Chi₁lenꞌ₄ ꞌniaꞌ₂ Diú₄ o₄quián₂ jniaꞌ₅₄
3
Jë₁ca₂tóꞌ₂ rɨnꞌ₅₄ jniog₄, chi₁lenꞌ₄ ꞌniaꞌ₂ Diú₄ o₄quián₂ jniaꞌ₅₄, ia₁jaun₂ ma₂në₃ cónꞌ₅ dsióg₄ jág₁ dse₃ quióꞌ₅ Te₁guiꞌ₅₄ ca₂le₃jë́₃ juɨg₂. Juɨ₁gue₅₄ bá₄ dsa₂ ꞌŋio₂ dsɨ́₅ juɨ₁jme₂juëꞌ₂ bá₄ dsa₂ jág₁ la₂ juɨ₁liaꞌ₂ ca₂lë₃ quianꞌ₅₄ ꞌniaꞌ₂.
2 Mɨ₄ ꞌniaꞌ₂ o₄quián₂ jniaꞌ₅₄ ján₃, ia₁jaun₂ lió₂ jniaꞌ₅₄ o₄gú₃ dsa₂ ꞌlɨnꞌ₅₄ i₂jmógꞌ₂ mɨꞌ₅₄, ia₁ tsá₃ ꞌén₂ ca₂le₃jɨ́n₃.
3 La₁ tí₅ bá₄ jág₁ quióꞌ₅ Te₁guiꞌ₅₄ quiánꞌ₂ ꞌniaꞌ₂. Jmo₃ bá₄ ꞌag₃ caun₂ ꞌauꞌ₂ ꞌniaꞌ₂ qui₂jmo₃ ꞌí₁, ia₁jaun₂ tsá₃ jmógꞌ₂ i₂së₃dsen₃.
4 Caun₂ bá₄ ꞌei₅ dsɨ₅ jniaꞌ₅₄ të₂le₃ quióꞌ₅ Te₁quiꞌ₅₄, a₂jmoꞌ₂ tonꞌ₂ a₂jmóꞌ₂ ꞌniaꞌ₂ në́₃, ca₂le₃jë́₃ ꞌe₂ a₂ma₂juaꞌ₂ jniaꞌ₅₄ jmóꞌ₂ ꞌniaꞌ₂.
5 Juɨ₁jiog₅₄ bá₄ Te₁guiꞌ₅₄ të₂ꞌauꞌ₂ ꞌniaꞌ₂ ja₁ꞌnio₃ Diú₄, ja₁jme₁juɨnꞌ₂ ꞌniaꞌ₂ ꞌauꞌ₂ juɨ₁liaꞌ₂ juɨnꞌ₂ dsɨ́₅ Cristo në́₃.
Ca₂tɨ́n₂ bá₄ dsa₂ jmo₃ ta₁
6 Rɨnꞌ₅₄ jniog₄, cuë₂ jniaꞌ₅₄ ꞌéiꞌ₃ të₂le₃ o₄quióꞌ₄ Te₁guiꞌ₅₄ Jesucristo, jmo₄ ꞌniaꞌ₄ cau₅ juɨ₁ꞌein₂ guë́₃ rɨnꞌ₅₄ jniog₄ juɨ́nꞌ₅ jmo₃ ta₁ on₃ guëꞌ₂ jmo₂₃ conꞌ₂ lë́₅ a₂ca₂jme₁tɨn₅ jniaꞌ₅₄ ꞌniaꞌ₂.
7 Jaun₂ ŋiꞌ₅₄ bá₄ ꞌniaꞌ₂ ꞌa₂ liaꞌ₂ ꞌnióꞌ₅ tiángꞌ₄ a₂jmóꞌ₂ conꞌ₂ lë́₅ ꞌa₂ liaꞌ₂ chong₂ jniaꞌ₅₄. Tsá₃ juaꞌ₅₄ a₂tsá₃ ca₂jmó₁ jniaꞌ₅₄ ta₁ të₁liaꞌ₂ ca₂tióꞌ₄ quianꞌ₅₄ ꞌniaꞌ₂,
8 on₃ guëꞌ₂ juaꞌ₅₄ ca₂que₅₄ jniaꞌ₅₄ a₂lë₁ca₂que₅₄ quióꞌ₅ rɨnꞌ₅₄, juaꞌ₅₄ tsá₃ ca₂qui₅₄. Të₂le₃ qui₂ca₂jmó₁ bá₄ jniaꞌ₅₄ ta₁ ꞌŋio₅ lɨn₃ liaꞌ₂ ꞌuë₂-jmɨ₂ ia₁jaun₂ tsá₃ cánꞌ₁ ꞌniaꞌ₂ guei₂ o₄quián₂ jniaꞌ₅₄.
9 On₃juaꞌ₅₄ ia₁ a₂tsá₃ ca₂tág₂ jniaꞌ₅₄; a₂jŋiaꞌ₅₄ liaꞌ₂ ca₂quián₁ jniaꞌ₅₄ caun₂ juɨ₅ ne₄ ꞌniaꞌ₂, ia₁jaun₂ ꞌniaꞌ₂ në́₃ cánꞌ₁ juɨ₅ jaun₂ a₂ca₂quián₁ jniaꞌ₅₄.
10 Ia₁ liaꞌ₂ conꞌ₂ jme₁tioꞌ₅₄ jniaꞌ₅₄ quianꞌ₅₄ ꞌniaꞌ₂, ca₂cuë́₁ ꞌéiꞌ₃ la₂: Juɨ₁liaꞌ₂ dsa₂ i₂juɨ́nꞌ₅ jmo₃ ta₁, tsá₃ juɨ₁guë́ꞌ₄.
11 Ma₂ne₄ jniaꞌ₅₄ dsia₅ dsa₂ tság₅ jniaꞌ₅₄, chan₂ ꞌniaꞌ₂ i₂lɨn₅₄ tiánꞌ₅ tsá₃ ta₁ ꞌnio₃ jmo₃, ꞌŋio₅ bá₄ tsá₃ jɨin₅₄ qui₂tiáin₂ ja₁tsá₃ ca₂tɨ́in₂.
12 Jaun₂ dsa₂ ꞌéi₂ në́₃ chei₂ jniaꞌ₅₄ le₃quióꞌ₅ Te₁guiꞌ₅₄ Jesucristo quián₂, juɨ₁jmo₁₂ ta₁ quióꞌ₅ ia₁jaun₂ cha₂ a₂qui₂dsɨ₃ŋɨ́i₂.
13 Rɨnꞌ₅₄ jniog₄, tsá₃ jmo₂ ꞌniaꞌ₂ a₂ca₂ꞌongꞌ₃ jmoꞌ₂ cosa dse₃.
14 Chi₂juaꞌ₂ chan₂ i₂tsá₃ tónꞌ₂ juɨ₅ a₂juaꞌ₂ jniaꞌ₅₄ ne₄ si₂ la₂, jag₄ ꞌniaꞌ₂ ꞌein₂ ꞌéi₂ jaun₂ tsá₃ ma₃jme₁quiainꞌ₅₄ ꞌniaꞌ₂, ia₁jaun₂ le₃guiꞌ₅₄.
15 La₁ tsá₃ jme₁ꞌŋiaiꞌ₅₄ ꞌniaꞌ₂, të₂le₃ cuëꞌ₅₄ tioinꞌ₂ ꞌniaꞌ₂ jág₁ dse₃ co₂ꞌnióꞌ₄ rɨ́ngꞌ₂.
Juɨ₁jme₂guꞌ₅₄ bá₄ Diú₄: Jág₁ jë₁ca₂tóꞌ₂ quióꞌ₅ Pa₄
16 ꞌŊiog₅ Te₁guiꞌ₅₄ i₂jmo₅ ꞌag₅ tei₄ dsɨ́₅ dsa₂, juɨ₁jmo₁₂ le₁ꞌág₄ tei₄ ꞌauꞌ₂ ꞌniaꞌ₂ quianꞌ₅₄ ca₂le₃jë́₃ a₂jmoꞌ₂ ꞌniaꞌ₂. Juɨ₁ꞌen₅₄ bá₄ Diú₄ quianꞌ₅₄ ca₂le₃jɨ́nꞌ₃ ꞌniaꞌ₂.
17 Jniá₂ Pa₄ jmo₂₃ si₂ la₂ quianꞌ₅₄ gu₃a cuɨ́ng₅ Diú₄ ꞌniaꞌ₂, co₂ꞌnióꞌ₄ léi₄ a₂tóꞌ₅ jniá₂ ne₄ ca₂le₃jë́₃ si₂ a₂jmo₂₃. Le₂la₂ lë́₅ letra quió₃.
18 Juɨ₁jme₂guꞌ₅₄ Te₁guiꞌ₅₄ Jesucristo quián₂ jniog₄ ca₂le₃jɨ́nꞌ₃ ꞌniaꞌ₂.
Co₂në₅.