Si₂ carta a₂ca₂jmo₃ San Pablo ne₄
TITO
Jmo₅ Pa₄ si₂ a₂chein₃ ne₄ Tito
1
Jniá₂ Pa₄, lɨ́ng₅ dsa₂ i₂jme₂ti₃ ta₁ ne₄ Diú₄, lɨ́ng₅ jan₂ dsa₂ i₂chen₄* quián₅ Jesucristo ia₁jaun₂ le₃ꞌén₂ ca₂le₃jɨ́n₃ i₂ma₂quiónꞌ₂ Diú₄, ia₁jaun₂ le₃cuɨ́ꞌ₅ jág₁ tí₅ a₂jiog₅ juɨ₅ dse₃,
2 ia₁jaun₂ jmo₃ ꞌɨ́n₂ dsɨ́₅ ja₁le₃chain₂ co₂tan₅₄. Diú₄, i₂tsá₃ lé₂ le₃chain₂ të₂jɨ́n₁, ca₂cuë₃ jág₁ quióꞌ₅, a₂ca₂i₃jiog₅ dsɨ́₅ liaꞌ₂ conꞌ₂ néꞌ₃ guë́₄ a₂nio₃ mɨ₂güɨ́g₃, a₂le₃chong₂ jniog₄ co₂tan₅₄.
3 Në₃ guë́₄ në́₃, ca₂të́₂ jmɨg₄ a₂le₃ne₄ jniog₄ jág₁ dse₃ të₂le₃ quianꞌ₅₄ jág₁ a₂ꞌë́₄ jniá₂ a₂ma₂dsia₃ Diú₄ quián₂ i₂lió₂ o₄gu₃, liaꞌ₂ conꞌ₂ lë́₅ ꞌéiꞌ₃ quióꞌ₅.
4 Jmo₅ jniá₂ si₂ la₂ dsiangꞌ₅₄ neꞌ₅₄ ꞌne₂ Tito i₂lɨ́ngꞌ₅ co₂ꞌnióꞌ₄ jan₂ jón₃ quiáng₃ të₃dsónꞌ₂, ia₁ ꞌéin₂ jniog₄ le₃o₃. Juɨ₁jme₂guꞌ₅₄ Diú₄ ꞌne₂, juɨ₁ꞌei₅ tei₄ ꞌauꞌ₂, jmo₅ Diú₄ Jmei₂ jniog₄, jmo₅ Te₁guiꞌ₅₄ Jesucristo i₂ma₂ca₂lió₂ jniog₄ në́₃.
Ta₁ quióꞌ₅ Tito a₂jmo₃ ꞌuë₃ Creta
5 Ca₂dsián₃ jniá₂ ꞌne₂ ꞌuë₃ Creta ia₁jaun₂ jme₁rëꞌ₂ ꞌne₂ a₂ꞌnióꞌ₅ lé₂ guë́₄ dse₃, a₂dsiángꞌ₄ dsa₂ canꞌ₅₄a i₂nio₃ ne₄ jmo₃ ꞌí₁ le₂caun₂ le₂caun₂ guáꞌ₅ liaꞌ₂ conꞌ₂ lë́₅ jág₁ a₂ma₂juáꞌ₃ jniá₂,
6 juɨ₁liaꞌ₂ i₂chan₂ i₂tsá₃ cha₂ juaꞌ₅₄ lé₂ le₃bógꞌ₂ dsa₂ dso₄, i₂ꞌŋio₅ jan₂ bá₄ dsa₂ mɨ́₂, i₂ꞌŋio₅ chiꞌ₂ quián₅ i₂ꞌén₂, i₂tsá₃ ꞌe₂ qui₂rë₂ꞌnɨ₄ juaꞌ₅₄ a₂lë₁qui₂i₂nioi₅₄, juaꞌ₅₄ nau₂ ꞌnei₂ në́₃.
7 Dsa₂ i₂niog₅ gu₂ guáꞌ₅,b ca₂tɨ́in₂ ŋɨ₃ le₃ne₄ Diú₄ tsá₃ ꞌe₂ jág₁ cha₂ juaꞌ₅₄ lé₂ le₃bógꞌ₂ dsa₂ dso₄, on₃juaꞌ₅₄ i₂tsá₃ jág₁ cán₂, on₃ guëꞌ₂ i₂caun₂ lë₁rë₂ꞌne₂, on₃ guëꞌ₂ ꞌnióꞌ₅ lén₂ jan₂ dsa₂ ꞌen₅, on₃ guëꞌ₂ dsa₂ i₂tɨn₂ dsɨ́₅ ꞌno₅ mɨꞌ₅₄, on₃ guëꞌ₂ dsa₂ i₂lë₁ꞌnio₃ líꞌ₂ cu₄ quióꞌ₅ dsa₂ në́₃.
8 Të₂le₃ ꞌnióꞌ₅ qui₂guein₃ dsa₂ i₂dsi₁lén₂ quióꞌ₅. ꞌNióꞌ₅ léin₂ jan₂ dsa₂ i₂të₅ dsɨ́₅ jmáꞌ₃ a₂dse₃, liꞌ₅₄ quióꞌ₅, i₂quian₅ caun₂ juɨ₅ rë₂, i₂jŋió₅, i₂con₂ dsɨ́₅ në́₃.
9 ꞌNióꞌ₅ léin₂ jan₂ dsa₂ i₂chanꞌ₂ tiá₂ jág₁ tí₅ dsónꞌ₂ liaꞌ₂ conꞌ₂ lë́₅ ca₂rë₃tɨ́in₃, ia₁jaun₂ bá₄ lé₂ le₃cuë́ꞌ₃ liánꞌ₂ dsɨ́₅ dsa₂ siánꞌ₂ jmáꞌ₃ liaꞌ₂ conꞌ₂ lë́₅ juáꞌ₅ dse₃, lé₂ le₃jme₃ꞌuáin₂ dsɨ́₅ dsa₂ i₂juáꞌ₂ ꞌlɨgꞌ₅₄ ꞌë₂₃ jág₁ dse₃.
10 Ia₁ juɨn₅ bá₄ dsa₂ i₂tsá₃ neꞌ₅₄, i₂dsia₅ jág₁ a₂tsá₃ ta₁ tí₄, i₂juɨ₁gan₂ në́₃, të₂le₃ lë́₅ guë́₄ jë₄ quióꞌ₅ dsa₂ judíos.c
11 Dsa₂ i₂le₂ꞌéi₂ ꞌen₄ jne₃ dsa₂ mɨ₂ꞌo₄, ia₁ ta₁jma₃caun₂ choꞌ₅₄ dsa₂ dsi₂néi₂ ma₂le₁gáin₃ ma₂le₁ꞌág₄ caun₂-tɨn₃ dsɨ́₅ a₂jme₁ma₂ꞌéin₂, ia₁ i₂ꞌéi₂ i₂nio₄ jme₂tag₂₃ a₂tsá₃ ca₂tɨ́in₂ a₂jŋiaꞌ₅₄ ꞌnio₃ líꞌ₂ cu₄ bá₄.
12 Dsónꞌ₂ bá₄ dsau₅ juɨ₁liaꞌ₂ ca₂juáꞌ₂ jan₂ dsa₂ go₅₄ guioin₅₄ ma₂lɨ́gꞌ₂ jme₁ca₂juáꞌ₂: “Dsa₂ chan₂ Creta ꞌŋio₅ lɨn₃ të₂jɨ́in₁, lɨ́in₅ juɨ₁liaꞌ₂ lɨ́n₅ jáꞌ₂ tsau₂ dsɨ́₅, juɨ́inꞌ₅, jléin₂ në́₃.”
13 Jaun₂ tí₅ bá₄ jág₁ ca₂juáꞌ₂ ꞌéi₂. Jaun₂ lë₃ juáꞌ₅ jniá₂ të₂jéin₃ ꞌne₂ ꞌŋio₅ lɨn₃, ia₁jaun₂ náu₃ táng₃ tsánꞌ₂ tiá₂ jág₁ dse₃,
14 ia₁jaun₂ tsá₃ ma₃tónꞌ₂ juɨ₅ jág₁ a₂lë₁ꞌnoꞌ₂ dsa₂ judíos dsɨ́₅ guioin₅₄, on₃ guëꞌ₂ ꞌnióꞌ₅ tónꞌ₂ juɨ₅ ꞌe₂ ꞌéiꞌ₃ cuë₅ dsa₂ i₂tsá₃ jiꞌ₅₄ jág₁ tí₅.
15 Të₂le₃ quióꞌ₅ dsa₂ i₂le₁jë́₃ të₂dsɨ́₅, ca₂le₃jë́₃ bá₄ cosa ma₂le₁jë́₃. La₁ të₂le₃ quióꞌ₅ i₂dsɨ₂jiog₅ ꞌlɨgꞌ₅₄ dsɨ́₅, i₂tsá₃ ꞌén₂ në́₃, ꞌi₁caun₂ tsá₃ ꞌe₂ le₁jë́₃. Ia₁ ma₂le₁ꞌióg₄ a₂dsi₂jiog₅ dsi₅₄, le₂jiog₅ a₂qui₂dsɨ₂jŋi₅ dsɨ́₅ në́₃.
16 Juáꞌ₂ bá₄ a₂cuɨin₂₃ Diú₄, la₁ të₂le₃ quianꞌ₅₄ a₂jmo₂₃ guëꞌ₂ në́₃, jángꞌ₅ léi₄ a₂tsá₃ dsau₅. ꞌLɨgꞌ₅₄ lɨn₃ bá₄ jmo₂₃ ne₄ Diú₄, ꞌioꞌ₅₄ jág₁ dse₃, ꞌi₁caun₂ a₂dse₃ tsá₃ ta₁ téin₄ jmo₃.