Ta₁ a₂ca₂jmo₃ Pablo juɨg₂ Tesalónica
2
Ia₁ ŋiꞌ₅₄ bá₄ ꞌniaꞌ₂ guiongꞌ₅₄, rɨnꞌ₅₄ jniog₄, tsá₃ juaꞌ₅₄ a₂lë₁ca₂i₁náu₄ jniaꞌ₅₄ ca₂i₁jɨn₁ ꞌniaꞌ₂.
2 Ia₁ ma₂ŋiꞌ₅₄ bá₄ ꞌniaꞌ₂, të₂le₃ ca₂jme₃ꞌo₅₄ bá₄ Diú₄ ca₂nio₃ tiá₂ dsɨ₅, ca₂ꞌë́₄ jniaꞌ₅₄ ja₁conꞌ₂ ꞌniaꞌ₂ jág₁ dse₃ a₂lión₂ dsa₂, o₁jŋiaꞌ₅₄ ca₂jmógꞌ₂ dsa₂ ca₂të₂ca₂ꞌoꞌ₂ juɨg₂ Filipos le₂jŋiá₅.
3 Ia₁ jág₁ a₂ca₂tionꞌ₅₄ jniaꞌ₅₄ ꞌniaꞌ₂, on₃juaꞌ₅₄ a₂já₃ ꞌuɨg₅₄ ia₁ a₂i₂gon₂ jniaꞌ₅₄, on₃ guëꞌ₂ o₄quióꞌ₄ ia₁ a₂dsɨ₂jŋia₅ dsɨ₅ a₂ꞌlɨgꞌ₅₄, on₃ guëꞌ₂ juaꞌ₅₄ ia₁ a₂jme₂gán₁ jniaꞌ₅₄ ꞌniaꞌ₂.
4 Të₂le₃ ia₁ Diú₄ bá₄ ca₂cáun₃ ꞌí₁ a₂jmo₂ jniaꞌ₅₄, ca₂dsia₃ gu₂ jniaꞌ₅₄ a₂qui₁ꞌë́₄ jág₁ dse₃. Jaun₂ le₂në₅ juɨ₁liaꞌ₂ jág₁ a₂juaꞌ₂ jniaꞌ₅₄, on₃juaꞌ₅₄ a₂juaꞌ₂ ia₁jaun₂ ꞌŋio₂ dsɨ́₅ dsa₂ mɨ₂güɨ́g₃, të₂le₃ ia₁jaun₂ ꞌŋio₂ dsɨ́₅ Diú₄ bá₄ i₂con₂ ꞌí₁ të₂dsɨ₅ jniog₄.
5 Ŋiꞌ₅₄ bá₄ ꞌniaꞌ₂, ꞌi₁cónꞌ₂ tsá₃ juaꞌ₅₄ ca₂dsiá₁ jniaꞌ₅₄ jág₁ rau₂, on₃ guëꞌ₂ juaꞌ₅₄ ca₂ꞌmá₂ jniaꞌ₅₄ jág₁ a₂tsá₃ dsi₂ten₅₄ ꞌmá₂ ia₁jaun₂ léi₂ cu₄. Jág₅ bá₄ Diú₄ ca₂le₃jë́₃ a₂ca₂jmó₁.
6 Tsá₃ a₂jaun₂ ꞌniog₂ jniaꞌ₅₄ juaꞌ₅₄ a₂jme₃juagꞌ₂ dsa₂ ꞌŋio₅ lɨn₃, on₃ guëꞌ₂ ꞌniaꞌ₂, on₃ guëꞌ₂ dsa₂ siánꞌ₂ në́₃, o₁jŋiaꞌ₅₄ jme₁ca₂tág₂ rëꞌ₂ jniaꞌ₅₄ jmó₁ ꞌéiꞌ₃ jaun₂ ia₁ a₂lág₅ dsa₂ i₂chen₄ quián₅ Cristo.
7 Të₂le₃ ca₂jmó₁ bá₄ jniaꞌ₅₄ ꞌua₁ dsɨ₅ ja₁conꞌ₂ ꞌniaꞌ₂, juɨ₁liaꞌ₂ lɨ́n₅ jan₂ chog₅₄ chiꞌ₂, a₂jme₂cainꞌ₅₄ chiꞌ₂ quiáin₅ qui₂jmo₂₃ ꞌí₁.
8 Jaun₂ lë₃ ꞌŋio₅ lɨn₃ ca₂rë₃ꞌnio₃ jniaꞌ₅₄ ꞌniaꞌ₂, ca₂liaꞌ₂ jŋiaꞌ₅₄ on₃juaꞌ₅₄ jmáꞌ₃ jág₁ dse₃ quióꞌ₅ Diú₄ në₅ ca₂tág₂ jniaꞌ₅₄ cuë́₁, le₂jiog₅ jme₂dsí₂ quián₂ jniaꞌ₅₄ ꞌŋio₂ dsɨ₅ cuë₁ ján₃. Ia₁ ma₂dsi₂nóꞌ₅ ꞌniaꞌ₂ léngꞌ₂ dsa₂ i₂ꞌnió₄ lɨn₃ quián₂ jniaꞌ₅₄.
9 Juaꞌ₂ jniaꞌ₅₄ le₂në₅, rɨnꞌ₅₄ jniog₄, ia₁jaun₂ dsá₂ bá₄ ꞌauꞌ₂ ꞌniaꞌ₂ ꞌa₂ liaꞌ₂ ca₂jmó₁ jniaꞌ₅₄ ta₁ a₂ca₂lag₃ a₂que₅₄. Liaꞌ₂ ꞌuë₂-jmɨ₂ bá₄ qui₂ca₂jmó₁ jniaꞌ₅₄ ta₁, ia₁jaun₂ ꞌi₁janꞌ₂ ꞌniaꞌ₂ tsá₃ juaꞌ₅₄ ꞌein₂ ꞌŋio₅ guei₂ ca₂can₃ quianꞌ₅₄ jniaꞌ₅₄, të₁liaꞌ₂ ca₂tióꞌ₄ ca₂ꞌë́₄ jág₁ dse₃ quióꞌ₅ Diú₄.
10 Ca₂të́₂ bá₄ neꞌ₅₄ ꞌniaꞌ₂, jág₅ bá₄ Diú₄ ján₃, ca₂tióꞌ₄ jniaꞌ₅₄ quianꞌ₅₄ ꞌniaꞌ₂ dsa₂ i₂ꞌén₂, a₂lág₅ jniaꞌ₅₄ dsa₂ jŋió₅, dsa₂ dsen₃, i₂tsá₃ ꞌein₂ lé₂ le₃bógꞌ₂ dso₄.
11 Ŋiꞌ₅₄ bá₄ ꞌniaꞌ₂ ján₃, ca₂jmó₁ jniaꞌ₅₄ jɨnꞌ₄ ꞌniaꞌ₂ juɨ₁liaꞌ₂ jmo₅ jan₂ jmei₂ dsa₂ jmáiꞌ₂ chiꞌ₂ quiáin₅, qui₂ca₂cuë₅₄ jniaꞌ₅₄ bí₂ ꞌniaꞌ₂, ca₂tionꞌ₅₄ jniaꞌ₅₄ jág₁ ꞌniaꞌ₂ jaun₂ náuꞌ₁ tiá₂ juɨ₅ dse₃.
12 Jaun₂ qui₂ma₂chei₅₄ bá₄ jniaꞌ₅₄ ꞌniaꞌ₂ a₂i₁niogꞌ₄ liaꞌ₂ conꞌ₂ dsi₂ten₅₄ i₂nio₄ dsa₂ quián₅ Diú₄ i₂të́₂ a₂jme₁quiainꞌ₄ ꞌniaꞌ₂ ja₁jmo₂₃ ꞌéiꞌ₃ gueiꞌ₅₄ i₂juɨ́g₃ ja₁lë́₄ co₂tág₅ co₂ꞌnéꞌ₅ quióꞌ₅.
13 Jaun₂ lë₃, ca₂le₃jë́₃ jmɨg₄ bá₄ cuë₂ jniaꞌ₅₄ ti₁ꞌmagꞌ₄ Diú₄. Ia₁ le₂ꞌuɨg₅₄ jme₁ca₂neiꞌ₂ ꞌniaꞌ₂ jág₁ dse₃ quióꞌ₅ Diú₄ a₂ca₂juaꞌ₅₄ jniaꞌ₅₄, ca₂gueꞌ₅₄ bá₄ ꞌniaꞌ₂ conꞌ₂ lë́₅ jág₁ dse₃ quióꞌ₅ Diú₄, on₃juaꞌ₅₄ conꞌ₂ lë́₅ jág₁ quióꞌ₅ dsa₂ mɨ₂güɨ́g₃. Ia₁ dsónꞌ₂ bá₄ jág₁ dse₃ quióꞌ₅ Diú₄ në₅, a₂jmo₃ léi₄ të₂ꞌauꞌ₂ ꞌniaꞌ₂ dsa₂ i₂ꞌén₂.
14 Rɨnꞌ₅₄ jniog₄, liaꞌ₂ conꞌ₂ ca₂ŋagꞌ₅₄ ꞌniaꞌ₂ uɨg₅ qui₂ca₂ꞌein₃ dsa₂ goꞌ₄ ꞌniaꞌ₂, ca₂i₃ŋɨ́ꞌ₂ ꞌniaꞌ₂ juɨ₁liaꞌ₂ ca₂jmáꞌ₂ dsa₂ guáꞌ₅ quián₅ Diú₄ i₂tiánꞌ₅ Judea i₂ma₂lɨ́n₅ quián₅ Cristo Jesús. Le₂jaun₂ bá₄ ca₂qui₂co₂ꞌein₃ dsa₂ judíos* dsa₂ go₅₄.
15 Dsa₂ judíos ꞌéi₂ bá₄ i₂ca₂jŋɨꞌ₃ Te₁guiꞌ₅₄ Jesús, i₂ca₂jme₃dsian₅ dsa₂ i₂chen₄ quián₅ Diú₄ në́₃. Jaun₂ ca₂ꞌuágꞌ₂ bá₄ jniaꞌ₅₄. Tsá₃ ꞌnioi₃ Diú₄. ꞌŊiai₅₄ bá₄ ca₂le₃jɨ́n₃ dsa₂.
16 Cha₂ jme₁lɨn₅₄ ꞌniog₂ jniaꞌ₅₄ chei₅₄ jág₁ dsɨ₂nau₂, ia₁jaun₂ lión₂ ꞌéi₂ ján₃. La₁ ꞌéi₂ bá₄ jné₅ juɨ₅. Jaun₂ le₂në₅ caun₂ dsɨ₂juëꞌ₂ bá₄ dsáu₁. Co₂ŋeiꞌ₅₄ ma₂já₅ a₂ꞌi₄ ꞌnei₂ dsɨ́₅ Diú₄ ja₁coin₂.
Dsɨ₂jiog₅ dsɨ́₅ Pablo dsó₃ táng₃ juɨ₅ Tesalónica
17 Rɨnꞌ₅₄ jniog₄, liaꞌ₂ conꞌ₂ jme₁ca₂tén₄ co₂ꞌna₂ rɨnꞌ₅₄, o₁jŋiaꞌ₅₄ tsá₃ né₅ jniaꞌ₅₄ ꞌniaꞌ₂, la₁ tion₅₄ bá₄ jme₁dsauꞌ₂ dsɨ₅ jniaꞌ₅₄, ꞌŋio₅ lɨn₃ jme₁ꞌniog₂ jniaꞌ₅₄ dsau₅₄ táng₃ dsɨ₁né₄ ꞌniaꞌ₂.
18 Jaun₂ dsónꞌ₂ bá₄ jme₁ꞌniog₂ jniaꞌ₅₄ dsau₅₄ dsɨ₁jɨn₁ ꞌniaꞌ₂. Jniá₂ Pa₄ ꞌlióng₂ ráun₂ jme₁ca₂quɨ́nꞌ₃ bí₂ a₂nei₅₄. La₁ i₂së₃dsen₃ bá₄ ca₂jné₃ juɨ₅.
19 Jaun₂ ¿ꞌe₂ jaun₂ a₂ꞌɨ́n₂ dsɨ₅ jniaꞌ₅₄ chong₂, a₂jmo₅ jniaꞌ₅₄ ꞌioꞌ₂, o₃ premio o₄quióꞌ₄ a₂jmó₁ jniaꞌ₅₄ táuꞌ₅ jë₁ma₂të́₂ rë₁guanꞌ₂ Jesús Te₁guiꞌ₅₄ quián₂? ¿On₁juaꞌ₅₄ o₄quiánꞌ₂ ꞌniaꞌ₂ bá₄?
20 ꞌUɨg₅₄ quiánꞌ₂ ꞌniaꞌ₂ bá₄ ŋɨ́₄ ꞌioꞌ₂ jein₅ jniaꞌ₅₄; o₄quiánꞌ₂ ꞌniaꞌ₂ bá₄ jme₂go₃ dsa₂ siánꞌ₂ në́₃