Jan₂ ꞌlióg₂ dsen₃ quián₅ Jesucristo
2
La₁ ꞌne₂ në́₃ jón₃ quiáng₃, quenꞌ₂ bí₂ nau₂ tiá₂ ia₁ a₂ꞌua₁ dsɨ́₅ Diú₄ ca₂jmo₃ të₂le₃ quianꞌ₅₄ Cristo Jesús.
2 Ca₂le₃jë́₃ a₂ma₂neiꞌ₂ ma₂juáꞌ₃ jniá₂ të₃jɨn₄ juɨn₅ dsa₂ i₂ca₂të́₂ ne₄, jág₁ jaun₂ dsia₄ gu₂ dsa₂ i₂rë₂tiꞌ₅₄ i₂quɨꞌ₅₄ jmɨg₄ jme₃tɨn₅ i₂siánꞌ₂ táng₃.
3 ꞌŊiagꞌ₂ guëꞌ₂ në́₃, tiangꞌ₃ jmo₄ ŋagꞌ₅₄ uɨg₅ o₄quióꞌ₄ Jesucristo, jmo₄ bá₄ juɨ₁liaꞌ₂ ja₁jmo₅ jan₂ ꞌlióg₂ tióꞌ₃ dsɨ́₅ juɨ₁liaꞌ₂ jme₁ꞌein₅₄ ne₄ ꞌnei₂.
4 ꞌI₁jan₂ ꞌlióg₂ i₂jme₂ti₃ dse₃ ta₁ a₂chéinꞌ₅ juaꞌ₅₄ lé₂ le₃qui₂tiáin₂ tsɨ₃nei₃ jág₁ a₂ca₂tɨ́n₂ dsa₂ lë₁dsa₂, ia₁jaun₂ bá₄ lé₂ jme₃ti₃ conꞌ₂ ꞌŋio₂ dsɨ́₅ juɨg₅₄.
5 Ján₃ bá₄ le₂jaun₂ juɨ₁liaꞌ₂ dsa₂ i₂co₅, tsá₃ a₁jaun₂ juaꞌ₅₄ a₂líꞌ₂ ꞌe₂ líꞌ₂ në₁juaꞌ₂ tsá₃ ca₂quɨ́nꞌ₃ bí₂ co₃ conꞌ₂ dsi₂ten₅₄ quíꞌ₅ ꞌéiꞌ₃.
6 Ján₃ bá₄ le₂jaun₂ juɨ₁liaꞌ₂ dsa₂ i₂jmo₅ ta₁ ja₁nau₂, ca₂tɨ́in₂ bá₄ gue₃ le₂ꞌuɨg₅₄ conꞌ₂ ca₂tɨ́in₂ jë₁ma₂rau₂.
7 ꞌNioꞌ₂ ꞌauꞌ₂ a₂juáꞌ₅ jniá₂ la₂. Te₁guiꞌ₅₄ bá₄ jmo₃ le₃ŋɨ́gꞌ₂ ca₂le₃jë́₃.
8 Dsauꞌ₂ ꞌauꞌ₂ jmo₄, tsá₃ juɨ₁dsi₂ꞌén₂ ꞌauꞌ₂ Te₁guiꞌ₅₄ Jesucristo i₂ca₂jenꞌ₅₄ táng₃ jɨn₄ ꞌlag₄, i₂jme₁lɨ́n₄ tsɨ₁jon₂ David; a₂la₂ bá₄ jág₁ dse₃ a₂lión₂ dsa₂, a₂ꞌë́₅ jniá₂.
9 ꞌUɨg₅₄ jág₁ dse₃ la₂ bá₄, jmo₅ jniá₂ tióꞌ₅ dsɨ₃ ŋag₅₄ uɨg₅. Rë₂ꞌŋegꞌ₅₄ quianꞌ₅₄ ŋí₁ cadena co₂jmógꞌ₂ dsa₂ juɨ₁liaꞌ₂ ja₁jmáꞌ₂ dsa₂ jan₂ dsa₂ i₂rë₂cánꞌ₄ dso₄ juëꞌ₂. La₁ jág₁ dse₃ quióꞌ₅ Diú₄ në́₃, tsá₃ rë₂ꞌŋeꞌ₅₄ quianꞌ₅₄ ŋí₁ cadena.
10 Jaun₂ bá₄ lë₃, o₄quióꞌ₄ dsa₂ i₂ma₂quiónꞌ₂ Diú₄ jmo₂₃ tióꞌ₅ dsɨ₃ ca₂le₃jë́₃, ia₁jaun₂ bá₄ tɨ́nꞌ₄ ꞌéi₂ ján₃ le₃quióꞌ₅ Cristo Jesús ja₁lë́₄ co₂tág₅ co₂ꞌnéꞌ₅ co₂tan₅₄.
11 Të₃dsónꞌ₂ bá₄ dsau₅ a₂la₂:
Në₁juaꞌ₂ ca₂dsau₃ jniog₄ quianꞌ₅₄ Jesucristo,
ján₃ bá₄ le₂jaun₂ le₃chong₂ jniog₄ quiainꞌ₅₄.
12 Në₁juaꞌ₂ ca₂náu₂ jniog₄ tiá₂,a
ján₃ bá₄ le₂jaun₂ jme₁gon₂ jniog₄ quiainꞌ₅₄.
Në₁juaꞌ₂ tsá₃ tión₅ jniog₄ a₂cuɨin₅,
ján₃ bá₄ le₂jaun₂ tsá₃ ꞌag₃ jniog₄ ján₃.
13 Në₁juaꞌ₂ tsá₃ ca₂rë₃tei₅₄ jniog₄,
la₁ le₃tiꞌ₅₄ bá₄ ꞌŋiog₅,
ia₁ caun₂ jág₁ ma₂juáꞌ₂ Diú₄
tsá₃ a₁jaun₂ lé₂ juaꞌ₅₄ tsá₃ jme₃ti₃.
Juɨ₁liaꞌ₂ dsa₂ i₂jme₂ti₃ dse₃ ta₁ ne₄ Diú₄
14 A₂la₂ cheiꞌ₅₄ dsa₂ i₂jme₂tɨ́ngꞌ₁: dsá₂ dsɨ́₅ juɨ₁jmo₁₂ o₄quióꞌ₄ Te₁guiꞌ₅₄ a₂tsá₃ tsɨin₃ quiainꞌ₅₄ dsa₂, jág₁ a₂tsá₃ ta₁ tí₄, ia₁ në₁juaꞌ₂ tsɨn₅ dsa₂ në́₃, tsá₃ ꞌe₂ a₂dse₃ jmo₂₃, jŋiaꞌ₅₄ conꞌ₂ jmo₂₃ a₂gon₃ a₂ꞌén₂ dsa₂ i₂nag₅ bá₄.
15 Jmo₄ dsen₅₄ ꞌauꞌ₂ a₂jme₁jŋiagꞌ₅ ne₄ Diú₄ a₂léi₄ ma₂ca₂tiangꞌ₃ táu₂ a₂ma₂i₂ŋɨ́gꞌ₂, a₂lɨ́ngꞌ₅ jan₂ dsa₂ i₂jmo₅ ta₁, i₂tsá₃ ꞌe₂ juaꞌ₅₄ cha₂ a₂jéinꞌ₂ o₂guíꞌ₃, i₂jme₂tag₅ rë₂ jág₁ tí₅.
16 Tsá₃ lë₁cuɨ́n₅ jmɨg₄ juaꞌ₅₄ a₂dsiáꞌ₁ jág₁ quióꞌ₅ mɨ₂güɨ́g₃ a₂tsá₃ ta₁ tí₄. Ia₁ dsa₂ i₂co₂jmo₅ le₂jaun₂ caun₂ qui₂dsɨ₃léin₂ ne₄ juɨ₅ jë₄ cosa ꞌlɨgꞌ₅₄.
17 Cosa a₂jme₂tag₂₃ qui₂dsɨ₂jón₃ liaꞌ₂ jë₁qui₂dsɨ₂jón₃ caun₂ dso₄ a₂jmo₅ a₂dsa₂ nɨ₁ŋɨ₁ dsa₂. Le₂në₅ bá₄ ca₂lë₃ quianꞌ₅₄ Himeneo quianꞌ₅₄ Fileto në́₃.
18 Ma₂i₃léin₂ të₂le₃ cau₅ ja₁tsá₃ tí₅ jág₁, a₂qui₂jme₂tɨin₂₃ dsa₂ a₂juáꞌ₂ ma₂ca₂të́₂ bá₄ jmɨg₄ a₂jenꞌ₅₄ ꞌlag₄, jmo₂₃ a₂qui₂nió₅ i₂lɨn₅₄ ꞌa₂ liaꞌ₂ ꞌéin₂.
19 La₁ Diú₄ ma₂chiꞌ₃ caun₂ choꞌ₅₄ ꞌuɨg₅₄ a₂chíꞌ₅ tiá₂ co₂tan₅₄. A₂jaun₂ jángꞌ₅ léi₄ a₂juáꞌ₂: “I₂cuɨn₅ bá₄ Te₁guiꞌ₅₄ i₂lɨ́n₅ dsa₂ quiáin₅”;b jaun₂ në́₃: “Ca₂le₃jɨ́n₃ i₂quian₅ liaꞌ₂ chen₂ Cristoc ca₂tɨ́in₂ jmo₃ cau₅ ca₂le₃jë́₃ ja₁jmo₅ dsa₂ cosa ꞌlɨgꞌ₅₄.”
20 Juɨ₁liaꞌ₂ caun₂ dsi₂néi₂ pa₁, on₃juaꞌ₅₄ jmáꞌ₃ ca₂ne₅₄ cosa jláꞌ₁ a₂lë́₅ quianꞌ₅₄ cu₄nióg₄ quianꞌ₅₄ cu₄tiog₂ tioꞌ₅₄, ia₁ ján₃ bá₄ tioꞌ₅₄ cosa a₂lë́₅ quianꞌ₅₄ nɨ₁ꞌma₂, a₂lë́₅ quianꞌ₅₄ ti₁guaꞌ₅₄ ján₃. A₂lɨn₅₄ a₂lë́₅ ꞌí₁ a₂jmóꞌ₂ dsa₂ ta₁ jmáꞌ₃ liaꞌ₂ ne₄ a₂jláꞌ₁; a₂lɨn₅₄ guëꞌ₂ qui₂jmóꞌ₂ dsa₂ ta₁ liaꞌ₂ ꞌei₅ ne₅₄ cosa.d
21 Në₁juaꞌ₂ ca₂jŋiáꞌ₃ ꞌne₂ ca₂le₃jë́₃ ne₅₄ juɨ₅ ꞌlɨgꞌ₅₄, a₂jmóꞌ₂ jmáꞌ₃ ca₂ne₅₄ cosa dse₃, jaun₂ guë́₄ léngꞌ₂ liaꞌ₂ lë́₅ caun₂ nɨ₁uɨng₅ jláꞌ₁ a₂lë́₅ ꞌí₁, jaun₂ guë́₄ téngꞌ₃ ta₁ cáun₂ Juɨgꞌ₂ ꞌne₂ jmóꞌ₂ ca₂ne₅₄ ta₁ dse₃ quióꞌ₅.
22 Cuɨnꞌ₅₄ ꞌne₂ ca₂le₃jë́₃ ne₅₄ cosa ꞌlɨgꞌ₅₄ a₂ja₂ dsɨ́₅ dsa₂ jmo₃ të₁liaꞌ₂ meiꞌ₂. Quian₂ caun₂ juɨ₅ co₂dsau₅ a₂ꞌéngꞌ₂, a₂ꞌniógꞌ₃ rɨ́ngꞌ₂, a₂ꞌei₅ tei₄ ꞌauꞌ₂ quianꞌ₅₄ ca₂le₃jɨ́n₃ dsa₂ i₂ma₂le₁jë́₃ të₂dsɨ́₅, i₂jme₂juɨnꞌ₂ Te₁guiꞌ₅₄.
23 Tsá₃ lë₁tónꞌ₂ juɨ₅ ꞌe₂ jág₁ tsá₃ ta₁ tí₄ a₂tsɨ₂jɨn₅ dsa₂ i₂tsá₃ ma₂ꞌen₅₄ dsɨ́₅. Ia₁ ma₂ŋiꞌ₅₄, a₂jŋiaꞌ₅₄ dsiog₅ mɨꞌ₅₄ bá₄ a₂jaun₂.
24 Jan₂ dsa₂ i₂jme₂ti₃ ta₁ ne₄ Te₁guiꞌ₅₄ tsá₃ ca₂tɨ́in₂ tsɨ₃nei₃ jë₄ mɨꞌ₅₄, të₂le₃ ꞌnióꞌ₅ jme₃dsein₃ bá₄ quianꞌ₅₄ ca₂le₃jɨ́n₃. ꞌNióꞌ₅ léin₂ jan₂ dsa₂ i₂quɨꞌ₅₄ jmɨg₄ jme₃tɨin₂₃ dsa₂, juɨnꞌ₂ dsɨ́₅,
25 jmo₃ ꞌua₁ dsɨ́₅ jë₁cheinꞌ₃ juɨ₅ rë₂ juɨ₁liaꞌ₂ dsa₂ i₂nau₂ quen₅, conꞌ₂ tsá₃ ŋó₅ në₁juaꞌ₂ ca₂cuë₃ Diú₄ jmɨg₄ a₂le₃tsɨ́n₃ dsɨ́₅ dsa₂ ꞌéi₂, ia₁jaun₂ le₂në₅ le₃cuɨ́ꞌ₅ jág₁ tí₅;
26 ia₁jaun₂ lióin₂ ꞌuɨ́in₃ tsɨ₁cágꞌ₅ quióꞌ₅ i₂së₃dsen₃ i₂ca₂jo₃ ia₁jaun₂ jmo₃ a₂ꞌŋio₂ dsɨ́₅ ꞌéi₂.