Cuë₂₃ jág₁ dsau₅ ꞌa₂ liaꞌ₂ chi₃lénꞌ₂ dsa₂ Diú₄
2
Jë₁le₂ꞌuɨg₅₄, chi₁quian₅₄ jniá₂ jmɨg₄ a₂mɨ́ꞌ₁ ꞌniaꞌ₂ ne₄ Diú₄, a₂chi₁leinꞌ₅₄ ꞌniaꞌ₂, a₂cuëꞌ₅₄ ꞌniaꞌ₂ ti₁ꞌmagꞌ₄ në́₃, o₄quióꞌ₄ ca₂le₃jɨ́n₃ dsa₂,
2 o₄quióꞌ₄ juɨ₁liaꞌ₂ rag₅₄, o₄quióꞌ₄ ca₂le₃jɨ́n₃ juɨ₁liaꞌ₂ dsɨ₂tan₅₄, ia₁jaun₂ bá₄ lé₂ le₃ꞌio₄ jniog₄ ꞌei₅ tei₄ tsá₃ mɨꞌ₅₄ cha₂, ia₁jaun₂ chong₂ jniog₄ conꞌ₂ dsi₂ten₅₄, le₁jë́₃ jme₂dsí₂ quián₂ ne₄ ca₂le₃jë́₃, le₃ne₄ Diú₄.
3 Ia₁ le₂në₅ bá₄ dse₃, ꞌŋio₂ dsɨ́₅ Diú₄ quián₂ jniog₄ i₂lió₂,
4 i₂ꞌnio₃ lión₂ ca₂le₃jɨ́n₃ dsa₂, tonꞌ₂ ꞌnio₃ a₂dsi₁léin₂ ja₁le₃ŋɨ́ꞌ₂ dsɨ́₅ jág₁ tí₅.
5 Jan₂ bá₄ Diú₄ chan₂, tonꞌ₂ jan₂ bá₄ dsa₂ chan₂ i₂ŋág₅ jág₁, i₂chénꞌ₅ jë₄ quióꞌ₅ Diú₄ quianꞌ₅₄ dsa₂ mɨ₂güɨ́g₃. Dsa₂ ꞌéi₂ lɨ́n₅ Cristo Jesús.a
6 ꞌÉi₂ në́₃ ca₂jɨ́inꞌ₂ ꞌŋiog₅ ca₂quí₃ ꞌliaꞌ₅₄ ia₁jaun₂ lión₂ ca₂le₃jɨ́n₃ dsa₂. Jág₁ dsau₅ në₅ në́₃, ca₂rë₃ŋi₅ dsa₂ jme₁ca₂të́₂ jmɨg₄ a₂le₃ŋi₅.
7 Ta₁ jaun₂ ca₂rë₃ꞌɨ́n₁ jniá₂ ia₁jaun₂ léng₂ jan₂ i₂ꞌë́₂ jág₁, jan₂ i₂chen₄* quián₅ Jesús në́₃, jan₂ të₅ i₂jme₂tɨn₅ dsɨ₂nau₂ juɨ₁liaꞌ₂ ꞌa₂ liaꞌ₂ lë́₅ a₂ꞌén₂ dsa₂, ꞌa₂ liaꞌ₂ lë́₅ jág₁ tí₅ në́₃. Jág₁ dsau₅ bá₄ a₂juáꞌ₅,b tsá₃ të₂jɨ́ng₁.
8 Jaun₂ ꞌnio₃ jniá₂ a₂chi₃lénꞌ₂ dsa₂ Diú₄ ca₂le₂con₂, a₂qui₃chógꞌ₃ gu₂ qui₂le₁jë́₃ të₂dsɨ́₅, on₃juaꞌ₅₄ a₂ꞌi₄ ꞌnei₂ dsɨ́₅, on₃ guëꞌ₂ a₂qui₂tsɨin₂₃ quianꞌ₅₄ rɨinꞌ₅₄.
9 ꞌIo₅₄ guëꞌ₂ në́₃ ꞌnióꞌ₅ quɨ́ꞌ₃ tsɨnꞌ₅₄ conꞌ₂ dsi₂ten₅₄, dse₃ jniá₂, liꞌ₅₄ quióꞌ₅. Juɨ₁jmoiꞌ₅₄ a₂rë₂lɨin₅₄, on₃juaꞌ₅₄ quianꞌ₅₄ a₂ŋɨ́₄ lë₃ jláꞌ₁ qui₂rë₂lag₄ dsi₅₄, on₃ guëꞌ₂ quianꞌ₅₄ cu₄nióg₄, on₃ guëꞌ₂ quianꞌ₅₄ mɨ́g₂ perlas a₂tóꞌ₅ lag₅₄, on₃ guëꞌ₂ quianꞌ₅₄ tsɨnꞌ₅₄ ꞌmuꞌ₅₄ në́₃;
10 të₂le₃ quianꞌ₅₄ a₂dse₃ a₂qui₂jmo₂₃ bá₄ ꞌnióꞌ₅ jmóiꞌ₂, juɨ₁liaꞌ₂ ca₂tɨ́n₂ jmo₃ dsa₂ mɨ́₂ i₂ma₂jɨ́nꞌ₂ ja₁con₂ Diú₄.
11 Dse₃ bá₄ tónꞌ₃ ꞌio₅₄ tei₄, nag₃, gue₃ jág₁ quióꞌ₅ Diú₄ a₂jme₂tag₅ dsa₂, a₂caun₂ neiꞌ₅₄ jë₄ ca₂le₃jë́₃.
12 Tsá₃ cuë₅ jniá₂ jmɨg₄ juaꞌ₅₄ a₂jme₃tag₅ ꞌio₅₄, on₃ guëꞌ₂ juaꞌ₅₄ jmo₃ ꞌéiꞌ₃ ja₁con₂ dsa₂ ŋeꞌ₂. Jŋiaꞌ₅₄ liaꞌ₂ ꞌnióꞌ₅ jmo₃ tei₄ bá₄.
13 Ia₁ Adán bá₄ i₂le₂ꞌuɨg₅₄ ca₂jmóꞌ₂ Diú₄; cang₂ bá₄ ca₂jmóiꞌ₂ Eva.
14 Jaun₂ on₃juaꞌ₅₄ Adán i₂ca₂rë₃gán₃; ꞌio₅₄ bá₄ i₂ca₂rë₃gán₃ jaun₂ ca₂táinꞌ₂ dso₄.
15 La₁ia₁, lión₂ bá₄ ꞌio₅₄ në₁juaꞌ₂ jme₂cainꞌ₅₄ chiꞌ₂-guein₂ quiáin₅, chi₂juaꞌ₂ caun₂ ꞌéin₂ jág₁ quióꞌ₅ Diú₄, caun₂ ꞌnioi₃ rɨinꞌ₅₄, caun₂ chain₂ le₁jë́₃ jme₂dsí₂ quióꞌ₅, a₂liꞌ₅₄ quióꞌ₅ në́₃.