Si₂ carta jë₁ca₂të́₂ tɨn₃ a₂ca₂jmo₃ San Pablo ne₄
TIMOTEO
Jmo₅ Pa₄ si₂ a₂chein₃ ne₄ Timoteo
1
Jniá₂ Pa₄, lɨ́ng₅ dsa₂ i₂chen₄* quián₅ Te₁guiꞌ₅₄ Jesucristo, cheng₅₄ conꞌ₂ në₅ ꞌnio₃ Diú₄ bá₄, conꞌ₂ lë́₅ jág₁ ca₂cuë₃ Diú₄ jniog₄ a₂le₃chong₂ të₂le₃ quianꞌ₅₄ Cristo Jesús.
2 Jmo₅ jniá₂ si₂ la₂ neꞌ₅₄ ꞌne₂ jón₃ quiáng₃ Timoteo, ꞌnio₃ jniá₂ juɨ₁changꞌ₂ bá₄ ŋéi₂ dsɨ́₅ Diú₄, juɨ₁jme₂guꞌ₅₄ bá₄, juɨ₁changꞌ₂ bá₄ ꞌei₅ tei₄, juɨ₁jmo₅₄ Diú₄ Jmei₂ jniog₄ quianꞌ₅₄ Te₁guiꞌ₅₄ Jesucristo quián₂.
ꞌA₂ liaꞌ₂ dsi₂ten₅₄ jángꞌ₃ dsa₂ jág₁ dsau₅ të₂le₃ quióꞌ₅ Cristo
3 Dsauꞌ₂ dsɨ₃ co₂tan₅₄ bá₄ ꞌne₂ jë₄ chi₂lengꞌ₅₄ Diú₄ liaꞌ₂ ꞌuë₂-jmɨ₂. Jaun₂ lë₃ cuë́₅ jniá₂ ti₁ꞌmagꞌ₄ jme₂tí₁ ta₁ ne₅₄ a₂ma₂le₁jë́₃ a₂qui₂dsɨ₂jŋi₅ të₂dsɨ₃ juɨ₁liaꞌ₂ ca₂jmo₃ dsa₂ canꞌ₅₄ quiáng₃ ma₂lɨ́gꞌ₂.
4 Ca₂le₃jë́₃ jmɨg₄ bá₄ dsauꞌ₂ dsɨ₃ liaꞌ₂ conꞌ₂ ca₂ꞌoꞌ₅₄ le₂jaun₂, jaun₂ jme₁ꞌnio₃ i₁jɨng₁₂ táng₃ ꞌne₂ ia₁jaun₂ jmo₅₄ ꞌioꞌ₂.
5 Dsauꞌ₂ bá₄ dsɨ₃, ia₁ ꞌéngꞌ₂ të₃dsónꞌ₂. Chi₁ꞌioꞌ₄ Loida quianꞌ₅₄ chogꞌ₂ Eunice, ján₃ bá₄ le₂në₅ ca₂rë₃ꞌéin₂ le₂ꞌuɨg₅₄. Jaun₂ të₃dsónꞌ₂ lɨ́n₂ jniá₂ ján₃ bá₄ le₂jaun₂ ꞌénꞌ₂ ꞌne₂.
6 Jaun₂ lë₃ juáꞌ₅ jniá₂, cuëꞌ₅₄ bí₂ ca₂le₃jë́₃ a₂ma₂cuë₃ Diú₄ të₂ꞌauꞌ₂, a₂lë́₅ liaꞌ₂ lë́₅ si₂ të₂ꞌauꞌ₂ a₂ca₂ŋɨgꞌ₂ liaꞌ₂ conꞌ₂ jme₁ca₂co₃ jniá₂ gu₃ ne₄ quiángꞌ₂.
7 Ia₁ on₃juaꞌ₅₄ jme₂dsí₂ i₂góꞌ₅ ma₂cuɨn₃ Diú₄ jniog₄. Jme₂dsí₂ ꞌéi₂ bá₄ ma₂cuɨin₃ i₂jmo₃ a₂nio₃ tiá₂ dsɨ₅ jniog₄, i₂jmo₃ a₂jme₁ꞌnió₄ jniog₄ rɨnꞌ₅₄, i₂jmo₃ a₂jme₂ꞌuán₄ dsɨ₅ guio₅₄.
8 Tsá₃ lë₁jmo₂ guengꞌ₅₄ ja₁jangꞌ₅₄ jág₁ dsau₅ o₄quióꞌ₄ Te₁guiꞌ₅₄ quián₂, on₃ guëꞌ₂ jmo₂ guengꞌ₅₄ o₄quió₃ jniá₂ ia₁ ꞌeng₅₄ néꞌ₃ ꞌmá₃ o₄quióꞌ₄ ꞌéi₂. Të₂le₃ guen₅₄ bá₄ ján₃ jë₂ jmɨ₁uɨg₅ a₂já₅ o₄quióꞌ₄ jág₁ dse₃, conꞌ₂ lë́₅ bí₂ a₂cuë₅ Diú₄
9 i₂ca₂lió₂ jniog₄ tonꞌ₂ ca₂të₃ ia₁jaun₂ le₃chong₂ jniog₄ jŋió₅. On₃juaꞌ₅₄ ia₁ cha₂ ꞌe₂ dse₃ ma₂jmó₁ jniog₄, ia₁ le₂në₅ ca₂lë₃ dsɨ́₅ ꞌŋiog₅ ca₂jmo₃ ꞌua₁ dsɨ́₅ ca₂rë₃ꞌnio₃ jniog₄ të₂le₃ ꞌuɨg₅₄ o₄quióꞌ₄ Cristo Jesús. Ia₁ le₂jaun₂ jme₁ma₂ꞌnio₃ bá₄ Diú₄ jniog₄ ca₂le₂jŋiá₅ liaꞌ₂ conꞌ₂ tsá₃ mɨ₂güɨ́g₃ ma₂jmo₃.
10 Diú₄ ma₂ca₂jme₃jnia₂₃ léi₄ ja₁con₂ dsa₂ mɨ₂güɨ́g₃, a₂ꞌnio₃, jme₁ca₂chein₃ Jesucristo i₂lió₂ quián₂ jniog₄, co₂dsia₅ ca₂ꞌéin₂ bí₂ a₂ꞌio₅ ꞌmú₃; tonꞌ₂ ca₂jme₃jnia₂₃ të₂le₃ quianꞌ₅₄ jág₁ dse₃, ꞌa₂ liaꞌ₂ le₃chan₂ dsa₂ co₂tan₅₄.
11 ꞌUɨg₅₄ jaun₂ ca₂rë₃ꞌɨ́n₁ jniá₂, ia₁jaun₂ qui₂i₁ꞌë́₃ jág₁ dse₃ la₂, a₂léng₂ jan₂ të₅ i₂chen₄ quiáin₅.a
12 ꞌUɨg₅₄ jaun₂ bá₄ a₂ŋag₅₄ ca₂le₃jë́₃ ne₅₄ uɨg₅ la₂. La₁ tsá₃ o₂guíꞌ₃ jéin₅ jniá₂, ia₁ guion₅₄ bá₄ ꞌein₂ të₂le₃ quióꞌ₅ ma₂ca₂ꞌag₃ caun₂ dsɨ₃, ꞌéng₂ bá₄ a₂ꞌio₅ ꞌéi₂ bí₂ a₂jmo₃ ꞌí₁ a₂le₃tei₅₄ jniá₂ ta₁ a₂ma₂ca₂dsia₃ gu₃,b ca₂liaꞌ₂ ca₂të́₂ jmɨg₄ jaun₂.
13 Caun₂ jmo₄ bá₄ juɨ₁liaꞌ₂ ma₂ca₂jme₁tɨng₂₃ ꞌne₂. Juɨ₁changꞌ₂ bá₄ ꞌéngꞌ₂, jme₁ꞌnió₄ rɨ́ngꞌ₂ le₃quióꞌ₅ Cristo Jesús.
14 Quianꞌ₅₄ bí₂ quióꞌ₅ Jme₂dsí₂ quián₅ Diú₄ i₂jiog₅ të₂dsɨ₅ jniog₄, jmo₄ ꞌí₁ a₂ma₂dsia₃ Diú₄ gogꞌ₂.
15 Ma₂ŋiꞌ₅₄ bá₄, ca₂le₃jɨ́n₃ bá₄ dsa₂ chan₂ ꞌuë₃ Asia ma₂ca₂téi₂ bá₄ jniá₂, i₂lɨn₅₄ ꞌéi₂ Figelo quianꞌ₅₄ Hermógenes në́₃.
16 Juɨ₁dsia₅₄ bá₄ Te₁guiꞌ₅₄ ŋéi₂ dsɨ́₅ ca₂le₃jɨ́n₃ dsa₂ dsi₂néi₂ quióꞌ₅ Onesíforo, ia₁ ꞌlióng₂ ráun₂ bá₄ ma₂guain₂₃ o₃jag₅₄ ca₂jmo₃ ca₂rë₃güɨgꞌ₂ jme₂dsí₂ quió₃. On₃juaꞌ₅₄ a₂jaun₂ guiꞌ₅₄ ja₃jag₅₄ ia₁ a₂ꞌeng₅₄ néꞌ₃ ꞌmá₃.
17 Të₂le₃ ca₂o₃ꞌniogꞌ₂ bá₄ jniá₂ jme₁guain₃ Roma*. Ca₂liaꞌ₂ ca₂dsáuꞌ₂ bá₄ ca₂jmo₃.
18 Juɨ₁dsia₅₄ bá₄ Te₁guiꞌ₅₄ ŋéi₂ dsɨ́₅ ja₁coin₂ jë₁ma₂të́₂ jmɨg₄ jaun₂. Dsá₂ bá₄ ꞌauꞌ₂ ꞌne₂, ca₂jme₃ꞌo₅₄ ꞌŋio₅ lɨn₃ jniog₄ liaꞌ₂ conꞌ₂ jme₁tioꞌ₅₄ juɨg₂ Efeso.