2 Caun₂ chi₂lenꞌ₄ ꞌniaꞌ₂ Diú₄ a₂léi₄ rë₂jnio₄ neꞌ₅₄ ꞌniaꞌ₂, cuëꞌ₅₄ ti₁ꞌmagꞌ₄.

3 Mɨ₄ ꞌniaꞌ₂ ne₄ Diú₄ o₄quián₂ jniaꞌ₅₄ ján₃, ia₁jaun₂ bá₄ cuë₃ Te₁guiꞌ₅₄ juɨ₅ rë₂na₄ jniaꞌ₅₄ ia₁jaun₂ lé₂ le₃qui₁ꞌë́₄ jág₁ dse₃ a₂qui₁chei₅₄ jniaꞌ₅₄ dsa₂ jág₁ a₂rë₂ꞌma₄ quióꞌ₅ Cristo; ꞌuɨg₅₄ jág₁ në₅ bá₄ ꞌeng₅₄ rë₂jnɨ́g₅.

4 Chi₂lenꞌ₄ ꞌniaꞌ₂ Diú₄ ia₁jaun₂ lé₂ le₃ꞌë́₄ liaꞌ₂ qui₂rë₂jiá₃ jág₁ liaꞌ₂ conꞌ₂ dsi₂ten₅₄ jmo₅₄.

5 Tiánꞌ₂ ꞌniaꞌ₂ ꞌen₅₄ ꞌauꞌ₂ jmo₄ quianꞌ₅₄ juɨ₁liaꞌ₂ dsa₂ i₂tsá₃ ꞌén₂, ꞌŋioꞌ₄ ꞌniaꞌ₂ jmo₄ a₂dse₃ jë₁cuɨn₅ jmɨg₄.

6 Jág₁ a₂dsiaꞌ₂ ꞌniaꞌ₂ co₂tan₅₄ bá₄ ca₂tɨ́nꞌ₂ ꞌniaꞌ₂ dsiáꞌ₁ a₂ꞌua₁ ꞌauꞌ₂, jág₁ a₂ꞌŋio₂ dsɨ₅ a₂ja₂ mɨ₂juɨg₂. Ca₂tɨ́nꞌ₂ ꞌniaꞌ₂ ján₃ le₃ŋiꞌ₅₄ ꞌa₂ liaꞌ₂ qui₁jeinꞌ₄ jág₁ ja₁con₂ le₂jan₂ le₂jan₂ dsa₂.

7 Tíquico rɨnꞌ₅₄ jniog₄ i₂ꞌnióg₃ guë́₄ lɨn₃, i₂ma₂já₅ jme₂ꞌo₅₄ qui₂rë₂tiꞌ₅₄, jme₂ti₃ quianꞌ₅₄ jniá₂ ne₄ Te₁guiꞌ₅₄, ꞌéi₂ bá₄ dsia₃ ca₂le₃jë́₃ ꞌa₂ liaꞌ₂ lë́₅ chang₂.

8 ꞌUɨg₅₄ jaun₂ tsɨ́in₂ jniá₂ ja₁conꞌ₂ ꞌniaꞌ₂ ia₁jaun₂ dsia₃ ꞌa₂ liaꞌ₂ chong₂ jniaꞌ₅₄ ja₁lá₃, tonꞌ₂ ia₁jaun₂ cuë́ꞌ₃ ꞌniaꞌ₂ liánꞌ₂;

9 quiainꞌ₅₄ Onésimo në́₃, jan₂ rɨnꞌ₅₄ jniog₄ i₂rë₂tiꞌ₅₄, i₂lɨ́n₅ jan₂ i₂quianꞌ₄ ꞌniaꞌ₂: i₂në₅ bá₄ dsia₃ ca₂le₃jë́₃ ꞌe₂ niog₅ lë́₂ ja₁lá₃.

10 Aristarco, i₂quiongꞌ₅₄ jniá₂ néꞌ₃ má₃, dsiáinꞌ₂ jág₁ a₂cuɨin₂₃ Diú₄ ꞌniaꞌ₂, ján₃ bá₄ le₂jaun₂ Marcos, i₂lɨ́n₅ chiꞌ₂ rɨnꞌ₅₄^a Bernabé. Të₂le₃ quióꞌ₅ Marcos ꞌéi₂ në́₃, ma₂gueꞌ₅₄ bá₄ ꞌniaꞌ₂ jág₁ ꞌa₂ liaꞌ₂ jmóꞌ₂; në₁juaꞌ₂ ca₂dsióg₃ dsi₁jɨin₁₂ ꞌniaꞌ₂, guein₅₄ bá₄ ꞌniaꞌ₂ dse₃.

11 Ján₃ bá₄ cuag₅ Diú₄ i₂chen₂ Jesús i₂të́ꞌ₂ dsa₂ Justo ján₃. Jŋiaꞌ₅₄ liaꞌ₂ i₂në₅ bá₄ lɨ́n₅ i₂ún₂ tan₅₄ i₂rë₂uɨng₄* quióꞌ₅, i₂jmo₅ ta₁ quianꞌ₅₄ jniá₂ o₄quióꞌ₄ ja₁gon₂ Diú₄, i₂ma₂ja₂lén₂ jmo₅ liánꞌ₂ dsɨ₃.

12 Epafras në́₃ jan₂ i₂lɨ́n₅ rɨ́nꞌ₂ ꞌniaꞌ₂, dsiáinꞌ₂ jág₁ a₂cuɨin₂₃ Diú₄ ꞌniaꞌ₂, jan₂ rɨnꞌ₅₄ i₂jme₂ti₃ ne₄ Cristo Jesús. Co₂tan₅₄ bá₄ chi₂lénꞌ₂ ꞌéi₂ Diú₄ ꞌŋio₅ lɨn₃ o₄quiánꞌ₂ ꞌniaꞌ₂, ia₁jaun₂ tónꞌ₂ ꞌniaꞌ₂ rë₂ꞌŋiagꞌ₅, ꞌei₅ caun₂ jág₁ ꞌniaꞌ₂ jë₄ ca₂le₃jë́₃ ꞌa₂ liaꞌ₂ ꞌŋio₂ dsɨ́₅ Diú₄.

13 Lé₂ jángꞌ₄ jniá₂ jág₁ dsau₅ ꞌa₂ liaꞌ₂ ma₂já₅ ꞌéi₂ dsan₂ dsɨ́₅ ꞌniaꞌ₂, ján₃ bá₄ le₂jaun₂ o₄quióꞌ₄ i₂tiánꞌ₅ juɨg₂ Laodicea quianꞌ₅₄ guëꞌ₂ i₂tiánꞌ₅ Hierápolis ján₃.

14 Lucas, i₂lɨ́n₅ të₅mɨ́₅ i₂ꞌnió₄ guë́₄ lɨn₃, cuɨin₂₃ Diú₄ ꞌniaꞌ₂; ján₃ guëꞌ₂ le₂jaun₂ i₂të́ꞌ₂ Demas.

15 Cuɨn₅₄ ꞌniaꞌ₂ Diú₄ rɨnꞌ₅₄ i₂tiánꞌ₅ juɨg₂ Laodicea. Cuɨn₅₄ ꞌniaꞌ₂ Diú₄ ján₃ ꞌio₅₄ Ninfas, quianꞌ₅₄ co₂nióꞌ₃ guáꞌ₅ i₂ŋɨꞌ₂ dsi₂néi₂ quióꞌ₅ në́₃.

16 Jë₁ma₂ca₂ꞌíꞌ₂ ꞌniaꞌ₂ si₂ la₂ jë₄ quiánꞌ₂ ꞌniaꞌ₂, jaun₂ tsɨngꞌ₅₄ ꞌniaꞌ₂ guáꞌ₅ chan₂ Laodicea ia₁jaun₂ ꞌɨ₃ táng₃ rɨnꞌ₅₄ jniog₄ ja₁jaun₂; tonꞌ₂ ján₃ guëꞌ₂ ꞌí₂ ꞌniaꞌ₂ si₂ a₂ca₂dsióg₃ ne₄ i₂chan₂ Laodicea.

17 A₂la₂ cheiꞌ₅₄ Arquipo: “Tionꞌ₂ ꞌne₂ juɨ₅ ta₁ a₂ma₂gueꞌ₅₄ a₂ma₂dsia₃ Te₁guiꞌ₅₄ gogꞌ₂, a₂jme₁tiꞌ₄ rë₂.”

18 Jniá₂ Pa₄, cuɨ́ng₅ Diú₄ ꞌniaꞌ₂ quianꞌ₅₄ letra quió₃ ꞌŋió₃.^b Juɨ₁dsiogꞌ₂ bá₄ ꞌauꞌ₂ ꞌniaꞌ₂ a₂ꞌeng₅₄ rë₂jnɨ́g₅. Juɨ₁jme₂guꞌ₅₄ bá₄ Diú₄ ꞌniaꞌ₂.