ꞌA₂ liaꞌ₂ ca₂tɨ́n₂ jmo₃ juɨ₁liaꞌ₂ dsa₂ i₂cán₂ ne₄ juɨ₅ quián₅ guáꞌ₅
3
Dsónꞌ₂ bá₄ dsau₅ jág₁ la₂: chi₂juaꞌ₂ ꞌein₂ ꞌniaꞌ₂ ꞌnio₃ cán₂ ne₄ juɨ₅ jŋia₃ rɨnꞌ₅₄,a ta₁ dse₃ bá₄ jaun₂ ꞌɨ́n₅ dsɨ₅.
2 Jaun₂ lë₃ juáꞌ₅ jniá₂, dsa₂ i₂chénꞌ₅ ne₄ juɨ₅a tsá₃ ꞌnióꞌ₅ juaꞌ₅₄ cha₂ ja₁coin₂ a₂lé₂ le₃bógꞌ₂ dsa₂ dso₄, juaꞌ₅₄ a₂ꞌag₃ ꞌlɨgꞌ₅₄. Ján₃ guëꞌ₂, jan₂ bá₄ ꞌio₅₄ quiáin₅ i₂guá₅ quiainꞌ₅₄; ꞌen₅₄ dsɨ́₅ ꞌnióꞌ₅ léin₂; liꞌ₅₄ quióꞌ₅, i₂ŋɨ₅ conꞌ₂ dse₃ jniá₂, qui₂guein₃ dsa₂ dsi₂néi₂ quióꞌ₅, quɨꞌ₅₄ jmɨg₄ jme₃tɨin₂₃ dsa₂.
3 Tsá₃ ꞌnióꞌ₅ ŋɨ₃ ꞌein₅, on₃ guëꞌ₂ qui₃ꞌno₃ mɨꞌ₅₄, on₃ guëꞌ₂ ꞌnióꞌ₅ jmo₃ ꞌɨ́n₅ dsɨ́₅ juaꞌ₅₄ a₂lë₁ꞌnio₃ líꞌ₂ cu₄ quióꞌ₅ dsa₂. Të₂le₃ ꞌnióꞌ₅ ŋɨ₃ caun₂ tei₄ jmo₃ ꞌua₁ dsɨ́₅ quianꞌ₅₄ rɨinꞌ₅₄, tsá₃ ꞌnióꞌ₅ jmo₃ juaꞌ₅₄ a₂ŋɨ́₄ lë₃ ꞌɨ́n₅ dsɨ́₅ cu₄.
4 ꞌNióꞌ₅ ŋi₅ ꞌa₂ liaꞌ₂ jŋiai₃ dsa₂ dsi₂néi₂ quióꞌ₅, ꞌa₂ liaꞌ₂ co₂jéinꞌ₂ chiꞌ₂ quiáin₅ ia₁jaun₂ bá₄ jme₂go₃ chiꞌ₂ quiáin₅ ne₄ ca₂le₃jë́₃.
5 Ia₁ në₁juaꞌ₂ tsá₃ ŋi₅ ꞌa₂ liaꞌ₂ jŋiai₃ dsa₂ dsi₂néi₂ quióꞌ₅ në́₃, ¿ꞌa₂ bá₄ liaꞌ₂ lé₂ le₃jmo₃ ꞌí₁ guáꞌ₅ quián₅ Diú₄?
6 Tsá₃ ꞌnióꞌ₅ cán₂ ne₄ juɨ₅ quióꞌ₅ guáꞌ₅ jan₂ i₂të₂ca₂rë₃ꞌén₂. Ia₁ conꞌ₂ tsá₃ ŋó₅ në₁juaꞌ₂ ꞌŋio₅ ca₂jmo₃ róin₂, tiáinꞌ₃ juɨ₁liaꞌ₂ ca₂tánꞌ₂ i₂së₃dsen₃.
7 Ján₃ bá₄ ꞌnióꞌ₅ ꞌei₅ jág₁ dse₃ quióꞌ₅ jɨn₄ dsa₂ i₂tsá₃ ꞌén₂, ia₁ conꞌ₂ tsá₃ ŋó₅ në₁ca₂táinꞌ₂ jág₁ liaꞌ₂ chain₂, a₂tiáinꞌ₂ tsɨ₁cágꞌ₅ quióꞌ₅ i₂së₃dsen₃ në́₃.
ꞌA₂ liaꞌ₂ ꞌnióꞌ₅ jmo₃ dsa₂ i₂jme₂ꞌo₅₄ quián₅ guáꞌ₅
8 Le₂në₅ bá₄ ján₃, ꞌnióꞌ₅ jmo₃ dsa₂ i₂jme₂ꞌo₅₄a quián₅ guáꞌ₅, ꞌnióꞌ₅ lén₂ dsa₂ i₂ꞌen₅₄ dsɨ́₅ ján₃, i₂quian₅ caun₂ juɨ₅ dse₃. Tsá₃ ꞌnióꞌ₅ lén₂ dsa₂ i₂lë₁qui₂co₅ jág₁ quióꞌ₅, on₃ guëꞌ₂ ꞌnióꞌ₅ i₃nioi₅₄ ꞌein₅, tsá₃ ꞌnióꞌ₅ jmo₃ ꞌɨ́n₅ dsɨ́₅ juaꞌ₅₄ a₂lë₁ꞌnio₃ líꞌ₂ cu₄ quióꞌ₅ dsa₂.
9 ꞌNióꞌ₅ jmo₃ ꞌí₁ jág₁ dse₃ a₂rë₂ꞌma₄ quióꞌ₅ Diú₄ a₂ꞌéin₂ jniog₄, a₂le₁jë́₃ të₂dsɨ́₅.
10 ꞌNióꞌ₅ con₂ deꞌ₂ dsa₂ ꞌí₁ quióꞌ₅ ca₂le₃jɨ́n₃ conꞌ₂ dsa₂ i₂lén₂ i₂jme₃ꞌo₅₄ në₁juaꞌ₂ ꞌa₂ liaꞌ₂ lɨ́in₅. Në₁juaꞌ₂ tsá₃ ꞌe₂ rɨin₂, jaun₂ guë́₄ dsi₂ten₅₄ léin₂ dsa₂ i₂jme₂ꞌo₅₄a quián₅ guáꞌ₅.
11 Juɨ₁liaꞌ₂ dsa₂ mɨ́₂ guëꞌ₂ në́₃, ján₃ bá₄ le₂jaun₂ ꞌnióꞌ₅ liꞌ₅₄ quióꞌ₅, tsá₃ ꞌnióꞌ₅ a₂lë₁bógꞌ₂ dso₄. ꞌNióꞌ₅ ꞌen₅₄ dsɨ́₅ léin₂, rë₂tiꞌ₅₄ jë₄ ca₂le₃jë́₃ në́₃.
12 I₂jme₂ꞌo₅₄ quián₅ guáꞌ₅a ꞌnióꞌ₅ jmo₃ ján₃, jan₂ bá₄ ꞌio₅₄ quiáin₅ i₂rë₂jenꞌ₂ gu₂ quiáinꞌ₅₄. Jaun₂ ꞌnióꞌ₅ ŋi₅ ꞌa₂ liaꞌ₂ co₂jéinꞌ₂ conꞌ₂ dsi₂ten₅₄ chiꞌ₂ quiáin₅, quianꞌ₅₄ dsa₂ dsi₂néi₂ quióꞌ₅ në́₃.
13 Ia₁ juɨ₁liaꞌ₂ dsa₂ i₂jme₂ꞌo₅₄b i₂rë₂tiꞌ₅₄ dse₃ ta₁ quióꞌ₅ a₂lɨ́in₅, líꞌ₄ a₂ꞌag₃ dsa₂ dse₃ quióꞌ₅, tonꞌ₂ ján₃ guëꞌ₂ caun₂ guë́₄ ꞌag₃ dsɨ́₅ a₂dsia₃ ꞌa₂ liaꞌ₂ ꞌéin₂ të₂le₃ quióꞌ₅ Cristo Jesús.
Le₂la₂ lë́₅ jág₁ quióꞌ₅ Diú₄ a₂ꞌéin₂ jniog₄
14 ꞌƗ́n₂ dsɨ₃ jniá₂ nei₅₄ ŋiꞌ₅₄ ta₁ i₁jɨng₁₂ ꞌne₂. La₁ néꞌ₃ a₂dsióg₄, jmo₂₃ si₂ la₂,
15 ia₁jaun₂ në₁juaꞌ₂ ca₂rë₃ꞌɨng₅₄, le₃ŋiꞌ₅₄ bá₄ ꞌa₂ liaꞌ₂ ca₂tɨ́n₂ i₃nio₄ dsa₂ dsi₂néi₂ quióꞌ₅ Diú₄, i₂lɨ́n₅ guáꞌ₅ quián₅ Diú₄ jénꞌ₃, co₂ꞌnióꞌ₄ ꞌuɨg₅₄ ꞌiaꞌ₂, ꞌma₂dsɨ₅ në́₃, quióꞌ₅ jág₁ tí₅.
16 Dsónꞌ₂ bá₄ juëꞌ₂ juáꞌ₅ a₂ꞌéin₂ jniog₄, a₂jme₁rë₂ꞌma₄ le₂jŋiá₅:
Ca₂guan₃ Diú₄ chi₁dsain₂;
ca₂jme₃jniog₅ Jme₂dsí₂ a₂lɨ́in₅ i₂dsen₃;
ca₂jág₂ ángeles;
ca₂rë₃ꞌë́₂ jág₁, ca₂ꞌag₃ dsa₂ jɨn₄ dsɨ₂nau₂;
ca₂rë₃ꞌén₂ dsa₂ mɨ₂güɨ́g₃ jág₁ quióꞌ₅;
ca₂guéiꞌ₂ táng₃ Jmei₂ gueiꞌ₅₄ i₂juɨ́g₃ në́₃.