ꞌA₂ liaꞌ₂ dsi₂ten₅₄ le₃chan₂ dsa₂ conꞌ₂ ꞌŋio₂ dsɨ́₅ Diú₄
4
Në₃ në́₃ rɨnꞌ₅₄ jniog₄, mɨ₂ jniaꞌ₅₄ neꞌ₅₄ ꞌniaꞌ₂ të₂le₃ o₄quióꞌ₄ Te₁guiꞌ₅₄ Jesús, a₂i₁nioꞌ₄ ꞌniaꞌ₂ liaꞌ₂ conꞌ₂ ꞌŋio₂ dsɨ́₅ Diú₄, juɨ₁liaꞌ₂ ca₂jme₁tag₅ jniaꞌ₅₄. Le₂jaun₂ caun₂ jmo₄ ꞌniaꞌ₂ ca₂le₃jë́₃ jmɨg₄.
2 Ŋiꞌ₅₄ bá₄ ꞌniaꞌ₂ ꞌa₂ liaꞌ₂ lë́₅ jág₁ ca₂jme₁tag₅ jniaꞌ₅₄, ꞌéiꞌ₃ ca₂cuë₃ Te₁guiꞌ₅₄ Jesús.
3 A₂ꞌnio₃ Diú₄ a₂i₁nioꞌ₄ ꞌniaꞌ₂ lɨ́ngꞌ₅ dsa₂ i₂ma₂lë́₅ ꞌí₁ ca₂ne₅₄ i₂ma₂quiáin₅ ꞌŋiog₅; ꞌi₁jan₂ tsá₃ ꞌein₂ juɨ₁nióꞌ₄ jág₁ a₂tsá₃ dsi₂ten₅₄ nióꞌ₃.
4 Juɨ₁le₂ŋiꞌ₅₄ ꞌniaꞌ₂ le₂jangꞌ₂ le₂jangꞌ₂ ꞌa₂ liaꞌ₂ tiángꞌ₄ quiangꞌ₅₄ dsa₂ mɨ́₂ quiángꞌ₂, lë́₅ ꞌí₁, jme₁gainꞌ₃ ꞌniaꞌ₂.a
5 On₃juaꞌ₅₄ a₂lë₁qui₂dsɨ₂jein₅ ꞌauꞌ₂ ꞌniaꞌ₂ ꞌlɨgꞌ₅₄ juɨ₁liaꞌ₂ jmo₅ dsɨ₂nau₂ i₂tsá₃ Diú₄ cuɨn₅.
6 Jaun₂ ꞌi₁jan₂ tsá₃ ꞌein₂ juɨ₁qui₂dsɨ₂juɨn₅₄ juaꞌ₅₄ jme₃gain₂₃ rɨinꞌ₅₄, quianꞌ₅₄ ꞌi₁caun₂. Ia₁ Te₁guiꞌ₅₄ bá₄ jéinꞌ₃ uɨg₅ ca₂le₃jë́₃ a₂le₂në₅, juɨ₁liaꞌ₂ ma₂chei₅₄ jniaꞌ₅₄ ꞌniaꞌ₂ le₂jŋiá₅.
7 Ia₁ on₃juaꞌ₅₄ jaun₂ ma₂të₅ Diú₄ a₂qui₂dsɨ₂jiog₅ dsɨ₅ ꞌlɨgꞌ₅₄; a₂jaun₂ bá₄ ca₂të₃ a₂le₃chong₂ jniog₄ jŋió₅.
8 Jaun₂ le₂në₅, juɨ₁liaꞌ₂ i₂tsá₃ gue₅ jág₁ a₂jme₂tág₁ jniaꞌ₅₄ la₂, on₃juaꞌ₅₄ dsa₂ tsá₃ guein₂₃; Diú₄ bá₄ tsá₃ guein₂₃, i₂ma₂cuɨn₃ Jme₂dsí₂ Jŋió₅ quiáin₅.
9 Tsá₃ ꞌe₂ tion₅₄ ꞌnióꞌ₅ juaꞌ₅₄ a₂juáꞌ₄ jniá₂ tóꞌ₄ ne₄ si₂ la₂, juaꞌ₅₄ a₂juáꞌ₄ jniá₂ ꞌa₂ liaꞌ₂ dsi₂ten₅₄ jme₁ꞌnióꞌ₄ ꞌniaꞌ₂ dsa₂ i₂ꞌén₂ rɨ́ngꞌ₂. Ia₁ ma₂ca₂jme₃tag₅ bá₄ Diú₄ ꞌŋiog₅ ꞌa₂ liaꞌ₂ jme₁ꞌnióꞌ₃ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂.
10 Jaun₂ le₂në₅ bá₄ jmoꞌ₂ ꞌniaꞌ₂ ja₁con₂ rɨ́nꞌ₂ ꞌniaꞌ₂ i₂ꞌén₂ i₂tiánꞌ₅ ꞌuë₃ Macedonia. La₁ mɨ₂ jniaꞌ₅₄ ja₁conꞌ₂ ꞌniaꞌ₂, rɨnꞌ₅₄ jniog₄, caun₂ juɨ₁dsi₂tsón₃ bá₄ a₂ꞌniógꞌ₃ ꞌniaꞌ₂ rɨ́ngꞌ₂.
11 Quenꞌ₂ ꞌniaꞌ₂ bí₂ tiánꞌ₂ ꞌniaꞌ₂ ꞌei₅ tei₄, jmo₄ ꞌniaꞌ₂ jmáꞌ₃ conꞌ₂ a₂ca₂tɨ́nꞌ₂ ꞌniaꞌ₂ jmóꞌ₂ guiongꞌ₅₄, jmo₄ ꞌniaꞌ₂ ta₁ quiángꞌ₂ quianꞌ₅₄ gogꞌ₂-tagꞌ₅₄, juɨ₁liaꞌ₂ qui₂ma₂juaꞌ₅₄ jniaꞌ₅₄ le₂jŋiá₅,
12 ia₁jaun₂ i₁nioꞌ₄ ꞌniaꞌ₂ caun₂ juɨ₅ a₂jme₃go₃ dsa₂ siánꞌ₂ i₂tsá₃ ꞌén₂, ia₁jaun₂ tsá₃ lë́₅ juaꞌ₅₄ cha₂ a₂ꞌnióꞌ₅ quiánꞌ₂ ꞌniaꞌ₂.
A₂jŋióꞌ₂ Te₁guiꞌ₅₄
13 Rɨnꞌ₅₄ jniog₄, tsá₃ ꞌniog₂ jniaꞌ₅₄ juaꞌ₅₄ tsá₃ ŋiꞌ₅₄ ꞌniaꞌ₂ ꞌe₂ lé₂ quianꞌ₅₄ dsa₂ ꞌén₂ i₂ma₂dsan₃, ia₁jaun₂ tsá₃ jmóꞌ₂ ꞌniaꞌ₂ ꞌliaꞌ₂ ꞌauꞌ₂ juɨ₁liaꞌ₂ ꞌliaꞌ₂ dsɨ́₅ dsa₂ i₂tsá₃ jmɨg₄ cha₂ quióꞌ₅ juaꞌ₅₄ tɨ́inꞌ₄.
14 Jaun₂ le₂në₅, juɨ₁liaꞌ₂ ꞌéin₂ jniog₄ a₂ca₂jon₃ Jesús, a₂ca₂jeinꞌ₅₄ táng₃ në́₃, le₂jaun₂ bá₄ ꞌéin₂ jniog₄ ján₃ a₂jme₃jenꞌ₅₄ Diú₄ co₂lë₅ quianꞌ₅₄ Jesús dsa₂ i₂ca₂dsan₃ i₂ꞌén₂ le₃quióꞌ₅.
15 Jaun₂ lë₃ chei₂ jniaꞌ₅₄ ꞌniaꞌ₂ juɨ₁liaꞌ₂ ca₂jme₃tag₅ Te₁guiꞌ₅₄, conꞌ₂ jniog₄ i₂chong₂ ca₂liaꞌ₂ ca₂të́₂ jmɨg₄ a₂guanꞌ₂ Te₁guiꞌ₅₄, ꞌi₁jan₂ tsá₃ ꞌein₂ juaꞌ₅₄ i₂dsɨ₃jŋiá₄ conꞌ₂ guë́₄ dsa₂ i₂ma₂dsan₃.
16 Ia₁ ꞌŋiog₅ bá₄ Te₁guiꞌ₅₄ sióin₃ gueiꞌ₅₄ i₂juɨ́g₃ guióꞌ₃ tiá₂ jmo₃ ꞌéiꞌ₃, quianꞌ₅₄ jág₁ quióꞌ₅ ángel i₂ꞌuanꞌ₂ guë́₄, dsɨ₃ꞌein₅₄ ŋí₁ trompeta quióꞌ₅ Diú₄ në́₃. Jaun₂ guë́₄ ca₂le₃jɨ́n₃ dsa₂ i₂ꞌén₂ le₃quióꞌ₅ Cristo i₂ma₂dsan₃, qui₃jeinꞌ₅₄ le₂ꞌuɨg₅₄.
17 Jaun₂ jniog₄ i₂chong₂ guë́₄, i₂të₁ꞌŋiá₄ guë́₄ në́₃, chóꞌ₂ co₂lë₅ jë₄ jnei₅ quianꞌ₅₄ dsa₂ i₂ma₂dsan₃ ꞌéi₂, a₂dsɨ₂jme₁jenꞌ₂ Te₁guiꞌ₅₄ gueiꞌ₅₄ dsi₁guɨg₂. Jaun₂ le₂në₅ dsɨ₁tióꞌ₄ co₂tan₅₄ quianꞌ₅₄ Te₁guiꞌ₅₄.
18 Jaun₂ lë₃, cuë₅₄ ꞌniaꞌ₂ liánꞌ₂ rɨ́ngꞌ₂ quianꞌ₅₄ jág₁ la₂.