6
Dsa₂ i₂jme₂ti₃ ta₁ ne₄ juɨg₅₄ ꞌnióꞌ₅ jme₃gain₃ juɨg₅₄ ia₁jaun₂ tsá₃ chi₂ꞌag₃ dsa₂ ꞌlɨgꞌ₅₄ ꞌɨin₃ Diú₄, on₃ guëꞌ₂ ꞌë₃ dsa₂ ꞌlɨgꞌ₅₄ ꞌe₂ jme₂tɨ́n₁ jniog₄ dsa₂.
2 Chi₂juaꞌ₂ chan₂ juɨg₅₄ i₂ꞌén₂ në́₃, tsá₃ juaꞌ₅₄ jaun₂ ꞌnióꞌ₅ jme₃go₃ dsa₂ meꞌ₂ guë́₄ ia₁ lɨ́in₅ dsa₂ ꞌén₂ rɨinꞌ₅₄. Co₂rë₂ bá₄ ꞌnióꞌ₅ jme₃gan₃ dsa₂ rɨinꞌ₅₄ conꞌ₂ rɨinꞌ₅₄ i₂ꞌén₂ të₂le₃ quióꞌ₅ Cristo. Të₂le₃ ꞌnióꞌ₅ jme₃ti₃ guë́₄ dsa₂ dse₃ ta₁ ne₁₂, ia₁ a₂lɨ́in₅ dsa₂ ꞌén₂ rɨnꞌ₅₄ i₂ꞌnió₄. Le₂në₅ jme₁tɨn₅ dsa₂, tioinꞌ₂ jág₁ në́₃.
ꞌAg₅ dsa₂ dse₃ dsɨ́₅ jmo₂₃ ꞌioꞌ₂ quianꞌ₅₄ juáꞌ₅
3 Chi₂juaꞌ₂ chan₂ i₂jme₂tag₅ le₂siáꞌ₂, tonꞌ₂ tsá₃ dsáu₅ dsɨ́₅ jág₁ dse₃ quióꞌ₅ Te₁guiꞌ₅₄ Jesucristo, on₃ guë́₄ juáꞌ₅ quióꞌ₅ Diú₄ në́₃,
4 a₂jŋiaꞌ₅₄ conꞌ₂ jme₂rón₂ ꞌŋiog₅ bá₄ dsa₂ ꞌéi₂, ꞌi₁ca₂juɨg₄ tsá₃ ꞌe₂ ŋɨ́ꞌ₂ dsɨ́₅. Në₂jag₄ bá₄ i₂dsoꞌ₅₄ bá₄ i₂le₂ꞌéi₂, ia₁ a₂jŋiaꞌ₅₄ ꞌnio₃ dsia₃ mɨꞌ₅₄ quianꞌ₅₄ jág₁. ꞌUɨg₅₄ jaun₂ ja₂ uɨg₅ dsɨ́₅ dsa₂, qui₂tsɨn₅ dsa₂, qui₂jnáꞌ₂ dsa₂ jág₁ uɨg₅ rɨinꞌ₅₄, tsá₃ ꞌe₂ dse₃ jɨ́n₂ dsa₂ rɨinꞌ₅₄ në́₃.
5 Lë́₅ bá₄ caun₂ jŋiaꞌ₅₄ niog₅ mɨꞌ₅₄ tsá₃ dsian₅ lë́₅ jɨn₄ dsa₂ i₂tsá₃ dse₃ qui₂dsɨ₂jiog₅ dsɨ́₅. Tsá₃ ma₃ꞌe₂ jág₁ dsau₅ cuɨ́ꞌ₅; lɨ́in₂ quianꞌ₅₄ juáꞌ₅ a₂jme₂tag₂₃, a₂të₃dsɨ₅₄ quióꞌ₅. [Co₂dsia₅ jŋiagꞌ₃ cau₅, tsá₃ lë₁ꞌú₅ quianꞌ₅₄ dsa₂ i₂le₂ꞌéi₂.]a
6 Dsau₅ bá₄ jaun₂ a₂quen₅ juáꞌ₅, la₁ia₁ a₂të₁dsɨ₅₄ guë́₄ lɨn₃ le₃quióꞌ₅ dsa₂ i₂le₁ꞌág₄ tei₄ dsɨ́₅, i₂chan₂ ma₂dsáu₅ dsɨ́₅ ꞌe₂ cha₂ quióꞌ₅.
7 Ia₁ ꞌi₁caun₂ tsá₃ ꞌe₂ le₁quian₁ jniog₄ ca₂o₃náu₅ mɨ₂güɨ́g₃ la₂, on₃ guëꞌ₂ cha₂ juaꞌ₅₄ a₂lé₂ le₃quiong₅₄ ꞌi₁caun₂ táng₃.
8 Ia₁ në₁juaꞌ₂ cha₂ bá₄ a₂que₅₄, cha₂ bá₄ tsɨnꞌ₅₄ jniog₄ në́₃, co₂jaun₂ bá₄ guëꞌ₂ jŋiaꞌ₅₄ ꞌnióꞌ₅ le₃ꞌéi₁ jniog₄ tei₄ dsɨ₅ jmó₁ ꞌioꞌ₂.
9 La₁ juɨ₁liaꞌ₂ dsa₂ i₂ꞌɨ́n₅ dsɨ́₅ le₃cha₂ cu₄ në́₃, tsɨ₂séinꞌ₂ dso₄, tsɨ₂séinꞌ₂ ꞌŋióꞌ₃ tsɨ₁cágꞌ₅ quióꞌ₅ i₂së₃dsen₃, ne₄ ca₂le₃jë́₃ a₂ꞌɨ́n₅ dsɨ́₅ a₂tsá₃ ta₁ tí₄, a₂jmógꞌ₂ dain₅₄, a₂dsɨ₂ꞌéin₂ në́₃.
10 Ia₁ a₂ŋɨ́₄ lë₃ ꞌɨ́n₅ dsɨ́₅ dsa₂ le₃cha₂ cu₄, ꞌuɨg₅₄ jaun₂ lé₂ le₃jiog₃ ca₂le₃jë́₃ ne₅₄ juɨ₅ ꞌlɨgꞌ₅₄. Chan₂ i₂lɨn₅₄ ia₁ a₂ꞌɨ́n₅ dsɨ́₅ a₂jaun₂, ma₂i₂léin₂ cau₅ juɨ₅ a₂jme₁ꞌéin₂; a₂ꞌuɨin₅₄ guioin₅₄ ma₂chain₂ jmɨ₁uɨg₅ ꞌŋio₅ lɨn₃.
Dsa₂ i₂quɨ́nꞌ₅ bí₂ ia₁ ꞌéin₂
11 La₁ ꞌne₂, dsa₂ quián₅ Diú₄, co₂dsia₅ cuɨnꞌ₅₄ ca₂le₃jë́₃ a₂në₅. Co₂dsia₅ ŋɨ₄ bá₄ quian₂ caun₂ juɨ₅ co₂dsau₅, jme₁dsau₅ quiángꞌ₂ të₂le₃ quióꞌ₅ Diú₄, caun₂ ꞌén₂ bá₄, chanꞌ₂ tiá₂ jág₁, caun₂ jme₁ꞌnió₄ rɨ́ngꞌ₂, jme₁juɨnꞌ₂ ꞌauꞌ₂, jmo₄ megꞌ₂ në́₃.
12 Quenꞌ₂ bí₂ dse₃ o₄quióꞌ₄ jág₁ a₂ꞌéin₂ jniog₄, juɨ₁liaꞌ₂ jan₂ ꞌlióg₂ quɨ́nꞌ₅ bí₂ ne₄ ꞌnei₂. Tioꞌ₂ gogꞌ₂ ja₁le₃chan₂ co₂tan₅₄ jme₂dsí₂ quiángꞌ₂, ia₁ ta₁ jaun₂ ca₂të₃ Diú₄. Ia₁ dse₃ bá₄ ma₂ŋeꞌ₃ jmoꞌ₂ jɨn₄ dsa₂, a₂cuë́ꞌ₂ léi₄ a₂ꞌéngꞌ₂.
13 Në₃ në́₃, jág₅ bá₄ Diú₄ i₂jmo₅ jénꞌ₃ ca₂le₃jɨ́n₃, jág₅ bá₄ Jesucristo në́₃ i₂ca₂jángꞌ₃ dse₃ jág₁ dsau₅ ne₄ Poncio Pilato, juɨ́g₂ jniá₂ ꞌne₂
14 a₂jme₁tiꞌ₄ ꞌéiꞌ₃ në₅ tsá₃ qui₂rë₂ꞌióg₄ ia₁jaun₂ tsá₃ cuɨn₅ jmɨg₄ juaꞌ₅₄ të₃jí₂ dsa₂ ca₂liaꞌ₂ ca₂të́₂ jmɨg₄ i₁guanꞌ₂ Te₁guiꞌ₅₄ Jesucristo quián₂.
15 Jë₁ma₂ca₂të́₂ jmɨg₄ jaun₂, ia₁ jŋiaꞌ₅₄ liaꞌ₂ ꞌŋiog₅ bá₄ Te₁guiꞌ₅₄ Diú₄ jmo₃. ꞌŊiog₅ bá₄ lɨ́in₅ i₂jŋió₅ i₂ꞌuanꞌ₂, i₂lɨ́n₅ Rag₅₄ quián₅ rag₅₄, Te₁guiꞌ₅₄ quián₅ ca₂le₃jɨ́n₃ juɨg₅₄ canꞌ₅₄ i₂chan₂ ne₄ guaꞌ₅₄ ꞌuë₃ la₂.
16 Jŋiaꞌ₅₄ liaꞌ₂ jan₂ ꞌéi₂ bá₄ i₂chan₂ i₂ca₂liaꞌ₂ o₁lɨ́gꞌ₂ jmɨg₄ tsá₃ jón₂, i₂chan₂ i₂guá₅ ja₁jniá₂ si₂ ja₁ca₂liaꞌ₂ ꞌi₁jan₂ tsá₃ ꞌein₂ quɨꞌ₅₄ jmɨg₄ jme₃quián₃, i₂tsá₃ ꞌein₂ dsa₂ mɨ₂güɨ́g₃ ma₂jág₂, on₃ guëꞌ₂ quɨꞌ₅₄ jmɨg₄ jág₂. ¡Ca₂tɨ́n₂ bá₄ Diú₄ ca₂le₃jë́₃ bí₂! ¡Quióꞌ₅ ꞌéi₂ bá₄ jme₃juagꞌ₂ dsa₂ co₂tan₅₄! ¡A₂méi₃*!
17 Juɨ₁liaꞌ₂ i₂cha₂ cu₄ mɨ₂güɨ́g₃ la₂, cheiꞌ₅₄ tsá₃ lë₁juɨ₁jmo₁₂ róin₂, on₃ guëꞌ₂ juɨ₁jmo₅₄ ꞌɨ́n₂ dsɨ́₅ le₃quióꞌ₅ cu₄, ia₁ a₂lë₁lé₂ dsɨ₃ꞌén₂ bá₄ cu₄. Co₂dsia₅ guë́₄ jmo₅ juɨ₁jmo₁₂ ꞌɨ́n₂ dsɨ́₅ të₂le₃ quióꞌ₅ Diú₄ jénꞌ₃ i₂jénꞌ₅ ca₂le₃jë́₃ liaꞌ₂ qui₂rë₂tsón₂ ia₁jaun₂ jmó₁ ꞌioꞌ₂ le₃chong₂.
18 Cheiꞌ₅₄ juɨ₁jmo₁₂ a₂dse₃ ꞌŋio₅ lɨn₃, juɨ₁jmo₁₂ ꞌŋio₂ dsɨ́₅ juɨ₁jme₂ꞌoin₅₄ rɨinꞌ₅₄ quianꞌ₅₄ ꞌe₂ a₂cha₂ ca₂la₂ quióꞌ₅.
19 Jaun₂ le₂në₅ qui₂dsɨ₃tsón₃ ꞌuɨg₅₄ ja₁náu₃ tiá₂ të₂le₃ ne₄ juɨ₅ ja₁ŋó₄, tóꞌ₃ gu₂ ja₁le₃chain₂ dsónꞌ₂.
Jág₁ a₂ca₂tsɨ́ꞌ₃ guë́₄ Timoteo jë₁ca₂tóꞌ₂
20 ꞌNe₂ Timoteo, dse₃ jmo₄ ꞌí₁ a₂ma₂niog₅ neꞌ₅₄. Tsá₃ lë₁tónꞌ₂ juɨ₅ jág₁ a₂tsá₃ ta₁ tí₄ a₂niog₅ dsia₅ dsa₂ mɨ₂güɨ́g₃ i₂tsá₃ ꞌén₂. Ŋí₂ dse₃, tsá₃ tónꞌ₂ juɨ₅ jág₁ quióꞌ₅ dsa₂ i₂ŋɨ́₄ lë₃ ꞌŋio₅ ŋi₅ jmo₅, ia₁ on₃juaꞌ₅₄ dsau₅ dsónꞌ₂ tɨn₂ dsa₂ ꞌéi₂, ia₁ tsá₃ jme₂tag₂₃ liaꞌ₂ conꞌ₂ lë́₅ juáꞌ₅ dse₃ dsónꞌ₂.
21 Ia₁ i₂lɨn₅₄ dsa₂ i₂ca₂rë₃ꞌén₂ jág₁ quióꞌ₅ dsa₂ le₂ꞌéi₂ ma₂i₂cóinꞌ₅ bá₄ táng₃ juɨ₅ quióꞌ₅ Diú₄ a₂jme₁ꞌéin₂.
Juɨ₁jme₂guꞌ₅₄ bá₄ Diú₄ quiángꞌ₂.
Co₂në₅.