ꞌA₂ liaꞌ₂ ꞌnióꞌ₅ jmo₃ jɨn₄ dsa₂ ꞌén₂ rɨinꞌ₅₄
5
Tsá₃ lë₁të₂jén₅ juɨ₁liaꞌ₂ dsa₂ ma₂guenꞌ₂. Të₂le₃ ꞌnióꞌ₅ tioinꞌ₂ jág₁, jmo₄ bá₄ ꞌauꞌ₂ co₂ꞌnióꞌ₄ ŋéiꞌ₅. Ján₃ guëꞌ₂ le₂jaun₂ dsa₂ ŋeꞌ₂ chiꞌ₂, jmo₄ ꞌauꞌ₂ jɨin₅₄ liaꞌ₂ ja₁jɨngꞌ₅₄ rɨ́ngꞌ₂.
2 Ján₃ guëꞌ₂ le₂jaun₂ juɨ₁liaꞌ₂ dsa₂ mɨ́₂ ma₂guenꞌ₂ në́₃, jme₁ꞌniói₄ juɨ₁liaꞌ₂ ꞌniógꞌ₃ chogꞌ₂. Le₂jaun₂ guëꞌ₂ juɨ₁liaꞌ₂ ꞌio₅₄ chiꞌ₂, jɨin₅₄ jme₁ꞌniói₄ juɨ₁liaꞌ₂ ja₁ꞌniógꞌ₃ ꞌio₅₄ rɨ́ngꞌ₂ ján₃, a₂le₁jë́₃ ꞌauꞌ₂ co₂ŋeiꞌ₅₄.
3 Juɨ₁liaꞌ₂ ꞌio₅₄ ꞌnág₂ guëꞌ₂ në́₃, jme₁ꞌoin₅₄ në₁juaꞌ₂ léi₄ a₂ꞌnióꞌ₅ dsónꞌ₂ quióꞌ₅.
4 La₁ në₁juaꞌ₂ jan₂ dsa₂ mɨ́₂ ꞌnág₂ chan₂ chiꞌ₂ quiáin₅ o₃ chiꞌ₂ dsio₅₄ ꞌe₂, i₂ꞌéi₂ bá₄ le₂ꞌuɨg₅₄ ca₂tɨ́n₂ jme₃tɨn₅ dsɨ́₅ nio₃ ne₅₄ chog₅₄, a₂jéinꞌ₅ dsɨ́₅ jme₃ꞌnioi₃ chog₅₄ ia₁ ma₂ca₂jme₃cauꞌ₅₄. Ia₁ le₂në₅ bá₄ dse₃, ꞌŋio₂ dsɨ́₅ Diú₄.
5 ꞌIo₅₄ ꞌnág₂ i₂të₃dsónꞌ₂ tsá₃ ꞌein₂ chan₂ quián₅, caun₂ a₂jaun₂ bá₄ chain₂ ꞌɨ́n₂ dsɨ́₅ le₃quióꞌ₅ Diú₄ bá₄, chi₂léinꞌ₂ Diú₄ ꞌuë₂-jmɨ₂ mɨ₂₃ ꞌe₂ ꞌnióꞌ₅ quióꞌ₅.
6 La₁ në₁juaꞌ₂ ꞌio₅₄ ꞌnág₂ i₂lë₁ŋɨ₅ cuë́ꞌ₅ o₂ꞌŋió₃ o₂jŋia₃ dsɨ₅ ꞌŋiog₅ në́₃, co₂ꞌnióꞌ₄ ꞌlag₄ bá₄ ꞌéi₂ chan₂.
7 Jaun₂ ca₂le₃jë́₃ a₂në₅ cheiꞌ₅₄ dsa₂ jaun₂ tsá₃ ꞌe₂ cha₂ juaꞌ₅₄ a₂cuɨn₃ jmɨg₄ ꞌag₃ dsa₂ ꞌlɨgꞌ₅₄.
8 Në₁juaꞌ₂ chan₂ i₂tsá₃ juɨ₅ tónꞌ₂ ꞌe₂ ta₁ chain₂ quiainꞌ₅₄ i₂chan₂ quiáin₅, la₁ ꞌŋio₅ lɨn₃ guë́₄ në₁juaꞌ₂ tsá₃ tóinꞌ₂ juɨ₅ i₂chan₂ dsi₂néi₂ quióꞌ₅ ꞌŋiog₅ në́₃, ma₂dsia₃ cau₅ a₂ꞌéin₂; i₂le₂ꞌéi₂ lɨ́n₅ tson₂ guë́₄ liaꞌ₂ dsa₂ i₂tsá₃ ꞌén₂.
9 ꞌNióꞌ₅ të₃ton₅₄ ne₄ si₂ jmáꞌ₃ ꞌio₅₄ ꞌnág₂ i₂ma₂tionꞌ₅₄ lë́₅ guë́₄ ma₃ꞌnagꞌ₂ ne₂guióg₂ ŋi₂, i₂ma₂jŋia₃ jan₂ bá₄ dsɨ₂i₂gu₂.
10 ꞌNióꞌ₄ dsa₂ i₂ma₂cuɨn₅ dsa₂ dse₃, a₂dsónꞌ₂ bá₄ dsein₃, dse₃ bá₄ ta₁ jë₁ma₂já₅, juɨ₁liaꞌ₂ chi₂juaꞌ₂ ma₂ca₂jme₃cainꞌ₅₄ chiꞌ₂-guein₂ quiáin₅, chi₂juaꞌ₂ ma₂qui₂ma₂cuë₃ bá₄ ꞌŋio₂ dsɨ́₅ dsi₂néi₂ quióꞌ₅ ma₂qui₂ma₂jŋia₃ dsa₂, chi₂juaꞌ₂ ma₂ca₂jme₃ti₃ bá₄ ta₁ ꞌŋio₂ dsɨ́₅ ne₄ dsa₂ rɨnꞌ₅₄ jniog₄ i₂ꞌén₂,a tsá₃ jmo₂₃ dsɨ́₅ juaꞌ₅₄ quein₅ guë́₄ conꞌ₂ guë́₄ rɨinꞌ₅₄, chi₂juaꞌ₂ ma₂ca₂jme₃ꞌoin₅₄ bá₄ i₂chan₂ o₂i₁ dsɨ₅, chi₂juaꞌ₂ ma₂jmo₃ ca₂le₃jë́₃ ne₅₄ a₂dse₃ në́₃.
11 La₁ tsá₃ të₃tonꞌ₅₄ ne₄ si₂ ꞌio₅₄ ꞌnág₂ i₂tionꞌ₅₄ meꞌ₂ guë́₄ ŋi₂, ia₁ jë₁ma₂ca₂lë₃ dsɨ́₅ ꞌŋio₅ lɨn₃ guë́₄ tónꞌ₂ juɨ₅ a₂mɨ₅ dsɨ́₅ conꞌ₂ guë́₄ a₂jme₃ti₃ ta₁ a₂tióin₂ ne₄ Cristo, gu₂ bá₄ tiá₂ ꞌnio₃ jéinꞌ₃ táng₃.
12 Le₂në₅ bá₄ rë₂cáinꞌ₄ ia₁ tsá₃ ca₂rë₃tiꞌ₅₄ jág₁ quióꞌ₅ a₂ma₂cuë₃.
13 Ján₃ guëꞌ₂ conꞌ₂ tsá₃ ŋó₅ në₁juaꞌ₂ ca₂rë₃tɨ́n₃ dsɨ́₅ jŋiaꞌ₅₄ i₂nioi₅₄ të₂juɨin₂ tsɨ₁jɨin₁₂. Ján₃ guëꞌ₂ le₂jaun₂, on₃juaꞌ₅₄ rëꞌ₂ jŋiaꞌ₅₄ tɨin₂ i₂nioi₅₄ tsɨ₁jɨin₁₂, dsɨ₂léin₂ le₂ꞌí₁ ꞌné₅ tonꞌ₂ qui₂i₂quian₅₄ jág₁ a₂la₂ a₂ó₃, qui₂tiáin₂ ja₁tsá₃ ca₂tɨ́in₂.
14 Jaun₂ lë₃ ꞌnio₃ jniá₂ co₂ŋeiꞌ₅₄ jénꞌ₂ táng₃ gu₂ juɨ₁liaꞌ₂ ꞌio₅₄ ꞌnág₂ chiꞌ₂, juɨ₁le₂chan₂ chiꞌ₂-guein₂ quiáin₅, juɨ₁lein₅₄ bá₄ dsa₂ i₂niog₅ gu₂ dsi₂néi₂. Jaun₂ tsá₃ cuɨn₃ jmɨg₄ jmo₃ i₂së₃dsen₃ lé₂ dsɨ́₅ dsa₂ ꞌag₃ ꞌlɨgꞌ₅₄.
15 Ia₁ i₂lɨn₅₄ ma₂i₂léin₂ cau₅, ꞌein₂₃ Satanás.
16 Chi₂juaꞌ₂ chan₂ rɨnꞌ₅₄ jniog₄ dsa₂ ŋeꞌ₂, o₃ dsa₂ mɨ́₂ ꞌe₂,b chi₂juaꞌ₂ chan₂ dsa₂ ꞌnág₂ quióꞌ₅, ne₄ ꞌéi₂ nio₃ ꞌe₂ ꞌnióꞌ₅ quióꞌ₅ dsa₂ ꞌnág₂, ia₁jaun₂ tsá₃ ŋɨ́₄ lë₃ guei₂ cán₂ guáꞌ₅, ia₁jaun₂ bá₄ cuɨn₃ jmɨg₄ lé₂ le₃jme₃ꞌo₅₄ guáꞌ₅ jmáꞌ₃ quióꞌ₅ ꞌio₅₄ ꞌnág₂ i₂ꞌnióꞌ₅ dsónꞌ₂ quióꞌ₅.
17 Dsa₂ canꞌ₅₄ i₂jmo₅ ꞌéiꞌ₃ dse₃ guáꞌ₅, tɨn₃ ráun₂ lë́₅ guë́₄ ꞌnióꞌ₅ jme₃go₃ dsa₂, jág₂ dsa₂ dse₃. La₁ ꞌŋio₅ lɨn₃ guë́₄ ca₂tɨ́n₂ dsa₂ jɨ́in₂ dse₃ jme₃ꞌnioi₃ i₂jmo₅ ta₁ i₂cuë₅ jág₁ jme₂tag₂₃.
18 Ia₁ ne₄ Si₂ quióꞌ₅ Diú₄ juáꞌ₂: “Tsá₃ lë₁tóꞌ₂ ꞌnei₅₄ mɨ₂ꞌo₄ ca₁juɨ₅ i₂jmo₅ ta₁ qui₂tsóꞌ₅ i₂ꞌuɨ́g₂ mɨ́g₂ trigo.”c Ján₃ guëꞌ₂ le₂jaun₂ juáꞌ₂ Si₂: “Ca₂tɨ́n₂ bá₄ dsa₂ i₂jmo₅ ta₁ gue₃ ꞌliainꞌ₅₄.”d
19 Tsá₃ lë₁tónꞌ₂ juɨ₅ në₁juaꞌ₂ chan₂ ꞌein₂ dsia₅ dso₄ ꞌnɨi₂₃ jan₂ guiꞌ₅₄ canꞌ₅₄ në₁juaꞌ₂ tsá₃ tión₂ on₃-ún₂ dsa₂ i₂jángꞌ₃ jág₁ dsau₅.e
20 La₁ juɨ₁liaꞌ₂ dsa₂ i₂caun₂ ꞌno₅ dso₄, të₂jéin₃ të₃jë₄ ja₁le₁ŋɨꞌ₂ ꞌniaꞌ₂ ca₂le₃jɨ́ngꞌ₃, ia₁jaun₂ të₃ ne₄ ca₂le₃jɨ́n₃ jaun₂ le₃góꞌ₃ ján₃.
21 O₄quióꞌ₄ Diú₄, quianꞌ₅₄ Te₁guiꞌ₅₄ Jesucristo, quianꞌ₅₄ ca₂le₃jɨ́n₃ ángeles i₂ma₂quióinꞌ₂, cuë₅ jniá₂ ꞌéiꞌ₃ la₂ ia₁jaun₂ jme₁tiꞌ₄ ꞌne₂: Tsá₃ jmóꞌ₂ juaꞌ₅₄ a₂jɨngꞌ₅₄ jma₃quén₅ rɨ́ngꞌ₂ a₂jmóꞌ₂ i₂lɨn₅₄ të₁jéngꞌ₄, i₂lɨn₅₄ guëꞌ₂ tsá₃ të₁jéngꞌ₄. Co₂rë₂ bá₄ të₁jéngꞌ₄ conꞌ₂ i₂ca₂tɨ́n₂ dsɨ₃jen₅₄.
22 Tsá₃ caun₂ lë₁ꞌɨ́n₅f deꞌ₂ të₂le₃ dséi₂ dsa₂ i₂jiog₃ cán₂ ne₄ juɨ₅ guáꞌ₅, conꞌ₂ tsá₃ ŋó₅ në₁juaꞌ₂ le₃jiog₄ ꞌne₂ ca₂rë₃cángꞌ₂ dsáu₁ i₂siánꞌ₂. Jmo₄ ꞌí₁ a₂changꞌ₂ le₁jë́₃ të₂ꞌauꞌ₂.
23 Ia₁ a₂rë₂dsongꞌ₅₄ i₂gúꞌ₃ ton₅ dso₄ togꞌ₂, tsá₃ ma₃ꞌnióꞌ₅ ꞌagꞌ₅₄ jmáꞌ₃ jmɨg₂; ꞌénꞌ₂ ca₂la₂ vino ján₃.