3 Juɨ₁liaꞌ₂ ca₂juáꞌ₃ jniá₂ néꞌ₃ a₂nei₅₄ juɨ₅ ꞌuë₃ Macedonia, a₂janꞌ₅₄ juɨg₂ Efeso ia₁jaun₂ juɨgꞌ₅₄ dsa₂ i₂lɨn₅₄ a₂tsá₃ jme₃tag₂₃ juáꞌ₅ a₂tsá₃ dsau₅,

4 on₃ guëꞌ₂ tónꞌ₃ juɨ₅ ꞌe₂ jág₁ a₂lë₁dsia₅ dsa₂, o₃ a₂ꞌɨn₅ dsa₂ dsa₂ canꞌ₅₄ i₂jme₁chan₂ ma₂lɨ́gꞌ₂, jág₁ a₂tsá₃ lɨ́gꞌ₂ jmɨg₄ dsian₅. Jŋiaꞌ₅₄ conꞌ₂ dsiog₅ mɨꞌ₅₄ a₂tsɨn₅ dsa₂, ꞌnióꞌ₄ a₂jme₁jme₃ꞌo₅₄ a₂le₃tei₅₄ jniog₄ ta₁ quióꞌ₅ Diú₄, a₂lë₂ të₂le₃ quianꞌ₅₄ a₂ꞌén₂ dsa₂.

5 Jë₁ma₂le₁jë́₃ të₂dsɨ₅ jniog₄ guio₅₄, léi₄ bá₄ jniog₄ të₂dsɨ₅ ꞌe₂ a₂dse₃ a₂ca₂tág₂ jniog₄ jmó₁, on₃juaꞌ₅₄ a₂lë₁jmo₂ a₂ꞌéin₂ në́₃, jaun₂ guë́₄ lé₂ le₃jiá₃ lé₂ të₂dsɨ₅ jniog₄ a₂jme₁ꞌnio₃ rɨnꞌ₅₄ le₂jau₂ le₂jau₂. Ta₁ jaun₂ quíꞌ₅ ꞌéiꞌ₃ la₂.

6 Ia₁ i₂lɨn₅₄ dsa₂ ma₂i₂léin₂ të₂le₃ cau₅ ma₂i₂cóinꞌ₅ juɨ₅ quianꞌ₅₄ jág₁ a₂tsá₃ ta₁ tí₄.

7 ꞌNio₃ léin₂ të₅juáꞌ₅, la₁ jŋiaꞌ₅₄ guioin₅₄ bá₄ tsá₃ ŋɨ́iꞌ₂ ꞌe₂ juáꞌ₂ a₂jme₂tɨin₂₃ dsa₂, ŋag₅₄ rëꞌ₂ ꞌei₅ caun₂ dsɨ́₅, në₂jag₄ bá₄ a₂dsau₅ dsónꞌ₂ a₂jme₂tag₂₃.

8 Ma₂ne₄ bá₄ jniog₄ a₂dse₃ bá₄ ꞌÉiꞌ₃ në₁juaꞌ₂ ca₂jmóꞌ₂ dsa₂ ta₁ conꞌ₂ dsi₂ten₅₄.

9 Ma₂ne₄ jniog₄, ꞌi₁caun₂ ꞌéiꞌ₃ tsá₃ ca₂quiog₂ Diú₄ quióꞌ₅ dsa₂ dsen₃. O₄quióꞌ₄ i₂jmo₅ ꞌlɨgꞌ₅₄ bá₄ ca₂quiog₂ ꞌÉiꞌ₃: o₄quióꞌ₄ juɨ₁liaꞌ₂ dsa₂ i₂tsá₃ nag₃, dsa₂ i₂ꞌno₅ dso₄, dsa₂ i₂tsá₃ jme₂gan₃ Diú₄, i₂tsá₃ jme₂góꞌ₃ Juáꞌ₅, dsa₂ i₂jme₂dsian₅ chog₅₄-jmei₂, quióꞌ₅ ca₂le₃jɨ́n₃ dsa₂ i₂jme₂dsian₅ dsa₂ në́₃;

10 o₄quióꞌ₄ juɨ₁liaꞌ₂ dsa₂ i₂nióꞌ₅ jág₁ a₂tsá₃ dsi₂ten₅₄ nióꞌ₃, o₄quióꞌ₄ juɨ₁liaꞌ₂ dsa₂ ŋeꞌ₂ i₂nióꞌ₅ jág₁ ꞌlɨgꞌ₅₄ quianꞌ₅₄ dsa₂ ŋeꞌ₂ rɨnꞌ₅₄, o₄quióꞌ₄ dsa₂ i₂ꞌang₅ ꞌɨn₅ dsa₂, o₄quióꞌ₄ dsa₂ i₂jme₂gan₅ rɨnꞌ₅₄, o₄quióꞌ₄ dsa₂ i₂co₂jmo₅ jág₁ të₂jág₁ ꞌɨin₂₃ Diú₄, o₄quióꞌ₄ dsa₂ i₂jmo₅ juɨ₁ꞌe₂ guë́₄ cosa a₂tsá₃ lë́₅ conꞌ₂ lë́₅ juáꞌ₅ dse₃.

11 Juáꞌ₅ dse₃ la₂, co₂rë₂ bá₄ quɨn₅ quianꞌ₅₄ jág₁ jláꞌ₁ a₂tɨ́nꞌ₄ dsa₂, a₂ca₂dsia₃ Diú₄ Jŋió₅ o₄gu₃ jniá₂.

12 Cuë́₅ jniá₂ ti₁ꞌmagꞌ₄ Te₁guiꞌ₅₄ Jesucristo quián₂ jniog₄, ia₁ qui₂ma₂cuë₃ bí₂ jmo₅ jniá₂ ta₁ la₂ quióꞌ₅ a₂ma₂dsia₃ gu₃, tonꞌ₂ ia₁ jág₂ bá₄ jniá₂ liaꞌ₂ ja₁jɨ́in₂ jan₂ dsa₂ i₂rë₂tiꞌ₅₄.

13 Ca₂jmo₃ Cristo ca₂le₃jë́₃ në₅ ja₁con₂ jniá₂, o₁jŋiaꞌ₅₄ jme₁dsia₅ jniá₂ ꞌlɨgꞌ₅₄ jme₁ꞌɨ́in₅ le₂jŋiá₅, qui₂ca₂ꞌéng₃ dsa₂ i₂jme₁quiainꞌ₅₄, qui₂ca₂jmaiꞌ₄ jniá₂ tsau₂ dsɨ₃ në́₃. La₁ ca₂dsia₃ Te₁guiꞌ₅₄ ŋéi₂ dsɨ́₅ ja₁con₂ jniá₂ ia₁ a₂tsá₃ jme₁guion₄ bá₄ jniá₂ ꞌe₂ jme₁jmo₂₃ liaꞌ₂ conꞌ₂ tsá₃ jme₁ꞌéng₂.

14 Jaun₂ Te₁guiꞌ₅₄ quián₂ jniog₄ ꞌŋio₅ lɨn₃ ca₂jmo₃ ꞌua₁ dsɨ́₅ ja₁cong₂, a₂ca₂rë₃ꞌéng₂ le₃quióꞌ₅ Cristo Jesús i₂ꞌnio₃ guë́₄ lɨn₃.

15 Dsónꞌ₂ dsau₅ bá₄ jág₁ la₂, jaun₂ ca₂le₃jɨ́n₃ ꞌnióꞌ₅ le₃ꞌén₂: Ta₁ jaun₂ guan₃ Cristo Jesús mɨ₂güɨ́g₃ la₂, a₂qui₃lióin₂ dsa₂ i₂le₁cánꞌ₄ dso₄; jë₄ quióꞌ₅ ꞌéi₂, jniá₂ lɨ́ng₅ i₂le₂ꞌuɨg₅₄ i₂rë₂cánꞌ₄ guë́₄ dso₄.

16 La₁ Diú₄ ca₂dsia₃ ŋéi₂ dsɨ́₅ jniá₂, ia₁jaun₂ lén₂ jniá₂ i₂jángꞌ₃ jág₁ dsau₅ ꞌa₂ liaꞌ₂ dsia₅ Jesucristo ŋéi₂ dsɨ́₅ lióin₂ dsa₂ i₂ŋɨ́₄ rɨn₂ dso₄. Le₂jaun₂ bá₄ ma₂guio₃ jniá₂ quian₅₄ ne₄ juɨ₅ ia₁jaun₂ jág₃ ca₂le₃jɨ́n₃ dsa₂ i₂le₃ꞌén₂ të₂le₃ quióꞌ₅ Jesucristo ia₁jaun₂ le₃chain₂ co₂tan₅₄.

17 Jaun₂ lë₃, le₃quióꞌ₅ Rag₅₄ i₂chan₂ co₂tan₅₄, i₂tsá₃ lɨ́gꞌ₂ jmɨg₄ jón₂, on₃ guëꞌ₂ jniái₂, i₂jan₂ tan₅₄ Diú₄ i₂ŋɨ́ꞌ₂ dsɨ́₅: juɨ₁jme₂go₃ dsa₂, juɨ₁jme₂juagꞌ₂ dsa₂ ca₂le₃jë́₃ jmɨg₄ ŋi₂ a₂já₅. A₂méi₃*.

18 Jaun₂ ꞌne₂ Timoteo, jón₃ quiáng₃, ꞌéiꞌ₃ la₂ dsia₅ jniá₂ gogꞌ₂, liaꞌ₂ conꞌ₂ lë́₅ jág₁ dse₃ a₂ca₂cuë₃ Jme₂dsí₂ Jŋió₅ ca₂cuë́ꞌ₃ dsa₂ rɨnꞌ₅₄ jniog₄ i₂ca₂ꞌag₃ ca₂ꞌɨin₃ ꞌne₂ le₂jŋiá₅: jmo₄ dsen₅₄ ꞌauꞌ₂ a₂náuꞌ₁ tiá₂ a₂quɨ́ngꞌ₄ ne₄ ꞌnei₂ a₂gu₂dsí₂, të₂le₃ quianꞌ₅₄ jág₁ a₂ca₂cuë₃ dsa₂ jaun₂:

19 a₂chanꞌ₅₄ tiá₂ a₂ꞌéngꞌ₂, a₂tsá₃ ꞌe₂ ꞌlɨgꞌ₅₄ qui₂dsɨ₂jŋi₅ ꞌauꞌ₂ në́₃. I₂lɨn₅₄ dsa₂, ꞌuɨg₅₄ ia₁ a₂ca₂dsia₃ cau₅ a₂në₅ ca₂i₃ꞌén₂ a₂ꞌéin₂, në₂jag₄ bá₄ caun₂ nɨ₁barco a₂ca₂lë₃ le₁juɨg₁ le₁dsogꞌ₅₄ ne₄ jmɨ₁ŋíꞌ₄.

20 Le₂në₅ bá₄ ca₂i₃ŋɨ́₂ Himeneo quianꞌ₅₄ Alejandro i₂ma₂ca₂jɨnꞌ₄ jniá₂ ja₁con₂ i₂së₃dsen₃ ia₁jaun₂ le₃ꞌen₅₄ dsɨ́₅ a₂tsá₃ ma₃juáꞌ₂ ꞌlɨgꞌ₅₄ të₃ꞌoinꞌ₂ Diú₄.