Si₂ carta a₂ca₂jmo₃ San Pablo ne₄
FILEMÓN
Ca₂jmo₃ Pablo si₂ ca₂chein₃ ne₄ Filemón
1
Jniá₂ Pa₄ ꞌeng₅₄ néꞌ₃ ꞌmá₃ o₄quióꞌ₄ Cristo Jesús. Jmo₅ jniá₂ si₂ carta la₂ quiangꞌ₅₄ rɨnꞌ₅₄ jniog₄ Timoteo, neꞌ₅₄ ꞌne₂ Filemón i₂ꞌnió₄, i₂co₂dsia₅ jmo₂ ta₁,
2 ne₄ ꞌio₅₄ rɨnꞌ₅₄ jniog₄ Apia, quianꞌ₅₄ Arquipo në́₃, co₂ꞌnióꞌ₄ bá₄ jan₂ ꞌlióg₂ rɨnꞌ₅₄ jniog₄, quianꞌ₅₄ ne₄ guáꞌ₅ i₂ŋɨꞌ₂ dsi₂néi₂ quiángꞌ₂.
3 Juɨ₁jme₂guꞌ₅₄ bá₄ Diú₄ ꞌniaꞌ₂, juɨ₁tionꞌ₄ bá₄ ꞌniaꞌ₂ ꞌei₅ tei₄, jmo₅ Diú₄ Jmei₂ jniog₄ quianꞌ₅₄ Te₁guiꞌ₅₄ Jesucristo.
ꞌA₂ liaꞌ₂ jme₁ꞌnio₃ Filemón rɨinꞌ₅₄ ia₁ a₂ꞌéin₂
4 Ca₂le₃jë́₃ ráun₂ cuë́₅ jniá₂ ti₁ꞌmagꞌ₄ Diú₄, ꞌɨ́n₅ jniá₂ ꞌne₂ jë₁ma₂chi₁ca₂leinꞌ₄ jniá₂.
5 Ia₁ ma₂ca₂rë₃guion₅₄ jág₁ a₂ꞌniógꞌ₃ Te₁guiꞌ₅₄ Jesús, ꞌéngꞌ₂ bá₄ të₂le₃ quióꞌ₅, ján₃ bá₄ le₂jaun₂ ꞌniógꞌ₃ ca₂le₃jɨ́n₃ i₂ma₂tén₅ të₂le₃ quióꞌ₅ Diú₄.a
6 Mɨ₅ jniá₂ ján₃ a₂jmóꞌ₂ dsen₅₄ ꞌauꞌ₂ a₂quenꞌ₅₄ a₂ꞌéngꞌ₂ jɨn₄ dsa₂ siánꞌ₂, ia₁jaun₂ le₃cuɨ́ꞌ₅ ca₂le₃jë́₃ a₂dse₃ a₂cha₂ ja₁con₂ jniog₄ o₄quióꞌ₄ Cristo Jesús.
7 ꞌŊio₅ lɨn₃ ꞌioꞌ₂ jéin₅, ꞌei₅ liánꞌ₂ dsɨ₃, ia₁ a₂ꞌniógꞌ₃ jniá₂, ia₁ ꞌuɨg₅₄ quiánꞌ₂ ꞌne₂ bá₄ rɨnꞌ₅₄ jniog₄, ma₂qui₂le₁ꞌág₄ tei₄ dsɨ́₅ dsa₂ i₂ꞌén₂.b
Mɨ₅ Pa₄ ne₄ Filemón a₂jmo₃ ꞌéi₂ dse₃ dsɨ́₅ le₃quióꞌ₅ Onésimo
8 Jaun₂ lë₃, o₁jŋiaꞌ₅₄ jme₁ca₂tɨ́n₂ jniá₂ le₃quióꞌ₅ Cristo a₂jmo₅₄ ꞌéiꞌ₃ neꞌ₅₄ ꞌne₂, juɨ₁liaꞌ₂ ꞌe₂ dsi₂ten₅₄ jmóꞌ₂,
9 la₁ të₂le₃ ia₁ a₂ŋɨ́₄ lë₃ ꞌnió₃ bá₄ jniá₂ ꞌne₂, ja₂lɨn₃ guë́₄ dse₃ chi₂lenꞌ₄ jniá₂ ꞌne₂, lɨ́n₂ jniá₂. Jniá₂ Pa₄ ma₂guengꞌ₂ ꞌeng₅₄ néꞌ₃ ꞌmá₃ o₄quióꞌ₄ Cristo Jesús.
10 Mɨ₅₄ jmóꞌ₂ dse₃ ꞌauꞌ₂ të₂le₃ quióꞌ₅ Onésimo i₂ca₂lɨn₃ co₂ꞌnióꞌ₄ jan₂ chiꞌ₂ quiáng₃ dsi₂néi₂ ꞌné₅ ꞌmá₃ la₂.
11 Le₂jŋiá₅ në́₃ jme₁lɨ́n₄ Onésimoc jan₂ dsa₂ i₂tsá₃ ta₁ tén₄ jme₃ti₃ ta₁ neꞌ₅₄. La₁ rë₂në́₃ në́₃, ma₂téin₅ bá₄ ta₁ jme₃ti₃ ta₁ ne₄ jniog₄ le₃o₃.
12 Jaun₂ dsiainꞌ₅₄ táng₃ jniá₂ neꞌ₅₄, jaun₂ guein₅₄ bá₄ co₂nio₄ co₂ꞌnióꞌ₄ bá₄ a₂jme₁guéiꞌ₄ jniá₂ ꞌŋió₃.
13 O₁jŋiaꞌ₅₄ jme₁ꞌɨ́n₅ dsɨ₃ jme₁ꞌí₂ guë́₄ ja₁lá₃ jme₃ti₃ ta₁ ne₃ co₂ꞌnióꞌ₄ bá₄ a₂jme₁jme₁tiꞌ₄ ꞌne₂ të₁liaꞌ₂ ꞌeng₅₄ guë́₄ néꞌ₃ ꞌmá₃ ꞌuɨg₅₄ quióꞌ₅ jág₁ dse₃,
14 la₁ tsá₃ ꞌe₂ ꞌnio₃ jmo₅₄ ꞌi₁caun₂ juaꞌ₅₄ a₂tɨng₂ ꞌŋió₃ juaꞌ₅₄ a₂tsá₃ ꞌei₅ caun₂ jág₁ quianꞌ₅₄ ꞌne₂. Jaun₂ tsá₃ o₁lengꞌ₂ juaꞌ₅₄ a₂chi₂quiong₅₄ jniá₂ jmɨg₄ a₂jmóꞌ₂ tion₅₄; jaun₂ ꞌa₂ conꞌ₂ ꞌŋio₂ ꞌauꞌ₂ ꞌŋiagꞌ₂ bá₄ ꞌne₂.
15 ꞌAn₁ Diú₄ bá₄ ca₂cuë₃ jmɨg₄ ca₂téi₂ Onésimo co₂ꞌna₂ quiánꞌ₂ ꞌne₂, ia₁jaun₂ guéinꞌ₄ jme₃quiongꞌ₅₄ co₂tan₅₄,
16 on₃juaꞌ₅₄ ma₃lɨ́in₅ ca₂ne₅₄ dsa₂ i₂lë₁jme₂ti₃ ta₁ neꞌ₅₄, tonꞌ₂ të₂le₃ dse₃ guë́₄ ma₂lɨ́in₅ jan₂ rɨ́ngꞌ₂ i₂ꞌniogꞌ₃ të₂le₃ quianꞌ₅₄ jme₂dsí₂. Jniá₂ ꞌŋio₅ lɨn₃ ꞌniói₃, la₁ ꞌne₂ në́₃ ꞌŋio₅ lɨn₃ guë́₄ ca₂tɨ́ngꞌ₂ jme₁ꞌnióiꞌ₄ jaun₂ tsá₃ ma₃jɨinꞌ₅₄ juɨ₁liaꞌ₂ ja₁jɨngꞌ₄ jan₂ dsa₂ lë₁dsa₂. Jɨin₅₄ bá₄ juɨ₁liaꞌ₂ ja₁jɨngꞌ₄ jan₂ rɨ́ngꞌ₂ të₂le₃ quióꞌ₅ Te₁guiꞌ₅₄.
17 Le₂në₅ jaun₂, chi₂juaꞌ₂ dsónꞌ₂ jmoꞌ₂ ꞌauꞌ₂ a₂lɨ́n₅ jniá₂ jan₂ dsa₂ i₂jmoꞌ₂ ta₁ quiangꞌ₅₄, jaun₂ guein₅₄ bá₄, jmo₄ ꞌauꞌ₂ co₂ꞌnióꞌ₄ a₂guéiꞌ₅ jniá₂ ꞌŋió₃.
18 Chi₂juaꞌ₂ ꞌe₂ dain₅₄ ma₂jmógꞌ₂, o₃ chi₂juaꞌ₂ cha₂ a₂rɨin₂, quió₃ jniá₂ mɨ₄.
19 Jniá₂ Pa₄ jmo₂₃ si₂ la₂ ꞌŋió₃ të₃dsónꞌ₂ quianꞌ₅₄ gu₃.d Jniá₂ bá₄ quɨ́₄, jŋiaꞌ₅₄ jme₁ꞌnio₃ jniá₂ jmo₅₄ dsiogꞌ₂ ꞌauꞌ₂ a₂rɨngꞌ₂ quiángꞌ₂ ꞌŋiagꞌ₂ quió₃ ján₃.
20 Jaun₂ le₂në₅ bá₄, ꞌne₂ rɨnꞌ₅₄ jniog₄, jmo₄ dse₃ ꞌauꞌ₂ quianꞌ₅₄ jniá₂ juɨ₁liaꞌ₂ dsi₂ten₅₄ jmo₃ dsa₂ i₂ꞌén₂ le₃quióꞌ₅ Te₁guiꞌ₅₄, jmo₄ juɨ₁le₂güɨgꞌ₂ dsɨ₃ juɨ₁liaꞌ₂ jan₂ rɨ́ngꞌ₂ le₃quióꞌ₅ Cristo.
21 Dsianꞌ₄ jniá₂ si₂ la₂ neꞌ₅₄, ia₁ dsónꞌ₂ bá₄ lɨ́ng₂ jme₁tiꞌ₄ bá₄ ca₂le₃jë́₃, të₂le₃ lë́₅ guë́₄ jmóꞌ₂ conꞌ₂ guë́₄ a₂juáꞌ₅.
22 Jmo₄ dse₃ ꞌauꞌ₂, jmo₄ co₂jŋia₅₄ caun₂ dsi₂néi₂ ja₁i₁jŋia₁₂, ia₁ ꞌɨ́n₂ dsɨ₃ jniá₂ a₂ŋágꞌ₃ Diú₄ a₂mɨꞌ₂ ꞌniaꞌ₂, jmo₃ bá₄ a₂dsióg₄ jniá₂ i₁jag₁₂.
ꞌÁgꞌ₅ jág₁ jë₁ca₂tóꞌ₂, cuag₂₃ Diú₄ në́₃
23 Rɨ́ngꞌ₃ i₂chen₂ Epafras i₂quiangꞌ₅₄ ꞌeng₅₄ néꞌ₃ ꞌmá₃ ꞌuɨg₅₄ quióꞌ₅ Cristo Jesús, dsiáinꞌ₂ jág₁ a₂cuɨin₂₃ Diú₄ ꞌne₂.
24 Ján₃ bá₄ le₂jaun₂ Marcos, Aristarco, Demas quianꞌ₅₄ Lucas në́₃ i₂jme₂ꞌo₅₄ jmo₅ ta₁.
25 Juɨ₁jme₂guꞌ₅₄ Te₁guiꞌ₅₄ Jesucristo jme₂dsí₂ quiánꞌ₂ ꞌniaꞌ₂.
Co₂në₅.