ia₁ a₂ꞌéin₂
2 Ca₂le₃jë́₃ jmɨg₄ bá₄ cuë₂ jniaꞌ₅₄ ti₁ꞌmagꞌ₄ Diú₄ o₄quiánꞌ₂ ꞌniaꞌ₂ ca₂le₃jɨ́ngꞌ₃. Jë₁ma₂të́₂ rë₁chi₁lenꞌ₄ jniaꞌ₅₄ Diú₄, dsauꞌ₂ bá₄ dsɨ₅ jniaꞌ₅₄ ꞌniaꞌ₂.
3 Dsauꞌ₂ bá₄ dsɨ₅ jniaꞌ₅₄ ꞌniaꞌ₂ ne₄ Diú₄ Jmei₂ jniog₄, ia₁ ꞌŋio₅ lɨn₃ ma₂jmoꞌ₅₄ ꞌniaꞌ₂ ta₁ cha₂ léi₄ ja₁conꞌ₂ ꞌniaꞌ₂ ia₁ ꞌéngꞌ₂, ia₁ ꞌŋio₅ lɨn₃ jme₂tiꞌ₅₄ ꞌniaꞌ₂ ta₁ ne₄ Te₁guiꞌ₅₄ ꞌuɨg₅₄ ia₁ a₂ꞌnióiꞌ₃ ꞌniaꞌ₂. Jaun₂ caun₂ bá₄ le₁ꞌág₄ ꞌauꞌ₂ ꞌniaꞌ₂ a₂ꞌɨ́n₂ ꞌauꞌ₂ le₃quióꞌ₅ Te₁guiꞌ₅₄ Jesucristo quián₂ jniog₄.
4 Rɨnꞌ₅₄ jniog₄, ꞌnio₃ bá₄ Diú₄ ꞌniaꞌ₂, ne₄ bá₄ jniaꞌ₅₄ a₂ma₂quióinꞌ₂ ꞌniaꞌ₂.
5 Liaꞌ₂ conꞌ₂ jme₁ca₂jme₁tɨn₅ jniaꞌ₅₄ ꞌniaꞌ₂ jág₁ dse₃, on₃juaꞌ₅₄ jmáꞌ₃ quianꞌ₅₄ jág₁ jaun₂ jme₁né₄. Ia₁ jme₁quianꞌ₅₄ bá₄ juɨ₅bí₂ quióꞌ₅ Jme₂dsí₂ Jŋió₅ ján₃, ca₂ꞌë́₄ jág₁ dse₃ la₂ jɨnꞌ₄ ꞌniaꞌ₂. Jaun₂ caun₂ bá₄ ꞌei₅ dsɨ₅ jniaꞌ₅₄ ia₁ Jme₂dsí₂ Jŋió₅ bá₄ jmo₃ jme₃ꞌuá₂ ꞌauꞌ₂ ꞌniaꞌ₂ a₂le₃ꞌéngꞌ₂. Ŋiꞌ₅₄ bá₄ ꞌniaꞌ₂ dse₃ ꞌa₂ liaꞌ₂ ca₂tióꞌ₄ jniaꞌ₅₄ jɨnꞌ₄ ꞌniaꞌ₂ a₂dse₃ quiánꞌ₂ bá₄ ꞌniaꞌ₂ jaun₂.
6 ꞌNiaꞌ₂ në́₃, ca₂quianꞌ₂ ꞌniaꞌ₂ juɨ₅ a₂ca₂quián₁ jniaꞌ₅₄, a₂ca₂can₃ Te₁guiꞌ₅₄ në́₃. Ca₂gueꞌ₅₄ bá₄ ꞌniaꞌ₂ a₂ꞌŋio₂ ꞌauꞌ₂ jág₁ dse₃. Chanꞌ₂ bá₄ ꞌniaꞌ₂ o₂ꞌŋió₃ o₂jŋia₃ ꞌauꞌ₂ a₂jmo₅ Jme₂dsí₂ quián₅ Diú₄, tsá₃ a₂nag₅₄ jaun₂ ca₂quɨ́n₂ a₂ca₂i₃ŋɨ́ꞌ₂ ꞌniaꞌ₂ uɨg₅ ꞌŋio₅ lɨn₃ ꞌuɨg₅₄ jág₁ dse₃.
7 Jaun₂ le₂në₅ bá₄ ca₂dsi₃nóꞌ₅ ꞌniaꞌ₂ ca₂cuëꞌ₅₄ ꞌniaꞌ₂ caun₂ juɨ₅ dse₃ jaun₂ ca₂cáun₃ ꞌí₁ ca₂le₃jɨ́n₃ dsa₂ i₂ꞌén₂ le₂tan₅₄ juɨg₂ te₁ꞌi₁ ꞌuë₃ Macedonia quianꞌ₅₄ le₂tan₅₄ ꞌuë₃ Acaya në́₃.
8 Jaun₂ le₂në₅ ma₂ca₂ꞌëꞌ₅₄ ꞌniaꞌ₂ dsa₂ jág₁ dse₃ quióꞌ₅ Te₁guiꞌ₅₄, on₃juaꞌ₅₄ jmáꞌ₃ dsa₂ chan₂ Macedonia quianꞌ₅₄ Acaya ma₂qui₂ma₂ꞌëꞌ₅₄ ꞌniaꞌ₂ jág₁, ia₁ ca₂le₂con₂ ja₁siáꞌ₂ bá₄ ján₃ le₁ŋi₅ dsa₂ a₂lɨ́nꞌ₂ ꞌniaꞌ₂ dsa₂ i₂ꞌén₂ quián₅ Diú₄. Jaun₂ tsá₃ ma₃ꞌe₂ juaꞌ₅₄ ꞌnióꞌ₅ guë́₄ chei₅₄ jniaꞌ₅₄ ꞌi₁caun₂ ꞌniaꞌ₂.
9 Të₂le₃ dsia₅ bá₄ ꞌéi₂ guioin₅₄ a₂ca₂gueiꞌ₅₄ ꞌniaꞌ₂ dse₃ jniaꞌ₅₄, dsia₂₃ ꞌa₂ liaꞌ₂ ca₂tíꞌ₃ a₂jme₁ꞌéngꞌ₂ të₂le₃ quióꞌ₅ diú₄ lag₄, a₂ca₂rë₃ꞌénꞌ₂ ꞌniaꞌ₂ të₂le₃ quióꞌ₅ Te₁guiꞌ₅₄, ca₂jme₁tiꞌ₄ ne₄ Diú₄ jénꞌ₃ dsónꞌ₂ i₂chan₂.
10 Dsia₂₃ bá₄ ján₃ ꞌa₂ liaꞌ₂ tionꞌ₅₄ ꞌniaꞌ₂ le₁janꞌ₄ a₂jŋióꞌ₂ táng₃ juɨ₅ gueiꞌ₅₄ i₂juɨ́g₃ Jesús Ja₁ŋiꞌ₅₄ Diú₄ i₂ca₂jme₃jeinꞌ₅₄ jɨn₄ ꞌlag₄. I₂ꞌéi₂ bá₄ lió₂ jniog₄ ne₄ a₂ꞌi₄ ꞌnei₂ dsɨ́₅ Diú₄.