ꞌA₂ liaꞌ₂ niog₅ lén₂ dsa₂ jmɨg₄ jë₁ca₂tóꞌ₂
3
ꞌNióꞌ₅ le₃ŋiꞌ₅₄ ꞌne₂ ján₃, jë₁ma₂ja₂quián₃ jmɨg₄ jë₁ca₂tóꞌ₂, ꞌŋio₅ lɨn₃ le₃gau₂, quian₅ ta₁ lé₂.
2 Jmɨg₄ jë₁ca₂tóꞌ₂ le₃chan₂ dsa₂ i₂jŋiaꞌ₅₄ ꞌnioi₃ guioin₅₄ bá₄ quianꞌ₅₄ cú₁; le₃chan₂ dsa₂ i₂jŋiaꞌ₅₄ jme₃jlánꞌ₁ jmo₃ róin₂ guioin₅₄; le₃chan₂ dsa₂ i₂lë₁të₂ꞌoꞌ₂ të₂ꞌoinꞌ₂ rɨinꞌ₅₄; le₃chan₂ dsa₂ i₂tsá₃ ma₃jme₃gan₃ Diú₄, i₂tsá₃ ma₃jme₃gan₃ chog₅₄-jmei₂ në́₃. Le₃chan₂ dsa₂ i₂tsá₃ ꞌe₂ ti₁ꞌmagꞌ₄ cha₂ ja₁coin₂, on₃ guëꞌ₂ ma₃jme₃góꞌ₃ juáꞌ₅ quióꞌ₅ Diú₄.
3 Le₃chan₂ dsa₂ i₂tsá₃ ꞌnio₃ rɨnꞌ₅₄, i₂tsá₃ ma₃ꞌe₂ ŋéi₂ dsɨ́₅ dsa₂ mɨ₂güɨ́g₃ rɨnꞌ₅₄; le₃chan₂ dsa₂ i₂tsá₃ ma₃jme₃ti₃ ꞌe₂ jág₁ lɨꞌ₅₄ quianꞌ₅₄ rɨinꞌ₅₄; le₃chan₂ dsa₂ të₂jág₁ i₂lë₁qui₃ꞌnɨ₃ rɨnꞌ₅₄; le₃chan₂ dsa₂ i₂tsá₃ ŋi₅, tsá₃ tɨin₂ ꞌa₂ liaꞌ₂ jme₃ꞌuán₂ dsɨ́₅; le₃chan₂ dsa₂ i₂lén₂ juɨ₁liaꞌ₂ jáꞌ₂ tsau₂ dsɨ́₅; le₃chan₂ dsa₂ i₂le₃ꞌioꞌ₅₄ ca₂le₃jë́₃ cosa dse₃.
4 Le₃chan₂ dsa₂ i₂qui₃jɨ́nꞌ₂ rɨnꞌ₅₄; le₃chan₂ dsa₂ i₂tsá₃ ꞌen₅₄ dsɨ́₅ jmo₃ të₂le₃ dséi₂ në₁ꞌe₂ caun₂ cosa jmo₃ juɨ₁le₅₄ bá₄ ꞌe₂ ca₂lë₃; ꞌŋio₅ cainꞌ₅₄ ꞌŋio₅ ŋi₅ jmo₃; le₃chan₂ dsa₂ i₂ꞌnoꞌ₂ jmáꞌ₃ juɨ₅ ja₁le₃chain₂ o₂ꞌŋió₃ o₂jŋia₃ dsɨ₅ bá₄ ꞌnióꞌ₄ jme₁ꞌniaiꞌ₂ Diú₄.
5 Le₃chan₂ dsa₂ i₂jmo₃ a₂ŋɨ́₄ lë₃ cuɨin₂₃ Diú₄, la₁ le₃léi₄ bá₄ ꞌa₂ liaꞌ₂ të₁i₃nioi₅₄ le₃chain₂, tsá₃ ꞌe₂ bí₂ quióꞌ₅ Diú₄ cha₂ ja₁coin₂.
Co₂dsia₅ jŋiagꞌ₃ cau₅, tsá₃ lë₁ꞌú₅ quianꞌ₅₄ dsa₂ i₂le₂ꞌéi₂.
6 Jë₄ quióꞌ₅ dsa₂ le₂ꞌéi₂, chan₂ i₂lɨn₅₄ i₂qui₂dsɨ₂tonꞌ₅₄ tsɨ₁ꞌné₅, qui₂jme₂gain₂₃ ꞌio₅₄ ꞌuan₅₄ i₂qui₂rë₂cánꞌ₄ dsáu₁ ꞌŋio₅ lɨn₃, i₂ma₂lë́₅ dsɨ́₅ jmo₃ ca₂le₃jë́₃ guë́₄ cosa ꞌlɨgꞌ₅₄.
7 Co₂tan₅₄ bá₄ jmo₂₃ liaꞌ₂ jmo₅ dsa₂ i₂ŋɨ́₄ lë₃ ꞌnio₃ le₃tɨn₂ jág₁, la₁ tsá₃ a₁jaun₂ quɨꞌ₅₄ jmɨg₄ le₃cuɨ́ꞌ₅ jág₁ tí₅ dsónꞌ₂.
8 Juɨ₁liaꞌ₂ ca₂jmo₃ on₃ dsa₂ ꞌlɨnꞌ₅₄ i₂jme₁chen₂ Janes quianꞌ₅₄ Jambres ca₂rë₃ꞌŋiai₅₄ Moisés, ján₃ bá₄ le₂jaun₂ ꞌioꞌ₅₄ dsa₂ ꞌéi₂ jág₁ dsau₅ dsónꞌ₂. Dsa₂ i₂le₂ꞌéi₂ në́₃ co₂dsia₅ ma₂ŋɨ́ꞌ₂ të₂le₃ jen₅ bá₄ dsɨ́₅, ꞌuɨg₅₄ jaun₂ tsá₃ ma₂ꞌe₂ tióꞌ₅ a₂le₃ŋɨ́ꞌ₂ dse₃ dsɨ́₅ juɨ₁liaꞌ₂ ja₁ŋɨ́ꞌ₂ dsɨ́₅ dsa₂ i₂ꞌén₂.
9 La₁ tsá₃ juaꞌ₅₄ ja₁uɨ́ng₂ dsi₁léin₂, ia₁ ca₂le₃jɨ́n₃ bá₄ dsa₂ le₃cuɨg₅ a₂lɨ́in₅ dsa₂ co₄, juɨ₁liaꞌ₂ ca₂i₃ŋɨ́₂ le₃on₃ i₂ca₂jme₃ꞌŋia₅₄ Moisés.
Jág₁ jë₁ca₂tóꞌ₂ a₂ca₂cuë₃ guë́₄ Pa₄ ca₂tsɨ́ꞌ₃ Timoteo
10 La₁ ꞌne₂ në́₃ ma₂ca₂rë₃tɨ́ngꞌ₃ bá₄ dse₃ jë₂ liaꞌ₂ lë́₅ juáꞌ₅ a₂ca₂jme₁tag₅ jniá₂; ma₂ŋiꞌ₅₄ ꞌa₂ liaꞌ₂ lɨ́ng₅, chang₂ ma₂guio₃; ma₂cuɨngꞌ₂ bá₄ ꞌe₂ ta₁ ma₂guio₃ jniá₂ jmo₂₃; ꞌéngꞌ₂ bá₄ ján₃ ꞌa₂ liaꞌ₂ ꞌén₂ jniá₂; jme₂juɨ́ngꞌ₁ bá₄ ꞌauꞌ₂ juɨ₁liaꞌ₂ ma₂ca₂jme₁juɨnꞌ₂ jniá₂ dsɨ₃; jme₂ꞌniógꞌ₃ bá₄ rɨ́ngꞌ₂ juɨ₁liaꞌ₂ ma₂jmo₃ jniá₂; tiangꞌ₃ bá₄ ján₃ juɨ₁liaꞌ₂ ca₂tió₃ jniá₂.
11 Ma₂qui₂ma₂ꞌein₃ dsa₂, ma₂qui₂ma₂ŋag₅₄ uɨg₅, juɨ₁liaꞌ₂ ca₂i₃ŋɨ́g₂ juɨg₂ ciudad Antioquía, juɨg₂ Iconio quianꞌ₅₄ juɨg₂ Listra në́₃. Qui₂ca₂co₃ꞌein₃ dsa₂, la₁ ne₄ ca₂le₃jë́₃ a₂në₅, ca₂lió₂ bá₄ Te₁guiꞌ₅₄.
12 Jaun₂ a₂dsónꞌ₂ bá₄ jaun₂, ca₂le₃jɨ́n₃ i₂ꞌnio₃ le₃chan₂ lë́₅ ꞌí₁ quián₅ Cristo Jesús, tion₅₄ le₂jaun₂ dsɨ₃ŋɨ́i₂ uɨg₅ co₂ꞌein₃ dsa₂.
13 La₁ dsa₂ ꞌlɨnꞌ₅₄ në́₃ quiainꞌ₅₄ ca₂le₃jɨ́n₃ dsa₂ i₂qui₂jme₂gau₅, tsá₃ ma₂ꞌe₂ dse₃ juaꞌ₅₄ le₃chain₂, ia₁ caun₂ le₃ꞌlɨinꞌ₅₄ bá₄, qui₂jme₃gau₂₃, qui₂rë₂gain₂ guioin₅₄ në́₃.
14 La₁ ꞌne₂ në́₃, nau₂ tiá₂ a₂ma₂ca₂rë₃tɨ́ngꞌ₃, caun₂ bá₄ ꞌei₅ ꞌauꞌ₂ jág₁ a₂ma₂ca₂rë₃ꞌéngꞌ₂. ꞌŊiagꞌ₂ bá₄ ŋiꞌ₅₄ ꞌein₂ ca₂jme₃tag₅.
15 Liaꞌ₂ conꞌ₂ bɨngꞌ₅₄ bá₄ ma₂ŋeꞌ₃ cuɨngꞌ₂ Si₂ jŋió₅ quióꞌ₅ Diú₄. Si₂ në₅ bá₄ a₂jiog₃ quiángꞌ₂, a₂tɨ́ngꞌ₄ të₂le₃ quianꞌ₅₄ Cristo Jesús ia₁ ꞌéngꞌ₂.
16 Ca₂le₃jë́₃ bá₄ Si₂ quióꞌ₅ Diú₄ ca₂lë₃ të₂le₃ quianꞌ₅₄ Jme₂dsí₂ quiáin₅, a₂tí₅ ta₁ jme₃tag₅ a₂dse₃, të₂jí₂, cheinꞌ₂ dsa₂ caun₂ juɨ₅ rë₂, jme₃tag₅ ꞌa₂ liaꞌ₂ i₂nio₄ dsa₂ juɨ₅ co₂dsau₅,
17 ia₁jaun₂ lén₂ dsa₂ quián₅ Diú₄ jan₂ dsa₂ ma₂ron₂, rë₂ rë₂qui₂rë₂ꞌan₂ dsɨ́₅, rë₂ꞌŋia₅ ca₂le₃jë́₃ a₂ꞌnióꞌ₅ quióꞌ₅ jaun₂ jmo₃ ca₂le₃jë́₃ ne₅₄ a₂dse₃.