5
La₁ tsá₃ tion₅₄ juaꞌ₅₄ a₂juáꞌ₄ jniá₂ tóꞌ₄ ne₄ si₂ ꞌe₂ ꞌióꞌ₄ ꞌe₂ jmɨg₄ a₂lé₂ jaun₂.
2 Jaun₂ ma₂le₁ŋiꞌ₅₄ bá₄ ꞌniaꞌ₂ dse₃ guiongꞌ₅₄, jmɨg₄ a₂jŋióꞌ₂ Te₁guiꞌ₅₄ conꞌ₂ tsá₃ ján₅ bá₄ dsa₂, juɨ₁liaꞌ₂ ja₁já₄ jan₂ dsa₂ ꞌang₂ caun₂ ꞌuë₂.
3 Jë₁ma₂të́₂ rë₁juáꞌ₂ dsa₂: “Ca₂le₃jë́₃ lë́₅ ꞌí₁, tei₄ bá₄ ꞌei₅”, të₃jë₄ jaun₂ ꞌén₂ conꞌ₂ tiá₂ ne₄ quióꞌ₅ dsa₂ ꞌéi₂. Lé₂ juɨ₁liaꞌ₂ ja₁jénꞌ₅ ꞌio₅₄ i₂quian₅ guein₂. Conꞌ₂ tsá₃ rë₂jáin₁ jë₁ma₂táꞌ₂ quɨꞌ₂ uɨg₅ quióꞌ₅, tsá₃ a₁jaun₂ a₂lióin₂ juaꞌ₅₄ a₂tsá₃ ŋág₃ jmɨ₁uɨg₅ jaun₂.
4 La₁ ꞌniaꞌ₂ rɨnꞌ₅₄ jniog₄, tsá₃ tionꞌ₅₄ ꞌniaꞌ₂ jë₄ qui₁néꞌ₃, jaun₂ tsá₃ lë́₅ juaꞌ₅₄ jo₅₄ jmɨg₄ jaun₂ quiánꞌ₂ ꞌniaꞌ₂, juɨ₁liaꞌ₂ ja₁jo₅ jan₂ ꞌang₂.
5 Ia₁ ca₂le₃jɨ́nꞌ₃ bá₄ ꞌniaꞌ₂ lɨ́ngꞌ₅ jaun₅ quián₅ ja₁tág₅ si₂, quianꞌ₅₄ a₂jmɨ₂ në́₃. Tsá₃ téi₅ jniog₄ a₂ꞌuë₂, on₃ guëꞌ₂ jë₄ qui₁néꞌ₃.
6 Jaun₂ tsá₃ ꞌnióꞌ₅ guág₃ jniog₄ juɨ₁liaꞌ₂ güɨn₂ i₂lɨn₅₄. Le₁jnio₂ ne₄ bá₄ jniog₄ ꞌnióꞌ₅ jmó₁, lei₅₄, ꞌen₅₄ dsɨ₅.
7 A₂ꞌuë₂ bá₄ güɨn₂ dsa₂, ján₃ guëꞌ₂ a₂ꞌuë₂ bá₄ ꞌɨ́nꞌ₂ dsa₂ ꞌen₅.
8 La₁ jniog₄ në́₃, i₂téi₅ a₂jmɨ₂, ꞌnióꞌ₅ lei₅₄, ꞌen₅₄ dsɨ₅. ꞌNióꞌ₅ qui₁jmó₁ ꞌí₁ quianꞌ₅₄ a₂ꞌéin₂ quianꞌ₅₄ a₂jme₁ꞌnió₄ rɨnꞌ₅₄ në́₃, në₂jag₄ bá₄ qui₂rë₂lióg₃ ŋí₁ le₁dsɨ₅, lë́₅ ꞌí₁; a₂ꞌɨ́n₂ dsɨ₅ jniog₄ a₂tágꞌ₄ në́₃, lë́₅ co₂ꞌnióꞌ₄ ŋí₁ a₂ꞌi₄ mɨ₂dsi₄ ꞌlióg₂, lë́₅ ꞌí₁.
9 Ia₁ on₃juaꞌ₅₄ jaun₂ ca₂ꞌag₃ Diú₄ a₂guéi₁ jniog₄ ꞌnei₂ a₂ꞌi₄ dsɨ́₅; a₂jaun₂ bá₄ ca₂ꞌag₃ a₂lió₂ jniog₄ të₂le₃ quianꞌ₅₄ Te₁guiꞌ₅₄ Jesucristo quián₂.
10 O₄quián₂ jniog₄ ca₂join₃ ia₁jaun₂ dsɨ₁ꞌio₁ co₂lë₅ quiainꞌ₅₄, të₁liaꞌ₂ chong₂, o₃ jë₁ma₂dsau₃ ꞌe₂.a
11 Jaun₂ caun₂ dsia₄ ꞌniaꞌ₂ tiá₂ ꞌauꞌ₂, cuëꞌ₅₄ bí₂ rɨ́ngꞌ₂ le₂jangꞌ₂ le₂jangꞌ₂, juɨ₁liaꞌ₂ ma₂jmoꞌ₂ në₅.
Tonꞌ₂ Pablo jág₁ dsa₂ rɨinꞌ₅₄
12 Rɨnꞌ₅₄ jniog₄, mɨ₂ jniaꞌ₅₄ a₂jme₁gangꞌ₃ dsa₂ i₂jmo₅ ta₁ jë₄ quiánꞌ₂ ꞌniaꞌ₂, i₂jiog₅ ne₄ juɨ₅ le₃quióꞌ₅ Te₁guiꞌ₅₄, i₂toꞌ₂ jág₁ dse₃ në́₃.
13 Ca₂tɨ́nꞌ₂ ꞌniaꞌ₂ jme₁gainꞌ₃ ꞌŋio₅ lɨn₃, a₂jme₁ꞌniói₄ në́₃, o₄quióꞌ₄ ta₁ a₂jmo₂₃. Juɨ₁ꞌei₅ bá₄ tei₄ tionꞌ₅₄ ꞌniaꞌ₂ le₂jangꞌ₂ le₂jangꞌ₂.
14 Ján₃ guëꞌ₂ le₂jaun₂ rɨnꞌ₅₄ jniog₄, jén₃ ꞌniaꞌ₂ dsa₂ i₂tsá₃ ta₁ ꞌnio₃ jmo₃. Cuëꞌ₅₄ ꞌniaꞌ₂ bí₂ dsa₂ i₂tsá₃ lɨn₄ niog₅ tiá₂ dsɨ́₅, jme₁ꞌon₁ ꞌniaꞌ₂ dsa₂ ꞌuan₅₄, jme₁juɨnꞌ₂ ꞌniaꞌ₂ ꞌauꞌ₂ quianꞌ₅₄ ca₂le₃jɨ́n₃ rɨ́ngꞌ₂.
15 Jmo₄ ꞌniaꞌ₂ ꞌí₁, ia₁jaun₂ ꞌi₁jan₂ tsá₃ jéinꞌ₃ ꞌlɨgꞌ₅₄ quióꞌ₅ i₂jmógꞌ₂ ꞌlɨgꞌ₅₄. Të₂le₃ caun₂ o₂nóꞌ₅ bá₄ ꞌniaꞌ₂ jmo₄ a₂dse₃ co₂tan₅₄ quianꞌ₅₄ rɨ́nꞌ₂ ꞌniaꞌ₂ le₂jangꞌ₂ le₂jangꞌ₂ quianꞌ₅₄ guë́₄ ca₂le₃jɨ́n₃ dsa₂.
16 Tiánꞌ₂ bá₄ ꞌniaꞌ₂ ꞌioꞌ₂ jéngꞌ₂ co₂tan₅₄.
17 Chi₂lenꞌ₅₄ ꞌniaꞌ₂ Diú₄ liaꞌ₂ tsá₃ ꞌna₂.
18 Cuëꞌ₅₄ ꞌniaꞌ₂ ti₁ꞌmagꞌ₄ Diú₄ ne₄ ca₂le₃jë́₃, ia₁ a₂në₅ bá₄ ꞌŋio₂ dsɨ́₅ Diú₄ të₂le₃ quiánꞌ₂ ꞌniaꞌ₂ o₄quióꞌ₄ Cristo Jesús.
19 Tsá₃ lë₁ag₂ ꞌniaꞌ₂ si₂ quióꞌ₅ Jme₂dsí₂ Jŋió₅.
20 Në₁juaꞌ₂ ꞌein₂ ꞌë́₂ jág₁ a₂guéiꞌ₅ quióꞌ₅ Diú₄, tsá₃ lë₁jmo₂ ꞌniaꞌ₂ juaꞌ₅₄ a₂tsá₃ jengꞌ₅₄.
21 Quion₂ deꞌ₂ ꞌniaꞌ₂ ꞌí₁ ca₂le₃jë́₃ a₂në₅, jaun₂ chanꞌ₂ bá₄ ꞌniaꞌ₂ jmáꞌ₃ a₂dse₃.
22 Co₂dsia₅ jmo₄ ꞌniaꞌ₂ cau₅ ca₂le₃jë́₃ ne₅₄ a₂ꞌlɨgꞌ₅₄.
23 ꞌŊiog₅ Diú₄ i₂jmo₅ ꞌei₅ tei₄, juɨ₁jmo₁₂ a₂lénꞌ₂ ꞌniaꞌ₂ dsa₂ jŋió₅ co₂ŋeiꞌ₅₄; juɨ₁le₅₄ bá₄ ꞌí₁ ꞌniaꞌ₂, ta₁jangꞌ₂: liaꞌ₂ jme₂dsí₂, liaꞌ₂ ꞌauꞌ₂, liaꞌ₂ ŋɨꞌ₄ ꞌniaꞌ₂; ia₁jaun₂ tsá₃ ꞌein₂ lé₂ le₃bógꞌ₂ dso₄ jë₁ma₂të́₂ rë₁guanꞌ₂ Te₁guiꞌ₅₄ Jesucristo quián₂.
24 I₂ma₂të₃ quiánꞌ₂ ꞌniaꞌ₂ tí₅ bá₄ jág₁ quióꞌ₅, jaun₂ jme₃ti₃ bá₄ ca₂le₃jë́₃ a₂në₅.
ꞌÁgꞌ₅ jág₁ jë₁ca₂tóꞌ₂
25 Rɨnꞌ₅₄ jniog₄, chi₁lenꞌ₄ ꞌniaꞌ₂ Diú₄ o₄quián₂ jniaꞌ₅₄.
26 Cuɨn₅₄ Diú₄ ca₂le₃jɨ́n₃ rɨnꞌ₅₄ a₂qui₁chénꞌ₁b ꞌniaꞌ₂ quióꞌ₅ rɨ́ngꞌ₂, a₂lë́₅ léi₄ a₂ma₂ꞌei₅ caun₂ jág₁ a₂le₁jë́₃ ꞌauꞌ₂ quianꞌ₅₄ rɨ́ngꞌ₂.
27 Mɨ₅ jniá₂, liaꞌ₂ conꞌ₂ lë́₅ ꞌéiꞌ₃ quióꞌ₅ Te₁guiꞌ₅₄, ꞌí₂ ꞌniaꞌ₂ si₂ carta la₂ jɨn₄ ca₂le₃jɨ́n₃ rɨnꞌ₅₄.
28 Juɨ₁jme₂guꞌ₅₄ Te₁guiꞌ₅₄ Jesucristo quián₂ jniog₄ ca₂le₃jɨ́nꞌ₃ ꞌniaꞌ₂.
Co₂në₅.