Juɨ₁liaꞌ₂ a₂ca₂tɨ́n₂ dsa₂ i₂ꞌén₂ jmo₃.
3
Cheiꞌ₅₄ ꞌne₂ juɨ₁dsiogꞌ₂ bá₄ dsɨ́₅ juɨ₁tioinꞌ₅₄ ꞌéiꞌ₃ quióꞌ₅ dsɨ₂tan₅₄ dsa₂ canꞌ₅₄, juɨ₁nei₅₄ gau₂ jág₁ quióꞌ₅, juɨ₁chain₂ co₂jŋiai₅₄ a₂jmo₃ ca₂le₃jë́₃ ne₅₄ ta₁ dse₃.
2 Tsá₃ juɨ₁ꞌɨin₁₂ ꞌlɨgꞌ₅₄ ꞌi₁jan₂ dsa₂, tsá₃ ꞌein₂ ꞌen₄ jmáiꞌ₂ mɨꞌ₅₄ në́₃. Juɨ₁lein₅₄ bá₄ dsa₂ juɨnꞌ₂ dsɨ́₅, ꞌua₁ dsɨ́₅ ja₁con₂ ca₂le₃jɨ́n₃ dsa₂.
3 Ia₁ le₂në₅ bá₄ jme₁lág₄ jniog₄ guio₅₄ le₂jŋiá₅ ján₃, tsá₃ ꞌen₅₄ dsɨ₅, tsá₃ néꞌ₂ jniog₄ ja₁con₂ Diú₄. I₂jme₁ma₂i₂cónꞌ₅ bá₄ jniog₄ jme₁i₂nio₄. Jme₁i₂nio₄ jniog₄ qui₂rë₂ꞌŋeiꞌ₅₄ quianꞌ₅₄ ca₂le₃jë́₃ ne₅₄ cosa ꞌlɨgꞌ₅₄ jme₁ꞌɨ́n₅ dsɨ₅ jniog₄ jmó₁. ꞌŊio₅ ꞌlagꞌ₅₄ jniog₄ jme₁chong₂. Jme₁uɨg₅ dsɨ₅ jniog₄, jme₁ꞌiog₅₄ dsa₂ jniog₄, tonꞌ₂ jme₁ꞌŋia₅₄ jniog₄ rɨnꞌ₅₄ le₂jau₂ le₂jau₂.
4 La₁ jme₁ca₂jme₃jnia₅ Diú₄ quián₂ i₂lió₂ ca₂jmo₃ léi₄ a₂ꞌua₁ dsɨ́₅, a₂ꞌnioi₃ dsa₂ mɨ₂güɨ́g₃,
5 jaun₂ ca₂lió₂ jniog₄, on₃juaꞌ₅₄ ia₁ ꞌe₂ dse₃ a₂ma₂jmó₁. Të₂le₃ ꞌŋiog₅ bá₄ ca₂dsia₃ ŋéi₂ dsɨ́₅ jniog₄ ca₂lió₂ të₂le₃ quianꞌ₅₄ a₂qui₂ca₂chéi₂ jniog₄, a₂ca₂rë₃chóng₃ táng₃, a₂le₃chong₂ quián₁ caun₂ juɨ₅ ꞌmɨ́₂, ca₂jmo₃ Jme₂dsí₂ Jŋió₅
6 i₂ca₂tein₃ liaꞌ₂ rë₂tsón₂ ne₄ quián₂ jniog₄ të₂le₃ quianꞌ₅₄ Jesucristo i₂lió₂.
7 Të₂le₃ ia₁ a₂ꞌua₁ dsɨ́₅ ma₂ca₂juáꞌ₂ në́₃, dsa₂ ma₂le₁jɨ́n₃ bá₄ jniog₄, jaun₂ guéiꞌ₂ bá₄. Jaun₂ le₂në₅ bá₄ ꞌɨ́n₂ dsɨ₅ jniog₄ guéi₁ ja₁le₃chong₂ co₂tan₅₄.
8 Jág₁ dsau₅ dsónꞌ₂ bá₄ në₅, jaun₂ ꞌnio₃ jniá₂ caun₂ ꞌéi₂ ꞌauꞌ₂ caun₂ jme₁tɨinꞌ₅ jág₁ në₅, ia₁jaun₂ i₂ꞌén₂ le₃quióꞌ₅ Diú₄ quɨ́nꞌ₃ bí₂ jmo₃ a₂dse₃. Ca₂le₃jë́₃ cosa në₅ dse₃, tí₅ ta₁ quióꞌ₅ ca₂le₃jɨ́n₃.
9 La₁ tsá₃ lë₁cuë₂ jmɨg₄ juaꞌ₅₄ a₂lë₁qui₃ŋag₃ dsa₂ jág₁ a₂tsá₃ ꞌe₂ ta₁ tí₄, juɨ₁liaꞌ₂ jág₁ a₂ꞌɨn₅ dsa₂ dsa₂ i₂qui₂ma₂ŋɨ́₂ ma₂lɨ́gꞌ₂, juɨ₁liaꞌ₂ jág₁ a₂tsɨn₅ dsa₂ a₂nio₅ mɨꞌ₅₄, juɨ₁liaꞌ₂ jág₁ a₂já₅ o₄quióꞌ₄ Si₂ ꞌÉiꞌ₃ në́₃. Ia₁ tsá₃ ꞌe₂ ta₁ jmo₃, tsá₃ ꞌe₂ ta₁ tí₄.
10 Në₁juaꞌ₂ chan₂ jan₂ i₂jmo₅ le₁dsonꞌ₅₄ dsa₂, teꞌ₂ co₂ráun₂, tɨn₃ ráun₂, ꞌë́₃ jág₁ cheiꞌ₅₄ tsá₃ dse₃ jmo₃ le₂jaun₂. Chi₂juaꞌ₂ tsá₃ tónꞌ₂ juɨ₅ jág₁ quiángꞌ₂, co₂dsia₅ dsein₅₄ jë₄ quiánꞌ₂ ꞌniaꞌ₂.
11 Jŋiaꞌ₅₄ liaꞌ₂ co₂në₅ bá₄ ma₂ca₂rë₃ŋiꞌ₅₄ ꞌne₂, dsa₂ i₂le₂ꞌéi₂ në́₃ tsá₃ ma₃ꞌe₂ dse₃ dsɨ₂jein₃ dsɨ́₅; të₂le₃ quianꞌ₅₄ dsáu₁ ꞌŋiog₅ bá₄ a₂ꞌliogꞌ₅ quióꞌ₅.
Cuë́ꞌ₅ jág₁ rɨinꞌ₅₄ conꞌ₂ ca₂tɨ́in₂ guioin₅₄
12 Jë₁ma₂të́₂ rë₁tsɨn₅₄ jniá₂ i₂chen₂ Artemas neꞌ₅₄, o₃ i₂chen₂ Tíquico ꞌe₂, në₅ i₂ŋeꞌ₂ dsɨ₂juɨ₅ i₁jagꞌ₄ juɨ₅ Nicópolis, ia₁ ja₁jaun₂ ma₂i₂jiog₅ dsɨ₃ ŋɨg₅₄ jein₂ güɨ́g₂.
13 Zenas i₂chénꞌ₅ ne₄ jág₁, quianꞌ₅₄ Apolos në́₃, ꞌa₂ conꞌ₂ lé₂ quiángꞌ₂ jme₁ꞌoin₁₂ ꞌa₂ conꞌ₂ jŋiaꞌ₅₄ len₅ quióꞌ₅ tioinꞌ₅₄ juɨ₅.
14 Juɨ₁le₂tɨn₂ bá₄ dsa₂ quián₂ jniog₄ jmo₃ a₂dse₃ jme₂ꞌoin₅₄ rɨinꞌ₅₄ juɨ₁liaꞌ₂ jme₁ꞌnióꞌ₅, ia₁ conꞌ₂ tsá₃ ŋó₅ në₁tsá₃ ꞌe₂ dse₃ ca₂rau₂ liaꞌ₂ chain₂.
ꞌÁgꞌ₅ jág₁ jë₁ca₂tóꞌ₂, cuag₂₃ Diú₄ në́₃
15 Ca₂le₃jɨ́n₃ i₂quianꞌ₅₄ jniá₂ ja₁lá₃ chein₂₃ jág₁ a₂cuɨin₂₃ Diú₄ ꞌne₂. Cuɨn₅₄ Diú₄ ca₂le₃jɨ́n₃ i₂ꞌnio₃ jniog₄ i₂ꞌén₂. Juɨ₁jme₂guꞌ₅₄ bá₄ Diú₄ ꞌniaꞌ₂ ca₂le₃jɨ́ngꞌ₃.
Co₂në₅.