Le₃jniá₂ jan₂ dsa₂ i₂tsá₃ ꞌe₂ ꞌéiꞌ₃ góꞌ₅
2
Jaun₂ në́₃, ꞌniaꞌ₂ rɨnꞌ₅₄ jniog₄, juɨ₁liaꞌ₂ jë₁ma₂të́₂ rë₂guanꞌ₂ Te₁guiꞌ₅₄ Jesucristo, jë₁ma₂të́₂ rë₁tióꞌ₄ loꞌ₂ quiainꞌ₅₄, mɨ₂ jniaꞌ₅₄ chei₂ ꞌniaꞌ₂, rɨnꞌ₅₄ jniog₄,
2 a₂tsá₃ caun₂ lë₁jme₁tsɨ́n₄ ꞌniaꞌ₂ a₂dsɨ₃jiog₅ ꞌauꞌ₂ le₂siáꞌ₂, on₃ guëꞌ₂ can₂ ꞌniaꞌ₂ go₂ꞌi₃, në₁ꞌe₂ guë́₃ jág₁ a₂já₅ të₂le₃ quianꞌ₅₄ jan₂ jme₂dsí₂, on₃ guëꞌ₂ jág₁ a₂dsia₅ dsa₂, on₃ guëꞌ₂ në₁ꞌe₂ si₂ carta a₂chen₅ dsa₂ neꞌ₅₄ ꞌniaꞌ₂ në₂jag₄ bá₄ a₂jmo₂ jniaꞌ₅₄, jë₁juáꞌ₂ dsa₂ a₂ma₂ca₂të́₂a jmɨg₄ quióꞌ₅ Te₁guiꞌ₅₄.
3 Tsá₃ lë₁cuɨ́n₅ ꞌniaꞌ₂ jmɨg₄ a₂jme₃gau₅ dsa₂. Ia₁ néꞌ₃ a₂te₅₄ jmɨg₄ jaun₂, jmo₃ dsa₂ caun₂ jág₁ a₂jme₃ꞌŋiai₅₄ Diú₄, jaun₂ le₃jniá₂ jan₂ dsa₂ i₂tsá₃ ꞌe₂ ꞌéiꞌ₃ góꞌ₅ ꞌi₁caun₂, i₂ma₂ꞌi₄ ꞌéiꞌ₃ dsɨ₃ꞌén₂.
4 Dsa₂ ꞌéi₂ náu₃ quein₅ ne₄ ca₂le₃jë́₃ a₂jmo₅ dsa₂ dsɨ́₅ lɨ́n₅ Diú₄, o₃ a₂jme₂juagꞌ₂ dsa₂ ꞌe₂. Ca₂liaꞌ₂ dsióg₄ guá₃ të₂ dsi₂néi₂ guáꞌ₅ templo* quióꞌ₅ Diú₄, a₂jmo₂₃ lɨ́in₅ Diú₄.
5 ¿Tsa₁ dsá₂ ꞌauꞌ₂ ꞌniaꞌ₂, liaꞌ₂ conꞌ₂ jme₁ꞌeng₅₄ guë́₄ quianꞌ₅₄ ꞌniaꞌ₂, ca₂juáꞌ₃ jniá₂ le₃jë́₃ a₂në₅?
6 Jaun₂ në́₃ ma₂ŋiꞌ₅₄ bá₄ ꞌniaꞌ₂ ꞌein₂ ꞌéi₂ i₂jné₅ juɨ₅, jaun₂ tsá₃ jme₃jniog₂₃ jŋiá₅ néꞌ₃ a₂të₅₄ jmɨg₄ quióꞌ₅.
7 La₁ tion₅₄ bá₄ ma₂jmo₅ i₂ꞌlɨnꞌ₅₄ ꞌéi₂ bí₂ rë₂ꞌma₄ quióꞌ₅ ia₁jaun₂ tsá₃ le₃jiꞌ₅₄ dsa₂ ꞌéiꞌ₃ quióꞌ₅ Diú₄. Jŋiaꞌ₅₄ liaꞌ₂ chi₁jŋia₂₃ a₂jŋiaꞌ₃ i₂chénꞌ₅ dsi₂jo₂ i₂jmo₅ jnág₅ juɨ₅.
8 Jaun₂ guë́₄ jme₃jnia₅ dsa₂ ꞌlɨnꞌ₅₄ ꞌéi₂. Jaun₂ Te₁guiꞌ₅₄ Jesús në́₃ jŋagꞌ₃ quianꞌ₅₄ dsí₂ tioꞌ₅₄ ꞌo₅₄, ꞌéin₂ ꞌéi₂ quianꞌ₅₄ a₂co₂tág₅ co₂ꞌnéꞌ₅ quióꞌ₅ në́₃ jë₁jŋióiꞌ₂.
9 Satanás bá₄ jmo₃ jiá₃ dsa₂ ꞌlɨnꞌ₅₄ ꞌéi₂, ia₁ guáin₂ ján₃ quian₅ bí₂ a₂o₂dsain₂ jmo₃ léi₄ juëꞌ₂ jme₃gau₂₃.
10 Ca₂le₃jë́₃ ne₅₄ cosa ꞌlɨgꞌ₅₄ jmo₃ a₂jme₃gain₂₃ dsa₂ i₂tionꞌ₅₄ juɨ₅ dsɨ₃ꞌén₂ ia₁ tsá₃ guëꞌ₂ ca₂rë₃ꞌnio₃ gue₃ jág₁ tí₅ dsónꞌ₂ a₂jme₁lió₂.
11 Jaun₂ bá₄ lë₃ cuë₃ Diú₄ jmɨg₄ a₂le₃gain₂, ia₁jaun₂ juɨ₁le₂ꞌéin₂ co₂ŋeiꞌ₅₄ jág₁ të₂jág₁,
12 ia₁jaun₂ ꞌë́₂ Diú₄ uɨg₅ quióꞌ₅ ca₂le₃jɨ́in₃ ia₁ tsá₃ guëꞌ₂ ca₂rë₃ꞌéin₂ jág₁ tí₅ dsónꞌ₂, ia₁ ja₂lɨn₃ guë́₄ të₅ dsɨ́₅ cosa ꞌlɨgꞌ₅₄.
Dsa₂ i₂ma₂quionꞌ₅₄ quián₅ Diú₄
13 La₁ jniaꞌ₅₄ në́₃, ca₂le₃jë́₃ jmɨg₄ bá₄ cuë₂ ti₁ꞌmagꞌ₄ Diú₄ o₄quiánꞌ₂ ꞌniaꞌ₂, rɨnꞌ₅₄ jniog₄, i₂ꞌnió₄ quián₅ Te₁guiꞌ₅₄. Jaun₂ lë₃ liaꞌ₂ conꞌ₂ jme₁ca₂rë₃lióg₃ jmɨg₄ bá₄ ca₂quiónꞌ₂ Diú₄ ꞌniaꞌ₂ ia₁jaun₂ tɨ́nꞌ₄ ꞌniaꞌ₂, lénꞌ₂ ꞌniaꞌ₂ dsa₂ i₂le₁jë́₃ të₂dsɨ́₅ të₂le₃ quianꞌ₅₄ Jme₂dsí₂ quián₅ Diú₄, të₂le₃ quianꞌ₅₄ jág₁ dsau₅ a₂ma₂ꞌénꞌ₂ ꞌniaꞌ₂ në́₃.
14 Ta₁ jaun₂ ca₂të₃ Diú₄ ꞌniaꞌ₂ të₂le₃ quianꞌ₅₄ jág₁ dse₃ a₂ca₂jme₁tag₅ jniaꞌ₅₄, ia₁jaun₂ dsi₁nóꞌ₅ ꞌniaꞌ₂ quenꞌ₅₄ quiangꞌ₅₄ a₂jláꞌ₁ a₂lɨ́n₅ Te₁guiꞌ₅₄ Jesucristo quián₂ jniog₄.
15 Jaun₂ le₂në₅, rɨnꞌ₅₄ jniog₄, caun₂ ꞌéi₂ ꞌniaꞌ₂ ꞌauꞌ₂, chanꞌ₂ tiá₂ jág₁, tsá₃ juɨ₁dsi₂ꞌén₂ ꞌauꞌ₂ ꞌniaꞌ₂ jág₁ a₂qui₂ma₂cuë́₁ jniaꞌ₅₄, liaꞌ₂ jág₁ quianꞌ₅₄ si₂ cartas në́₃.
16 Jaun₂ ꞌŋiog₅ Te₁guiꞌ₅₄ Jesucristo quianꞌ₅₄ Diú₄ Jmei₂ jniog₄, i₂ma₂jmo₃ ꞌua₁ dsɨ́₅ ꞌnio₃ jniog₄, cuë₂₃ liánꞌ₂ co₂tan₅₄, cuë₂₃ a₂ꞌɨ́n₂ dsɨ₅ jniog₄ tágꞌ₄ në́₃,
17 juɨ₁cuë́ꞌ₄ bí₂ të₂ꞌauꞌ₂ ꞌniaꞌ₂ ia₁jaun₂ caun₂ bá₄ ꞌag₃ ꞌauꞌ₂ ꞌniaꞌ₂, jë₁dsiáꞌ₁ jág₁, jë₁jmóꞌ₂ ꞌniaꞌ₂ ca₂le₃jë́₃ ne₅₄ a₂dse₃.