3 Rɨnꞌ₅₄ jniog₄, ca₂le₃jë́₃ jmɨg₄ bá₄ ca₂tág₂ jniaꞌ₅₄ cuëꞌ₅₄ ti₁ꞌmagꞌ₄ Diú₄ o₄quiánꞌ₂ ꞌniaꞌ₂, ia₁ le₂jaun₂ bá₄ dse₃ dsióg₅, ia₁ caun₂ dsɨ₂cónꞌ₃ bá₄ ꞌniaꞌ₂ a₂rë₂ꞌéngꞌ₂ jág₁ quióꞌ₅ Diú₄, caun₂ jme₂ꞌniógꞌ₃ bá₄ ꞌniaꞌ₂ rɨ́ngꞌ₂ ꞌŋio₅ lɨn₃ le₂jangꞌ₂ le₂jangꞌ₂.

4 Jaun₂ lë₃, jmáꞌ₃ liaꞌ₂ jág₁ dse₃ bá₄ dsia₂ jniaꞌ₅₄ ꞌɨ́n₅ ꞌniaꞌ₂ jɨn₄ guáꞌ₅ quián₅ Diú₄, ꞌa₂ liaꞌ₂ ma₂ca₂tianꞌ₃ ꞌniaꞌ₂ a₂ma₂ca₂jme₁juɨngꞌ₂ ꞌauꞌ₂ a₂ꞌénꞌ₂ ꞌniaꞌ₂ ne₄ ca₂le₃jë́₃ a₂co₂ꞌein₅ dsa₂, a₂qui₂jmógꞌ₂ dsa₂ në́₃.

5 Jaun₂ le₂në₅ cuë₅ léi₄, conꞌ₂ dsi₂ten₅₄ bá₄ qui₂dsɨ₅ Diú₄ ꞌéiꞌ₃, ia₁jaun₂ lénꞌ₂ ꞌniaꞌ₂ dsa₂ i₂ca₂tɨ́nꞌ₂ dsi₁niogꞌ₃ ja₁gon₂ Diú₄; o₄quióꞌ₄ a₂jaun₂ ŋagꞌ₅₄ ꞌniaꞌ₂ uɨg₅.

6 Ján₃ bá₄ le₂jaun₂ dsi₂ten₅₄, Diú₄ bá₄ jme₃rë́₃ cuë́ꞌ₃ uɨg₅ a₂ca₂tɨ́n₂ dsa₂ i₂ma₂jmáꞌ₂ ꞌniaꞌ₂.

7 Jaun₂ ꞌniaꞌ₂ dsa₂ i₂qui₂ma₂ŋagꞌ₅₄ uɨg₅, Diú₄ jmo₃ a₂ꞌag₃ tei₄ ꞌauꞌ₂ ꞌniaꞌ₂, a₂ꞌag₃ tei₄ dsɨ₅ jniaꞌ₅₄ ján₃ jë₁ma₂të́₂ rë₁jŋióꞌ₂ Te₁guiꞌ₅₄ Jesús juɨ₅ gueiꞌ₅₄ i₂juɨ́g₃ jë₄ si₂ ca₂joꞌ₅₄, quiainꞌ₅₄ ángeles i₂ꞌuanꞌ₂ quiáin₅.

8 Jŋióiꞌ₂ a₂cuë́ꞌ₃ uɨg₅ dsa₂ i₂tsá₃ cuɨn₅ Diú₄, ia₁ on₃ guëꞌ₂ juɨ₅ ca₂tónꞌ₃ jág₁ dse₃ quióꞌ₅ Te₁guiꞌ₅₄ Jesucristo.

9 Ca₂le₃jɨ́n₃ ꞌéi₂ gue₃ ꞌliainꞌ₅₄ a₂dsɨ₃ꞌéin₂ co₂ŋeiꞌ₅₄, co₂dsia₅ jŋiaiꞌ₃ ne₄ Te₁guiꞌ₅₄, dsɨ₃toinꞌ₅₄ uɨ́ng₂ ja₁tsá₃ ma₃ꞌe₂ bí₂ jláꞌ₁ quióꞌ₅ Diú₄ jniá₂.

10 Jmɨg₄ jaun₂, jë₁ma₂të́₂ rë₁guanꞌ₂ Te₁guiꞌ₅₄, a₂jme₃juagꞌ₂ ca₂le₃jɨ́n₃ dsa₂ i₂ꞌén₂ quiáin₅,^b jaun₂ dsa₂ i₂ꞌén₂ në́₃ qui₂dsɨ₃góꞌ₃ dsɨ́₅ jág₃ jɨ́in₂ Te₁guiꞌ₅₄. Ján₃ bá₄ o₁tonꞌ₄ ꞌniaꞌ₂ ja₁jaun₂, ia₁ a₂ma₂ca₂rë₃ꞌénꞌ₂ ꞌniaꞌ₂ jág₁ dsau₅ quián₂ jniaꞌ₅₄.

11 ꞌUɨg₅₄ jaun₂ bá₄ ján₃, chi₂lenꞌ₄ jniaꞌ₅₄ Diú₄ ca₂le₃jë́₃ jmɨg₄ o₄quiánꞌ₂ ꞌniaꞌ₂, juɨ₁i₂nioꞌ₄ ꞌniaꞌ₂ conꞌ₂ dsi₂ten₅₄ i₃nio₄ dsa₂ i₂ma₂të́ꞌ₃ quiáin₅; juɨ₁jme₂ti₃ të₂le₃ quianꞌ₅₄ bí₂ quióꞌ₅ ca₂le₃jë́₃ a₂dse₃ a₂ꞌŋio₂ ꞌauꞌ₂ ꞌniaꞌ₂ jmóꞌ₂, quianꞌ₅₄ ca₂le₃jë́₃ ta₁ a₂jmoꞌ₂ ꞌniaꞌ₂ ia₁ a₂ꞌéngꞌ₂.

12 Jaun₂ le₂në₅ bá₄ lé₂ le₃juɨnꞌ₂ Te₁guiꞌ₅₄ Jesucristo quián₂ ja₁conꞌ₂ ꞌniaꞌ₂, ján₃ bá₄ le₂jaun₂ ꞌniaꞌ₂ ja₁con₂ ꞌéi₂, liaꞌ₂ conꞌ₂ lë́₅ a₂ꞌua₁ dsɨ́₅ Diú₄ quianꞌ₅₄ Te₁guiꞌ₅₄ Jesucristo.