Dsa₂ i₂dsɨ₃lén₂ cau₅, qui₃tí₂ jág₁ quióꞌ₅ Diú₄
4
Liaꞌ₂ tí₅ jág₁ dsónꞌ₂ bá₄ ma₂ca₂juáꞌ₂ Jme₂dsí₂ quián₅ Diú₄ ꞌa₂ liaꞌ₂ lé₂ jmɨg₄ jë₁ca₂tóꞌ₂. I₂lɨn₅₄ dsa₂ dsɨ₃lén₂ cau₅, tí₂ jág₁ a₂ꞌéin₂ jniog₄, tónꞌ₂ juɨ₅ jág₁ quióꞌ₅ jme₂dsí₂ i₂juɨ₁gan₂, jág₁ juáꞌ₅ a₂já₅ quióꞌ₅ je₂naꞌ₅₄ në́₃,
2 a₂jme₂tag₅ dsa₂ i₂jŋiaꞌ₅₄ qui₂le₁ꞌág₄ dse₃ o₁ne₁, i₂co₂jmo₅ jág₁ të₂jág₁, i₂tsá₃ ma₃ꞌe₂ qui₂dsɨ₂jŋi₅ dsɨ́₅ ia₁ ma₂lë́₅ dsɨ́₅ në₂jag₄ bá₄ a₂ma₂cáu₂ quianꞌ₅₄ nɨ₁ŋí₁ dséi₂.
3 Jme₃tag₂₃ a₂tsá₃ ma₃jénꞌ₂ dsa₂ gu₂; a₂lɨn₅₄ má₃ guëꞌ₂ në́₃ tsá₃ ma₃cuë₃ jmɨg₄ juaꞌ₅₄ a₂guë́ꞌ₃ guë́₄ dsa₂, o₁jŋiaꞌ₅₄ ca₂jmo₃ Diú₄ ca₂le₃jë́₃ ne₅₄ cosa ia₁jaun₂ guë́ꞌ₃ dsa₂ i₂ꞌén₂ i₂cuɨ́ꞌ₅ jág₁ dsau₅, a₂cuë₃ ti₁ꞌmagꞌ₄ në́₃.
4 A₂dse₃ jë₂ bá₄ a₂ca₂jmo₃ Diú₄. Jaun₂ dse₃ bá₄ guéi₁ jniog₄ cuë₅₄ ti₁ꞌmagꞌ₄ Diú₄, tsá₃ ꞌnióꞌ₅ juaꞌ₅₄ a₂tsá₃ guéi₁.
5 Ia₁ ma₂ron₅ jág₁ quióꞌ₅ Diú₄, juáꞌ₂ a₂le₁jë́₃ bá₄ jaun₂. Jme₂jŋió₃ bá₄ Diú₄ jme₁cuë₅ dsa₂ ti₁ꞌmagꞌ₄.
Dsa₂ i₂jme₂ti₃ dse₃ ne₄ Jesucristo
6 Chi₂juaꞌ₂ jme₂tɨ́ngꞌ₁ dsa₂ rɨnꞌ₅₄ jniog₄ le₂në₅, léngꞌ₂ dsa₂ dsen₃ i₂jme₂ti₃ ta₁ ne₄ Jesucristo. Qui₂rë₂tangꞌ₅₄, rë₂beiꞌ₂ ꞌauꞌ₂ quianꞌ₅₄ jág₁ quióꞌ₅ Diú₄ a₂ꞌéngꞌ₂, juáꞌ₅ dse₃ a₂chanꞌ₅₄ në́₃.
7 La₁ tsá₃ lë₁tónꞌ₂ juɨ₅ jág₁ co₄ a₂lë₁dsia₅ dsa₂ mɨ₂güɨ́g₃, on₃ guëꞌ₂ tónꞌ₂ juɨ₅ cuentos a₂le₁dsia₅ guiongꞌ₂ canꞌ₅₄ në₃. Caun₂ jme₁dsau₅ quiángꞌ₂ të₂le₃ quióꞌ₅ Diú₄.
8 Dsónꞌ₂ a₂dse₃ bá₄ jaun₂ jme₂dsau₅ dsa₂ cho₅ dséi₂ nɨ₁ŋɨ₁₂ juɨ₁liaꞌ₂ jme₁co₂₃. La₁ ꞌŋio₅ lɨn₃ guë́₄ dse₃ jme₃dsau₅ dsa₂ të₂le₃ quióꞌ₅ jme₂dsí₂ quióꞌ₅ a₂ꞌnioi₃ Diú₄. Ia₁ a₂në₅ bá₄ cuë₃ a₂dse₃ quián₂ jniog₄ mɨ₂güɨ́g₃ caun₂, on₃juaꞌ₅₄ jmáꞌ₃ ne₄ guaꞌ₅₄ ꞌuë₃ la₂.
9 Ca₂le₃jɨ́n₃ bá₄ ꞌnióꞌ₅ le₃ꞌén₂ jág₁ la₂, ia₁ të₃dsónꞌ₂ bá₄ dsau₅.
10 A₂jaun₂ bá₄ lë₃ dsen₅₄ dsɨ₅ jmo₂ jniog₄ ta₁, qui₂jnáuꞌ₂ dsa₂ jág₁ uɨg₅, ia₁ ma₂ca₂ꞌéi₁ jniog₄ caun₂ dsɨ₅ të₂le₃ quióꞌ₅ Diú₄ jénꞌ₃ të₃dsónꞌ₂ i₂lɨ́n₅ i₂lió₂ quián₅ ca₂le₃jɨ́n₃ dsa₂, la₁ të₂le₃ dsen₅₄ guë́₄ quián₅ dsa₂ i₂ꞌén₂.
11 Jág₁ në₅ ca₂tɨ́ngꞌ₂ juɨgꞌ₅₄ dsa₂, jme₁tɨinꞌ₂ në́₃.
12 Tsá₃ lë₁cuɨ́n₅ jmɨg₄ juaꞌ₅₄ a₂tsá₃ jme₃go₃ dsa₂ ia₁ a₂megꞌ₂. Të₂le₃ ꞌŋio₅ lɨn₃ guë́₄ ca₂tɨ́ngꞌ₂ cánꞌ₁ ne₄ juɨ₅ a₂jmóꞌ₂ a₂dse₃ ia₁jaun₂ jág₃ ca₂le₃jɨ́n₃ dsa₂ i₂ꞌén₂: juɨ₁liaꞌ₂ ꞌa₂ liaꞌ₂ lë́₅ jág₁ quiángꞌ₂, jme₁dsiaꞌ₂ jág₁, juɨ₁liaꞌ₂ ꞌa₂ liaꞌ₂ changꞌ₂ ŋɨꞌ₂, juɨ₁liaꞌ₂ ꞌa₂ liaꞌ₂ ꞌnióꞌ₃ ꞌne₂ dsa₂ rɨ́ngꞌ₂, juɨ₁liaꞌ₂ ꞌa₂ liaꞌ₂ ꞌéngꞌ₂, juɨ₁liaꞌ₂ ꞌa₂ liaꞌ₂ changꞌ₂ a₂le₁jë́₃ të₂ꞌauꞌ₂ në́₃.
13 Të₁liaꞌ₂ tsá₃ ma₂dsióg₃ jniá₂, ꞌí₁ Si₂ quióꞌ₅ Diú₄ jɨn₄ dsa₂; tioinꞌ₂ jág₁ dse₃ jme₁tɨin₅ në́₃.
14 Tsá₃ juɨ₁dsi₂ꞌén₂ ꞌauꞌ₂ a₂ma₂cuë₃ Diú₄ a₂ma₂tɨngꞌ₂ a₂ca₂ŋɨgꞌ₂ të₂le₃ quianꞌ₅₄ dsa₂ canꞌ₅₄ rɨnꞌ₅₄ jniog₄ i₂ca₂quiog₂ gu₂ ne₄ quiángꞌ₂.
15 Dsen₅₄ ꞌauꞌ₂ jmo₄ jme₁dsau₅ quiángꞌ₂ ca₂le₃jë́₃ a₂në₅, ia₁jaun₂ le₃líꞌ₄ dsa₂ a₂ma₂dsɨ₂jŋiágꞌ₄ a₂tɨngꞌ₂.
16 Jmo₄ ꞌí₁ ꞌŋiagꞌ₂, ján₃ guëꞌ₂ le₂jaun₂ quianꞌ₅₄ juáꞌ₅ a₂jme₂tɨ́ngꞌ₁ dsa₂. Caun₂ jmo₄ bá₄ a₂në₅. Në₁juaꞌ₂ ca₂jme₁tiꞌ₄ ca₂le₃jë́₃ a₂në₅, longꞌ₅₄ ꞌŋiagꞌ₂, ján₃ guëꞌ₂ longꞌ₅₄ ca₂le₃jɨ́n₃ i₂nag₅ jág₁ quiángꞌ₂.