4
Jág₅ bá₄ Diú₄ quianꞌ₅₄ Te₁guiꞌ₅₄ Jesucristo në́₃ i₂lë́₅ jág₁ jŋióꞌ₂ ja₃goin₂, i₂qui₃dsɨ₅ ꞌéiꞌ₃ ne₄ quióꞌ₅ i₂chan₂ liaꞌ₂ i₂ma₂dsan₃ në́₃. Jaun₂ lë́₃ chi₂quian₅₄ jniá₂ jmɨg₄ ꞌne₂:
2 ꞌË́₃ jág₁ dse₃. Ma₂rë₂jángꞌ₁ ꞌnioꞌ₂ juɨ₅ ꞌa₂ liaꞌ₂ jme₁tɨngꞌ₂ dsa₂ jme₁cuɨn₅ jmɨg₄ o₃ tsá₃ cuɨn₅ jmɨg₄ ꞌe₂. Jmóꞌ₂ jme₁ꞌuangꞌ₅₄ dsɨ́₅ dsa₂, të₂jén₃ dsa₂, tioinꞌ₂ jág₁ dse₃, o₁lɨ́gꞌ₂ jmɨg₄ juaꞌ₅₄ a₂jmóꞌ₂ a₂tsá₃ jme₁juɨnꞌ₂ ꞌauꞌ₂ quiainꞌ₅₄ jë₁jme₂tɨ́inꞌ₂.
3 Ia₁ já₅ jmɨg₄ a₂tsá₃ ma₃jmo₃ dsa₂ tióꞌ₅ dsɨ́₅ quianꞌ₅₄ juáꞌ₅ dse₃. Të₂le₃ liaꞌ₂ conꞌ₂ lë́₅ dsɨ́₅ guioin₅₄ qui₃ꞌnaiꞌ₂ juɨn₅ lɨn₃ të₅ i₂jme₃tag₅ jmáꞌ₃ a₂ꞌɨ́n₅ dsɨ́₅ guioin₅₄ nag₃ bá₄.
4 Cau₅ bá₄ jéinꞌ₃ táng₃ juɨ₁liaꞌ₂ ja₁jme₂tag₅ dsa₂ jág₁ tí₅ dsónꞌ₂. Cang₂ jaun₂ në́₃, tóinꞌ₃ juɨ₅ dsɨ₃léin₂ nag₃ ca₂liaꞌ₂ ꞌei₅ ne₄ jág₁ cuento ga₂ a₂ꞌén₂ dsa₂.
5 La₁ ꞌne₂ në́₃, ꞌen₅₄ ꞌauꞌ₂ jmo₄, tiangꞌ₃ jmo₄ ŋagꞌ₅₄ uɨg₅. Caun₂ qui₂ꞌë́₃ bá₄ jág₁ dse₃ a₂lión₂ dsa₂. Jme₁ti₁ dse₃ ta₁ quiángꞌ₂.
6 Jniá₂ në́₃, ca₂të́₂ jmɨg₄ jë₁o₃ꞌɨng₅ mɨ₂güɨ́g₃ la₂, ia₁ në₃ guë́₄ jŋagꞌ₃ dsa₂ juɨ₁liaꞌ₂ ja₁jŋɨꞌ₂ dsa₂ jáꞌ₂ i₂jénꞌ₂ dsa₂ ne₄ Diú₄.
7 Ma₂ca₂quɨ́nꞌ₃ jniá₂ bí₂, ma₂jmo₃ a₂dse₃ juɨ₁liaꞌ₂ ja₁jmo₅ jan₂ ꞌlióg₂ ne₄ ꞌnei₂; ma₂ca₂ŋɨ₃ jniá₂ liaꞌ₂ conꞌ₂ lë́₅ juɨ₅ quióꞌ₅ Te₁guiꞌ₅₄, ca₂dsióg₃ jniá₂ të₂ jë₁ca₂tóꞌ₂ juɨ₅; ma₂ca₂jmáꞌ₃ tiá₂ a₂ꞌéng₂.
8 Në₃ guë́₄ në́₃ ma₂lë́₅ co₂jŋia₅₄ ja₁le₃chang₃ dse₃, co₂ꞌnióꞌ₄ caun₂ corona a₂cuë₃ Te₁guiꞌ₅₄ jmɨg₄ jaun₂. Ia₁ Te₁guiꞌ₅₄ ꞌéi₂ bá₄ i₂qui₃dsɨ₅ ꞌéiꞌ₃ co₂rë₂ jmɨg₄ jaun₂, on₃juaꞌ₅₄ a₂cuë₃ jmáꞌ₃ jan₂ jniá₂ corona; a₂cuë́ꞌ₃ ca₂le₃jɨ́n₃ i₂le₁jŋiog₅ ꞌŋio₂ dsɨ́₅ ca₂liaꞌ₂ ca₂të́₂ jmɨg₄ jaun₂ a₂guainꞌ₂ táng₃.
Cuë́ꞌ₅ jág₁ rɨinꞌ₅₄ conꞌ₂ ca₂tɨ́in₂ guioin₅₄
9 Jmo₄ dsen₅₄ ꞌauꞌ₂ a₂i₁jagꞌ₄ jniá₂ ŋiꞌ₅₄ ta₁ la₂.
10 Ia₁ i₂chen₂ Demas ma₂téi₂ bá₄ ꞌuɨg₅₄ ia₁ ꞌŋio₅ lɨn₃ guë́₄ ꞌɨ́n₅ dsɨ́₅ cosa a₂cha₂ mɨ₂güɨ́g₃ la₂, jaun₂ ma₂ŋó₅ juɨ₅ juɨg₂ Tesalónica. I₂chen₂ Crescente guëꞌ₂ në́₃, ma₂ŋó₅ juɨ₅ ꞌuë₃ Galacia; Tito guëꞌ₂ në́₃ ma₂ŋó₅ juɨ₅ Dalmacia.
11 Jŋiaꞌ₅₄ liaꞌ₂ jan₂ Lucas bá₄ i₂quianꞌ₅₄ guë́₄ jniá₂ ja₁lá₃. ꞌNiaꞌ₂ Marcos ia₁jaun₂ jainꞌ₅₄ ŋeꞌ₅₄ quiainꞌ₅₄, ia₁ téin₅ ta₁ jme₃ti₃.
12 Tíquico guëꞌ₂ në́₃ ca₂tsɨ́in₂ juɨ₅ juɨg₂ Efeso.
13 Jë₁ma₂të́₂ rë₁ŋeꞌ₅₄, quian₂ co₂nio₄ tsɨ₁ꞌmɨꞌ₂ dsiog₂ quió₃ a₂ca₂dsia₃ juɨg₂ Troas ja₁quióꞌ₄ Carpo. Ján₃ bá₄ le₂jaun₂ quian₂ si₂ rë₂bɨn₅ quió₃. La₁ ꞌŋio₅ guë́₄ dsen₅₄ ꞌnióꞌ₅ nɨ₁lo₁ jáꞌ₂ a₂lë́₅ tsɨ₁mɨ₂si₂.
14 Alejandro i₂lɨ́n₅ të₅ŋí₁ ꞌŋio₅ lɨn₃ tsá₃ ꞌe₂ dse₃ ma₂jmógꞌ₂. Te₁guiꞌ₅₄ bá₄ quí₃ quióꞌ₅ liaꞌ₂ conꞌ₂ lë́₅ a₂ma₂jmo₃.
15 ꞌÍ₁ jmo₄ ꞌne₂ ján₃ ia₁jaun₂ tsá₃ jo₅₄, ia₁ ꞌŋio₅ lɨn₃ ma₂nau₂ quein₅ a₂ꞌioꞌ₅₄ jág₁ dse₃ quián₂.
16 Le₂ꞌuɨg₅₄ conꞌ₂ jme₁ca₂cheiꞌ₃ dsa₂ ne₄ dsɨ₂tan₅₄ jë₁ca₂cáun₃ dsa₂ le₂ꞌuɨg₅₄ jág₁ dsau₅ quió₃, ꞌi₁jan₂ tsá₃ ꞌein₂ ca₂jme₃quiongꞌ₅₄, ca₂téi₂ ca₂le₃jɨ́n₃. Tsá₃ juɨ₁quion₂ bá₄ Diú₄ ꞌí₁ quióꞌ₅ ia₁ ca₂jmógꞌ₂ le₂jaun₂.
17 La₁ ꞌŋiog₅ bá₄ Te₁guiꞌ₅₄ ca₂jme₃quiongꞌ₅₄ ca₂cuë₃ bí₂ ia₁jaun₂ të₂le₃ quianꞌ₅₄ jniá₂ ca₂rë₃ti₃ ca₂jme₁tɨng₂₃ dsɨ₂nau₂, ca₂liaꞌ₂ rë₂ꞌŋia₅ jág₁ dse₃. Jaun₂ le₂në₅ bá₄ ca₂lió₂ Te₁guiꞌ₅₄ jniá₂ mɨ₂ꞌo₄ dsɨ₂ꞌiaꞌ₂.
18 La₁ Te₁guiꞌ₅₄ bá₄ caun₂ lió₂ guë́₄ ia₁jaun₂ tsá₃ dsɨ₃ŋɨ́g₂ ca₂le₃jë́₃ cosa ꞌlɨgꞌ₅₄, jaun₂ jniá₂ i₂lë́₅ ꞌí₁ quiáin₅, të₂ gueiꞌ₅₄ i₂juɨ́g₃ ja₁goin₂. ¡Juɨ₁jme₂juagꞌ₂ bá₄ dsa₂ co₂tan₅₄! ¡A₂méi₃*!
ꞌÁgꞌ₅ jág₁ jë₁ca₂tóꞌ₂, cuag₂₃ Diú₄ në́₃
19 Dsianꞌ₄ jniá₂ jág₁ cuɨ́ng₅ Diú₄ Priscilaa quianꞌ₅₄ Aquila në́₃, quianꞌ₅₄ ca₂le₃jɨ́n₃ dsa₂ dsi₂néi₂ quióꞌ₅ Onesíforo në́₃.
20 Juɨg₂ Corinto bá₄ ca₂jŋia₃ Erasto. I₂chen₂ Trófimo guëꞌ₂ ca₂të₁ꞌŋiá₄ dsoꞌ₅₄ jme₁o₃ꞌɨ́ng₃ juɨg₂ Mileto.
21 Quenꞌ₂ bí₂ ŋeꞌ₅₄ ŋiꞌ₅₄ ta₁ néꞌ₃ a₂të₅₄ jein₂ güɨ́g₂. Eubulo quiainꞌ₅₄ Pudente, Lino quiainꞌ₅₄ Claudia në́₃ quiainꞌ₅₄ ca₂le₃jɨ́n₃ rɨnꞌ₅₄ jniog₄ dsiáinꞌ₂ jág₁ neꞌ₅₄ a₂cuɨin₂₃ Diú₄ ꞌne₂.
22 Juɨ₁ꞌen₅₄ bá₄ Te₁guiꞌ₅₄ Jesucristo ja₁con₂ jme₂dsí₂ quiángꞌ₂; juɨ₁jme₂guꞌ₅₄ bá₄ Diú₄ ꞌniaꞌ₂.
Co₂në₅.