Juɨ₁liaꞌ₂ juáꞌ₅ tí₅ dsónꞌ₂
2
La₁ ꞌne₂ në́₃, cheiꞌ₅₄ dsa₂ liaꞌ₂ conꞌ₂ lë́₅ juáꞌ₅ dse₃.
2 Juɨ₁liaꞌ₂ dsa₂ canꞌ₅₄, juɨ₁jmo₁₂ ꞌen₅₄ dsɨ́₅, tsá₃ caun₂ lë₁lɨ́in₅, juɨ₁jmo₁₂ liꞌ₅₄ quióꞌ₅, juɨ₁le₂ꞌéin₂ bá₄ juáꞌ₅ dse₃, juɨ₁jme₂ꞌnioi₃ rɨinꞌ₅₄, juɨ₁jmo₁₂ bá₄ juɨnꞌ₂ dsɨ́₅.
3 Ján₃ guëꞌ₂ le₂jaun₂ të₂le₃ quióꞌ₅ dsa₂ mɨ́₂ ma₂canꞌ₅₄, juɨ₁i₂nioi₅₄ jŋió₅, tsá₃ juɨ₁ꞌɨin₁₂ rɨinꞌ₅₄ juaꞌ₅₄ a₂lë₁bógꞌ₂ dso₄, on₃ guëꞌ₂ ꞌnióꞌ₅ jme₂tɨin₂₃ dsɨ́₅ ꞌɨ́nꞌ₂ ti₁jmɨ́g₃, të₂le₃ ca₂tɨ́in₂ ꞌë₃ caun₂ juɨ₅ dse₃,
4 ia₁jaun₂ lé₂ le₃jme₃tɨin₂₃ juɨ₁liaꞌ₂ ꞌio₅₄ chiꞌ₂ ꞌa₂ liaꞌ₂ jme₃ꞌnioi₃ dsɨ₂i₂gu₂, a₂jme₃ꞌnioi₃ chiꞌ₂-guein₂ quiáin₅ në́₃,
5 ꞌa₂ liaꞌ₂ jmo₃ ꞌen₅₄ dsɨ́₅, ꞌa₂ liaꞌ₂ jmo₃ léi₄ a₂ma₂le₁jë́₃ të₂dsɨ́₅, ꞌa₂ liaꞌ₂ jmo₃ ꞌí₁ dse₃ dsi₂néi₂ quióꞌ₅, ꞌa₂ liaꞌ₂ jmo₃ ꞌua₁ dsɨ́₅, ꞌa₂ liaꞌ₂ tóinꞌ₃ ꞌéiꞌ₃ quióꞌ₅ dsɨ₂i₂gu₂ në́₃, ia₁jaun₂ bá₄ tsá₃ ꞌein₂ juáꞌ₂ ꞌlɨgꞌ₅₄ ꞌë₃ jág₁ quióꞌ₅ Diú₄.
6 Ján₃ guëꞌ₂ le₂jaun₂ cheiꞌ₅₄ dsa₂ ŋeꞌ₂ chiꞌ₂ ca₂tɨ́in₂ jmo₃ ꞌen₅₄ dsɨ́₅.
7 Jŋiá₅ deꞌ₂ ꞌne₂ ca₂tɨ́ngꞌ₂ ꞌëꞌ₅₄ juɨ₅ dse₃ ꞌa₂ liaꞌ₂ ca₂tɨ́in₂ jmo₃: A₂jme₁tɨinꞌ₅ on₃juaꞌ₅₄ a₂cha₂ ꞌe₂ ꞌɨ́n₂ ꞌauꞌ₂, on₃juaꞌ₅₄ a₂caun₂ lë₁lɨ́ngꞌ₄,
8 cheiꞌ₅₄ jmáꞌ₃ liaꞌ₂ quianꞌ₅₄ jág₁ rë₂ a₂tsá₃ ꞌein₂ lé₂ le₃ꞌë₃ ꞌlɨgꞌ₅₄, ia₁jaun₂ le₃guiꞌ₅₄ juɨ₁liaꞌ₂ dsa₂ i₂nau₂ quen₅, ia₁ tsá₃ ꞌe₂ cha₂ a₂ꞌag₃ ꞌlɨgꞌ₅₄ jniog₄.
9 Juɨ₁liaꞌ₂ dsa₂ i₂jme₂ti₃ ne₄ juɨg₅₄, tioinꞌ₂ jág₁ dse₃ juɨ₁jme₂ti₃ ca₂le₃jë́₃ ꞌe₂ ta₁ te₂néiꞌ₂ dsa₂ juɨg₅₄, juɨ₁jmo₁₂ bá₄ jë₂ a₂të₅ dsɨ́₅ juɨg₅₄, tsá₃ ꞌnióꞌ₅ a₂caun₂ lë₁qui₂ŋag₃ ne₄ ꞌéi₂.
10 Tsá₃ ꞌnióꞌ₅ qui₃jŋiáꞌ₂ ꞌe₂ cha₂ quióꞌ₅ juɨg₅₄. Ca₂le₃jë́₃ bá₄ ꞌnióꞌ₅ jmo₃ tí₅ jág₁ quióꞌ₅ ia₁jaun₂ bá₄ rë₂ jniá₂ qui₂rë₂lag₄ juáꞌ₅ quióꞌ₅ Diú₄ quián₂ jniog₄ i₂lió₂.
11 Ia₁ ma₂ca₂jme₃jnia₅ Diú₄ a₂ꞌua₁ dsɨ́₅, a₂lióin₂ bá₄ ca₂le₃jɨ́n₃ dsa₂ mɨ₂güɨ́g₃,
12 jme₂tag₂₃ a₂tí₄ jniog₄ ca₂le₃jë́₃ a₂ꞌlɨgꞌ₅₄, ca₂le₃jë́₃ a₂ꞌɨ́n₅ dsɨ́₅ dsa₂ mɨ₂güɨ́g₃ la₂; a₂le₃chong₂ jniog₄ mɨ₂güɨ́g₃ la₂ ꞌen₅₄ dsɨ₅, quián₁ caun₂ juɨ₅ co₂dsau₅, qui₂rë₂jɨnꞌ₅₄ jniog₄ ja₁con₂ Diú₄ në́₃.
13 Jme₂tag₂₃ ján₃, a₂ꞌio₁ jniog₄ chi₂jŋia₁ a₂ꞌɨ́n₂ dsɨ₅ a₂le₃ti₃ jág₁ jláꞌ₁ jaun₂, a₂le₃jniá₂ a₂co₂tág₅ co₂ꞌnéꞌ₅ quióꞌ₅ Diú₄ ꞌuanꞌ₂, Cristo Jesúsa i₂lió₂ jniog₄.
14 ꞌÉi₂ në́₃, ca₂jɨ́inꞌ₂ ꞌŋiog₅ o₄quián₂ jniog₄, ca₂quí₃ ca₂lió₂ jë₄ ca₂le₃jë́₃ a₂ꞌlɨgꞌ₅₄, ca₂chéi₂ jniog₄ ia₁jaun₂ léi₂ jniog₄ dsa₂ juɨg₂ quiáin₅ ꞌŋiog₅, a₂dsen₅₄ dsɨ₅ jmó₁ jmáꞌ₃ a₂dse₃.
15 Jág₁ në₅ bá₄ dsia₄ tiá₂ ꞌauꞌ₂ jmo₄ ꞌéiꞌ₃ cheiꞌ₅₄ dsa₂ qui₁cuëꞌ₅₄ bí₂, a₂të₁jéinꞌ₄ në́₃. Tsá₃ lë₁cuë₂ jmɨg₄ juaꞌ₅₄ a₂tsá₃ jme₃go₃ dsa₂.